Salamo 119
119
SALAMO 119#119 Ity Salamo ity dia misy tarehin’abidy 22, izay mitondra andininy 8 avy. Araka ny filazan’i Masindahy Ambroise dia sahaza indrindra ho an’ny kristianina ity Salamo ity, satria ao no ahitana ny fotopototry ny zavatra tsy maintsy atao. Ny didin’Andriamanitra dia hita amin’ny andininy rehetra afa-tsy amin’ny faha-122. (Volgata 118)
Fiderana ny lalàn’Andriamanitra
Alef
1Sambatra ny tsy manan-tsiny amin’ny lalany,
izay mandeha araka ny lalàn’i Iaveh.
2Sambatra izay mitana ny fampianarany;
izay mitady azy amin’ny fony rehetra,
3tsy mba manao ratsy,
fa mandeha eo amin’ny lalany.
4Efa namoaka ny didinao ianao;
mba hitandreman’ny olona azy tsara.
5Enga anie ka ho voahitsy ny lalako,
mba hitandremako ny didinao!
6Dia tsy hahazo henatra aho,
mijery ny didinao rehetra.
7Hidera Anao amin’ny hitsim-poko aho,
amin’ny fianarana ny didin’ny fahamarinanao.
8Sitrako ny mitandrina ny didinao:
aza dia ilaozanao tokoa aho.
Bet
9Hataon’ny zatovo ahoana no fahatonga ny lalany ho madio?
Ny fitandremany tena araka ny teninao.
10Mitady Anao amin’ny foko rehetra aho;
aza avela hania lavitra ny didinao.
11Tahirizo miafina ato am-poko ny teninao,
mba tsy hanotako aminao.
12Hisaorana anie Ianao, ry Iaveh!
Ampianaro ny didinao aho.
13Ny molotro no amisavisako
ny fitsipika rehetra naloaky ny Vavanao.
14Ny manaraka ny fampianaranao dia ahazoako fifaliana
toy ny hananako ny harena rehetra.
15Sitrako ny misaintsaina ny didinao,
sy ny mahira-maso amin’ny lalanao.
16Ataoko fifaliana ho ahy ny lalànao;
tsy hohadinoiko mandrakizay ny teninao.
Gimel
17Anehoy hatsaram-po ny mpanomponao, mba ho velona aho,
ka hitandrina ny teninao.
18Sokafy ny masoko mba hahitako
ny zava-mahagaga ao amin’ny lalànao.
19Vahiny aho eto an-tany:
aza afenina ahy ny didinao.
20Ny fanahiko torotoron’ny faniriana
izay mampitodika azy lalandava any amin’ny didinao.
21Mandrahona ny mpiavonavona Ianao, dia ireo olom-boaozona,
izay mania lavitra ny didinao.
22Halaviro ahy ny henatra amam-panesoana,
fa mitandrina ny fampianaranao aho.
23Na dia mipetraka aza ny mpanapaka sy miteny mamely ahy,
mbola hisaintsaina ny lalànao ihany ny mpanomponao.
24Eny, ny fampianaranao no fahafinaretako,
izy no olona mpanolo-tsaina ahy.
Dalet
25Miraikitra amin’ny vovoka ny fanahiko;
velomy indray aho araka ny teninao.
26Naposako Anao ny lalako, dia hoy ny navalinao ahy:
Ampianaro ny lalànao aho.
27Ampafahantaro ahy ny lalan’ny didinao,
dia hisaintsaina ny fahagagana ataonao aho.
28Azon’alahelo ny fanahiko ka latsa-dranomaso,
atsangano indray aho araka ny teninao.
29Halaviro ny lalan’ny lainga aho,
fa omeo ahy ny soa ao amin’ny lalànao.
30Nifidy ny lalan’ny fahamarinana aho,
ataoko eo imasoko ny didinao.
31Nifikitra tamin’ny fampianaranao aho;
ry Iaveh, aza avela ho azon-kenatra aho.
32Mihazakazaka eo amin’ny lalan’ny didinao aho,
fa nohalalahinao ny foko.
He
33Ry Iaveh ô, ampianaro ny lalan’ny didinao aho,
mba hitandremako azy hatramin’ny faran’ny aiko.
34Omeo fahazavan-tsaina aho, hitandremako ny lalànao:
sy hankatoavako azy amin’ny foko rehetra.
35Tariho aho amin’ny lalan’ny didinao,
fa ao no hahitako fahasambarana.
36Atongilano ho amin’ny fampianaranao ny foko,
fa tsy ho amin’ny fahazoan-tombony.
37Avilio tsy hahita izay zava-poana ny masoko;
ataovy velona ao amin’ny lalànao aho.
38Tovy amin’ny mpanomponao ny fampanantenanao,
izay nataonao ho an’ny olona matahotra Anao.
39Esory amiko ny fahafaham-baraka izay atahorako;
fa tsara ny didinao.
40Mirehi-paniriana hanaraka ny didinao aho,
velomy amin’ny fahamarinanao aho.
Vao
41Ho tonga amiko anie ny famindram-ponao, ry Iaveh ô,
sy ny famonjenao araka ny teninao!
42Ary ho haiko valiana izay maniratsira ahy,
fa mitoky amin’ny teninao aho.
43Aza esorina amin’ny vavako, tsy hisy intsony, ny tenim-pahamarinana,
fa ny didinao no antenaiko.
44Sitrako tsy tapaka ny mitandrina ny didinao;
mandrakariva sy mandrakizay.
45Handeha amin’ny malalaka aho,
fa ny didinao no katsahiko.
46Hilaza ny fampianaranao eo anatrehan’ny mpanjaka aho,
ka tsy ho menatra.
47Ny didinao no hataoko fahafinaretako,
fa tiako izy.
48Hanandratra ny tanako amin’ny didinao, izay tiako, aho,
ary hisaintsaina ny lalànao.
Jain
49Tsarovy ny teny nomenao ny mpanomponao,
izay ampiorenanao ny fanantenako.
50Izany no fiononako ao anatin’ny fahoriako,
dia ny hameloman’ny teninao ahy indray.
51Manaraby ahy fatratra ireo mpiavonavona,
fa tsy mba mivily amin’ny lalànao aho,
52Ny didinao tamin’ny andro taloha no eritreretiko,
ry Iaveh, ka mionona aho.
53Azon’ny hatezerana aho noho ny amin’ny ratsy fanahy,
izay mahafoy ny lalànao.
54Ny lalànao no fihirako,
eo amin’ny fitoerana fivahiniako.
55Mahatsiaro ny Anaranao aho nony alina, ry Iaveh ô,
ka mitandrina ny lalànao.
56Izao no anjara nomena ahy:
mitandrina ny didinao aho.
Het
57Ny anjarako, ry Iaveh, lazaiko izany,
dia ny mitandrina ny teninao.
58Mitalaho aminao amin’ny foko rehetra aho;
mamindrà fo amiko araka ny teninao.
59Mieritreritra ny làlako aho,
ka mampiverina ny diako ho araka ny fampianaranao.
60Midodododo aho, fa tsy mangataka andro,
hitandrina ny didinao.
61Manodidina ahy ny fandriky ny ratsy fanahy,
fa tsy manadino ny lalànao aho.
62Mifoha mamatonalina hidera Anao aho,
noho ny fitsaràn’ny fahamarinanao.
63Sakaizan’izay rehetra matahotra Anao aho;
mbamin’izay mitandrina ny didinao.
64Henika ny hatsaram-ponao ny tany, ry Iaveh,
ampianaro ny lalànao aho.
Tet
65Nanehoanao ny hatsaram-ponao ny mpanomponao,
araka ny teninao, ry Iaveh ô!
66Ampianaro ny fahalalana marina#119,66 Ampianaro ny fahalalana marina...aho. Izany hoe ny fahamalinana sy ny fahendrena mba handosirako ny ratsy sy hankanesako amin’ny tsara. amam-pahafantarana aho;
fa matoky ny didinao.
67Naniasia aho, fony mbola tsy naetry,
fa mitandrina ny teninao aho ankehitriny.
68Tsara fo sy manao soa Ianao,
ampianaro ny lalànao aho.
69Misy mpiavonavona, mamoron-dainga hamelezena ahy;
izaho kosa, mitandrina ny didinao amin’ny foko rehetra.
70Ny fon’izy ireo tsy mihontsina hoatra ny sabora,
izaho kosa mahita ny fahafinaretako ao amin’ny lalànao.
71Soa ho ahy ny naetry
mba hianarako ny didinao.
72Ny lalàna naloaky ny vavanao no tsara ho ahy;
mihoatra noho ny volamena sy volafotsy miavosa.
Iôd
73Ny Tananao no nanao ahy sy namolavola ahy;
omeo fahazavan-tsaina aho, hianarako ny didinao.
74Hifaly amin’ny fahitana ahy, izay matahotra Anao,
fa mitoky amin’ny teninao aho.
75Fantatro, ry Iaveh, fa marina ny fitsarànao;
tamin’ny fahamarinanao no nanetrenao ahy.
76Ny hatsaram-ponao anie no ho fiononako,
araka ny teny nomena ny mpanomponao.
77Ho tonga amiko anie ny fiantranao ary ho velona anie aho,
fa ny lalànao no fahafinaretako.
78Aoka ny mpiavonavona nampahory ahy tsy an-drariny ho menatra;
izaho kosa misaintsaina ny didinao.
79Aoka hitodika ho atỳ amiko izay matahotra Anao,
mbamin’izay mahalala ny fampianaranao.
80Ny foko manontolo anie ho amin’ny lalànao,
mba tsy ho menatra aho.
Kaf
81Hanìnin’ny fanahiko ny famonjenao;
ny teninao no antenaiko.
82Valalanina ny masoko miandry ny fampanantenanao,
hoy aho: «Rahoviana no hampionona ahy Ianao?»
83Fa efa tahaka ny siny hoditra#119,83 Efa tahaka ny siny hoditra: rehefa maina izany hoditra izany dia miketrona; ka manambara ny toetoetry ny mpamorona Salamo azon’ny fahoriana mafy. mitanina amin’ny setroka aho,
nefa tsy mba manadino ny lalànao.
84Manana andro firy moa ny mpanomponao?
Mba rahoviana no hamaizanao izay manenjika ahy?
85Mihady lavaka hahaverezany ahy ireo mpiavonavona,
izay mpanohitra ny lalànao.
86Ny didinao rehetra dia fahamarinana;
mpanenjika ahy tsy ahoan-tsy ahoana izy ireo: vonjeo aho.
87Efa saiky nolevoniny eto amin’ny tany aho,
fa izaho kosa tsy mba nahafoy ny didinao.
88Velomy amin’ny hatsaram-ponao aho,
dia hankatò ny fampianaran’ny vavanao.
Lamed
89Iaveh ô, ny teninao,
miorina mandrakizay any an-danitra.
90Maharitra amin’ny taona rehetra mifandimby ny fahamarinanao;
nanorina ny tany Ianao, dia maharitra izy.
91Araka ny lalànao no mbola aharetan’ny zavatra rehetra mandraka androany;
fa manaiky ny fandaharanao ny zavatra rehetra.
92Raha tsy ny lalànao no nataoko fahafinaretako,
dia efa maty tamin’ny fahoriako aho toy izay.
93Tsy hohadinoiko mandrakizay ny didinao,
fa izy no namelomanao ahy indray.
94Anao aho: dia vonjeo,
fa mitady ny didinao.
95Miandry ahy ny ratsy fanahy mba hamono ahy:
mihaino tsara ny fampianaranao aho.
96Efa hitako fa misy fetra avokoa ny lavorary,
ny didinao no tsy manam-petra.
Mem
97Endrey izany fitiavako ny lalànao!
izy no fisaintsainako tontolo andro.
98Ataonao hendry noho ny fahavaloko aho,
amin’ny didinao,
satria ato amiko mandrakariva izy.
99Hendry noho ny mpampianatra ahy rehetra aho
satria ny fampianaranao no fisaintsainako.
100Manan-tsaina noho ny anti-panahy aho,
satria mitandrina ny didinao.
101Hazoniko lavitra ny lalan-dratsy rehetra ny tongotro,
mba hitandremako ny teninao.
102Tsy mba miala amin’ny didinao aho,
fa Ianao no nampianatra ahy.
103Endrey, mamy loatra amin’ny lanilaniko ny teninao,
manoatra noho ny tantely amin’ny vavako.
104Ny didinao dia ahatongavako ho manan-tsaina;
noho izany dia mankahala ny lalan’ny fitaka aho.
Non
105Ny teninao dia fanilo#119,105 Ny teninao dia fanilo: izany hoe, ny lalànao dia fanilo manazava ny diako, ary fanazavana manazava ny lalana izay alehako. Zahao Ohab 6,25; 2Pier 1,49. mialoha ny diako,
fahazavana eny an-dalako.
106Efa nianiana aho, ary tsy hivadika amin’izany,
fa hitandrina ny didim-pahamarinanao.
107Tonga amin’ny fara fahoriana aho,
Iaveh ô, velomy indray aho araka ny teninao.
108Ankasitraho, ry Iaveh, ny fanatitra aloaky ny molotro,
ary ampianaro ahy ny didinao.
109Hatenda lava izao ny aiko,
nefa tsy manadino ny lalànao aho.
110Mamela-pandrika hamelezana ahy ny ratsy fanahy,
nefa tsy mania lavitra ny didinao aho.
111Ny fampianaranao no ananako mandrakizay mba ho lova,
fa fifalian’ny foko izy.
112Nandraika ny foko hitandrina ny didinao aho,
mandrakizay, hatramin’ny farany.
Samek
113Halako ny olona miroa fo,
ary tia ny lalànao aho.
114Fialofako sy ampingako Ianao
mitoky amin’ny teninao aho.
115Mialà amiko ianareo ratsy fanahy,
dia hitandrina ny didin’Andriamanitra aho.
116Tohano araka ny fampanantenanao aho, mba ho velona,
ary aza avela hahazoako henatra ny fanantenako.
117Aoka ho tohako Ianao, dia ho voavonjy aho,
ka ho eo imasoko mandrakariva ny lalànao.
118Ataonao tsinontsinona izay rehetra mania amin’ny lalànao;
satria lainga foana ny hafetseny.
119Arianao toy ny tain-drendrika ny ratsy fanahy rehetra amin’ny tany;
noho izany dia tiako ny fampianaranao.
120Mangovitra noho ny tahotra ny nofoko eo anatrehanao,
ary matahotra ny fitsarànao aho.
Ain
121Manaraka ny rariny sy ny fahamarinana aho;
aza dia afoinao ho an’ny mpampahory ahy aho.
122Aoka Ianao hiantoka ny fananan’ny mpanomponao,
ary aoka tsy hampahorin’ny mpiavonavona aho.
123Valalanina ny masoko miandry ny famonjenao,
sy ny fampanantenanao ny fitsarana marina.
124Ento araka ny hatsaram-ponao ny mpanomponao,
ary ampianaro ny lalànao aho.
125Mpanomponao aho, ka omeo fahazavan-tsaina,
mba hahalalako ny fampianaranao.
126Fotoana tokony hiraharahan’i Iaveh izao,
fa mandika ny lalànao izy ireo.
127Noho izany dia tia ny didinao aho,
mihoatra ny volamena, sy ny volamena madio.
128Noho izany dia hitako fa marina avokoa ny didinao;
halako ny lalam-pitaka rehetra.
Fe
129Mahagaga ny fampianaranao,
ka mitandrina azy ny fanahiko.
130Mahazava, ny famelarana ny teninao;
ka mampahazo saina ny olona tsotra.
131Atanatànako ny vavako, dia mitroka aho,
fa lian-kiteny ny didinao aho.
132Atodiho ahy ny Tavanao, ka mamindrà fo amiko;
fa rariny izany ho an’izay tia ny Anaranao.
133Afikiro amin’ny teninao ny diako,
ary aza avela hisy haratsiana hanjaka ato amiko.
134Afaho amin’ny fampahorian’ny olombelona aho,
dia hitandrina ny didinao.
135Ampamirapirato amin’ny mpanomponao ny Tavanao,
ary ampianaro ny lalànao aho.
136Mandrotsa-dranomaso mandriaka ny masoko,
noho ny tsy fitandreman’ny olona ny lalànao.
Tsade
137Marina Ianao, ry Iaveh,
ary araka ny rariny ny fitsarànao.
138Namoaka ny fampianaranao Ianao araka ny rariny,
sy ny fahamarinana lavorary.
139Mandritra aina ahy ny fahazotoako,
satria manadino ny teninao ireo mpanohitra ahy.
140Voazaha toetra tanteraka ny teninao,
ka tia azy ny mpanomponao.
141Sady kely aho no mavomavo,
fa tsy mba manadino ny didinao.
142Ny fahamarinanao dia fahamarinana mandrakizay#119,142 Fahamarinana mandrakizay: izany hoe, tsy miova ary tsy mihena na oviana na oviana.,
ary ny lalànao dia fahamarinana.
143Tratry ny fahoriana aman-tebiteby aho;
ny didinao no fahafinaretako.
144Marina mandrakizay ny fampianaranao,
omeo ny fahazavan-tsaina aho, mba ho velona.
Kôf
145Miantso Anao amin’ny foko rehetra aho,
valio aho, ry Iaveh,
mba hitandremako ny lalànao.
146Miantso Anao aho, ka vonjeo,
mba hanarahako ny fampianaranao.
147Alohan’ny mazava atsinanana dia efa mitaraina aminao aho;
matoky ny teninao aho.
148Mialoha ny fiambenan’alina ny masoko,
mba hisaintsaina ny teninao.
149Henoy araka ny hatsaram-ponao ny feoko;
velomy aho indray, ry Iaveh, araka fandaharanao.
150Efa mby akaiky ireo mpanaraka ny ratsy,
izay nihataka tamin’ny lalànao.
151Akaiky Ianao, ry Iaveh,
ary fahamarinana avokoa ny didinao.
152Efa fantatro ela ny amin’ny fampianaranao,
fa naorina ho mandrakizay izy.
Resh
153Jereo ny fahoriako, ka vonjeo aho;
fa tsy manadino ny lalànao aho.
154Arovy aho amin’ny adiko, ary valio ny ratsy natao tamiko;
velomy indray aho araka ny teninao.
155Lavitra ny ratsy fanahy ny famonjena,
satria tsy asiany raharaha ny lalànao.
156Betsaka ny famindram-ponao, ry Iaveh,
velomy indray aho araka ny fandaharanao.
157Maro ny mpanenjika ama-mpandrafy ahy;
tsy mba mihataka amin’ny fampianaranao aho.
158Tsiravina aho, mahita ny mpivadika,
satria tsy mba mitandrina ny teninao ireny.
159Dinihonao fa tiako ny didinao;
Iaveh ô, velomy indray aho araka ny hatsaram-ponao.
160Fahamarinana no tontalin-kevitry ny teninao,
ary mandrakizay avokoa ny lalàn’ny fahamarinanao.
Shin
161Enjehi-mpanjaka tsy ahoan-tsy ahoana aho;
ny teninao no hany atahoran’ny foko.
162Mifaly amin’ny teninao aho,
hoatra ny mahazo babo be.
163Halako, mahatsiravina ahy ny lainga;
tia ny lalànao aho.
164Midera Anao impito isan’andro aho,
noho ny lalàn’ny fahamarinanao.
165Be fiadanana izay tia ny lalànao;
ary tsy misy zava-manafintohina azy.
166Manantena ny famonjena aho, ry Iaveh,
ary manaraka ny didinao.
167Mitandrina ny fampianaranao ny fanahiko,
ary miraiki-pitia amin’izany izy.
168Mitana ny fandaharanao amana fampianaranao aho;
fa eo anatrehanao avokoa ny lalako.
Tao
169Ho tonga eo anatrehanao anie ny fitarainako, ry Iaveh ô;
Omeo fahazavan-tsaina araka ny teninao aho.
170Ho tonga hatrany aminao anie fifonako,
afaho araka ny teninao aho.
171Hamoaka fiderana Anao anie ny molotro,
satria nampianarinao ahy ny lalànao.
172Hitory ny teninao anie ny lelako,
fa marina avokoa ny didinao.
173Hivelatra hamonjy ahy anie ny tananao;
fa efa nifidy ny fandaharanao aho.
174Maniry ny famonjenao aho, ry Iaveh ô,
ary ny lalànao no fahafinaretako.
175Ho velon-kidera Anao anie ny fanahiko,
ary ho avy hamonjy ahy ny fitsarànao.
176Mania toy ny ondry very aho: tadiavo ny mpanomponao,
fa tsy mba manadino ny didinao aho.
Voafantina amin'izao fotoana izao:
Salamo 119: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.