Seemthawhnak 35
35
Jakob Bethel ah a Kir
1Pathian ni Jakob hemah, “Hang tho, Bethel ah tat la acunangah omhmun khuar. Na u Esau hemin na zuan lio ih na hemah a langta tu Pathian hemah acunang ahcun pakawh don,” tiah a ti. 2Curuangah Jakob ni a innsang leh amah rum a om mipawl hemah, “Nan lakih a ommi ramdang mepapawl cu zam mianmi u la nanmah cu thianfai tia uh, cun nan partlaipawl thlengtia uh; 3cuhnukah suak u la Bethel ah tat le hu, ka thinhar lioah ka hemih a lang tu leh ka vah taak nakpohah a ma ompi ta tu Pathian hem acunang a’cun pakawh a don taw’ng,” tiah a ti hngai. 4Curuangah an ngeihmi ramdang mepapawl leh an naa parih ommi nathlaihpawl an zate Jakob an pia; culeh Jakob ni Shekhem hrialih khukkhih kung tangah a thup hngai.
5An tah tikah an velkim ih khuapi sung hmawh cu Pathian hemin ṭihṭha ni a tlak hngai ih ahuhman ni an dung in an dawi hngai lo. 6Jakob cu amah rum a om tu mipawl an zate rum Kanaan ram ih a om mi Luz (Bethel tinak) timi a pha, 7culeh acunang ahcun pakawh a don ih, a upa hemin a zuan tikahkhin Pathian ni acunang ahcun a hemih a phuantiak ruangah acui hmun cu El-Bethel#35:7 El-Bethel ti cu Bethel ih Pathian tican. tiah a ko. 8Culeh Rebekah omtu Deborah a thi ih, Bethel khuataw ih khukkhih kung tangah vui a ii. Curuangah acu cu Allon-bakuth#35:8 Allon-bakuth ti cu Ṭahnak Khukkhih kung tican. tiah kawh a ii.
9Jakob cu Paddan-aram in a phat tikah Pathian a hemah a lang ṭhan ih a thluasuah. 10Pathian ni, “Na min hi Jakob a ii; Jakob tiah kawh na i ti thok lo, na min cu Israel a i thok. Curuangah Israel ti’h kawh a ii. 11Pathian ni a hemah, “Kei hi Pathian Zongzatikho cu ka ii: pungzai la tampi karh; na hemin miphun pakhat leh miphunpawl buurpi, cun siangphahrangle an suak thok. 12Abraham leh Isaak hemih ka ṭhen hngaimi ram cu namah ka tan ṭhen thok, cun namah hnukah na ciitlangle ka ṭhen hngai thok,” tiah a ti. 13Cuhnukah Pathian cu Jakob rum an biaktiak nak hmun cun a hang kai. 14Jakob ni an biaktiak nak hmun ahcun palhtiak-lonak lung a ling; culeh a parah tidin raihriik ding a toih, cun thathau a toih. 15Curuangah Jakob ni Pathian rum an biaktiak nak hmun cu Bethel tiah a ko.
Benjamin Suahnak leh Rachel Thihnak
16Cuhnukah Bethel cun an tat ih Efrath in hla nawn ih an om lioah Rachel cu nau hring dingah nausanpiak harngaiin a tuar. 17Nausanpiak harngai a tuar tikah nauhlawmtu ni, “Na thin phang hlah law; icatile atu hi tiapa pace na ngei thok,” tiah a ti. 18A thaw a cah lioah a tiapa cu Ben-oni tiah a kota; a pa ni zong cu Benjamin tiah a ko. 19Curuangah Rachel cu a thi-ih Efrath (Bethlehem tinak) lam ah an vui; 20culeh Jakob ni a thlaan ah palhtiak-lonak lung a ling; acui Rachel thlaan ih lunglin cu nihinni tiang a omkau. 21Israel cu lamtah a peh ih Eder donsang lon a’khin a riahbuuk a sa.
22Israel acui hmunram ih a om lioah Reuben ni a pa ih nusun Bilhah a metpi; culeh Israel ni a za.
Jakob ih tiapale cu hleihnih an ii. 23Leah ih tiapale ah: Reuben (Jakob ih tiapa upa), Simeon, Levi, Judah, Issakhar leh Zebulun. 24Rachel ih tiapale ah: Josef leh Benjamin. 25Rachel ih hemomnu Bilhah ih tiapale ah: Dan leh Naftali. 26Leah ih hemomnu Zilpah ih tiapale ah: Gad leh Asher. Hile hi Jakob Paddan-aram ih a om lioah, a ca-ih hrinmi tiapale an ii.
Isaak Thihnak
27Jakob cu Abraham leh Isaak tluangmi in an omnak Mamre, iklole Kiriath-arba#35:27 Kiriath-arbati cu Hebron tican. timi hmun ih ommi a pa Isaak hem a pha. 28Isaak ih san sung hmawh cu kum 180 a ii. 29Culeh Isaak cu a thaw netatleng a suah; a hraamkha laah kum tlungpi in a thi, a phunpile hemah tum a ii; culeh a tiapale Esau leh Jakob ni an vui.
Селектирано:
Seemthawhnak 35: KHBF
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Khualsim Holy Bible © Bible Society of Myanmar, 2021.