uYoohani 15
15
UYeesu ali inza impensya ilya nalyoli
1Pe uYeesu ahajendeelela kuvhasambiilizya avhasundikwa vhaakwe kuuti, “Ine indi inza ikwi ilya impensya ilya nalyoli, uTaata waane ali inza umulimi. 2Ulusamba lwonti lwe luli muli ine lwe lutakuhoma amantonongwa, uTaata akuludiba. Ileelo ulusamba lwe lukuhoma amantonongwa, uTaata akulupalulila, inga luhomaje ahinza. 3Imwe mupaluliliilwe, kwe kuuti mwe vhazelu, mwe pe muzyitisile insambiilizyo zyane. 4Mujendeelele kuvha pooka niine, niine kwe njendeelele kuvha pooka niimwe. Inza vwe ulusamba lutangaahoma amantonongwa lweka ishisita kuvha mwi impensya, niimwe mutangavhomba zye zikumuhondezya uMulungu ishisita kuvha muhati yaane.
5“Ine indi inza ikwi ilya impensya, imwe mwe nsamba. Umuntu wonti we akuvha muhati yaane, niine nkuvha muhati yaakwe, uyo we akuhoma amantonongwa aminji, mwe pe ishisita ine mutangavhomba naashimo. 6Umuntu wonti we atali muhati yaane, alisumbwa panzi inza vwe ulusamba lukusumbwa nu kwuma. Pe avhantu vhakulusevha nu kulusumba mu mwoto lukupwa. 7Inga mwavha muhati yaane na mazwi gaane gavha muhati zyinyu, pe mulaavhaje kwa Taata shonti she mukwanza, woope aliivhapa. 8Inga mukuhoma amantonongwa aminji, nu kuvha mwe vhasundikwa vhaane avha nalyoli, kwe mulolesyaje apazelu uvhushindamu uvhwa Taata waane. 9Inza vwe uTaata ankunzite ine, vwe niine mbakunzite imwe. Ishi pe mujendeelele kuvha mu shikunzi shaane. 10Inga mukuzilandata indajizyo zyane, pe kwe mujendeelele kuvha mu shikunzi shaane, inza vwe niine nkuzilandata indajizyo izya Taata waane nu kuvha mu shikunzi shaakwe.
11“Navhavhuuzya zyonti izyo, inga muvhe nu luseshelo inza ine, havhili museshelaje nkaani. 12Ululajizyo lwane kuli imwe lwa kuuti, mukundanaje inza vwe niine mbakunzite imwe. 13Ataliipo umuntu we ali ni shikunzi ishipiti kuluusya ishikunzi isha muntu we akwitiha kufwa kuzya vhamanyani vhaakwe. 14Inga mukuvhomba zye mbalajiziizye, kwe muvhe mwe vhamanyani vhaane. 15Kwandila ishi, te mbiitaje havhili kuuti mwe vhazya vhaane, mwe pe umuzya atakumanya zye umwene waakwe akuvhomba. Ileelo imwe kwe mbiitaje kuuti mwe vhamanyani vhaane, mwe pe navhamanyisya zyonti zye nivuuye kufuma kwa Taata waane. 16Te mwemwe mwánsavhuuye ine, ine ne návhasavhuuye imwe kuvha mwe vhasundikwa vhaane. Návhasavhuuye, inga mupaapaje amantonongwa ge gatakusila naalumo. Pe zyonti zye mukumulaavha uTaata uMulungu kwi izina lyane, aliivhapa. 17Ishi nkuvhalajizya imwe kuuti, mukundanaje.”
Avhantu avha mu nsi vhakuvhaviitilwa vhe vhakumwitiha uYeesu
18UYeesu ahajendeelela kuvhavhuuzya avhasundikwa vhaakwe ahati, “Inga avhantu avha mu nsi umu vhakuvhaviitilwa imwe, mukumbuhaje kuuti vhátalisile kumviitilwa ine. 19Inga mwaamile mwe vhantu avha mu nsi umu, nkandi vhavhakunzite inza vwe vhavhakunzite avhantu vhaakwe. Ileelo imwe te mwe vha mu nsi umu, mwe pe mbasavhuuye kufuma mu nsi umu, ye nongwa avhantu avha mu nsi umu vhakuvhaviitilwa. 20Mukumbuhaje zye návhavhuziizye kuuti, ‘Umuzya te mupiti kuluusya umwene waakwe.’ Inga vhánjimvwizye ine, pe niimwe vhalivhayimvwa. Havhili inga vhakuzyitiha insambiilizyo zyane, pe ni zyinyu vhalizyitiha. 21Ileelo vhalivhavhombela zyonti izyo, mwe pe mukulilandata izina lyane, havhili, mwe pe vhatamumanyile we ansonteleziizye. 22Inga ntínzile nu kuyanga navho, nkandi vhatali nu vhutalamalandu. Ileelo ishi vhatangayiyanjila kuuti vhatali nu vhutalamalandu. 23Umuntu wonti we akumviitilwa ine, akumuviitilwa nu Taata waane. 24Mbomvile imbombo impiti zye umuntu inga wooka atahavhomba. Inga apele vhatazilolaje, nkandi vhatali nu vhutalamalandu. Ileelo ishi vhazivhwenyi zyonti zye mbomvile, ileelo poosye vhwevhulo vhali she vhakumviitilwa ine nu Taata waane. 25Izi zivhombesile, inga amazwi ge gasimviilwe mu Vhusimbe uVhufinjile galunjishe, mwe pe yisimviilwe kuuti, ‘Vhámuvitiliilwe vhweleele.’#15:25 iZabuuli 35:19; 69:4
26“Nkumutuma uMutuuli we wu Mupepo uMufinjile uwa kuvhalolesya avhantu vhonti uvhwanalyoli. Akufuma kwa Taata, havhili lwe aafiha kuli imwe, alivhahomeshezya uvhwanalyoli vhwane. 27Havhili, niimwe mulivhahomeshezyaga avhantu avhanji, mwe pe muli pooka niine kufuma ku vhwandilo.”
Селектирано:
uYoohani 15: nih
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2021 Wycliffe Bible Translators, Inc.