Luka Enjil 6
6
Bag. 6.
1Samte owittir, owoldin agabir, ewittichin bareged nogburangon tenna hirani sorinn ilegi mer jigidka akalsan. 2Farisichirton weri tirgi wetidirsan: „Ir ma aawrun samten tur awtakkimenilgi?“ 3„Yesu widegir tirgi wetidirsum: „Ir geryekomnun Dawud awsingi orgos, wide tekkodon daligon? 4Mine artina kar to jurgi kal numebulgi inji kaled wide tekkodon daligi tidirsum, tenna kale hilemenil, fegiri agudeg anmenkin.“ 5Wide tirgi wetidirsum: „Zolna tod samtena tirgongenum.“
6Samte echel werro jamar torosirgi akurkidirsum. Mandogon id i iyindi sowibulkol wer dasum. 7Wide abajiligon Farisichigon tekki urwedagsan, ter on samten tur bigengirkin, tedder ila wekki elkirangon, tekked tin shekeru an. 8Ama ter tinna erigki iyiros id i sowibulkolgi wetirsum: „Imbel. Seler kute teb.“ 9Ter imbel kute tebingad Yesu tirgi wetidirsum: „Ai eleken urti wekki bisigirrin. Adeln awar samten tur serere? Wala milin awar? Newertina osaro? Wala tenna berar?“ 10Ter wide malegi urwosir idti wetirsum: „Enna igi mide.“ Ter midengad tenna i owitti galganossum. 11Tir wide monarked eyos ittiwrin barer awesan: „Mine terre awrun tekked?“
12Man ugrosir jebelgir belsum, saliri an. Teddo ugu malegi nogidisum, artigi asalitiringon. 13Ugros belingad tenna hiranigi uwedtargi tiddeton diminde owigi barsum. Tirgon ishinbuliy an undrirsum: 14Siman Butrus an undursingi, wide Andrawuskon tenna timbes, Yagubkon wide Hanagon, Filibuskon wide Bartulamawuskon, 15Matagon wide Tumagon, Yagub Halfana todton, Siman agirel an awerangon, 16Yahuda Yagubna timbes wide Yahuda Isharyutigon, tekki biselimekanil.
17Tirgodon shugurrigi agar sehel werro tebsum. Tenna hiranirton digrichi weri dasan. Wide jema dul wer Yahudiye malerton wide Urushalimirtongon wide Surkon Saidatongon tasam, tekki gijred wide tinn odarroton genandu an. 18Newertichi nijisiged marisbueligon atahirtakkisan. 19Wide jema male tekki kumarki werissum, mine teddeton gudra wer belka malegi agengiringad.
20Ter wide tenna misichigi tenna hiranin dogor shegos wide wesum:
21„Ir barkeburun, wo hajebuli. Mine artina mulki indum. Ir barkeburun, wo iri eleken origbuli. Mine ir biberkandun. Barkeburun, wo iri aoili eleken. 22Mine iri busukandun. Ir barkeburun, irgi zoli tisikran, wide miligi irged awkiran, wide aïreirkiran, wide bināleirkiran zolna todna jiradilo. 23Man ugrosir gurekanwe, wide gurattiged banwe. Mine inna kere simer bidulanin. Ikke teran tinna timbabi nebichiged awsan.“
24„Urmud indum, wo berbuli. Mine olongu ir tabetakkosrungad. 25Urmud indum, wo iri berbuli. Mine ir borigkandun. Urmud indum, wo iri eleken aüsuli. Mine ir bimusulkandun wide barwijkandun. 26Urmud indum, zoli male idder seregi wekran. Mine ikke teran imbabi nebichi mursajiged awsan.“
27„Ama ai irgi awetidirrin, wo agijrili, inna aduwichigi dolirwe. Irgi atisiligi soke tidirwe. 28Irgi anāleligi barkeirwe, wide irged miligi aawiligi salitidirwe. 29Ekki jakumdogor jomilgi owittigi dairetir. Wer on enna tagredigi arekkin, gobirmen enna kadertongon. 30Ekki isigil malegon tiru. Endanilgi arilgongi isigmen. 31Ir werisrun nawre zoli irgi awtidirrangi, ikke irgon tirged awwe. 32Won irgi doliligi dolkurun, inna genkane minde? Zenbikonigon teran tirgi doliligi adollan. 33Widegon irged seregi awiligi awtidirkirun, inna genkane minde? Zenbikonigon teran ikke aawran. 34Won ir on ewirtigi widegrarna joro tidirkrun, inna genkane minde? Zenbikonigon teran widegrarna joro ewirtigi atidirran. Ama inna aduwichigi dolwe. 35Wide seregidton ewirtigongi tidder awwe, widegrarki urumen. Mani wattigi inna kere bidulanin. Widegon dogondina toniandun. Mine ter adelum shukurkiyichigodon wide milichigodongon. 36A jagadkonianwe, inn abo indogochir a jagadkol en nawite.“
37„Gadiemenwe gaditakkimendunna jiradilo. Wakewe wakitakkirunna jiradilo. 38Tidirwe tirtakkirunna jiradilo. Asedi adel eyebul shondibul bogbul wer inna ogirro bibogtakkikanin. Mine inn asediged teran irgi bassidirran.“
39Tirgi metel wekkon wetidirsum: „Dugur wer dugur wekki kiyekin, owingari dolir bidigirtoran.“
40„Hirangon tenna arifdogor dulmunum. Tekki kefen arifki dur ar.“
41„Er ma burubi imbesna misir tebilgi aürun? Ama kiyen kam enna misir tebilgi analmunu? 42Won minegon imbeski awetirin: ‚Wo ambes, aigi weleseden ter burubigi enna misir tebilgi dukos an.’ Won er enna kidir analmunu kiyen kam endir koj tebilgi? Wo habis, owolgir kiyen kam endir tebilgi osos, terin agabir, naloskin, burubi imbesna misir tebilgi dukikan.“
43„Bettin bura adel wer dife us wekki bosmunum. Wala bettin bura us wer dife adel wekki bosmunum. 44Bettin umbu nutin tenna diferton biyirtakkin. Kadirton tinkirigi adetirana? Wala bulasirton enebki? 45Zol sere tenna ana hazin Bererton seregidti aosin. Wide zol mili tenna ana hazin milirton miligidti aosin. Mine ana eyegrarroton teran agil abainin.“
46„Ir ma aigi aüwerun: ‚Tir, tir’ an? Won ai aweringi aawmendungon? 47Annai tal nutin wide anna werechigi gijril wide awil — irgi bamintidirrin ni galg engi. 48Ter zol ka wekki agoyel galgum, tenna katren asaski doligir gol kulur ojjosel wekki. Sel wide shugur man kagi jomingad, urti wekki eske tedder awkomnum, gunan dogor goibungad. 49Wide anna weregi gijril wala awmenil, in zol ashebihen zol tenna kagi arid siw werdogor goyel wekki, asaskiyir. Sel targi shugur jomingad, man ka gir werro bor shugrossum. Tenna borarkon desen dul esum.“
Селектирано:
Luka Enjil 6: XNZ1912
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Published by the British and Foreign Bible Society in 1912.