Lukɨ 23

(Matɨyui 27:1,2,11-14; Maakɨ 15:1-5; Jonɨ 18:28-38)

1A'mwe yuyara daavɨna yeva gamɨnyɨ maarɨna yeva Paailatɨmyabanna makuna. 2Sara yeva kotɨya' gaai marina yadɨvɨ' wɨdɨna “Nemɨ a'mwe dazarɨ tɨnna wangamanɨgolyɨ. Nemɨjɨya yɨta savaakɨyaraavɨrebwi yɨpalasɨ'da gamɨrebwi yɨvanɨkelyɨra. Sizaarɨ taakɨzɨya wɨjaaya'najɨ kɨmaakɨya nedakɨvanɨkelyɨra. Nedadelyɨ ‘Nɨmɨ sainyɨ Kɨraazɨtɨyainyɨra. Kingɨyainyɨra.’ ” 3Wɨdɨna kye' Paailatɨ sahwarɨ yɨdaanganna “Gɨmɨ Juyaraavɨre kingɨyaigɨ daaka?” Wɨdɨna kya' Paailatɨmɨ ja'nawɨdɨna “Gɨmɨ saigɨ sara dɨwaanya' sahɨrɨsɨra.” 4Wɨdɨna kya' Paailatɨ Gotɨyarɨna mubɨthɨka yɨra'dɨvɨta naangerajɨ kwala bwa'naanyavɨyarajɨ saraavɨ wɨdɨna “A'mwe datharɨ gamɨre yɨwetawakya aane pɨmɨlɨ' mabɨramaariwana!” 5Sarevɨ kɨrɨ' sahwara naanga dɨragɨnna kuna wɨdɨna “Sahwai a'mweraavɨ a'mwemɨlɨkaavɨ yagaala wɨjɨwaakada Juthɨya sɨmagɨ yunebanna lɨka yɨwainɨgwimanaawɨgasalyɨra. Galɨli sabadaa'nyɨ yamaa'dei sasare sabwi mɨjɨmabada yune davannanyɨra.”

6Paailatɨ kadɨka sara wɨ'naka sahwaraavɨ yɨdaanganna “A'mwe dazai Galɨli mwaalyai daaka?” 7Yɨdaanganna yaka kumɨre ja'nawɨja' “A'mwe kwaaka Erotɨyai maremwaaide sɨmagɨdaa'nyalyɨra,” kadɨka wɨ'naka yawɨbwarya'nei Erotɨyaryawɨnnerɨ maryaasɨna. Dazagaa' kɨgaa' Erotɨyai kwalyɨ Jeruzaalemɨ mwaaidɨ'nyɨ. 8Maryaasɨna kya' Erotɨyai Jizaazarɨ tɨnna wanganaka yɨlaaya naanga yɨna. Sare' dare'nesɨ. Sahwarɨna yagaalya'na kadɨka wɨ'nadei, saamɨnyagaa' kuna “Sahwarɨ yɨwarɨma!” yawɨ'dei. Nabaai “Sahwai atɨka maru'nata pɨrɨ' wɨjɨwaainya' kyojɨ wanganɨma!” yawɨ'dei. 9Sare sagaa' Erotɨyai kwalaalyanna bithangamuna. Sare' Jizaazai gamɨre yagaalyangɨna yagaala aane pɨrɨ' kɨrɨ' muja'na muraayɨ. 10Muja'na muraayɨ kya' Gotɨyarɨna yɨra'dɨvɨta naangerajɨ Kɨwɨjarajɨ sara gamɨnyaba bahaidaa'na yɨna yeva kotɨya' dɨragɨnna marina. 11Sara yadaapi Erotɨyai gamɨre aawɨlasarajɨ yuna kayaa'na jɨwɨ'nyɨna yada bɨraiyagaalyajɨ wɨdɨna. Mi'na wɨdɨna yeva bɨralya'na kingɨyare yɨvɨta nawɨ'nyaanga pɨrɨ' maarɨna yeva marabwakaabɨna yeva Paailatɨmyawɨnna ayɨna maryaasɨna ya'. 12Sɨnnawɨ kɨgaa' Erotɨyai Paailatɨjɨ yɨkamaanga yɨma'nagɨlyaraalyɨ. Kɨrɨ' dahaa' saraai nya'mwana dɨnagɨla nawɨ'nyɨna mwaalɨna.

(Matɨyui 27:15-26; Maakɨ 15:6-15; Jonɨ 18:39–19:16)

13Paailatɨ Gotɨyarɨna yɨra'dɨvɨta naangeraavɨjɨ a'mwe naangeraavɨjɨ a'mweraavɨjɨ jaka wɨdɨna kya' sarera bi'bwa'nyɨna. 14Bi'bwa'nyɨna kye' sai wɨdɨna “A'mwe nɨmɨnyawɨnna nyɨmakabɨwaata dazarɨna sarɨmɨ dɨwaa' ‘A'mweraavɨrebwina nemaruwɨnakadelyɨra.’ Sare'na nabaai sarɨmɨre tɨnnyarɨ yɨdasaba yagaala dazahɨrɨ'ne'na yɨdangadaari. Yɨthaanyi! Sarɨmɨ kotɨya marivanɨgata daza'ne' nɨmɨ gamɨre yɨwetawakya aane pɨrɨ' kɨrɨ' mabɨramaariwelyɨra. 15Aawa. Erotɨyai kwalyɨ avaala sana yɨwakelyɨra. Sara yaka nemɨnyawɨnna nemaryasɨwaabɨkelyɨra. Yɨthaanyi! A'mwe dazai nemɨ yɨnɨga wi'na maratamarɨmwaade' yɨwetawakya aane pɨrɨ' kɨrɨ' yadei mɨka! 16Sarevɨdaa'nyɨ wɨlyabaalyɨna lɨ'bwara'mujɨ wɨdaasɨdelyɨ.” 17Kumɨrebwi sasarebwi yadɨvɨsara “Yuya Pari'ma'munne tewaanya sarɨkaavɨ Paailatɨ a'mwe kalavuzarɨ kumɨnyɨna wɨmaaryadelyɨ.”

18Sagaa' kwala bwa'naanyasɨ jaka naanga'na dara dɨna “Yɨsavɨri dɨmaratamarɨmwia! Sara ya'gɨzɨ Baravaazai nemɨnyawɨnna dɨnejaama!” 19Baravaazai sai anga naangeba ga'maanɨyaraavɨ mala bwa'delyɨ. Sara bwa'da a'mwerɨ tamakadaa'nyɨ kalavuzavɨ wɨmwaaihɨnɨkelyɨ. 20Jaka sara kade' Paailatɨ “Jizaazarɨ wɨdaasɨde'nana,” yawɨraka ayɨna jaka wɨdɨna. 21Sara yadaa'nyɨ jaka wɨdɨna ye' “Maara'gɨzɨ yɨsavɨri jeramo! Yɨsavɨri jeramo!” 22Jaka sara wɨdɨna kye' dahasaai dahaa' wɨdɨna “Be'nanaka! A'mwe dazai be kayaa'nanyabwi yɨwakalaka! Nemɨ gamɨnyɨ yɨnɨga wi'na maratamarɨmwaade kayaa'nanya aane pɨrɨ' kɨrɨvɨ mabɨramaariwelyɨra. Sarevɨdaa'nyɨ wɨlyabaalyɨ lɨ'bwara'mujɨ maryaasɨma!” 23Wɨdɨna kya' kɨrɨ' jaka dɨragɨnna naanga'na dɨna yɨna yeva jaka naanga dɨragɨnna kuna dɨna, “Sahwarɨ maara'gɨzɨ yɨsavɨri jeramo!” Kumɨre jaka naanga bathɨwaweta sa Paailatɨmɨre yagaalya' dathɨwanna. 24Sara kye' Paailatɨ kumɨre yagaalyangɨ mɨdɨnna. 25A'mwera jaka wɨdɨna a'mwe kalavuzavɨ mwaaidɨ'nyɨya sarɨ ayɨna maarya'na ga'maanɨyaraavɨ mala bwa'da a'mwerɨ tamakakerɨ sagaa' Paailatɨ kumɨre asɨrɨna wɨmaarina. Kumɨreburɨ mɨdɨnna yaka Jizaazarɨ aawɨlasaraavɨre asɨrɨna wɨmarɨmwaaihɨna.

Jizaazarɨ yɨsavɨri nilɨya wɨramesa'nesɨ.

(Matɨyui 27:32-44; Maakɨ 15:21-33; Jonɨ 19:17-27)

26Gamɨnyɨ makwodɨvɨ' a'mwe pwarɨ Saaimonɨ Saairini mwaalyarɨ galalɨmwanna. Sai anga naangeba wɨlaawia'nei tutaanyavɨ kaanya yɨdɨ'nyɨ. Galalɨmwanna yeva yɨta yovihɨrarannɨke' gamɨre egwevɨ yɨlamarakɨna kye' yɨkwavamakwoda Jizaazarɨ mɨdɨnna. 27Mɨdɨnna yadaa'nyɨ kwala bwa'naanya naanga, a'mwerajɨ a'mwejɨ gamɨnyɨ mɨdɨnna. A'mwe sa kale wiadaa'nyɨ kɨnna dadɨvɨ' kaladaasajɨ damɨdɨnna. 28Damɨdɨnna yadaapi Jizaazai gɨnyɨma'nyɨna yaka wɨdɨna “A'mwe Jeruzaalemɨdaasangihi, nɨmɨnyɨna kɨnna madɨpɨnera! Aawa. Kɨnnya' yune sarɨmɨnyɨne'najɨ sarɨnnya kaimɨraayangɨnajɨ dɨzide'nera. 29Yɨthaanyi! Sare' dare'nanyɨ. Dɨvi pɨgaa' yɨma'najahaa' dɨpɨ'de ‘A'mwe kaimɨraayanna yagɨnyajɨ bwaraminya kwazɨka kɨnɨnnakejɨ aamunya myaayadɨvɨsajɨ kumɨ sa yɨlaaya yadɨvɨ' tewaanaanga winadengɨra.’ 30Dazagaa' a'mwera mugunyangɨ dangabɨ'dengɨ ‘Mugunya ke'nɨngihi bwalanelamwaalyɨla!’ Mugunya maalɨkerɨkaavɨ wɨdɨpɨ'de ‘Mugunya ketɨrɨkaavihi bwalanelamwalabaihɨrakyɨla!’ Lɨka naanga yadɨvɨ' sara dɨpɨ'dere. 31Sare' dare'nanyɨ. Yɨta gaalyarɨ dɨke' navɨridevaaibɨ' tewaanyainyɨ kɨrɨ' nyɨramakɨpɨja' yɨ yɨta yawakerɨ dɨke' yarai nasɨ'devaaibɨ' kayaa'nanyaihɨrɨ gatha'dare' yɨhima'nadeihɨlaka!”

32A'mwe pwaraai kwaraarɨjɨ makuna. A'mwe saraai kayaa'nanyabwi yadisaraarɨ. Saraai gamɨnyɨjɨ yeramya'neraarɨ. 33Kaanya makuna yadɨvɨ' pɨba Gɨlemɨnyagɨnyaba wo'nɨkebanna yɨ'mavaawɨna yevegaa' dazahɨba gamɨnyɨ yɨsavɨri wɨrame'. Nabaai a'mwe kayaa'nanya saraai kwaraarɨjɨ yerame'. Pwarɨ gamɨnyɨ aangasɨmagɨ tamɨna, pwarɨ kwanaamimagɨ tamɨna. 34Yɨsavɨri kurame' Jizaazai wɨdɨna “Nɨmwaigɨ, kumɨre kayaa'na yɨwaata davurɨ tɨvɨkɨta dɨmarasɨka! Sare' dare'nesɨ. Yɨvanɨgata dahɨbwina myawɨryarera.” Wɨdɨna kya' aawɨlasara gamɨre kwaabɨyɨvɨta saza maramunyɨna yeva saatuyara gɨrɨda'gɨrɨdata yeva pwai wavɨlavakei pɨvaa' maarɨna. Sana sana yeva yuyara yunebanna maarɨna. 35Sare savɨ a'mwera bathakuna yeva baihana'na. Sahwara baihana'na yadaapi a'mwe naangera gamɨnyɨ bɨraiyagaala wɨdanganna “Sai a'mwe pwaraavɨ padaihasamaa'na mena yakelyɨ. Gotɨyare Kɨraazɨtɨyai, Gotɨyai dahɨlakadei mwaalaja' yɨ sarei gamɨ sai padaihasamaa'nana! Nabaladɨka!” 36Bɨraiyagaala wɨdanganna yadaapi aawɨlata kwarajɨ bɨraiyagaala wɨdɨna yadɨvɨ' gamɨnyabanna wɨlaabɨna yɨna yeva “Waainɨya yɨrɨke' wɨjavaana!” deva yaamɨjɨ makina yeva 37dara dɨna “Juyaraavɨre kingɨyaigɨ mwaaidɨzaigɨ gɨmɨ saigɨ dɨvadaihasamaa'na!” 38Pɨkarya pɨrɨ' gamɨnyɨ munyaba yɨda'nɨke' dɨna “A'mwe dazai Juyaraavɨre Kingɨyalyɨra.”

39A'mwe kayaa'nanya tamarɨmweta saraarɨdaa'nya pwai gamɨnyɨ bɨrala wɨdɨna “Kɨraazɨtɨyaigɨ daaka! Gɨmɨ saigɨ dɨvadaihasamaa'nana! Nabaai naarɨmɨ kwainaarɨjɨ dɨnehɨvadaihasamaaka!” 40Bɨrala sara wɨdɨna kya' kayaa'nanya pwai yagaala daza' kadɨka wɨ'naka maanga wɨdɨna “Sahwalyɨ daange' avaaina ma'mwaanya'na Gotɨyarɨna lɨka mijɨwaana! 41Naarɨmɨnyɨ nehɨramwaasa', sa' tewaanya yɨdasabwi yɨwaasasɨ. Sare' dare'nesɨ. Naarɨmɨ taanga maa'mwola davwi naarɨmɨ yadata yuna yɨdata sabwina maa'mwoi. Kɨrɨ' a'mwe dava dai yɨwetawakya aane pɨrɨ' kɨrɨ' myadelyɨ.” 42Wɨdɨna yaka wɨdɨna “Jizaazaigɨ, dɨvi dɨragɨnna maremwaala'gɨzɨ nɨmɨnyɨna nayaa dɨnyawɨ'deigɨnyɨ.” 43Dɨna kya' sai wɨdɨna “Nebulya'na gɨthɨwa ‘Yuna dahaasagaa' nɨmɨjɨ anga Tewaanyaba dɨmwaaide'nanyɨ Parathaazɨ.’ ”

Jizaazai mena balɨna yake'nesɨ.

(Matɨyui 27:45-56; Maakɨ 15:33-41; Jonɨ 19:28-30)

44Nyɨlyagaa' sɨrɨgwajahaa'bɨsagaa' yɨma'nyɨna kya' nyɨlyai balɨna. Sarevɨ jɨhɨnya' anga yuneba jɨnnaraka yune sawɨ'jɨhɨnya' tɨri kɨlokɨyagaa'na sawɨsɨrɨ. 45Yɨrɨke' yɨmaanyɨna yaka dɨvidaa'nyɨ Gotɨyare Angevɨya kwaabɨyɨvɨta naange' jɨkɨ'nadaa'dɨ'nyɨya janne sa' yuneba kayaaka lihɨ'na yɨna yaka pɨvakaai yɨma'nyɨna. 46Sagaasagaa' Jizaazai jaka naanga dɨragɨnna wɨdɨna “Nɨmwai nɨmɨre kuryai gɨmɨre asɨrɨ gwakɨwana.” Sai sara wɨdɨna yaka gannya kuryarɨ yaasɨna. 47Yaasɨna kya' aawɨlasaraavɨ maremwaaidei dazangɨ tɨnna wanganaka Gotɨyarɨne yaya' munyaba makɨlaka sai dɨna “Yuna nebulyasɨ. A'mwe dazai yuna yɨda'maraangelyɨra.” 48Dɨna kya' kwala bwa'naanya baihanasa'na bi'bwa'nesara yɨma'naka sangɨ tɨnna wanganeva kunnya kɨhɨsangɨ kale'na mala tannadɨvɨ' kaanna ayɨna yɨkwawe'. 49Sarevɨ gamɨre yuya gya'mwerajɨ a'mwe Galɨlidaa'nyɨ yawɨma'neva gamɨnyɨ mɨdɨnaabesamɨlɨkajɨ sangirɨ' menyaba daaveva yuya yɨma'naka dazangɨ tɨnna wangane'.

Jizaazare kɨlaakejɨ' sikavi'nɨnnyavɨ wakesa'nesɨ.

(Matɨyui 27:57-61; Maakɨ 15:42-47; Jonɨ 19:38-42)

50Yɨthaa! A'mwe pwai Jozepɨyai wo'nɨkei Juyaraavɨre Anga Aarɨmathɨya sabadaa'nyai mwaalɨna. Sarei Juyaraavɨ kaajolɨyai, a'mwe tewaanyai yune yɨda'maraangei 51kaajolɨya pwaraavɨre sɨmunyabwinajɨ kumɨrebwinajɨ aala wɨvu'nadei, sai Gotɨyai a'mweraavɨ maremwaaidevɨna yemwaaidelyɨ. 52A'mwe dazai Paailatɨmyawɨnna kaanna wɨna yaka sahwarɨ Jizaazare kɨlaakejɨ' maarya'na yɨdaanganna. 53Sara yaka yagaalya' maarɨna yaka wɨna yaka yɨsavɨdaa'nyɨ gamɨre kɨlaakejɨ' makwalaabɨna yɨna yaka kwaabɨyɨvɨta yaakesɨ yewaa'bwa'na yɨna yaka simaangevɨna wɨlakaawɨna. Simaanga daza' sɨla naangevɨ lɨlɨsɨwinɨke'. Sɨnnawɨ kɨgaa' a'mwe bainɨka aane pwai kwarɨ mulakɨbwaayavɨ, mudɨ'na waka'. 54Sagaa' yɨrɨka tɨka munne yovɨrawakya'nerɨkɨra. Kwazaakegaa' maalɨkegaa' yɨma'nya'negaakɨ. 55Jozepɨyai sara yadaa'nyɨ a'mwe Galɨlidaa'nyɨ yawɨma'neva Jizaazarɨ mɨjɨmabesa sahwarɨ mɨjamakuna. Yevemɨlɨka simaanga dazavɨ tɨnna wanganna yeva gamɨre kɨlaakejɨ' sara wakɨnɨkejɨ' tɨnna wanganna. 56Tɨnna mena wanganna yeve sagaa' kunnya angengɨna ayɨna kaanna wɨna. Saremɨlɨka marazɨnanyajɨ welivananya wabatɨrɨnnaka nawɨ'nyajɨ yovɨrawakɨna ye'.

Sara yevemɨlɨka kwazaakegaa' kɨwɨnya' sara dɨnɨkevɨna kave mwaalɨna ye'.

Voafantina amin'izao fotoana izao:

Lukɨ 23: byr

Asongadina

Hizara

Dika mitovy