uYoohani 16
16
1UYeesu ahajendeelela kuyanga na vhasundikwa vhaakwe ahati, “Navhavhuuzya zyonti izi, inga mutahaaleshe kuniitiha. 2Yeenya, vhalivhashimbizyaga imwe mu masinagoogi. Havhili, ahavhaliilizyo hakwinza he inga umuntu amugoga wumo muli imwe, alisiivhaga kuuti akuvhomba mbombo ya Mulungu. 3Vhalivhavhombelaga vhwevhulo, mwe pe vhatamumanyile uTaata, havhili niine vhweleele vhatamanyile. 4Ishi navhavhuuzya izyo, inga lwe ahavhaliilizyo haavho aha kuvhomba izyo haafiha, mukumbushe zye nkuvhavhuuzya. Ntávhavhuziizye zyonti izyo kufuma ku vhwandilo, mwe pe náamile pooka niimwe.”
Imbombo iya Mupepo uMufinjile
5“Ishi nkusogola kwa Taata we ansonteleziizye kuli imwe. Ileelo nuumo muli imwe we akumbuziilizya kuuti, ‘Vhuli, wasogola kwoshi?’ 6Ileelo mwaswimiililwa nkaani, mwe pe navhavhuuzya nati nkusogola kwa Taata. 7Nkuvhavhuuzya zya nalyoli kuuti, lilonka kuli imwe kuuti nsogole kwa Taata, mwe pe inga ntasogola uMutuuli te ayinze kuli imwe. Ileelo inga nasogola, kwe imutume kuli imwe. 8Lwe uMutuuli uyo ayinza, alivhalolesyaga avhantu avha mu nsi kuuti vhatalamalandu, nu kuuti ine ne mugolosu, havhili nu kuuti uMulungu aliyinza kuvhalonga. 9Alivhalolesyaga kuuti vhatalamalandu, mwe pe vhatakuniitiha ine. 10Alivhalolesyaga kuuti ne mugolosu, mwe pe nkusogola kwa Taata, havhili te muhandole. 11Alivhalolesyaga kuuti uMulungu alivhalonga, mwe pe amulonzile uSeetano we mupiti wa vhatalamalandu mu nsi.
12“Indi she indi nazyo inyinji izya kuvhavhuuzya, ileelo ahavhaliilizyo iha mutangazijimbiilila. 13UMupepo uyo we alivhalolesya uvhwanalyoli, lwe ayinza kuli imwe, alivhalongola kuvhulandata uvhwanalyoli vhwonti. Te ahayangaje ku maha gaakwe wuuyo, aliyangaga zye azyivwa nu kuvhavhuuzya zye zilifumila. 14Uweene alilolesyaga uvhushindamu vhwane, mwe pe alivhavhuzyaga zye aposheela kuli ine. 15Ivintu vwonti vwe uTaata ali navwo vwane. Ye nongwa nkuvhavhuuzya kuuti, uMupepo uyo alivhavhuzyaga zye aposheela kuli ine.”
Uvhuswimiilizu vhuligalunkana kuvha luseshelo
16UYeesu ahajendeelela kuvhavhuuzya avhasundikwa vhaakwe ahati, “Hasyaye ahavhaliilizyo hansi te mundole, havhili hasyaye ahavhaliilizyo hansi kwe mundole.”
17Pe avhasundikwa vhaakwe vhamo vhahavhuzilizanya vhuuvho vheeka vhahati, “Vhuli, kwe kuuti vhuli izi zye akuyanga akuti, ‘Hasyaye ahavhaliilizyo hansi te mundole, havhili hasyaye ahavhaliilizyo hansi kwe mundole,’ nu kuuti, ‘Nkusogola kwa Taata’?” 18Vhahajendeelela kuvhuzilizanya vhahati, “Vhuli, kwe kuuti vhuli, kuuti, ‘Ahavhaliilizyo hansi’? Iswe tutakumanyinsanya zye akuyanga.”
19UYeesu ahamanya kuuti vhakwanza kumuvhuziilizya zye ayanga, pe ahavhavhuziilizya ahati, “Vhuli, mukuvhuzilizanya zye nayanga kuuti, ‘Hasyaye ahavhaliilizyo hansi te mundole, havhili hasyaye ahavhaliilizyo hansi kwe mundole’? 20Nalyoli nkuvhavhuuzya kuuti, imwe kwe mukuute nu kuloosya, ileelo avhantu avha mu nsi umu kwe vhaseshele. Kwe muswimiililwe ahavhaliilizyo hansi, ileelo uvhuswimiilizu vhwinyu kwe vhugalunkane kuvha luseshelo. 21Inga umwantanda akupaapa, akuvha nu vhuswimiilizu, mwe pe ahavhaliilizyo aha vhuvhaavi hakuvha haafiha. Ileelo inga apaapa, atakukumbuha havhili uvhuvhaavi uvhwo, mwe pe akuvha nu luseshelo ulwa kupaapwa umwana mu nsi. 22Vhwevhulo, niimwe muli nu vhuswimiilizu ahavhaliilizyo iha, ileelo kwe ninze havhili kuli imwe, pe kwe muvhe nu luseshelo mu mooyo giinyu. Ataliipo we aliyeefwa uluseshelo ulwo mu mooyo giinyu. 23Havhili lwe ahavhaliilizyo iho haafiha, te muhandaavhe naashimo. Nalyoli nkuvhavhuuzya kuuti, zyonti zye mukumulaavha uTaata uMulungu kwi izina lyane, aliivhapa. 24Kufishila ishi mutalaavile naashimo kwi izina lyane. Mumulaavhaje uMulungu, pe woope kwe avhapanje. Kwi idala ilyo, kwe mujendeelele kuvha nu luseshelo nkaani mu mooyo giinyu.”
UYeesu agapoosite amaha amavhiivhi aga mu nsi
25UYeesu havhili ahati, “Navhavhuuzya zyonti izi ku viholanyo. Ileelo ahavhaliilizyo hakwinza he te nkayangaje niimwe havhili ku viholanyo, ndivhavhuzyaga apazelu izya Taata. 26Ahavhaliilizyo iho, mulilaavhaga kwi izina lyane. Ntakuti ine ndivhalavhilaga kwa Taata. 27Yeenyi, uTaata uMulungu avhakunzite imwe, mwe pe niimwe munkunzite ine, havhili mwitisile kuuti náfumile ku kwakwe. 28Nínzile mu nsi kufuma kwa Taata, havhili ishi nkwepa mu nsi, nkusogola kwa Taata.”
29Pe avhasundikwa vhaakwe vhahamuvhuuzya vhahati, “We Musambiilizi, ishi wanda kuyanga niiswe apazelu ishisita iviholanyo! 30Pe ishi, twamanya kuuti iwe umanyile zyonti, havhili utakwanza umuntu kukuvhuziilizya shimo. Izyo zye zikutuvhiiha kwitiha kuuti ufumile kwa Mulungu.” 31UYeesu ahavhavhuziilizya ahati, “Vhuli, mwataliha kwitiha ishi? 32Yeenyi, ahavhaliilizyo hapalamiiye, havhili hali papiipi nkaani, he mwenti kwe musataane. Mwenti kwe musogole ukwinyu nu kundeha neeka. Ileelo ine ntali neeka, mwe pe uTaata ali pooka niine. 33Navhavhuuzya izi, inga muvhe nu vhutehamu, mwe pe muli muhati yaane. Mu nsi umu muli na mayimba, ileelo mugomaje amooyo, mwe pe ine njipoosite insi.”
Селектирано:
uYoohani 16: nih
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2021 Wycliffe Bible Translators, Inc.