Seemthawhnak 34
34
Dinah an Sualpi
1Leah ni Jakob a hrinmi tianu Dinah cu acui hmun ih numile lum hngai dingin a vaksuak. 2Hiv mi Hamor, Shekhem ih tiapa, acunangih uktubawi, ni a hmuh tikah nam hratin a metpi. 3Culeh a thinlung cu Jakob ih tianu Dinah hem ceu ah a om; lengtianu cu a daw ih awka thlum dendo in a bia. 4Curuangah Shekhem ni a pa Hamor cu, “Hi lengtianu hi nupi dingah ma piit piak,” tiah a ti.
5A tianu Dinah cu Shekhem ni a hnomtamsak ti Jakob ni a za; a tiapale cu lo la ah a sumhnam an khalh ruangah an tlun hlansung cu daitein a om. 6Culeh Shekhem ih pa Hamor cu Jakob thu thluk dingin a pha, 7acu fang ah Jakob ih tiapale cu lo in an tlung. Acu an zak tikah, Shekhem ni Jakob ih tianu a sualpinak thawngin Israel miphun sungih thinsia-awṭha a vua ih acumang cu vuak awk a i lomi a ik ruangah an thinkaang in an heh a har vuai.
8Hamor ni bia hngai in, “Ka tiapa Shekhem ni na tianu a daw vuai; naktiahin a piit dingah pia hram uh. 9Keimi rum nupipumah iknak vua uh; nan tianule man piitsak u la kan tianule pi hngai uh. 10Kanmah rum nan om thok ih khurram cu nan hluh ngah hluahhlo thok; a sungah khuasain sumlet u la ngeinung uh,” tiah a ti. 11Shekhem ni Dinah ih pa leh a ṭapale hemah, “Nan mithmaiṭha tuak hram ning law, cun nan timi poh ka tan pia hngai kau thok. 12Nu man ding leh laksawng cu a saang kho hmawh in ti kau uh, nan dilmi itupoh ka tan pia hngai kau thok; lengtianu belte hi ka nupi dingah ma sen uh,” tiah a ti hngai.
13Shekhem ni an tarnu Dinah a hnomtamsak ruangah Jakob ih tiapale ni Shekhem leh a pa Hamor cu deuthahin thu an let hngai. 14An hemahcun, “Kan tarnu hi phawzim ṭhawhlo mi hemih piak thok timi thil hi cu kan ti kholo, icatile acu cu kan ca’h mualphonak a i thok. 15Kanmah mang nan cang thok ih nan lakih pami poh phawzim ṭhawh an i thok timi thil omdan par ceu ah kan tan natlakpi thok. 16Cutikah kan tianule cu nan piit dingah kan tan pia lei ih, nan tianule khaw piit dingah kan lattia hngai ve lei, cun nan lakah kan om lei ih miphun pakhat ah kan cang lei. 17A man cangngaih thok lo leh phawzim nan ṭhawhtiak lo zong a’cun kan tianu kan lata lei ih kan tat tia kau lei,” tiah an ti.
18An aanka ni Hamor leh Hamor ih tiapa Shekhem ih lung an awisak. 19Culeh tlangvalpa cu Jakob ih tianu parih a lung a hmui ruangah acui thil ti thok cu a nolnawk lo. Ani cu an innsang ah hmaizahmi tleng a ii. 20Curuangah Hamor leh a tiapa Shekhem cu an khua ih khuasuah kotka ahcun an khuamipawl hemah thu simin, 21“Ahi mipawl hi kanmah rum an rualrem vuai; ram sungahhin omin sumleh tia kau u seh, icatile khurram hi anmah daih ding khoin a kaau kovawh. An tianule kan pi lei ih kan tianule kan piitsak hngai ve lei. 22Anmah phawzim ṭhawh an ik mangin kan lakih pami cang phawzim ṭhawh ik ve thok timi thil omdan pakhat par ceu ah kan lakih om ding an naa a tla thok. 23An sumhnam runpawl, an ngeihsiah leh an cawpele cu kanmah ih ta an i thok lo hmen maw? Anmah rum zongbelte lungkimkhat hu la, kan lakah an om kau lei,” tiah an ti. 24Culeh khuasuah kotka ih a tat tupoh ni Hamor leh a tiapa Shekhem ih thu cu an ngai hngai; cun khua sungin kotka ih a tat tu pami poh an zate phawzim ṭhawh an ii.
Dinah ih Ṭale ni an Tarnu ih Phu an lam
25A ni thumnak, an thintiah rih lioah, Dinah ih ṭapale, Simeon leh Levi, Jakob ih tiapale pahnih cu an ralreen lattia in khuapi sungah ahu ih tiahlotein an lut ih pami hmawhhmawh an that hngai. 26Hamor leh a tiapa Shekhem khaw an ralreen in an that, Dinah cu Shekhem ih inn in an thiarta ih an tat mianmi. 27Cun Jakob ih tiapale pace khaw, an tarnu hnomtamsak a ik ruangah thah mipawl an zuanhnawh, cun khua cu an ruam. 28An turunpawl, cawrunpawl, an laakpawl leh, khua sung leh lo sungih ommi itupoh an la hngai. 29An ngeihsiah zate, an naunopawl leh an nupile, inn sungih ommi zate an pon hngai. 30Cutikah Jakob ni Simeon leh Levi cu, “Ram sungih omhlungle—Kanaan mipawl leh Periz mipawl ih mitkemaw ah a ma vuaknak hngai thawngin ka parah harnak nan phatsak hi tang. Kei le minung tlawmte ceu ngei hngai ing, ma ralsanin an ṭankhat leh a ma doh hngai a’cun kei leh ka innsang cu siatsuah kan i thok hekhawh,” tiah a ti hngai. 31Ihmansela anmimi ni, “Kan tarnu cu numizuartia mangih ti thok a i hmen maw?” tiah an ti.
Селектирано:
Seemthawhnak 34: KHBF
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Khualsim Holy Bible © Bible Society of Myanmar, 2021.