मरकुसो 4

बेजा एचाड़ो कथा

(मत्ती 13:1-9; लूको 8:4-8)

1इच्च़ा फेर यह्च़ा यीशु गलील झीलो मुखारिंङ मीहतिंङ धर्मिक उपदेश रंड्री लेहकी तोहई, इच्च़ा मोह्ड़े भीड़ दोऊ कछंङ ठ्रोहका शुहचे इलि दंङ दुह झीलंङ इच्च़ा किशतीऊ टोईच़ी बंङज़ा इलि, दंङ भत्ते भीड़ झीलो मुखारिंङ कछंङ खड़े तोहई। 2दंङ दुह दोतिंङ कथारंङ साते कंड्री लेहकी तोहई, दोई धर्मिक शिक्षरंङ साते दोतिंङ कुतोह, 3“ध्यानारंङ साते रेहड्रोंई! इच्च़ा ज़िमदार बेईज़ा एच़ी हुंच़िरी। 4एच़ी मुका फोहा अमरिंङ दहचे इलि दुह प्याज़ि पेशी शिलिरे। 5रेंहई रह्घचटे ठाहरीरिंङ दहचे इलि दंङ दोबि महस श्रोह माह खोकसिरी, महस श्रोह माह खोकसीरंङ साते दुह युरनाह पैचा शिलिर, 6दंङ अंऊ मुका एके हुंच़िरी ता रोषा इलि, दंङ जड़ मा चुम्ज़ी रंङ साते कर्चे इलि। 7रेह बेईज़ा छ्वाक्तु विचंङ दचीरी, दंङ महस छ़वाक शुहबी रंङ साते दुह तेप्चे इलि, दंङ दोई फल माह हति। 8दंङ रेह रुठे धरती रिंङ दह्चे इलि, दंङ पोशिरी ए फलवन्त शुई; दंङ निंज़ो सा गुणा, षुमनिज़ा गुणा दंङ राह गुणा फल अति।” 9दंङ दोई कुतोह, “छि; गेह कुट्रातग दुह ध्यानारंङ साते रेड्रुंई।”

कथा ओ मकसद

10अंऊ मुका यीशु इच्च़ा केह्षा इलि, दंङ दोऊ ऊई साथिरे दंङ दोऊ सनी चेला तु समेत दोबि दी कथा ओ पाहठी दोऊ मतलब रुहक्ती। 11दंङ यीशुज़ि दोतंङ साते कुतोह, “केतिंङ ता परमेश्वरो राज्यों राज ओ पाहठी समझ रांहषी तोह, पर दोतु थल्जी अरी गिऊ टोहकठे विशवास माह लहज़ा दोतु थल्जी भत्ते गप्पा कथारिंङ ए शोतो। 12झांह ठ्रोह, छना पवित्र शास्त्रा च़ेहसी तोह कि, दोच़ी खांई ते ला माहखांइरे, दंङ दोतिंङ शुङसी मादी रेड्रा ला रेहड्रोंई ता ला मा समझेक्ती, झांह ठ्रोह मीहरे माह लेहच़ी दंङ माह ए दोतिंङ माफी खोकसोतो।”

बेजा एचाड़ो कथा ओ व्याख्या

13दंङ यह्च़ा यीशुज़ि दोतंङ साते कुतोह, “छि केहच़ी दी कथाओ मतलब मा सम्ज़ेक्साईया? ता ऊई भत्ते उप्हाम केहच़ी छना ञेंओनि? 14दिह कथाओ मतलब दिह शुह कि, दुह ज़िमदार झांह ठ्रोह तोह छना इच्च़ा परमेश्वरो बचन सुनाच़ा तोह। 15अंऊ बैएजा अमू मुखरिङ दहछा, दोऊ मतलब झांह ठ्रोह तोह कि रेह मीहच़ी परमेश्वरो बचन ता रेड्री, पर एनोह सेमारिङ माह तहच़ि। दोहर अपेहल ला फलेक्पि माह। छना प्याज़ि बैएजा पेहषे चरच़ि दंङ ध्वांए शेताने दोहपले अंज़े दोतु अंद्रेगज़ि बचन लेन्ज़ा शिल्ज़ी। 16ध्वांए अंऊ बैएजा रघ्चटे ठाहरीरिंङ दह्च़ी तोहई, दोऊ मतलब झांह ठ्रोह तोह कि रेह मीहच़ी परमेश्वरो बचन रेड्री दंङ खुशी रंङ साते मनेक्चि ला। 17छना कुंई ता दोच़ी परमेश्वरो बचन एनोह सेहमो अंद्रेग महसे टेम तचेक बसाके माह तहच़ि। पर अपेहल विशवासो बज़ाहज़ि छिल्ला दुख या सताव अति ता दुहरे दुए मुका विशवासो दोरच़ी थलका यह्च़ा य्वातोर। 18अंऊ बैएजा छ्वाक्तु विचंङ तोहई दुह हुंज़ी ए माह, दिऊ मतलब दिह शुह कि रेह मीहच़ी परमेश्वरो बचन ता रेड्री, 19पर संसारो चिंदारिंङ, टंगा-ढबाहऊ छलावा, दंङ ऊई चीज़ा तु लालच दोतु अंद्रेग अच़ा अपि दंङ परमेश्वरो विशवासरिंङ माह बड़ेक्पी। 20अंऊ बैएजा रुठे ज़मीनारिंङ दचाते, दुह महसे फलेक्ति। दिऊ मतलब दिह शुह कि रेह मीहच़ी परमेश्वरो बचन रुठे रंङ साते रेड्रा दोऊ टोहकठे जोज़ी दंङ विशवासारिंङ बड़ेक्पातोर। झांह ठ्रोह मीहरे दुह बैएजा ठ्रोह तोह अच़ि निंज़ो सा गुणा, षुमनिज़ा गुणा, राह गुणा फलेके तोह।”

सजवो कथा

21दंङ यीशुज़ि दोतंङ अई इच्च़ा कथारंङ साते कुतोह, “छि अच़िया लम्पा बि जलाके मंजी ए टोकरिऊ पोयंङ केट्रीआ? कि दोऊ छंङी ब्याके योहतो। माह शोतो बिल्कुल माह शोतो! लम्पाबि जलाके ठेपू टोईच़ी केट्री ताकि मीहतिंङ दोऊ छंङी अपतो। 22गिऊ कुट्रिमी मतलब दिह तोह कि परमेश्वर दुह भत्ते गप्पातिंङ प्रगट लोहतो। अंऊ हेंतेग तचेक ब्याके तोहई। दंङ अंऊ ला गुप्त तोह दुह ला प्रगट शोतो। 23छि; गेह कुट्रातग दुह ध्यानारंङ साते रेड्रुंई।” 24यीशुज़ि यह्च़ा दोतंङ साते कुतोह, “छिल्ला गेह केतंङ साते कुट्रातेग दोबि ध्यानारंङ साते रेड्रुंई छना कुचे परमेश्वरे केतिंङ दिबे ले महस समझ रमतो।” 25अतु कछंङ समझ तोह, दोबि ऊई ला महस खोकसोतो, दंङ अतु दोहर छले माह, दोऊ दुह थोड़े समझ ला योह्सा योतो, अंऊ दोऊ कछंङ तोहई।

पोंशी बेजो कथा

26दंङ यीशुज़ि कुतोह, “परमेश्वरो राज्य झांह ठ्रोह तो; छना इच्च़ा ज़िमदारो ज़मीनो बैएजा तोह। 27बैएजा एह्च़ीरंङ साते दुह चिंद मेह रातारिंङ फेटे शवाते मुंजे अहच़ा यवाते। दोबि पता ला माह लेहती कि दुह बेईज़ा छना फलेके हुंच़ा इलि। 28ज़मीन एनोह ए फसल तेयार लहज़ाते मुंडा हुंच़िरी अंकुर दंङ सिल, दंङ सिलारिंङ तेयार शुहचे सोल, 29छना ए फसल तेयार शुहचे योतो दंङ ध्वांए ज़िमदारे मीहरे, दुह फसल ट्रिकट्रिमी थल्जी च़चे च़रति, छना कुचे ट्रिकट्रिमी ध्याड़ा अच़ा अन्दे।”

राईऊ सोल्तु कथा

(मत्ती 13:31-32)

30दंङ यीशुज़ि दोतु हखा कुतोह, “ञेंहच़ी परमेश्वरो राज्य बराबरी अतंङ साते लोहनि, अंऊ कथारंङ साते ञेंहच़ी दोऊ पाहठी कुट्री तरपोंई? 31परमेश्वरो राज्य राईऊ सोल्तु ठ्रोह तो; रांई तु सोल खंड्रिमी धरतीऊ टोईच़ी भत्ते बे कवचि शुहबी। 32दंङ अपेहल दुह एच़ी, दंङ दुह बैएजा फेलेके फल सब्जी बे मोह्ड़े शुहचे इबि कि प्याहरे लाह दोऊ ब्रन्ज़ो पोयंङ अंज़े बसेरा लहच़ी।” 33यीशुज़ि झांह ठ्रोह कथारंङ साते परमेश्वरो बचन समझाएकेचाते अंयों दुह मीहतु समझ तोहई। 34यीशुज़ि कथा मेह छल्ले उपदेश माह रंड्राते, अपेहल दुह ए दोऊ चेलारे इच्च़ा साते तोईरे दंङ दुह मुक्का दोई दोतिंङ भत्ते गप्पो मतलब कंड्राते।

आंधी बि शांत लहज़ी

(मत्ती 8:23-27; लूको 8:22-25)

35दुह ध्याड़ा अपेहल योंकोल शुई दुह मुक्का यीशुज़ि एनोह चेला तंङ साते कुतोह, “अतंई, हेनारेह गलील झीलो नुरेच़ि अच़ा योंई।” 36मीहतु भीड़ केट्रा चेलारे यीशुरंङ साते दुह ए किशतीऊ अंद्रेग बंङज़ा अच़ा इलिरे अंऊर यीशु तुहई बंङज़ा तोहई किशती रेंज़ा झीलो नुरेच़ि अच़ा इलिरे। दंङ दोतंङ साते ऊई मीहरे ला किशतीरि बंङज़ा इलिरे। 37-38यीशु किशतीऊ थल मुखंङ इलजे कुमुतु टोहकठे पुंज़ा केहच़ी ईम लहच़ी लेहकी तोहई। अचानक जोरे लहन हुंच़िरी दंङ मोह्ड़े-मोह्ड़े छ्वली किशतीऊ अंद्रेग अपि लेहती, किशती तिंङ पिंङषी लेहती दंङ चेलाज़ि यीशुबि इमरिंङ दोरच़ी खड़े लहच़ी कुहतोर, किशती ठुमज़िमी तोह दंङ हेनर ला ठुमज़िमी तोतोंई छि कनिंङ चिंद माह कि हेनर सिए योंई। 39दंङ दोहपल ए यीशु खड़े शुहचे भमबुट ए छ्वालि बि हुकुम रेह कुहतो, “शांत शुहचे ईल, दंङ रुमज़ा ईल!” झांह कुट्रिमी रंङ साते ए भमबुट शांत शुहचे इलि दंङ छ्वालि ला दुह ए मुक्का बंद शुहचे इलि। 40दंङ यीशुज़ि चेला तिंङ रुहक्तो, “केरे छिले बेवातोंई? छि केतिंङ एन तचेक गिऊ टोहकठे विशवास मा आ?” 41दुह चेलार महस ए बेवा इलजी तोईरे दंङ ऐनातु बिचंङ कुट्री लेहतिर, “दी छना ठ्रोह मीह शुह? देर तचेक भमबुट ए छ्वली ला दोऊ कहना मनेक्च़ा।”

Voafantina amin'izao fotoana izao:

मरकुसो 4: LBFNT

Asongadina

Hizara

Dika mitovy