Bokin’i Daniela 9
9
FAMINANIANA MOMBA IREO HERINANDRO FITOPOLO
Vavak’i Daniela
(Jereo Dan Gr 3,25-45; Bar 1–2; Neh 1,5-11; 9)
1Tamin’ny taona voalohany#9,1 Tamin’ny taona voalohany: Izany hoe, 538 taona talohan’i Jesoa Kristy, fotoana nahitan’i Daniela ny nionganan’ny fanjakana Kaldeanina; fa ny fanjakan’ny Meda-Persa no nisandratra hanapaka azy. nanjakan’i Dariosa, zanak’i Asoerosa, taranaky ny Meda, nampanjakaina tamin’ny fanjakan’ny Kaldeanina: 2tamin’ny taona voalohany nanjakany izaho Daniela nandinika, tamin’ny famakiana ny boky#9,2 Nandinika tamin’ny famakiana ny boky: Ny bokin’ny mpaminany talohany, indrindra ny an’i Jeremia, izay nilaza fa haharitra fitopolo taona ny faharavàn’i Jerosalema (Jer 25,11 sy ny manaraka; 29,10). Izany taona izany niantomboka tamin’ny taona 606, ka efa ho tapitra tamin’izay; koa italahoan’i Daniela Andriamanitra mba hanatanteraka ny teniny., ny isan’ny taona izay nanaovan’i Iaveh teny tamin’i Jeremia mpaminany ka tsy maintsy tanterahina ho tapitra amin’ny faharavàn’i Jerosalema, dia fitopolo taona izany. 3Natodiko any amin’ny Tompo Andriamanitra ny tavako ary nioman-kivavaka sy hifona amin’ny fifadian-kanina sy amin’ny lasàka aman-davenona aho.
4Nivavaka tamin’i Iaveh Andriamanitro aho, ary niaiky heloka, nanao hoe: «Indrisy, ry Tompo, Andriamanitra lehibe sy mahatahotra, mitandrina ny fanekena amam-pamindram-po amin’izay tia Anao sy mitandrina ny didinao, 5izahay efa nanota sy nahavita heloka aman-dalànao. 6Tsy nahinao ny mpaminany mpanomponao, izay niteny tamin’ny Anaranao tamin’ny mpanjakanay ama-mpanapaka anay sy tamin’ny razanay mbamin’ny vahoaka rehetra amin’ny tany. 7Anao ny fahamarinana, Tompo ô, fa ny fangaihaizan-tava kosa tahaka ny amin’izao anio izao no anay, dia an’ny olona any Jodà, ny mponina any Jerosalema, sy i Israely rehetra, na ny akaiky na ny lavitra, any amin’ny tany rehetra nandroahanao azy, noho ny helony izay nataony taminao. 8Tompo ô, anay ny fangaihaizan-tava, an’ny mpanjakany, an’ny mpanapaka anay, an’ny razanay, satria nanota taminao izahay. 9Fa an’ny Tompo Andriamanitray kosa, ny famindram-po amam-pamelan-keloka, satria niodina taminao izahay. 10Tsy nanaiky ny feon’i Iaveh Andriamanitray izahay, mba hanarahanay ny lalàny, nataony teo anoloanay tamin’ny alalan’ny mpaminany mpanompony. 11Nandika ny didinao avokoa i Israely, sady niodina tsy nihaino ny feonao, ka dia nianjera taminay ny ozona aman-tsahato voasoratra ao amin’ny lalàn’i Môizy, mpanompon’Andriamanitra, satria nanota taminy izahay. 12Notanterahiny ny teny nolazainy hamelezana anay mbamin’ny mpitsara nitsara anay: ka nataony iharan-doza lehibe tokoa izahay, fa tsy mbola nisy tahaka ny namely an’i Jerosalema, hita tetỳ ambany masoandro. 13Nidona taminay avokoa izao loza izao, araka ny voasoratra ao amin’ny lalàn’Andriamanitra; kanefa izahay tsy nanao izay hampitony an’i Iaveh Andriamanitray, tamin’ny fialanay amin’ny helokay sy amin’ny fieritreretanay amim-pitandremana ny fahamarinanao. 14Ka dia nandrasan’i Iaveh ny loza, ary nampihariny taminay; satria, marina i Iaveh Andriamanitray amin’ny asany rehetra nataony, ary tsy nihaino ny feony izahay. 15Koa ankehitriny, ry Tompo, Andriamanitray ô, izay nanala ny vahoakanao avy any amin’ny tany Ejipta tamin’ny tananao mahery, sy nanao anarana ho Anao, tahaka ny amin’izao anio izao, efa nanota izahay, efa ratsy izahay. 16Tompo ô, enga anie ka hihodivitra tsy hihatra amin’i Jerosalema, tanànanao sy tendrombohitrao masina, ny hatezeranao amam-pahaviniranao araka ny fahamarinanao rehetra; fa noho ny fahotanay aman-keloky ny razanay, no nahatonga an’i Jerosalema sy ny vahoakanao ho fandatsa eo amin’izay rehetra manodidina anay. 17Ankehitriny, ry Andriamanitray ô, henoy ny vavaka amam-pifonan’ny mpanomponao; ka ampamirapirato amin’ny fitoeranao masina efa noravana, ny Tavanao, noho ny fitiavan’ny Tompo. 18Andriamanitra ô, atongilano ny sofinao ka henoy, ahirato ny masonao ka jereo ity fahorianay sy ny tanàna niantsoana ny Anaranao. Fa tsy noho ny fahamarinanay no ametrahanay ny fifonanay eto anoloanao; fa noho ny famindram-ponao lehibe. 19Tompo ô, mandrenesa; Tompo ô, mamelà heloka; Tompo ô, mihainoa ka miasà; aza ela, ry Andriamanitra ô, noho ny aminao; fa ny Anaranao no voaantso amin’ny tanànanao sy ny vahoakanao.»
Ny Anjely Gabriely manazava ny faminaniana
20Mbola miteny eo aho mivavaka miaiky ny fahotako amam-pahotan’i Israely fireneko, ary mametraka ny fifonako eo anatrehan’i Iaveh Andriamanitro, ho an’ny tendrombohitra masin’Andriamanitra; 21mbola miteny eo amin’ny fivavahako eo aho, no indro ilay lehilahy Gabriely, hitako taloha tamin’ny fahitana, tonga teo amiko tamim-panidinana faingana, sahabo ho tamin’ny fotoan’ny fanatitra hariva. 22Nanoro ahy sy niresaka tamiko izy ka nanao hoe: «Ry Daniela ô, tonga aho amin’izao fotoana izao, hanokatra ny sainao. 23Vao niantomboka ny vavakao, dia nisy teny nivoaka, ka ny hampahalala izany anao no nahatongavako, fa olo-malalan’Andriamanitra ianao. Koa henoy amim-pitandremana ny teny, ary fantaro ny fahitana. 24Fitopolo herinandro no voafetra#9,24 Fitopolo herinandro no voafetra, sns. Ny hoe, herinandro eto milaza fito taona (jereo Lev 25,8). Koa ny tontalin’ny fito fitopolo taona dia 490 taona izany no fotoana voadidin’Andriamanitra hahatongavan’ny andro izay hamongorana ny fivadihana, izany hoe hampitsaharana ny fiodinana amin’Andriamanitra, hanonerana ny fahotana. ho an’ny firenenao sy ny tanànanao, hanampina ny fahotana, hanonitra ny heloka, hampiditra ny fahamarinana mandrakizay, hanisy tombokase ny fahitana amam-paminaniana ary hanosotra Ilay Masina#9,24 Hanosotra Ilay Masina: ny Mpamonjy, ny Mesia. indrindra. 25Aoka ho fantatrao sy ho azonao àry, fa hatramin’ny hivoahan’ny didy anankiray#9,25 Hatramin’ny nivoahan’ny didy anankiray: Io didy io dia ny tenin’i Artakserksesa nampanao indray an’i Jerosalema tokony ho tamin’ny taona 445 talohan’i Jesoa Kristy. Hatramin’izay ka hatramin’ny taona nanaovana batemy an’i Jesoa Kristy dia nisy tokony ho 486 taona eo ho eo, dia fitopolo herinandro taona izany; ka eo an-tenatenan’ny herinandro fahafitopolo no nahafatesan’i Jesoa Kristy. izay hampanorina indray an’i Jerosalema ka hatramin’ny voahosotra anankiray#9,25 Ka hatramin’ny voahosotra anankiray: Ny Voahosotra ho mpisorona sy mpanjaka, dia i Jesoa Kristy., ny filohany anankiray izay, dia ho fito herinandro, sy 62 herinandro#9,25 Fito herinandro sy 62 herinandro: Ny herinandro fito milaza ny fotoana nanorenana ny tanàna indray, araka ny didin’ny mpanjaka. Ary ny herinandro 62 milaza ny fotoana hatramin’ny nanorenana ny tanàna ka hatramin’ny nahatongavan’ny Mesia., dia haorina indray izy mbamin’ny kianja sy ny tamboho manodidina, amin’ny andro mampahory. 26Ary rehefa afaka ny 62 herinandro, hoesorina ny voasoratra#9,26 Hoesorina ny Voahosotra anankiray: Ilay voahosotra voalaza amin’ny andininy faha-25; dia hovonoina izy. Ary ny vahoakan’ny filohany anankiray, dia ny tafik’i Titosa izay nandrava an’i Jerosalema. anankiray izay, ka tsy hisy ho azy. Ary ny vahoakan’ny filohany anankiray ho avy, handrava ny tanàna amam-pitoerana masina; ny hiafarany dia ho amin’ny fahasaforan-drano, ary hatramin’ny farany dia hisy ady izay efa voatapaka momba ny fandringanana. 27Hanao fanekena mafy amin’ny maro be izy#9,27 Hanao fanekena mafy amin’ny maro be izy: Ny Mesia no hanao fanekena vaovao, amin’ny olona rehetra., mandritra ny herinandro; ka ao antenatenan’ny herinandro dia hatsahany ny sorona amam-panatitra#9,27 Ny sorona amam-panatitra fanao tamin’ny fanekena taloha, dia hatsahatra, tsy hisy hasiny intsony, fa ny fahotana rehetra dia efa noneran’i Jesoa Kristy.; ary hisy mpandrava ho avy amin’ny elatry ny fahavetavetana#9,27 Ny mpandrava ho avy amin’ny elatry ny fahavetavetana: Ny fahavalo ho avy, nitondra ny sampiny., ka izany dia haharitra mandra-pihatran’ny fandravana sy izay efa voatapaka amin’ilay efa rava.»
Voafantina amin'izao fotoana izao:
Bokin’i Daniela 9: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.