Afaka mandresy ny fahotana sy fakam-panahy tokoa ve aho?

Ao amin'ny I Samoela 13:14 dia niteny tamin'i Saoly, mpanjakan'ny Israely, ny mpaminany Samoela fa hosoloina izy satria "Jehovah efa nitady lehilahy ho Azy araka ny fony, ary izay no voatendrin’i Jehovah ho mpanapaka ny olony."

Izao anefa no nitranga am-polo taona aty aoriana, ilay "lehilahy ho Azy araka ny fony" dia nandry tamina vehivavy iray, efa manambady, ary nahabevohoka azy, ka dia nahavita nanao izay hahafaty ny vadiny izy mba hakany vady ilay vehivavy.

Tamin'ity zava-niseho iray ity dia nahavita nandika ny sivy amin'ireo Didy Folo ny Mpanjaka Davida

10: Nitsiriritra ny vadin'ny namana akaiky azy izy.

9: Nandainga momba ny fahotany izy.

8: Nangalatra azy ho an'ny tenany izy.

7: Nijangajanga izy.

6: Namono ny vadiny izy.

5: Nanala baraka ny ray aman-dreniny izy.

2: Nanao an'i Batseba ho sampy izy.

1 sy ny 3: Nanala baraka an'Andriamanitra sy ny anarany izy.

Farafahakeliny dia ny fandikana ny Sabata no tsy nataon'i Davida, araka izay takantsika.

Maninona no lehilahy izay heverina ho araka ny fon'Andriamanitra no nahavita an'izany?

Fa maninona isika no manota? Ahoana no andresena ny fakam-panahy? Inona no tokony ataontsika raha tsy mahavita an'izany?

Izany no hodinihintsika mandritra ny efatra andro manaraka.

Mety ho alaim-panahy

Rehefa nahatohitra ny fanafihan'i Satana Jesoa dia "dia nandao Azy aloha" ilay fahavalo (Lioka 4:13). Raha niatrika fakam-panahy ny Tompontsika dia, mety hiatrika izany koa isika.

Tena misy ny devoly ary mankahala anao izy. Fahavalony ianao. Nampitandrina antsika Jesoa fa ny devoly dia "mpamono olona hatramin’ny taloha" sady "mpandainga sy rain’ny lainga" (Jaona 8:44). Ny devoly dia "mandehandeha tahaka ny liona mierona mitady izay harapany" (I Petera 5:8). Maka fanahy izy sady mamitaka antsika tsirairay.

Izao no antony: "Ary ny filana, rehefa torontoronina, dia miteraka ota; ary ny ota, rehefa tanteraka, dia miteraka fahafatesana" (Jakoba 1:15).

Tadidio izao: ny fahotana dia mitarika anao handeha lavitra noho izay tianao haleha, mitana anao ela kokoa noho izay tianao hijanonana ary mihoatra noho izay noeritreretinao ho sandany.

Isan'andro.

Anontanio fotsiny ny Mpanjaka Davida. Vakio ny II Samoela 12 mba hahitana ny voka-dratsiny.