Jeremia 47
47
Tenin’Andriamanitra mamely ny Filistinina
(Jereo Jôs 13,2; Am 1,6-8; Sôf 2,4-7; Ezek 25,15-17)
1Tenin’i Iaveh tonga tamin’i Jeremia mpaminany, ny amin’ny Filistinina, fony i Faraôna#47,1 Fony i Faraôna. Izany dia milaza andro araka ny fifandimbiasan’ny taona; nefa tsy miseho mazava amin’ny tantara izay ahafantarana marina an’izany. tsy mbola namely an’i Gazà.
2Izao no lazain’i Iaveh:
Indro, misy rano be misondrotra avy any avaratra;
dia tonga sahala amin’ny renirano maria tondraka,
ka hanafotra ny tany mbamin’izay rehetra ao aminy,
na ny tanàna, na ny mponina.
Mihorakoraka ny lehilahy,
ary midradradradra avokoa ny mponina amin’ny tany.
3Rehefa re ny fikatraokan’ny tongo-tsoavaliny,
sy ny firodorodon’ny kalesiny aman-tabataban’ny kodiarany:
tsy miherika izay zanany intsony ny rainy,
fa efa miraviravy tanana fatratra ny olona.
4Izany dia noho ny fahatongavan’ny andro
handringanana ny Filistinina#47,4 Ny Filistinina. Izy ireo, dia avy tamin’ny Nosy Kaftora, dia ny nosy Kreta izany, araka ny hevitry ny maro. Jereo Deter 2,3; Am 9,7. rehetra;
handripahana an’izay sisa amin’ny mpikambana
amin’i Tira sy i Sidona;
fa horavan’i Iaveh ny Filistinina,
izay sisa amin’ny nosy Kaftôra.
5Tonga mangadihady loha i Gazà#47,5 Tonga mangadihady loha i Gazà: Nibory loha noho ny fisaonana.;
levona i Askalôna,
mbamin’ny lohasaha manodidina azy.
Mandra-pahoviana ianao no mbola hiteti-tena ihany#47,5 Mbola hiteti-tena ihany. Marika ny fisaonana koa izany fitetehana tena izany.?
6Indrisy, ry sabatr’i Iaveh,
mandra-pahoviana no tsy hanam-pitsaharana ianao?
Midira indray ao amin’ny tranonao,
miatoa ary mandria!
7Hataonao ahoana moa no fitsahatra,
fa nomen’i Iaveh didy ianao?
Mankany Aksalôna sy any amoron-dranomasina
no itarihany azy.
Voafantina amin'izao fotoana izao:
Jeremia 47: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.