Luka Enjil 5
5
Bag. 5.
1Ugros werro Jenisaretn essin garro kute tebingon jema tenna hawalendo anisesan, artina weregi gijirw an. 2Ter uru nalsum kub owi abir koli tebrangon. Karegi aariligon tiddeton belligi tinna tilichigi ashukisan. 3Ter wide kublirton werro toros, Simangi, kubna tirtigi, beddisum abirton kinnekki warianingi. Wide tedder tegos jemachigi kubirton akurkidirsum.
4Weregi bajkiros Simangi wetirsum: „Dolig abidi ju, wide inna tilichigi lufewe karen arama jiradilo.“ 5Siman widegirtirsum: „Wo tirti, ar ugu malegi amarissun. Wekkongon arkomnun. Ama enna wer en togor tiligi bilufundurrin.“ 6Tilichigi lufesan. Wide tole osirw andangad marossan karena digrikaneged. Wide tilichigon aürbijsan. 7Mani wattigi tinna tiwrichi kub owittir dalerigi uwetidirsan, tirgodon targi tolew an. Ingu targi tirgi ine kub owingarigi eyegirrangad kubli kidarro tebsan. 8Ingi Siman Butrus nalos Yesuna osichinai digros wesum: „Annaiton warian, wo tir. Mine ai zol zenbikol erin.“ 9Tekki sarke wer aressum wide tenna tiwrichi malegi, man kare ukkotterna ararked. 10Ikkegon Yagubkon wide Hanagon, Zabadina toni, Simanna sherikanbuli, sarkisan. Yesu wide Simangi wetirsum: „Sarkimen. Elekenton zoligi teran barkandun.“ 11Tir wide abir kub owiged bidargi malegi wakos tekki tebaesan.
12Gir owitti werro neja werro dangon, id barasked eyebul wer Yesugi nalos targi kurtichin dogor ungos tenna koigi aridtir obros beddi wesum: „Wo tirti, er on weriskin, er aigi 13eskergi bigengirin.“ Yesu tenna igi mide kumos wide wesum: „Ai awerisrin. Genan!“ Baras tenna lehdayen teddoton dabossum. 14Yesu wide wetirsum: „Zol wekki wetirmen. Ama ju ennewertigi fegirki amintir. Wide gojir Muse weredagsingi awu enna genkanena jiradilo, tinnai shehadayaninna joro.“ 15Tenna habar desen digrigir belsum. Jemachi digrichi weri deti jamesan gijirranna joro, wide genandanna joro tinna odechirton. 16Ama ter tennewertigi halagir tol osos asalisum.
17Ahan ugrosirton werro akurkidirangon, Farisichi werigon wide sheriagi akurkidili werigon agsan. Tirgon Jelilloton wide Yahudiyena nejachi malerton widegon Urushalimirton tasan. Wide artina gudraged odiligi agengirirsum.
18Wide ogij sowibul wekki angare werdogor injed, akasshan agar wekki tekked torgi tenn owollo uskurarki. 19Torann agarki jemana digrikaneged elmen, kan dogor tekked darirgi habikagi dawlos, tenna angareged shugudi Yesun owollo uskursan.
20Ter tinna imangi uru nalos tekki wetirsum: „Wo zol, enna zenbichi ekki wakebutirran.“ 21Abajiligon Farisichigon tinn achigodon ugudi wesan: „Ni terre in, jedifeka abainil? Ni eske zenbichigi biwakekidin, artig anmenkin?“ 22Yesu tinna damradti iyiros widegir tirgi wetidirsum: „Mingi iri inna achir adamrerun? 23Edi saï shorore? Enna zenbichi ekki wakebutirrano, wala imbel talos an wetirar? 24Ama ir iyirrunna jiradilo zolna tod gudragi ariddogor kongi wide zenbichigi waketidirarki — “ wide sowibulgi wetirsum: „Ekki ai awetirrin, imbel, enna angaregi soke injed enna kagir biju!“ 25Tenna lehdayen tinn owollo angare ter tendogor busingi soke injed tenna kagir artigi mejidengon bijusum. 26Male ajebked eyos wide artigi mejidesan. Widegon sarke dul werro toros wesan: „Ar elongu nalmensun wekki nalsun.“
27Terin agabir belbungon mekisdi Lawiy an aweran wekki makisn agarro agingon nalos wetirsum: „Aigi tebaer an!“ 28Tekkon haja malegi wakos imbelligi tekki tebaessum.
29Lawigon tekki azuma dul wekki tenna kar awtirsum. Tekkodon azmebuligon mekisn idirton wide echeli digrichi werigon dasan. 30Farisichigon tinna abajiligon tenna hiranin dogor nugnugos wetidirsan: „Ir ma mekisn idigon wide zenbikonigodongon kalka anirun?“ 31Yesu wetidirsum: „Genanbuli agengrilgi awerisminan, odilig anmenkin. 32Ai takomnim, adeligi uweri an, ama usigi tubew an.“
33Wide tekki wetirsan: „Won Hanana hirani ma dertigi dime aïnjiran, wide dime salar obburan, tinnawi tegon Farisindichi? Ama enna hirani akallan wide aniran.“ 34Ter tirgi wetidirsum: „Ir eskergi erkenekolna jelisigi dertigi binjikidirrua, erkenekol tirgodon engon? 35Ama ugrosi weri bitaran. Tidder erkenekol tinnaiton bisoketakkoskanin. Man ugrosir dertigi binjikandan.“
36Wide tirgi metel wekki wetidirsum: „Zol wer kade ēr werna gudagi merrigi kursello anijkolimnum. Mine ēr kurselgi ared bishugrosin. 37Wala zol wer hamur ēr wekki girba kursel werro aündurmunum. Mine hamur ēr girba kurselgi wachiros hamurkon bibogosin. 38Girbagon binefakiyanin. Ama hamur erki girba erro aündurran, owingarigi kewidw an. 39Wala zol wer, hamur atig wekki niekkin, hamur erki biwerismunum, mine kursel enikol engad.“
Селектирано:
Luka Enjil 5: XNZ1912
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Published by the British and Foreign Bible Society in 1912.