Lukɨ 22

A'mwe naangeraavɨna Jizaazarɨ wibwarɨdaakwia'na Juthaazai nebwina wɨdake'nesɨ.

(Matɨyui 26:1-5,14-16; Maakɨ 14:1-2,10,11; Jonɨ 11:45-53)

1Gɨrɨkula lɨwɨnya mavamidakya'ne munnegaa' nawɨ'nyagaa' aya kɨgaa' mena yɨma'nyɨna. Yɨ “Pari'ma'munneva! Gotɨyai Ne sɨnnawɨnyaraavɨ yɨvainyaakegaaka!” dadɨvɨsagaakɨ. 2Aya kɨgaa' mena yɨma'nyɨna kya' Gotɨyarɨna mubɨthɨka yɨra'dɨvɨta naangerajɨ Kɨwɨjarajɨ sahwara aanga'mweraavɨna lɨka yɨna yeve'na kuna dɨnyɨna “Nemɨ sahwarɨ kave gatha'dara yawaajɨ tamakaadelaka?”

3Sagaa' Kayaa'nanyai Saataanɨ Juthaazare sɨmunyavɨ wɨlamwaaina. Sai Yɨzɨkerɨyotɨyala wo'nɨkei, sɨvɨlɨrɨdaa'nyɨ pwaraalyaraavɨdaa'nyai. 4Sarei wawokegaa' Gotɨyarɨna yɨra'dɨvɨtara pɨrizɨya naangerajɨ Gotɨyare Angevɨ maremwaaidɨvɨta naangerajɨ yagaalya' jamungajɨna. Sahwarɨ kumɨnyɨneba wɨmaarya'ne tusarɨ'na bɨrya'nei. 5Sara mena jamungajevera yɨlaaya yeva Juthaazarɨ nɨgwia wɨjaaya'ne'na jamungajakɨna. 6Sarevɨ kumɨre yagaalyavɨna Juthaazai “Ya!” wɨdɨna yakei sahwarɨ kumɨnyɨneba wɨmaarya'ne tusarɨ'na bɨrɨna bɨrɨna. Sarei yune gave pɨgaa'nei, a'mwera a'mwe gamɨjɨ mye'mwannamwaalyadapiyagaa'nei.

Tɨka wapaaya ye'mwannanya'ne aaya'nesɨ.

(Matɨyui 26:17-25; Maakɨ 14:12-21; Jonɨ 13:21-30)

7Gɨrɨkula lɨwɨnya mavamidakya'ne yɨrɨke' yɨma'nyɨna. Yɨrɨka dazarɨkɨ Pari'ma'munne sipɨzipɨya dɨwɨnyai tadɨvɨsagaakɨ. 8Sarevɨ sai Pitarɨjɨ Jonɨmɨjɨ saraarɨ maryaasa'neraarɨ wɨdɨna “Kɨrɨmɨ wawokɨlyɨ nemɨnne tɨ'munne tɨka naade jovɨrawakaawila!” 9Wɨdɨna kya' saraai wɨdɨna “Naarɨmɨ gawɨ yovɨrawakade'na nehɨthɨwaana?” 10Wɨdɨna kyagi sai wɨdɨna “Yɨthaanyi! Anga naangebanna wɨlaawakɨlyɨ a'mwe pwai kwadɨka naangevɨ aalya' makwojɨyai tutaanyavɨ kɨrɨmɨnyɨ yɨhurata'najai. Yɨ kɨrɨmɨ sarɨ mɨjamakuna yakɨlyɨ anga gamɨ wɨlaja savɨna kwaraaihɨlyɨ wɨlɨna jidesɨra. 11Sara yakɨlyɨ anga dazavɨ gyakwalaangerɨ nayaa dara duzideraaihɨlyɨ ‘Nejɨwaakadei gɨmɨnyɨ gɨthɨwakeigɨnyɨ “Nɨmɨrerajɨ tɨ'munne naade' nɨmɨnne ku'dɨke' gava warɨka?” ’ 12Sara kudakɨlyɨ sai ku'dɨka yarinɨka naange' munyawɨ, wapeyɨ'bɨnyajɨ namwaalyɨsajɨ kɨnɨnnakevɨ yɨhibwarɨdaakwadelyɨ. Ku'dɨka dazahɨrɨvɨ tɨ'munne jovɨrawakyideraaihɨlyɨ.” 13Mi'na wɨdɨna kya' maryaasakeraai kaanna wɨna yagɨla gamɨ wɨdaka kɨbaaina sana yɨna yagi. Sara yagɨla Pari'ma'munne yovɨrawakɨna.

(Matɨyui 26:26-30; Maakɨ 14:22-26; 1 Koridɨ 11:23-25)

14Tɨka nya'negaa' mena kima'na' yɨ'bɨnyavɨ sai walamwaaina yadaa'nyɨ wɨdaasadera apozelɨyara walaye'mwannemwaaina. 15Sai wɨdɨna “Sarɨmɨjɨ Pari'ma'munne da' ye'mwannanya'na tewaanya dɨragɨnna nyɨvu'nɨvanɨ'. Sara ya'mujɨyainyɨ dɨvi daanga maarɨdeinyɨra. 16Sare' dare'nesɨ. Dara yɨhɨthɨvanɨge. Sarɨmɨjɨ tɨ'munne ayawɨdaa'nyɨ sasara yɨhye'mwannanɨdeinyɨ mɨka. Arɨkawɨ. Kɨrɨ' Gotɨyai a'mweraavɨ maremwaalade sa yune nebwina yɨma'najahaa'na yɨ sagaa' ayɨna nɨdeinyɨ.” 17Wɨdɨna yaka kaapɨvananyai maarɨna yaka Gotɨyarɨ suya wɨdɨna yaka wɨdɨna “Sarɨmɨ datha' maarapɨjɨ yanga dɨmunɨgulaawila! 18Sare' dare'nesɨ. Dara yɨhɨthɨvanɨge. Dahaasɨ dɨvi kɨgaasɨ waainɨwɨlyabaarɨdaa'nya yɨsiaalya manyɨ yɨdeinyɨra. Arɨkawɨ. Gotɨyai a'mweraavɨ maremwaalade sa' yune' nebwina yɨma'najahaa'na yɨ sagaa' ayɨna nɨdeinyɨ.” 19Wɨdɨna yaka gɨrɨkulya' maarɨna yaka Gotɨyarɨ suya wɨdɨna yaka gunyɨna yaka wɨjaavɨna yakegaa' wɨdɨna “Daza' nɨmɨre kɨlaakejɨkɨra. Sarɨmɨnyɨne'na wɨjaavɨnɨdezɨkɨra. Sarɨmɨ yuyagaa' sasara yadɨvɨ' nɨmɨnyɨna ayɨna jawɨryidevwinesɨ.” 20Wɨdɨna kya' mena nevegaa' kaapɨvananya sahwarɨ avaaina sana yɨna, “Kaapɨvananya dathai nɨmɨre tawevɨya yagaala wɨlɨmwagarɨke mudɨkesɨra. Sarɨmɨnyɨneba nɨmɨre tawe' yɨhɨthɨngikɨdesɨra. Nyɨramakɨpɨ'desɨra. 21Kɨrɨ' yɨthaanyi, a'mwe nɨmɨnyɨ yɨkamaangeraavɨna nyɨbwarɨdaakwia'nei yɨ'bɨnya dava davɨ nɨmɨjɨ ye'mwannamwaaihola dalaakana! 22A'mweraavɨne Kaimɨraayainyɨ sɨnnawɨ Gotɨyai tuta yawɨbwarakakevɨ mɨdɨmanɨge. Kɨrɨ' we'! Yɨkamaangeraavɨna nyɨbwarɨdaakwia'ne dazarɨ kayaaka gara yɨgainadei dɨngaka! We'!” 23Sai sara daka yadɨ'nyɨ kumɨ sara yɨdaanganyɨ yɨdaanganya binɨgulɨna “Sasare sabwi aaihwai yade'nevaka?”

24Dɨvi maalɨkegaa' sahwara gavamarasɨ'nyɨyagaala dɨnyɨna, “A'mweraayaba nemɨnyɨdaa'nyɨ nemɨre a'mwe naangei aaihwalaka? Nɨmɨ dɨngaka!” 25Sara wɨdesavɨna sai wɨdɨna “Ajɨmya yuyangɨya kingɨyara kwaakewɨnna a'mweraavɨ marulawakadɨvɨsara. A'mweraavɨ maremwaalyabwine dɨragɨnya' kɨnɨnnakera yawɨ'na ‘A'mwera nemɨnyɨna yawɨpɨka! “Sahwara yanga neyadɨvɨsarera.” ’ 26Kɨrɨ' sarɨmɨ sasare sabwi nyɨpɨdɨka! Aawa. A'mwe sarɨmɨnyɨdaa'nyɨ pwai naanga yɨma'najai sai aaya dɨviyai yɨma'nana! Nabaai sarɨmɨre maremwaalyai sara yɨhɨthaayadei mwaalana! 27Sare' dare'nesɨ. A'mwe naangei aaihwalaka? A'mwei yɨ'bɨnyavɨ namwaalyɨsarɨ mwaaidei dɨngaka? A'mwei wapaaya bulawɨjaaya'ne wɨdaayadei dɨngaka? Namwaalyɨsarɨ yɨlamwaalaka tɨka munne nada a'mwe dazai sahwalyɨra. Kɨrɨ' sarɨmɨnyɨ tɨnnyaba sarɨmɨnyɨ gaimwanga ya'neinyɨ yɨhɨthaayadeibɨsainyɨra.”

28“Nɨmɨnyɨ yɨjɨwaala'ne yɨma'nakegaa' sarɨmɨ kwaihɨlyɨ kuna nye'mwannamwaaimanɨgasaihɨlyɨ. Nyagalya'makuvanɨgataihi mɨka. 29Sarevɨ nɨmɨnyɨna Nɨmaamaangei maremwaalyaburɨ nyɨjaavakabaaibɨ' sarɨmɨnyɨna maremwaalyabwi yɨhɨzaavɨdeinyɨra. 30Nɨmɨre maremwaaidɨnyainyɨre yɨ'bɨnyavɨ tɨ'munne nye'mwannanadɨvɨ' aalya nye'mwannanya'neihi yɨhɨzaavɨdeihɨlyɨ. Nabaai kingɨyaraavɨre namwaalyɨsaraavɨ mwaalapɨri a'mwe Yɨzɨrelɨya yɨta savakaavɨya sɨvɨlɨrɨdaa'nya pwaraalyaraavɨne yawɨbwa'dɨvɨsaihi dɨmwaalyideihɨlyɨ.”

(Matɨyui 26:31-35; Maakɨ 14:27-31; Jonɨ 13:36-38)

31“Saaimonɨ! Saaimonɨ! Yɨthaa! Kayaa'nanyai Saataanɨ sarɨmɨnyɨ maarya'na mena wɨdɨwakeihɨlyɨ. Witɨya asasɨ gɨrɨdavalɨlɨvaidevaaibɨ' yɨjɨwaalya'neihɨrɨ walayɨhɨvapalakadeihɨlyɨra. 32Sare kɨrɨ' Gotɨyarɨ gɨmɨnyɨna dara yɨdaangamweigɨnyɨ ‘Saaimonɨmɨre dɨragɨnna lɨmwagasabwi mimaananna!’ Sareigɨ nɨmɨnyɨna ayɨna gɨnyɨma'naawa'gɨzɨ ba'gɨzɨyaigɨ gɨmɨjɨya ja'mweraavɨ jɨvaimwadeigɨnyɨra.” 33Sara wɨdɨna kya' sai wɨdɨna “Naangeigɨ, gɨmɨjɨ kalavuzangevɨna ye'mwannɨgwɨya'najɨ gɨmɨjɨ ye'mwannabalya'najɨ mena yawɨma'nɨweinyɨra.” 34Sara wɨdɨna kya' sai wɨdɨna “Pitaigɨ gɨthɨvanɨge. Sawɨta datharɨkɨ yɨrɨkunyagaa' kukuraayai jaka majadoriyagaa'na dahasaai dahaa' ‘Jizaazarɨ mwanganyainyɨra,’ duthatheigɨnyɨra.”

35Sai yuya sahwaraavɨ wɨdɨna “Sɨnnawɨ kɨgaa' nɨmɨ yɨhɨmaryaaseihi, nɨgwɨpaawɨzɨyajɨ gɨlyajɨ kwaari'masɨvɨlyajɨ mamakwɨyɨ yesaihɨlyɨ. Dazahɨgaa' sarɨmɨ gɨlyɨvɨta pɨrɨ' kɨrɨ' yɨhɨmudaasakeihi daaka?” Wɨdɨna kya' sahwara wɨdɨna “Aawa. Nemɨnyɨ aane pɨrɨ' kɨrɨ' mɨka!” 36Wɨdɨna kye' sai wɨdɨna “Kɨrɨ' dahaa' a'mwei nɨgwɨpaawɨzɨya kɨnɨnnakei sai sa' nayaa maarana! Gɨlya kɨrɨsɨ avaala sara jɨla! A'mwei kwaari'masɨramɨnya maayai gannya yɨvɨsa' nɨgwianna mubɨna yojɨ kwaari'masɨramɨnya pɨrɨ' mubathelyɨra. 37Sare' dare'nesɨ. Dara yɨhɨthɨvanɨge. Gotɨyare bukuyavɨ yɨda'nɨke' yunebanna nɨmɨnyɨ nyɨma'nana! Dare' dɨnɨ' ‘A'mwe kɨwɨnyangɨ galazekɨvaidɨvɨsarajɨ ye'mwagakɨpɨ'delyɨra.’ Sare' dare'nesɨ. Yuna dazahɨrɨsa'na nɨmɨnyɨna yɨda'nɨke daza', sa' yunebanna dahaa' nebwina nyɨ'mwannade'nanyɨ. (A'mwera nɨmɨnyɨna kayaa'na yawɨ'manɨgatabaaibɨ' nabaai sarɨmɨnyɨna yawɨpɨ'devɨna yɨhɨthɨwa.)” 38Sara wɨdɨna kya' sahwara wɨdɨna “Naangeigɨ, yɨthaa, kwaari'masɨramɨnya pɨrɨwaai dathawaalaakana!” Wɨdɨna kye' sai wɨdɨna “Sa' yɨnɨga wi'nanyɨra!”

(Matɨyui 26:36-46; Maakɨ 14:32-42)

39Anga naangebadaa'nyai walyawoka yuyagaa' ayabanna widaawadeva Mugunya Wolivɨnei kaanna wɨna yadaa'nyɨ mɨdɨdɨvɨsara sahwarɨ mɨdɨnna. 40Sara yadaapɨjɨ sɨmagɨ kɨba mena yɨ'mavaka sahwaraavɨ wɨdɨna “Naangerɨ nayaa duzɨla! Yɨjɨwaala'ne kayaa'nanyabwi sarɨmɨnyɨ nyɨhɨbɨramaaradɨka!” 41Wɨdɨna yaka saraavɨ yagalya'ma'na yaka menya sangirɨ' a'mwei sɨla lɨwakadaa'nyɨ wa'daawadevanna wɨna. Mi'na wɨna yaka kwadaai walagina yaka wɨdɨna 42“Nɨmwai, gɨmɨ tewaanna nyawɨra'gɨzɨ kaapɨvananya dai dɨmarasɨ'devaaibɨ' balya'ne da' dɨmarasɨka! Sare' kɨrɨ' nɨmɨrebwi mamɨdɨdɨnna! Aawa. Yune gɨnnyabwina dɨmɨdɨna!” 43Wɨdɨna kya' Sɨgunyavɨdaa'nya ejelɨya pwai gamɨnyawɨnna walaabɨna yaka dɨragɨnna yɨvaimwanna. 44Sagaa' Jizaazai gamɨre kɨlaakejɨkɨ taanga naanga widaa'nyɨ yɨbwakɨda Gotɨyarɨna dɨragɨnna naanga kuna wɨdɨna. Sara wɨdadaa'nyɨyavɨ gamɨre dɨkwagɨlya' tawe'bɨ' yɨma'nyɨna yaka kwaakevakɨna bwalaravaawɨna. 45Bwalaravaawɨna kya' mena wɨdakegaa' daavɨna yaka gamɨreraayawɨnnei kaanna wɨna. Sarei gamɨreraavɨ tɨnna dara wanganake' “Se dakava!” Sɨmunyai taanga wina'daa'nyɨ, sarevɨdaa'nyɨ wa'dapi. 46Sara daka wɨdɨna “Se da' be'ne' wakava! Dɨkaavapɨjɨ Gotɨyarɨ duzɨla! Sarɨmɨnyɨ yɨjɨwaala'ne kayaa'nanyabwi bozɨ nayɨhɨlɨmwagathɨka!”

(Matɨyui 26:47-56; Maakɨ 14:43-50; Jonɨ 18:3-12)

47Sahwai yagaalya' kuna dadaa'nyɨyagaa', yɨthaa, kwalaalyara yɨkabɨna. A'mwe dazai Juthaazai wo'nɨkei, sai sɨvɨlɨrɨdaa'nyɨ pwaraalyaraavɨdaa'nyai, yɨ sahwai wibwarɨdaakuna. Sarei maangwɨdaayɨlaaya ya'nei Jizaazaryaba aya kɨbanna wɨlaabɨna. 48Wɨlaabɨna kya' kɨrɨ' Jizaazai wɨdɨna “Juthaazaigɨ, A'mweraavɨne Kaimɨraayarɨ maangwɨdaayɨlaaya yɨwaanya' yɨ daza' nɨmɨre yɨkamaangeraavɨ nyɨmarɨmwangɨde'na daaka!” 49Wɨdɨna kya' gamɨnyaba daavesara yɨma'nyavɨna yawɨranganna yeva dɨna “Naangeigɨ, dahwaraavɨ nemɨ kwaari'masɨramɨnyasɨ tamakaade'na gɨmɨ gara yawɨ'mwaana?” 50Dɨna kye' gamɨre pwai Gotɨyarɨna Mubɨthɨka Yɨra'de Naangere wɨdaayaderɨ mala yarai tamɨna yaka kadɨka aangasɨmagɨnyɨ' yuna daku'na kya' bwalaraawɨna. 51Sare savɨ Jizaazai tɨnna wanganaka ja'nawɨdɨna “Sabwi mipɨna!” Sara wɨdaka a'mwe dazare kadɨkikyaba ata dathɨwanna yɨna yaka a'mwerɨ ayɨna tewaanya pada'galawɨmwaaihɨna. 52Tewaanya pada'galawɨmwaaihɨna yaka Jizaazai Gotɨyarɨna yɨra'dɨvɨta naangerajɨ Gotɨyare Angevɨ maremwaaidɨvɨsarajɨ a'mwe naangerajɨ sara gamɨnyɨ galalɨmwange'na yɨkabesaraavɨ wɨdɨna “Kuka yɨpalasɨ'naderɨ yɨravɨmaarya'neihi badɨvɨtabaaibɨ' kwaari'masɨramɨnya darɨkajɨ kɨlɨka dajɨ makabɨwaata daihi bɨwaasaihi daaka! 53Yuya yɨrɨkerɨkaavɨ Gotɨyare Angevɨ sarɨmɨjɨ yɨhye'mwannemwaaidɨnyainyɨra. Sare sagaa' galanyɨlɨmwadɨvɨtainyɨ mɨka. Aawa. Dahaa' sagaa' yuna sarɨmɨregaakɨra. Dahaa' jɨhɨnyavɨre dɨragɨnya' wavɨlavadehaakɨra.”

Pitai Jizaazarɨna “Mwanganyainyɨra,” wɨdake'nesɨ.

(Matɨyui 26:57-58,69-75; Maakɨ 14:53,54,66-72; Jonɨ 18:12-18,25-27)

54Sarɨ galalɨmwanna yeva makuna. Gotɨyarɨna Yɨra'de Naangere angevɨna makwina. Sagaa' Pitai kwalyɨ mɨdɨnna yake kwai kɨrɨ' menyaba sangirɨ' mwaalɨna. 55Angwɨrɨka byarihwinaakevɨ dɨke' yɨra'na yeva mwaihulɨna. Sara mwaaidapiyaba dɨvidaa'nyɨ Pitai walaja'nagaimwaaina. 56Sarei dɨkevɨ mwaaidɨ'nyɨ wɨdaayade a'mwe pɨrɨ' tɨnna wanganna. Wɨdaayade daza' baihana'na yaka wɨdɨna “A'mwe dazai kwalyɨ sahwalyɨ ye'mwannemwaaidakɨlyɨ wangamwa'delyɨra.” 57Dɨna kya' kɨrɨ' sai “Aawa,” wɨdɨna yaka wɨdɨna “A'mwe'gɨ nɨmɨ mwanganyainyɨra.” 58Wɨdɨna kya' dɨvi maalɨkegaa' a'mwe pwai tɨnna wanganakei wɨdɨna “Gɨmɨ kwaigɨ sahwarajɨyaigɨnyɨra.” Sara wɨdɨna kya' Pitai wɨdɨna “A'mwaagaigɨ, nɨmɨ sahwainyɨ mɨka!” 59Dɨvi kɨbawa nyihaanya pɨrɨ' mena kabwawa' a'mwe pwai dɨragɨnna wɨdɨna “Naanga nebulyasɨ. A'mwe dazai kwalyɨ ye'mwannemwaaidelyɨra. Sare' dare'nesɨ. Sai a'mwe Galɨlidaasalyɨra.” 60Wɨdɨna kya' kɨrɨ' Pitai wɨdɨna “A'mwaagaigɨ, yagaala dɨwaanya savɨ nɨmɨ myawɨryainyɨra.” Sai kuna dadaa'nyɨ jaahwasa'bɨ' kukuraayai jaka dɨna. 61Jaka dɨna yakegaa' Naangei gɨnyɨma'nyɨna yaka Pitarɨ maranganna. Pitarɨ maranganna kya' sai ayɨna yawɨ'na yagaala Naangei wɨdaka sa'na. Sagaa' dara wɨdake'na “Sawɨta dazarɨkɨ kukuraayai jaka majadori gɨmɨ dahasaai dahaa' dɨthatheigɨnyɨ ‘Jizaazarɨ mwanganyainyɨra.’ ” 62Sara yawɨ'na yaka mwasɨlaanna walyuna yaka kɨnna walyadɨna.

Jizaazarɨ bɨraiyagaalyajɨ wɨdadɨvɨ' mayagaala wɨdesa'nesɨ.

(Matɨyui 26:67-68; Maakɨ 14:65)

63A'mwera gamɨnyɨ galalɨmwanna yeva bɨraiyagaala wɨdadɨvɨ' mala tamɨna 64yadɨvɨ' kwaabɨyɨvɨsasɨ gamɨre tɨnnyarɨ kawaaka yɨrakɨna yeva yɨdaanganna “Gotɨyarɨ wɨ'nawɨdadɨnyabaaibɨ' dɨnedana! Malya' aai gɨramanɨka!” 65Yagaala kayaa'nanya kwalaalya pɨnɨjɨ bɨraizɨka wɨdɨna ye'.

Jizaazai Paailatɨmyabajɨ Erotɨyaryabajɨ daavake'nesɨ.

(Matɨyui 26:59-66; Maakɨ 14:55-64; Jonɨ 18:19-24)

66Nyɨlyai bilyɨrɨ'daasɨyagaa' a'mweraavɨre a'mwe naangera savaakɨyara, Gotɨyarɨna yɨra'dɨvɨta naanga kwarajɨ Kɨwɨja kwarajɨ sara yɨ'bwa'nemwaaina. Sarera gamɨnyɨ kumɨre kaajolɨyaraayawɨnna makuna yɨna yeva wɨdɨna 67“Gɨmɨ Kɨraazɨtɨyaigɨ mwaaidɨzaigɨ dɨnedana! Kɨraazɨtɨyaigɨ daaka?” Dɨna kye' sai wɨdɨna “Nabaai nɨmɨ yɨhɨthɨwɨja' sarɨmɨ dɨragɨnna myawɨralɨmwagi jideihɨlyɨ. 68Nabaai yagaala pɨnɨnna yɨhithaangamuja', nɨmɨre yɨhɨthɨwɨjavɨ dɨnyɨja'najideihi mɨka! Arɨkewɨ. 69Kɨrɨ' dahaasɨ yuya dɨvi kɨgaasɨ A'mweraavɨne Kaimɨraayai Gotɨyare aangasɨmagɨ dɨragɨnya naangesɨyaba walamwaaladelyɨ.” 70Wɨdɨna kya' yuyara wɨdɨna “Sarevɨdaa'nyɨ yuna gɨmɨ saigɨ Gotɨyare Kaimɨraayaigɨ daaka?” Dɨna kye' sai wɨdɨna “Sarɨmɨ saihi dɨwaasa'. Yɨ nɨmɨ sahwainyɨra.” 71Wɨdɨna kya' sahwara dɨnyɨna “Yagaalya' jalɨkurakyaraavɨre' kadɨke' ayɨna be'na wɨ'naajɨwona! Sare' dare'nesɨ. Gamɨre maangikɨdaa'nyɨ yagaala daza' kadɨwa' nemɨ mena wɨ'nɨwona.”

Voafantina amin'izao fotoana izao:

Lukɨ 22: byr

Asongadina

Hizara

Dika mitovy