Lukɨ 21

A'mwe yaanyɨwaake' Gotɨyarɨne nɨgwia wɨjaavake'nesɨ.

(Maakɨ 12:41-44)

1Maranganna yaka baihana'dɨ'nyɨ a'mwe gɨlyɨvɨta naangejɨyara Gotɨyarɨne nɨgwia wakadɨvɨta bukusarɨ nɨgwia sɨhumale wakɨ wakya yɨna. 2Wakɨ wakya yɨna yadaapi tɨnna baihana'na yada a'mwe yaanyɨwaaka wɨgainaka pɨrɨvɨ tɨnna wanganna. Sahɨrɨ' bukusarɨ nɨgwia maalɨka pukaainanyɨkaai yɨrakakesɨ. 3Tɨnna wanganna yaka wɨdɨna “Nebulya'na yɨhɨthɨvanɨge. A'mwe yaanyɨwaaka wɨgainada daza' nɨgwia yɨrakɨvanɨke' a'mwe pwaraavɨ wavɨla'mwakesɨra. 4Sare' dare'nesɨ. Yuya dazara nɨgwia naanga kɨnɨnnakera, sarera Gotɨyarɨne wɨjaaya'ne pimagɨnya maalɨkemɨlɨ'na wɨjaavanɨgasarera. Kɨrɨ' a'mwe daza' yuna wɨgainadaa'nyɨ kɨrɨ' gamɨre nɨgwia yuya yɨrakɨna yɨvanɨke', gamɨnne tɨka wapaaya mubya'ne pɨnɨ mivainyɨ yɨwakesɨra.”

Jeruzaalemɨ kayaaka yɨnya'nesɨ. Aayagaa'ne wɨjɨwaainya'nesɨ.

(Matɨyui 24:1-2; Maakɨ 13:1-2)

5A'mwe pwara Gotɨyare Angevɨna dɨna “Anga dazavɨ sɨla tewaanya paidapaide yɨ'dejɨ mannɨkesɨra. Nabaai Gotɨyarɨne yuya nawɨ'nya, sɨhumale sajɨ aaraare yawakadɨvɨsasɨra.” Sara dɨna yadaapi sai wɨdɨna 6“Dahaa' sarɨmɨ tɨnna wangamanɨgata daza pɨgaa' yɨma'najahaa' sɨla pwai sɨla pwarɨ a'badaa'nyɨ yɨlamɨwɨ'naradei mɨka! Yuya budawasɨ'na yɨpɨja kewɨnɨ bwalaraawadengɨra.”

(Matɨyui 24:3-14; Maakɨ 13:3-13)

7Sahwarɨ yɨdaanganna wie' “Nejɨwaakadɨnyaigɨ, dazaba gathɨhaasagaa' yɨma'nadevaka? Sarevɨ nemɨ yawɨranganaade ‘Sarevɨ sa' yɨma'nadehaa' aya kɨgaa'ne wɨjɨwaainya' berɨvaka?’ ” 8Sara yɨdaanganna kye' sai wɨdɨna “Sarɨmɨ mala nayaa jɨwannyɨla! Kwaasɨyabwina nayɨhɨthɨpɨka! Sarevɨ dare'nesɨ. Sarɨmɨnyawɨnna a'mwe kwalaalyara badɨvɨ' nɨmɨnyɨne yaya' yɨhɨthadɨvɨ' wɨdɨna ‘Nɨmɨ sainyɨ sahwainyɨra.’ Nabaai sahwara yɨhɨthɨpɨ'de ‘Aya kɨgaa' mena yɨma'nɨwakegaakɨra.’ Sara yɨhɨthɨpɨjaraavɨ namɨdɨbɨthɨka! 9Mala naanga bwa'nadɨvɨ' dadaapiya sangɨna sarɨmɨ kadɨka du'nyideihɨlyɨ. Sare sanna sarɨmɨ lɨka nyɨwaainɨpɨdɨka! Aawa. Sare' dare'nesɨ. Sasare dazaza sɨnnawɨ mena yɨma'nojɨ kɨrɨ' yɨrɨka aayarɨ'negaa' yɨme'nya'bɨ' yɨma'nade' mɨka!”

10Sagaa' sahwai wɨdɨna “A'mwe anga naanga pimagɨnyarajɨ a'mwe anga naanga pimagɨnya pwarajɨ mala bwa'nɨpɨ'derera. Nabaai kingɨya pware savaasɨ kingɨya pware sarajɨ mala bwa'nɨpɨ'derera. 11Kwaakevakɨ wɨnɨnya naangenna naangennanya lavirɨ'mwagakadevakɨra. Anga pimagɨdaa'nyɨ anga pimagɨnna a'mweraavɨ mɨjɨka naangejɨ nabalya naangejɨ yɨma'naderera. Sɨgunyavɨ dala nabinabinya naangenna naangennanya wɨjɨwaainya yɨma'naabazangɨ lɨka yɨrɨ'galamihya'ne danganyideihɨlyɨ. 12Kɨrɨ' yuya daza mima'naabyadozɨ sarɨmɨnyɨ ata galayɨhɨlɨmwagapɨjɨ yuna kayaa'na yɨhipɨ'deihɨlyɨ. Lotuangengɨ kotɨya yɨhɨmaryadɨvɨ' kalavuzavɨ yɨhɨmwangɨmwaaihɨpɨ'deihɨlyɨ. Nɨmɨnne yaya savɨna ‘Marulawakaana!’ yawɨ'dɨvɨ' kingɨyarajɨ Ga'maanɨya naangerajɨ saraayawɨnna yɨhɨmakabadɨvɨ' yɨhɨmarɨdaakupɨ'deihɨlyɨ. 13Sasare savɨ nɨmɨnyɨna nayaa jalɨkurakɨna jide'nanyɨ. 14Sare savɨdaa'nyɨ sarɨmɨ yagaala kumɨnyɨ ayɨna wɨja'ne sarɨmɨre sɨmunyarɨ myawɨramaremwaaibɨna! 15Sare' dare'nesɨ. Sarɨmɨre maangikaavɨ nɨmɨ sainyɨ nɨmɨre yagaalya yɨhwakadɨ sɨmunya tewaanya yɨhɨzaavɨdeinyɨra. Sare'na sarɨmɨre yuya yɨkamaanga kwara nɨmɨre yagaala yɨhɨzaavɨwɨja dazavɨ marayɨhɨrɨvɨkɨpɨ'dera mɨka! 16Sɨrɨnɨmaangerajɨ sɨrɨdaasɨrɨgwaaravajɨ avaalyarajɨ sɨrya'mwerajɨ sara yɨkamaangeraayawɨnna yɨhɨmaaripɨ'deihɨlyɨ. Sara yadaapi sarɨmɨnyɨdaa'nya pwaraavɨ tamakɨpɨ'derera. 17Nabaai a'mwe yuyara nɨmɨnne yaya savɨna yawɨ'dɨvɨ' sarɨmɨnyɨna sɨmɨlɨka wimwaalade'nanyɨ. 18Kɨrɨ' sarɨmɨre mɨnyagɨnyangɨya mɨjata aane pwai kwai samwi yala'daavadei mɨka. Arɨkewɨ. 19Sarɨmɨ dɨragɨnna daavapɨjɨyavɨ sarɨmɨre gaalyabwi dɨmaaryideihɨlyɨra.

(Matɨyui 24:15-21; Maakɨ 13:14-19)

20Dɨvi Jeruzaalemɨna aamiyara aawɨlasara bapɨjɨ bahɨhɨpaidapi sarɨmɨ danganyidehaa' jawɨryide ‘Anga naangeba kayaaka yɨgalakya'negaa' mena nebawa mɨka!’ 21Dazagaa' a'mwe anga Juthɨya mwaaibɨzara mugunyangɨna lɨkaanya yɨlaawɨpɨka! Nabaai a'mwe Jeruzaalemɨ mwaaibɨzara yarai yagalya'mavapɨjɨ pɨwɨnnera wɨpɨka! Yɨ anga naangeba mwasɨlaa mwaaibɨzara sahɨba kusawɨ mulaawɨpɨna! 22Dazahɨgaa' yɨ Gotɨyaregaa' kayaa'nanyabwina tɨvɨkɨta ya'negaa' yɨma'nadehaakɨra. Sarevɨdaa'nyɨ yagaala yuya Gotɨyare Bukuyavɨ yɨda'nɨke sa yuna nebwina yɨma'nadennanyɨra. 23Yɨrɨka sasarerɨkaavɨ a'mwe kaimɨraavɨmunnakenna we'! Nabaai kaimɨraayangɨ aamunya ya'daapɨjɨyanna we'! Sare' dare'nesɨ. Kwaaka dazavakɨ taanginya naange' yɨma'nadevakɨra. Gotɨyare sɨnna tɨke' a'mwe dazaraavɨ a'mwe dazamɨlɨkaavɨ waradesɨra. 24Kwaari'masɨramɨnya' yuneba tamaasaderera. Yɨkamaangera kalavuza maa'dɨvɨ' ajɨmya yuyangɨyaraavɨ marɨmwaaihɨpɨ'dere. A'mwe ajɨmya yuyangɨyaraavɨre sɨvɨlyajɨ Jeruzaalemɨ paihɨ'dɨvɨ' dathɨwagemwaaibɨ'derera. Sara yapɨjɨyaraavɨregaa' dɨvidaa'nyɨ ajɨmya yuyangɨya saraavɨregaa'na yɨnahu mi'na kyɨma'nojɨ Jeruzaalemɨ Juyara ayɨna nayaa maremwaaibɨ'desɨra.

(Matɨyui 24:29-31; Maakɨ 13:24-27)

25Nyɨlyarɨjɨ lawerɨjɨ sɨlɨngaamɨnyarɨkaavɨjɨ sɨgunya yunevɨ dala nabinabinya wɨjɨwaainya'ne yɨma'nadengɨ. Nabaai Kwaakevakɨ saalaalyavɨre aalɨmavajɨnaake' yɨ'munya'bɨ' wɨlapida gazamɨlɨsamɨlɨ' wɨlamujangɨ'daawori a'mwe ajɨmya yuyangɨyaraavɨre sɨmunyavɨ yuna kayaaka wigaida lɨka naanga yɨpɨ'derera. 26A'mwera Kwaakevakɨ yɨma'nade sanna yawɨ'dɨvɨ' kumɨre kɨlaakejɨ'na lɨka naanga yɨpɨ'derera. Sare'na kumɨre tɨnnyara jɨhɨmihɨta kɨrɨbɨbɨnya wɨbwaa'naderera. Sare' dare'nesɨ. Sɨgunyavɨya dɨragɨnya dɨ'nake sa yonyɨ yonyɨ yɨma'nade'nanyɨra. 27Daza' kima'nojɨ A'mweraavɨne Kaimɨraayainyɨ yɨraaya pɨjɨkɨ waidavadaa'muri dɨragɨnya naangesɨ byaanna naangesɨyainyɨ nyangabɨ'deinyɨ. 28Dɨvi yuya daza gaai yɨma'nadaawori ‘Gotɨyai nemɨnyɨ ayɨna maarya'negaa' aya kɨba menanyɨra,’ yawɨ'dɨvɨ' sara yɨma'nya'ne'na nayaa dɨragɨnna daavapɨjɨ sarɨmɨre mɨnyagɨnyɨ' kekina dɨhaihɨta jideihɨlyɨ.”

(Matɨyui 24:32-35; Maakɨ 13:28-31)

29Sahwai ke'ba'na yagaala pɨrɨ' kumɨnyɨ wɨdɨna “Yɨta pihɨyɨkɨjɨ yɨta pukaavɨjɨ tɨnna wangadɨvɨsaihɨlyɨ. 30Yɨkwarake' yɨnarɨwaala kya'nojɨ tɨnna wanganapɨjɨ sarɨmɨ saihi jawɨryide ‘Nyɨlyai gaai damaarojɨ tewaanyagaa' aya kɨgaa' yɨma'nade' daaka!’ 31Sasare sahɨbaaibɨsa' sasare sahɨnɨ kima'nojɨ tɨnna wanganapɨjɨ jawɨryide ‘Gotɨyai a'mweraavɨ maremwaaide' mena aya kɨba daaka!’ 32Nebulya'na yɨhɨthɨvanɨge. Sarevɨ a'mwe sagaasara mabalyɨ kyapɨri yuya daza mena yɨma'nadehaa'nanyɨ. Arɨkewɨ. 33Sɨgunyasɨ Kwaakesɨ mena yɨwɨna yojɨ kɨrɨ' nɨmɨre yagaalya' yɨwode' mɨka. Arɨkewɨ.

34Sarɨmɨ mala nayaa jɨwannyɨla! Biyaaya nyawaaihasa'na mɨnyagɨnyɨ' kɨrɨbɨbɨnya nyɨhima'nadɨka! Biyaaya yuyagaa' yaasɨwa'na nadɨvɨ' yɨmaka nyuibɨthɨka! Kɨlaakejɨkɨne sanna sɨmudaadaanya nyawɨ'mwaainɨpɨdɨka! Sasare sabwi sarɨmɨre sɨmunyavɨ kuna dathɨvaina yɨhyojɨ yɨ sagaa' naanya' yaawiarɨ lɨvavu'dɨhɨ'devaaibɨ' Naangere yɨrɨkerɨ' yɨme'nya'bɨ' yɨhɨbɨramaaradeihɨlyɨ. 35Sare' dare'nesɨ. Yɨrɨka dazarɨ' a'mwe Kwaakevakɨ yuneba mwaaihata yuyaraavɨ yɨma'naderɨkɨ. 36Gazagaasagaa' sarɨmɨ nayaa dɨvaihanaryɨla! Sara yadɨvɨ' ‘Nemɨnyɨ dɨragɨnya nejaavana!’ dapi Gotɨyarɨ dɨragɨnna jɨthaanganyɨla! Sarevɨdaa'nyɨ yɨ yɨma'naabathe yuya dazangɨ davɨlayideihɨlyɨra. Sara yapi A'mweraavɨne Kaimɨraayainyaba dɨthaayide'nanyɨra.”

37Yuya yɨrɨkerɨkaavɨ Gotɨyare Angevɨ a'mweraavɨ wɨjɨwaakakelyɨ. Sawɨsavɨ Mugunya Wolivɨ wo'nɨkevɨna se yɨla'daawadelyɨ. 38Sarevɨ yuya a'mwera yuna mwanyavɨna dɨkakwalyodɨvɨ' Gotɨyare Angevna gamɨre yagaalyangɨ kadɨka bu'nya'nera badɨvɨsarera.

Voafantina amin'izao fotoana izao:

Lukɨ 21: byr

Asongadina

Hizara

Dika mitovy