Luka Enjil 4
4
Bag. 4
1Ama Yesu Urdunirton newerti gadisebulged eyos kujbungon, tekki newerti halagir kiyed tosum. 2Teddogon ugros erbaïngi, Iblisirton jeribtakkiri an, kewidsum. Ter ugros erbaïngi dertigi kagsinged, orgid tekki arsum. 3Iblis wide wetirsum: „Er on artina tod ter ekin, in kulugi wetiru: Kalanos an.“ 4Yesu widegir wetirsum: „Bajbun: Kal agudeged zol aaïmunum.“ 5Terin agabir Iblis guna sokebul werdogor kujkiros, wide dunyana mulkichi malegi lehda werro amintiros, 6wetirsum: „Ekki in gudra malegi tenna mejidted bitirrin, aigi denbungad, aigon ai werisrinna tirtigi bitirrin. 7Er on ann owollo sejdekin, male bendanin.“ 8Yesu widegir wetirsum: „Bajbun: Tir enna artigi sejdetir, wide ter agudegi abde.“ 9Terin agabir Urushalimir attargi wide jamana berin dogor ebros wide wetirsum: „Er on artina tod ter ekin, ennewertigi indoton lufe shugudi. 10Mine ikke teran bajbun: Ter tenna malaikarigi biweseirin, ekki harsew an. 11Tirgon tinna ichin dogor ekki binjiran, enna osigi kulu wer jommen an.“ 12Yesu widegir wetirsum: „Webun: Arti, enna tirki jeribemen an.“ 13Iblis wide tenna jeribadigi bajkiros tennaiton nogsum watti werbokon.
14Yesu wide newertina gudraged Jelilgir widossum. Wide tenna habar nejachi malegi eyegrossum. 15Wide tinna jamachir akurkidirsum. Wide malertongon soke dolbusum.
16Nasiragir tasum, ter doitakkisinn agarro. Wide ter kurbusin nawre jamar tosum samten ugroski. 17Wide geryeri an imbelingad tiri Eshaya nebina kitabki tirsan. Ter wide kitabki kusingad elsum agar tedder bajbulgi: 18„Artina newerti andogorum. Mine ter aigi komissum, fegirigi beshirer an. Wide ishinsum, 19atogbuligi gengirir an, wide kobbuligi kusarked uwetidir an, wide dugrigi misigitidir an, wide kayuwbuligi talge kusir an, wide artina jen seregi zoligi wetidir an.“ 20Ter wide kitabki garos hadamgi tiros tegossum. Jamar dareli malena misichi tedder shegbusan. 21Ter wide ugudi wetidirsum: „Olongu in were inn ulgir timossum.“ 22Malegon tekki shehdetirsan, wide aajibesan nimana werechi tenn agilloton abelsaniged. Wide wesan: „Eleken in Yusifna tod termunu?“ 23Ter tirgi wide wetidirsum: „Ikk ekingon ir aigi in metelgi biwedendun: Wo agengiril, ennewertigi gengir an! Kafrinahumir awtakkelgi wide ar gijirsungi, indogon aw, enn esheir.“ 24Wide wesum: „Aleged irgi wetidirrin: Nebi wekkon tenna esheir dolbumnum. 25Alegedgon irgi wetidirrin, Eliyana ugrosir ecchi azabachi digrichi weri dasan Israello, sime jen; toskigi wide shahar goricchi annessirton kobbusinna wattigi, wide orgid dul wer arid maler dasum. 26Tiddeton wernai Eliya ishintakkikomnum, en azaba Sarepta arid Saidandir dabul wernaig anmenkin. 27Wide baraskoni digrichi weri dasan Israello Eliyashana ugrosir. Tiddeton wekkon tahirtakkikomnum, Niman Shamig anmenkin.“ 28Jamar dareli male montiged eyossan ingi gijirrigi. 29Tir imbelligi nejana bochir osos, wide gunan kochir, tinna neja tendogor goibusinder, ebidargi birigsan tekki jagin shugudarki. 30Ama ter tinna bareged nog talossum.
31Wide Kafrinahum, Jelilna medinegir, shugrossum. Teddo samter akurkidisum. 32Tenna kurkidarrotongon desen kumitakkisan. Mine tenna were gudraged esinged.
33Man jaman turgon ogij wer dasum, newerti nijis wekked degbul wer. Ter hisi dul wekked uwe wesum: 34„Ah, argon ekkongi min asawririn, wo Yesu Nasirandi? Er tama argi dabrirri an? Ai ekki iyirrin er ni ter engi, artina gadisebul ter engi.“ 35Yesu tekki hede wetirsum: „Agilgi kobos. Teddoton bolos!“ Shetan tekkodon maaski ared bolossum, miligid wekki tedder awmen. 36Male sarkosirgi wer wekki awetidirsan: „Won in were galig minde? Mine shidagon wide gudragonged newertichi nijisigi amrekin, abellan.“ 37Tenna awid esheyi mando dali maler belsum.
38Jamarton imbolos Simanna kar torossum. Simanna tinogogon huma shedid wer uredagsum. 39Tenna jiradilo tekki beddisan. Ter tendogor kute tebosirgi wide humagi hedengad, huma tekki wakossum. Tenna watten engon wide imbelligi tirgi ajelirsum.
40Masil torosingad odil wekki korel male odilgi Yesunai injedtakin, tekkon tenna ichigi wer nutindogor kujurkin, agenansum, tenna ode min ekingon. 41Newerti milichigon abelsan digrichi werirton, arwijrangon wide awerangon: „Er artina tod teran.“ Ama ter tirgi hedeka ikke werarki agobrirsum. Mine tiri iyirbusan tekki komisbul ter engi.
42Ugros kowengad ter belligi agar hala wekkir jusum, jemachigon tekk akasshan. Tiri tennai targi tekki morogirsan, tinnaiton nogkingon an. 43Ter tirgi wetidirsum: „Andogor dan medinechi echelirgon beshirad artina mulkiged. Mine ini jiradilo teran ishintakkisim.“
44Ter wide Jelilna jamachir abeshiresum.
Селектирано:
Luka Enjil 4: XNZ1912
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Published by the British and Foreign Bible Society in 1912.