Tena misy tokoa ve ny zavaboahary antsoina hoe Satana?

Tsy maintsy miresaka ny momba an'i Satana isika mba hahafahantsika miresaka ny fahotana. Tsy azo tsinontsinoavina ny asany: fo maratra sy tokantrano rava, fanararaotana, aretina, sy ny fahalotoam-pitondran-tena. Lava be sady mampalahelo avokoa izany raha tanisaina.

Sady tena misy Satana no efa resy. Tiany ianao hino fa samy tsy misy marina avokoa ny amin'ireo zavatra ireo, saingy anao ny safidy. Mangataka aho mba hanambara aminao ny fahamarinan'Andriamanitra ity fampaherezam-panahy ity.

Tena misy Satana

Misy anarana maromaro manambara an'i Satana ao anatin'ny Baiboly. Ny roa tena ahafantarantsika azy dia "Satana" sy "devoly". Ny voalohany amin'ireo dia midika hoe "mpiampanga" ary inefatra amby telo-polo miverina ao anaty Soratra Masina, ilay niampanga sy nanararaotra antsika. Ny Devoly kosa dia in-36 miverina ao amin'ny Testamenta Vaovao ary midika, ara-bakiteny, hoe "mpanendrikendrika".

Satana dia fantatra amin'ny hoe ilay "menarana ela", ilay "dragona" sy ilay "ratsy". Ny filazalazan'i Jesoa ny asan'i Satana ao amin'ny Jaona 8:42-47 dia tena mampatahotra tokoa.

Voalohany, milaza ny tenany ho tompon'izay fanahy tsy voavonjy rehetra Satana.

Ao amin'ny Jaona 8, ny Tompontsika dia nilaza ireo fahavalony ho zanaky ny Satana "rainy" (and. 44). Izy no "andriamanitr'izao tontolo izao" (Ii Korintiana 4:4), ny "andrian'izao tontolo izao" (Jaona 12:31) izay mifehy izao vanim-potoan'ny fahalavoana izao (I Jaona 5:19). Monina amin'ny tany anjakan'i Satana ny kristiana. Miaramila mipetraka amin'ny tanin'ny fahavalo isika ary mitoby amin'ny tany voababo.

Faharoa, manajamba ny saintsika momba ny marina ny devoly.

Izy dia "mpandainga sady rain’ny lainga" (Jaona 8:44). Izany no mahatonga ny olona mbola tsy nandray ny Fanahy Masina tsy hahatakatra ny amin'Andriamanitra (I Korintiana 2:14). Te hisintona ny voan'ny teny avy ao anatin'izay fo tena mila izany Satana (jereo Matio 13:1-9).

Fahatelo, milaza lainga ny amin'ny tenin'Andriamanitra i Satana.

Hatrany amin'ny Genesisy 3 ka ankehitriny dia manodikodina ny fahamarinan'ny Soratra Masina izy mba hamitahana antsika. Ilay nanonona Baiboly teo ampakana fanahy an'i Jesoa (Matio 4:1-11) dia mbola hampiasa ny tenin'Andriamanitra, amin'ny fomba ratsy, mba hamitahana antsika ihany koa. Tsy izay zavatra rehetra ampianarina sy rentsika dia fahamarinan'Andriamanitra avokoa. Afaka manonona Baiboly mihoatra lavitra noho ny haintsika ny fahavalontsika saingy ho amin'ny faharatsiana no hiafarany.

Fahaefatra, ny devoly dia "mpamono olona hatramin’ny taloha" (Jaona 8:44).

Liona mierona mitady izay harapany i Satana (I Petera 5:8). Ireo rehetra izay manompo azy dia misehatra amin'ny fanafihana ara-batana, ara-pihetseham-po sy ara-nofo amin'ny hafa sy amin'ny sisa amintsika. Tsy misy afa-tsy ny fandringanana tanteraka ny taranak'olombelona sy, indrindra indrindra, ny vahoakan'Andriamanitra no ilan'ny tompony.

Fahadimy, manapaka ny demony i Satana.

Izy ireo no mpanompony sy tafika mpandeha tongony amin'ny ady ataony amin'ny Tompo sy ny zanany.

Amin'ny ankapobeny dia manohitra an'Andriamanitra i Satana.

Ao amin'ny Jaona 8 dia nanoro hevitra ny mpitondra fivavahana hitady hahafaty an'i Jesoa izy. Nitarika tamin'ny fanomboana ny Tompontsika izy tao aorian'izay.

Mifanohitra amin'Andriamanitra i Satana amin'ny lafiny rehetra:

• Ny Tompontsika dia hazavana; Satana dia aizina.
• Andriamanitra dia masina, afo mandevona; ny devoly dia mpanota, mpamparary sady be aretina.
• Andriamanitra dia Fanahy; Satana kosa dia ara-nofo tsy manam-pahamasinana.
• Tia anao Andriamanitra; Satana kosa dia mankahala anao.
• Nanolotra ny Zananilahy ho anao Andriamanitra; Satana kosa dia ny haka ny fanahinao.
• Andriamanitra no Rainao; ny devoly no fahavalonao.

Tena misy Satana saingy aza hadino: efa resy izy.