Bokin’i Daniela 10
10
FAHITANA LEHIBE - NY ANDRO FAHATEZERANA
Fahitana ilay lehilahy mitafy rongony madinika
1Tamin’ny taona voalohany nanjakan’i Sirosa mpanjakan’i Persa, dia nisy teny nambara tamin’i Daniela, izay natao hoe Baltasara, marina izany teny izany, ary ady lehibe no lazainy. Azony an-tsaina ny teny, sady fantany hevitra ny fahitana#10,1 Ireto teny manaraka ireto dia mivaofy ny fahitana efa voalaza tamin’ny toko faha-8,19-25 momba ny ondralahy sy ny osy lahy. Ny mpanjaka ambara eto, na dia tsy voatonona anarana aza, dia fantatra mazava tsara, satria voavisavisa ny toerany sy ny ady nataony..
2Tamin’izany andro izany aho Daniela, nisaona nandritra ny andro roatokombolana. 3Tsy nihinan-kanim-pỳ akory aho, tsy nisy niditra ny vavako na hena na divay; ary tsy nihosotra aho, mandra-pahatapitry ny andro roatokombolana maninjitra. 4Tamin’ny andro faha-24n’ny volana voalohany#10,4 Volana voalohany: Angamba ny volana Nisàna (marsa-Avrily) izany, fa fankalazana ny Paka, ny andro faha-14-n’io volana io. aho, teo amoron’ny ony lehibe atao hoe Tigra. 5Nanopy ny masoko nijery aho, ka indro, nisy lehilahy anankiray#10,5 Lehilahy anankiray: Angamba izany dia ny Anjely Gabriely izay efa niseho tamin’i Daniela ihany., nitafy rongony fotsy, sy nihetra tamin’ny hetra volamena avy any Ofaza. 6Tahaka ny krizôlita ny tenany, hoatra ny hela-baratra no fijery ny tarehiny, tahaka ny fanilo mirehitra ny masony, mivolom-barahina manganohano ny sandriny amam-tongony, hoatra ny feon’olona maro be ny feony, raha miteny izy. 7Izaho Daniela irery no nahita ny fisehoana fa ny olona niaraka tamiko teo tsy mba nahita ny fisehoana; azon’ny tahotra mafy izy ireo, ka nandositra niery. 8Dia izaho irery no nijanona teo, ka nahita izany fisehoana lehibe izany, ka tsy nisy hery sisa intsony tafajanona tao amiko, ny tarehiko niova volo, fa tonga nivaloarika aho, ary tsy nisy hery intsony tamiko.
Fisehoan’ny Anjely
9Reko ny feony niteny, fa vao nandre ny feony niteny aho, dia nirona natory, ka nihohoka tamin’ny tany.
10Dia injay tanana nanohitra ahy, ka nampianariny ahy handohalika sy hitehin-tanana. 11Dia hoy izy tamiko hoe: «Ry Daniela, olo-malalan’Andriamanitra ô, fantaro izao teny holazaiko aminao izao, ka mitsangàna ianao fa nirahina ho atỳ aminao aho ankehitriny.» Nony nilaza izany teny izany tamiko izy, dia nitsangana aho nangovitra. 12Ary hoy izy tamiko: «Aza matahotra, ry Daniela, fa hatramin’ilay andro voalohany nandatsahanao am-po ny hahalala ny hanetry tena eo anatrehan’Andriamanitrao, dia nohenoina ny teninao, ary izaho no tonga dia noho ny teninao. 13Fa nitsangana teo anoloako, 21 andro, ilay filohan’ny fanjakan’i Persa#10,13 Ilay filohan’ny fanjakana: I Masindahy Jérôme, i Théodoret, i Masindahy Chrysostome, i Masindahy Grégoire le Grand sy ny ankamaroan’ny Rain’ny Eglizy ary ny ankabeazan’ny mpivaofy Soratra Masina, dia milaza fa izany, dia ny Anjely mpiambina ny fanjakan’ny Persa, izay atao hoe filoha, tahaka an’i Masina Misely Arkanjely. Io filohan’ny Persa io, dia naniry ny hitoeran’ny Jody elaela, araka izay azo atao, ao Persa, mba hahazahoany mampiely ny fahalalana an’ilay Andriamanitra Marina sy ny fivavahana aminy. I Gabriely sy i Misely anefa naniry ny hahita azy ireo miverina any amin’ny tanindrazany, mba hahafahan’izy ireo manorina ny tanàna sy ny Tempoly. Tamin’izay i Misely dia sady nampahafantatra an’ilay Anjely mpiambina an’i Persa ny sitrapon’Andriamanitra, no namporisika ny mpanjaka koa mba hamela ny Jody handeha, ary tanteraka anefa ny fanirian’i Misely, raha tsy efa tontosa tsara ny raharaha nanirahana an’i Gabriely., ary i Misely anisan’ireo filohany ambony no tonga nanampy ahy, ka nijanona teo akaikin’ny mpanjakan’i Persa aho. 14Ary ny hampahafantatra anao ny hanjò ny firenenao any am-parany any, no nahatongavako, satria mbola fahitana ny amin’ny any aoriana koa izany.»
15Tamin’ny nilazany izany teny izany tamiko, dia niondrika tamin’ny tany ny tarehiko, sady tsy nahateny aho, 16Fa indro kosa nisy anankiray nitarehin-janak’olombelona, nanendry ny molotro, dia niloa-bava aho, ka niteny dia nilaza tamin’ilay nitsangana teo anatrehako, nanao hoe: «Tompokolahy ô, very hevitra aho, azon’izany fahitana izany, ka tsy manan-kery intsony. 17Hataon’ity mpanompon’ny Tompoko ity ahoana moa no fiteny amin’ny tompoko eo. Amin’izao sady tsy manan-kery aho, no tsy nisy aina intsony akory koa.» 18Fa ilay nitarehin-janak’olombelona indray no nanendry ahy sy nankahery ahy. Dia hoy izy tamiko: 19«Aza matahotra, ry olo-malalan’Andriamanitra; ho aminao anie ny fiadanana! Matokia, matokia!» Mbola niteny tamiko teo izy, dia efa nahazo hery aho, ka nanao hoe: «Efa nankahery ahy ianao.»
Filazana ny faminaniana
20Hoy izy tamiko: «Fantatrao va ny nahatongavako atỳ aminao? Ankehitriny aho, ary amin’ny fotoana handehanako, dia indro ho avy ny filohan’i Javàna#10,20 Filohan’ny Javàna: Izany hoe, Anjely mpiambina an’i Gresy, izay fanjakana handimby an’i Medô-Persa.. 21Hambarako anao anefa ny voasoratra ao amin’ny bokin’ny fahamarinana, ary tsy misy mitsangana momba azy hanohitra an’ireo afa-tsy i Misely filohanareo ihany.»
Voafantina amin'izao fotoana izao:
Bokin’i Daniela 10: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.