Salamo 34:4-11

Miaraha amiko ianareo hankalaza an’i Iaveh: aoka isika hiara-midera ny Anarany. Nitady an’i Iaveh aho, dia nihaino ahy Izy, ary nanafaka ahy tamin’ny tahotro rehetra. Raha mitodika azy ny olona dia miramiran’ny hafaliana, ary tsy safo-kenatra ny tavany. Niantso ity olo-mahantra, dia nohenoin’i Iaveh, sy novonjeny tamin’ny fahoriany rehetra. Ny Anjelin’i Iaveh mitoby, manodidina izay matahotra Azy, ka mamonjy azy. Andramo ka zahao ange izany hatsaran’i Iaveh. Sambatra ny olona manao Azy ho fialofany. Matahora an’i Iaveh ianareo olo-masiny, fa tsy ho voan’ny fahantrana izay matahotra Azy. Ny liona tanora mety noana aman-tsy ampy hanina ihany, fa izay mitady an’i Iaveh tsy orin-java-tsoa akory.