Ny Baiboly Ho An’ny AnkizySantionany

Ary indro nisy vehivavy iray nijoro teo an-tsisindalana. Nanganohano izy mijery ny zava-miseho. Ho faty ny zanany. Tsy iza io fa Maria renin’i Jesoa, izay nipetraka teo akaiky ny toerana nanombohana hazo fijaliana azy.

Ahoana ny nahatongavan’izao zavatra izao? Fiainana tena tsara sy nahafinaritra toy iny ve dia izao no niafarany, fa nahoana? Ary ahoana koa ary no haneken’Andriamanitra ny hanombohana hazo fijaliana ny zanany, ka hamela azy ho faty?

Tsia! Tsy resy akory Andriamanitra. Tsy nanota na dia kely akory aza Jesoa. Efa fantatry Jesoa hatrizay fa tsy maintsy hovonoin’ireo ratsy fanahy izy. Simeona, tamin’i Jesoa fony kely dia efa nilaza tamin’i Maria fa hisy fahoriana lehibe ho avy.

Andro vitsivitsy talohan’ny namonoana an’i Jesoa, indro vehivavy iray nanatona, ka nanosotra diloilo manitra ny tongony. "Mandany vola fotsiny izy" hoy ny mpianatra nimenomenona. "Asa soa no ataony" hoy Jesoa. "Hanomana ahy halevina no anaovany izao amiko." Mba teny hafahafa koa re izany e !

Taorian’izay, Jodasy, iray amin’ireo mpianatr’i Jesoa, dia nifanaraka ny hanolotra an’i Jesoa an’ireo lohan’ny mpisorona tamin’ny vidiny 30 dinaria.

Tamin’ny fetin’ny Paska Jiosy, Jesoa dia niaraka nisakafo farany tamin’ny mpianany. Nilaza zavatra mahafinaritra azy ireo momba an’Andriamanitra sy ny fampanantenana omeny ireo izay tia azy Jesoa. Nifampizara mofo sy divay tamin’izy ireo Jesoa. Izany dia mba ho fahatsiarovana fa ny tenan’i Jesoa sy ny rany no nomena antsika ho solon’ny ota.

Rehefa avy eo Jesoa dia nilaza fa hisy hamadika azy amin’izy ireo, ary ny mpianatra sisa hafa kosa raha mahita izany dia handositra. "Tsy handao anao izany aho" hoy Petera. "Raha mbola tsy misy akoho maneno, dia handà ahy in-telo ianao" hoy Jesoa.

Rehefa alina ny andro, Jesoa dia nandeha nivavaka tao amin’ny saha anankiray atao hoe Getsemane. Resin-tory ireo mpianatra nanaraka azy. "Raiko o," hoy Jesoa nivavaka, ".. Esory amiko ity kapoaka ity. Nefa aoka tsy ny sitrapoko no atao fa ny anao".

Tampoka teo, indro tonga tao anatin’ilay saha vahoaka betsaka niaraka tamin’i Jodasy. Tsy nanohitra azy ireo Jesoa. Fa i Petera no nikapa tamin’ny sabatra ny sofin’iray tamin’izy ireo. Vao noraisin’i Jesoa anefa ny sofin’ilay lehilahy dia niverina tamin’ny laoniny. Fantatry Jesoa fa sitrapon’Andriamanitra izao fisamborana azy izao.

Ary ireo nisambotra azy dia nitondra an’i Jesoa ho any an-tranon’ny mpisorona be. Toerana nivorian’ny mpanora-dalàna sy ny loholona, izay nilaza fa tokony ho faty Jesoa. Ary Petera nanaraka teny lavidavitra teny, ary raha namelona afo teo an-kianja ireo dia mba nipetraka koa izy. Intelo no nisy nilaza i Petera hoe "Naman’i Jesoa ianao." Ary intelo koa no nandavan’i Petera izany, arak’izay efa nolazain’i Jesoa azy. Petera dia niozona sy nianiana mihitsy tamin’izany.

Tamin’izay fotoana izay indrindra, dia nisy akoho naneno. Tahaka ny feon’Andriamanitra no nahenoan’i Petera azy. Ary izy nahatsiaro ilay tenin’i Jesoa taminy ka nitomany mafy.

Ary Jodasy nanenina tamin’ny nataony. Fantany fa tsy meloka Jesoa. Naveriny noho izany ilay vola 30 dinaria, saingy tsy nety nandray izany ny mpisorona be.

Natsipin’i Jodasy tamin’ny tany ny vola- ary dia nananto-tena izy.

Ary ny mpisoronabe nitondra an’i Jesoa teo alohan’i Pilato, ilay governora romana. Ary hoy ity farany: "Tsy hitako izay helok’ity lehilahy ity." Saingy ny vahoaka niantsoantso nikiakiaka hoe: "Homboy amin’ny hazo fijaliana izy! Homboy amin’ny hazo fijaliana izy!"

Nony farany Pilato dia nanolotra an’i Jesoa azy ireo ihany mba hombohana amin’ny hazo fijaliana. Ary ny miaramila nikapoka sy nandrora an’i Jesoa teo amin’ny tavany. Namboatra fehiloha tsilo koa izy ireo, ka natsatony teo amin’ny lohany. Rehefa izany, dia nofantsihany teo ambony hazo fijaliana izy mba ho faty.

Fantatry Jesoa fa tsy maintsy toy izao ny fomba hahafatesany. Fantany ihany koa fa ny fahafatesany dia hitondra famelan-keloka ho an’ireo mpanota mino sy matoky azy. Nisy jiolahy roa nombohana tamin’ny hazo fijaliana teo anilan’i Jesoa. Ny iray nino an’i Jesoa- ka afaka nankany am-paradisa. Tsy toy izany kosa anefa ilay iray hafa.

Rehefa nijaly nandritra ny ora maromaro Jesoa dia niteny hoe: "Vita" ary dia maty izy. Vita ny asany. Ary ireo namany namono azy lamba sarobidy ka nandevina azy.

Ary ny miaramila nanidy mafy sy niambina ny fasana. Ka tsy nisy olona afaka nivoaka na niditra tao.

Mampalahelo tokoa raha toa ka tapitra teo ny tantara. Saingy Andriamanitra dia mbola nanao zavatra nahafinaritra be. Tsy nijanona maty teo i Jesoa.

Vao maraina ny andro voalohany amin’ny herinandro, nisy mpianatry Jesoa vitsivitsy nahita ny varavaram-pasana nisokatra. Rehefa nijery ny tao anaty fasana izy ireo dia gaga fa tsy tao intsony Jesoa.

Nisy vehivavy anankiray nitomany teo akaikin’ny fasana. Niseho taminy Jesoa. Vao nahita ny mpianatra izy dia nihazakazaka, feno fifaliana nanantona azy ireo ka nanao hoe: "VELONA JESOA! NITSANGANA TAMIN’NY MATY JESOA!"

Tsy ela taorian’io, dia tonga nanatona ny mpianany Jesoa ary nampiseho azy ireo ny holatra tamin’ny tanany. Tena marina tokoa! VELONA INDRAY JESOA! Namela ny helok’i Petera izy ny tamin’ny nandavany Azy. Ary naniraka ny mpianatra ny hitantara sy hampiely manerana izao tontolo izao ny tantarany. Nony avy eo dia niverina niakatra tany an-danitra izy, ilay toerana nisy azy fahiny tamin’ny krismasy voalohany.

Tapitra