Matio 16

Angatahana famantarana avy any an-danitra i Jesoa

(Jereo Mk 8,11-13; Lk 11,16-29; Mt 12,38-39; Lk 12,54-56)

1Ary nanatona Azy ny Farisianina sy ny Sadoseanina haka fanahy Azy, ka nangataka taminy mba hampiseho aminy famantarana avy any an-danitra. 2Namaly Izy ka nilaza taminy hoe: «Nony hariva ny andro, dia hoy ianareo: Ho tsara ny andro, fa mena ny lanitra; 3nony maraina indray: Ho ratsy ny andro, fa somary mena sy manjombona ny lanitra. 4Koa hainareo ny maminany amin’ny endriky ny lanitra, fa ny famantarana ny fotoana#16,4 Ny famantarana ny fotoana. Ny fotoana fahatongavan’ny Mesia indrindra izany. kosa tsy hainareo. Ity taranaka ratsy sy mpijangajanga ity dia mitady famantarana, fa tsy hisy famantarana hafa homena azy afa-tsy ny an’i Jônasy mpaminany ihany.» Dia nilaozany teo ireo, ka lasa Izy.

Ny lalivain’ny Farisianina sy ny Sadoseanina

(Jereo Mk 8,14-21; Lk 12,1)

5Fa nony efa tafita ny rano izy ireo, dia hadinon’ny mpianatra ny nitondra mofo. 6Ary hoy i Jesoa taminy: «Tandremo fandrao azon’ny lalivain’ny Farisianina sy ny Sadoseanina ianareo.» 7Dia nieritreritra izy ireo ka nanao anakampo hoe: «Noho isika tsy nitondra mofo izay.» 8Ary i Jesoa nahalala izany ka nanao hoe: «Ry kely finoana, nahoana ianareo no mihevitra anakampo, noho ianareo tsy mitondra mofo? 9Moa tsy mbola fantatrareo ihany, sa tsy tsaroanareo fa mofo dimy dia ampy olona dimy arivo, ary mbola firy harona no nangoninareo? 10Ary mofo fito dia ampy olona efatra arivo, sady mbola firy sobika koa no nangoninareo? 11Ahoana no tsy ahalalanareo fa tsy ny mofo no nantsoiko tamin’Izaho nilaza taminareo hoe: Tandremo ny lalivain’ny Farisianina sy ny Sadoseanina?» 12Izay vao fantatr’izy ireo fa tsy ny lalivay amin’ny mofo no nasainy notandremana, fa ny fampianaran’ny Farisianina sy ny Sadoseanina.

Fiekem-pinoan’i Piera sy fahefana ambony nomena azy

(Jereo Mk 8,27-30; Lk 9,18-21)

13Ary nony tonga tany amin’ny faritany atao hoe: Sezarean’i Filipo i Jesoa dia nanontany ny mpianany hoe: «Ataon’ny olona ho iza moa ny Zanak’olona?» 14Ary hoy ireo: «Ny sasany manao hoe: Joany Batista, ny sasany Elia, ary ny sasany Jeremia, na ny anankiray amin’ny mpaminany.» 15Dia hoy i Jesoa taminy: «Fa ianareo kosa, ataonareo ho iza Aho?» 16Namaly i Simôna Piera ka nanao hoe: «Ianao no Kristy zanak’Andriamanitra velona.» 17Dia namaly i Jesoa ka nanao taminy hoe: «Sambatra ianao, ry Simôna zanak’i Joany, fa tsy ny nofo aman-dra no nanambara izany taminao, fa ny Raiko izay any an-danitra. 18Ary Izaho milaza aminao fa ianao no Piera (vatolampy), ary eo ambonin’izany vatolampy izany no hanorenako ny Egliziko, ary ny vavahadin’ny afobe tsy haharesy azy#16,18, 19 Ianao... no hanorenako, sns. Raha i Piera no nanorenany ny fanjakany etỳ an-tany, moa tsy tokony ho i Piera sy ny dimbiny va no Mpifehy ao mandra-pahatapitr’izao tontolo izao? Ny fiorenany amin’i Piera koa no antony tsy haharesen’ny herin’ny afobe azy.. 19Homeko anao ny fanalahidin’ny fanjakan’ny lanitra, ka izay rehetra hofehezinao etỳ an-tany dia ho voafehy koa any an-danitra, ary izay rehetra hovahanao etỳ an-tany dia ho voavaha koa any an-danitra.» 20Ary tamin’izay, dia norarany ny mpianany mba tsy hilaza amin’ny olona fa Izy no Kristy.

Fanambaràna voalohany ny Fijalian’i Jesoa

(Jereo Mk 8,31-33; Lk 9,22)

21Hatramin’izay vao noborahin’i Jesoa tamin’ny mpianany fa tsy maintsy ho any Jerosalema Izy, ary hampijalin’ny loholona sy ny mpanora-dalàna mbamin’ny lohandohan’ny mpisorona, dia hovonoina, ary hitsangana amin’ny maty rehefa afaka hateloana. 22Ary naka Azy hitanila kely i Piera ka niteny Azy mafy hoe: «Sanatria, Tompo, raha hihatra aminao izany!» 23Fa nihodina Izy ka nilaza tamin’i Piera hoe: «Mialà amiko, ry Satana#16,23 Ry Satana. Izany hoe mpanohitra, mpaka fanahy, mpanoro hevi-dratsy; ary i Piera no antsoina toy izany, dia noho izy nahatafintohina an’i Jesoa, naka fanahy azy tsy hijaly, nefa izany no fandaharan’Andriamanitra.! manafintohina Ahy ity ianao, satria tsy mihevitra araka ny hevitr’Andriamanitra, fa araka ny an’ny olona.»

Toetra ilaina hanarahana an’i Jesoa

(Jereo Mk 8,24–9,1; Lk 9,23-27)

24Ary tamin’izay i Jesoa dia nilaza tamin’ny mpianany hoe: «Raha misy te hanaraka Ahy, aoka izy handà ny tenany, sy hitondra ny hazofijaliany, ka hanaraka Ahy.»

(Jereo Mt 10,38-39; Lk 14,27; 17,33; Jn 12,25-26)

25«Fa izay te hamonjy ny ainy no hahavery azy, ary izay hahafoy azy noho ny amiko no hahazo azy, 26Inona no soa ho azon’ny olona raha mahazo izao tontolo izao izy, nefa very ny fanahiny? Ary inona no homen’ny olona ho takalon’ny fanahiny? 27Fa ny Zanak’olona dia ho avy#16,27-28 Ho avy, sns. Amin’ny farandro izany; fa fihaviana hafa indray no ilay ho tratran’ny sasany eto: angamba ny handravana an’i Jerosalema izany., amin’ny voninahitry ny Rainy miaraka amin’ny Anjeliny, ka amin’izay dia hamaly ny olona araka ny nataony Izy. 28Lazaiko aminareo marina tokoa, fa ny sasany eto dia tsy hanandrana fahafatesana, raha tsy efa mahita ny Zanak’olona avy, amin’ny fanjakany.»

Voafantina amin'izao fotoana izao:

Matio 16: MBC

Asongadina

Hizara

Dika mitovy