Rômanina 6
6
Ny Batemy
(Jereo Kôl 2,12-13; Tit 3,5-7; 1Pier 3,21-22)
1Inona àry no holazaintsika: mbola hitoetra amin’ny fahotana#6,1 Amin’ny fahotana, ny fahotana tamin’ny fototra izany, indrindra ange ny fitongilanan-dratsy avy aminy mampahafantatra azy. Io no heverin’i Md. Paoly ho toa mpanjaka ratsy manjaka amin’ny izao tontolo izao (5,21; 6,21); toa manam-batana (6,6: ny tenan’ny fahotana); manana ny Lalàna aza ho mpanampy (5,20; 7,5; 1Kôr 15,56); otronin’ny fahafatesana sy mahafaty ny olona rehetra (7,11-13); nahafaty an’i Kristy aza (6,10), sns. ihany va isika, hitomboan’ny fahasoavana? 2Sanatria izany! Hataontsika efa maty ny amin’ny fahotana ahoana no mbola ho velona aminy ihany? 3Moa tsy fantatrareo va fa isika rehetra natao Batemy ho an’i Kristy Jesoa, dia natao Batemy ho amin’ny fahafatesany? 4Koa niara-nalevina taminy tamin’ny Batemy ho amin’ny fahafatesana isika, mba ho tahaka ny nananganana an’i Kristy ho velona, tamin’ny voninahitry ny Ray, no handehanantsika amin’ny fiainam-baovao koa. 5Fa raha nampiraisina taminy tamin’ny fakan-tahaka ny nahafatesany isika, dia ho tahaka izany koa amin’ny fitsanganany; 6fa fantatsika fa ilay olona tranainy#6,6 Ilay olona tranainy. Dikany ara-teny izany. Isika taranak’i Adama fotsiny, mbola tsy nohavaozin’ny fahasoavana ka mbola tsy olom-baovao, no antsoin’i Md. Paoly amin’izany. toetrantsika dia niara-nofantsihana taminy, mba ho levona ny tenan’ny fahotana, ka tsy hanompo ny fahotana intsony isika, 7satria izay maty dia afaka amin’ny fahotana. 8Ary raha niara-maty tamin’i Kristy isika, dia mino fa hiara-belona aminy koa; 9sady fantatsika fa rehefa nitsangan-ko velona Izy dia tsy maty intsony, tsy manan-kery aminy intsony ny fahafatesana. 10Satria ny fahafatesany moa, dia fahafatesana indray maka ny amin’ny fahotana; fa ny fahavelomany kosa, dia fahavelomana ho an’Andriamanitra. 11Ary aoka ho toy izany koa ianareo ka hanao ny tenanareo ho toy ny efa maty ny amin’ny fahotana, fa velona kosa ho an’Andriamanitra ao amin’i Kristy Jesoa.
Asan’ny fahotana sy asan’ny fahamarinana
12Koa aoka ny fahotana tsy hanjaka amin’ny tenanareo mety maty, amin’ny fanarahana ny filàn-dratsiny; 13ary aoka ny rantsam-batanareo tsy hatolotrareo ho an’ny fahotana hataony fiasana fanaovan-dratsy; fa atolory an’Andriamanitra ny tenanareo, izay maty no velona indray, sy ny rantsam-batanareo hataony fiasana fanaovam-pahamarinana. 14Fa tsy hanan-kery aminareo ny fahotana, satria ianareo tsy ambanin’ny Lalàna, fa ambanin’ny fahasoavana.
Afahana amin’ny fahotana ny kristianina
15Ahoana àry: hanota va isika, satria tsy ao ambanin’ny Lalàna, fa ao ambanin’ny fahasoavana? Sanatria izany! 16Tsy fantatrareo va fa na iza na iza anoloranareo tena ho mpanompo mba hanaiky azy, dia mpanompon’izay ekenareo ianareo, na ny fahotana ho amin’ny fahafatesana izany, na ny fanekena ho amin’ny fahamarinana? 17Ary isaorana Andriamanitra, fa na dia nanompo ny fahotana aza anie ianareo, dia nanaiky tao am-po tokoa ny fitsipi-pampianarana natolotra anareo; 18ary rehefa afaka tamin’ny fahotana ianareo, dia tonga mpanompon’ny fahamarinana. 19Miteny araka ny fanaon’ny olona aho, noho ny fahalemen’ny nofonareo: tahaka ny nanoloranareo ny tenanareo hanompo ny fahalotoana sy ny tsy fahamarinana hahatanteraka ny tsy fahamarinana, no aoka hanoloranareo ny rantsam-batanareo ankehitriny hanompo ny fahamarinana hahatanteraka ny fahamasinana.
20Fa fony mpanompon’ny ota ianareo, dia olon-ko azy tamin’ny fahamarinana#6,20 Olon-ko azy tamin’ny fahamarinana; izany hoe, tsy nanompo ny fahamarinana velively ianareo..
Ireo vokatry ny fahotana sy vokatry ny fahamarinana 21Inona àry no vokatra azonareo tamin’izay? Vokatra mahamenatra anareo fe ankehitriny, fa fahafatesana no iafarany. 22Ary ankehitriny kosa, rehefa afaka tamin’ny fahotana ianareo, ka efa tonga mpanompon’Andriamanitra, dia ny fahamasinana no vokatra azonareo, ary ny fiainana mandrakizay no hiafaranareo. 23Fa ny fahafatesana no tambin’ny ota, ary ny fiainana mandrakizay ao amin’i Kristy Jesoa Tompontsika kosa no fanomezan’Andriamanitra.
Voafantina amin'izao fotoana izao:
Rômanina 6: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.