मरकुसो 3

करची घुड़ो मीहबी ठीक लहज़ी

(मत्ती 12:9-14; लूको 6:6-11)

1इच्च़ा अई अरामो ध्याड़ारिंङ यीशु यहुदी सभा घरबारंङ इलि। दोहर इच्च़ा मीह तोहई, अतु गुहड़ बीमारीरंङ करची तोहई। 2दंङ थोड़े अरे फरिसीज़ि यीशु टोईच़ी दोष लगाएच़ी मी थल्जी मोका पेट्री लेहकी तोईर, कि खमोंई, यीशुज़ि अरामो ध्याड़ारिंङ दोबि अईन लोहतो आ मा लोहतो। 3यीशुज़ि करची गुहड़ो मीहरंङ साते कुहतो, “तुईज़ी अंज़े खड़े शुह।” 4दोई दोतंङ साते रूह्कतो, “परमेश्वरो हुकुमो हिसाबे, अरामो ध्याड़ारिंङ रुठे लहज़ी ठीक शुह या मांजी लहज़ी? छि दोई हुकुम माह रौंआ कि, प्राण बचाची ठीक शुह आ सच़ी ठीक शुह?” दंङ अच़िला जवाब माह ई। 5यीशु दिह खांई महसे दुखी शुहचे इलि छना कुचे दोतु सेहम ढिट शुहचे इलजी तोईर। दंङ यीशुज़ि दोतिंङ रोहषरंङ साते खांई दंङ दुह टेहची मीहू हखा कुहतो, “केनोह गुहड़ तुंखा लोह।” दंङ दोई गुहड़ तुंखा लहरी, दंङ दोऊ गुहड़ ठीक शुहचे इलि। 6दोहथल ए फरीसी मीहच़ी दोहपल ए धह्कते इलजे हेरोदेस रज्ज़ा ऊ अनुयायीरंङ साते यीशु खिलाप सलहा लहज़ी लेहकी कि छना हेंज़ी दुह सच़ी च़रपोंई।

भीड़ यीशु थ्लेसी शुहचे इलि

(मत्ती 12:15-17; लूको 6:17-19)

7दंङ यीशु एनोह चेलारे साते गलील झीलो कछंङ अच़ा इलि: दंङ गलील प्रदेशो शत्‌ह-शत्‌ह ठाहरिरिंङ ज़ि मीहतु महस मोड़े भीड़ यीशु थल शुहचे इलि। 8दुह भीड़ गलील प्रदेशो, यहुदिया प्रदेशो, यरूशलेम शहरो दंङ इदुमि प्रदेशो ए यरदन बेंड़ीऊ नुरेज़ि मीहरे देर तचेक कि, सोर ए सीदोन शहरो कछंङ कि महसे मीहरे ला अंज़े तोईरे। छना कुचे दोच़ी यीशुज़ि लहसी मोह्ड़े-मोह्ड़े कमो पाहठी रेड्रातेर। 9यीशुज़ि एनोह चेलारंङ साते कुतोह, “गिह्बी बंङज़िमी थल्जी इच्च़ा कवचि किशती रेंज़ा हतांई ताकि मीहज़ी गिह्बी तेपसी माह जूंस।” 10छना कुचे यीशुज़ि महस मीहरे ठीक लाहते, महसे टेची मीहरे यीशु बि थोहके ठीक शुहबिमी थल्जी दोऊ हखा शुहबी लेहकी तोईरे। 11दंङ अपेहल ला मांजी आत्मा रंङ टेहची मीहरे यीशु बि खंड्रातेर दंङ दोरे दोबि आदर रंड्रीमी थल्जी दोऊ तुईज़ी कोंङा शुहचे य्वातेर, दंङ हाऊष रेह कुट्रातेर, “का परमेश्वरो योह शुनाह” 12यीशुज़ि मांजी आत्मातिंङ खबरदार लहच़ी कुहतो, “केहच़ी मीहतंङ थाकुंई कि गेह अरी शुगाह।”

सनी प्रेरितो नियुक्ति

(लूको 6:12-16)

13दंङ यीशु गोह टोहकठे इलि, दंङ दोई दोरे मीहरे एनोह कछंङ बुलाएती, अच़ि दोई एनोह चेलारे बणाके थल्जी अंङषी तोईरे। दंङ दोरे भीड़ दोरच़ी हुंच़े ते यीशु कछंङ इलिरे 14दंङ दोई दोतु बिचंङज़ि सनी मीहरे खास कमो थल्जी अंङे दंङ दोतिंङ प्रेरित कुहतो। दोई दिह दिऊ थल्जी लहरी ताकि दोरे दोऊ साते-साते बंङज़तो दंङ यीशुज़ि दोतिंङ च़रपोतो कि दोच़ी परमेश्वरो खबर मीहतिंङ सुनाएपोतोर, 15दंङ मांजी आत्मा हुपिमी ला अधिकार तानि। 16दिह दोरे सनी चेलारे शुहरे अंऊ यीशुज़ि खास कहमो थल्जी अंङषी शुहरे, दी शुह: शमौन अतु मिन यीशुज़ि पतरस केहरिर। 17दंङ जब्दीऊ योह याकूब ए यूहन्ना, अतु दोतु थल्जी यीशुज़ि दिह कुहतो कि दिहरे झांह ठ्रोह तोहर छना सरगंङ गढ़गढ़ शवा, 18दंङ अन्द्रियास, फिलिप्पुस, बरतुल्मे, मत्ती, थोमा, हलफई ऊ योह याकूब, थद्देयास, दंङ अई दुह शमौन अंऊ यहुदी देशभक्त तोहई, 19यीशुज़ि करियोत नगरो यहूदा ला अंङे च़रति, अच़ि थले यीशुबि विरोधीतु घुडिङ च़ुमज़ि लाहते।

यीशु ए बालजबुल

(मत्ती 12:22-37; लूको 11:14-28)

20दंङ यीशु इच्च़ा चुंङ अति; दंङ दुहरे इच्च़ा भीड़ ठ्रोहका शुहचे इलि, कि दोच़ी रोटी ला ज़े मरतिरेह। 21अंऊ मुका दोऊ नाता ज़ि दी रेड्री, दंङ दोरे दोबि एनोह चुंङ शिल्ज़िमी थल्जी इलिरे; छना कुचे दोरे एनातु बिचंङ कुट्री लेहकी तोईरे कि यीशु दिमाग ठीक मा। 22यहुदी शास्त्रीज़ि ला अरी यरूशलेम शहरंङज़ि अन्जी तोईरे, दी कुट्रतेर, “दोऊ अंद्रेग शेतान तोद दंङ दुह शेतानो मदत ज़ि मांजी आत्मा हुंपा।” 23दंङ दोई दुरेह एनोह कछंङ बुलाके दोतंङ साते कथारिंङ कुट्री लेहती, “छि शेताने एनोह मांजी आत्मा मीहतु दोरच़ी धह्तेका हुंपतोआ? माह शोतो दिह अपेहल ला माह शोतो। 24दंङ इच्च़ा देशो मीहरे एनातु बिचंङ झगड़ा लोहर ता दंङ दुह देश महसे ध्याड़ा तचेक ध्वांए माह बंङज़ोतो दंङ दुह नाश शुहचे योतो। 25दंङ इच्च़ा टबरो मीहरे एनातु बिचंङ झगड़ा लोहर ता दंङ दुह टबर इच्च़ा साते बंङज़ी मरच़ि। 26ध्वांए ठ्रोह अगर शेतान एनोह ए बिरोधंङ खड़े शुहचे योतो दंङ एनोह ए मांजी आत्मा रंङ साते झगड़ा लोहतो ता दोऊ शक्ति योह्सा योहतो दंङ दोई एनोह ए नाश लोहतो।”

27“यीशुज़ि शेतानो बराबरी इच्च़ा ताकतवर मीहरंङ साते लहतो अंऊ दोई इच्च़ा घरबार ततो दंङ अंऊ ला मीह अतु ला ताकतवरो दोहर इलजे दोऊ समान कुजी मरच़ि, अंऊ तचेक दोई दुह बलबंत मीह छुचे माह तहच़िरी; दोऊ थल ए दोऊ घरबारंङ ज़ि कुजी तरपोतो। 28गेह केतंङ साते हेले कुट्रातग कि मीहतु दोरच़ी लहच़ी भत्ते पाप दंङ बुराई अंऊ दोई परमेश्वरो खिलाप लहज़ा, दुह परमेश्वरे माफ शोतो, 29पर अरीला पवित्र आत्मो खिलाप मदम लोहतो। दोतिंङ परमेश्वरे अपेहल ला माफ माह लोहतो; बल्कि परमेश्वरे दिह पापो थल्जी दुह मीहबी हमेशाऊ थल्जी दोषी ठहराएपोतो।” 30दोई कुहतो छना कुचे ता दोच़ी कुट्रते, “कि दोऊ अंद्रेग मांजी आत्मा तोद।”

यीशु याह ए न्वा

31दंङ यीशु ऊ याह ए कवचि न्वा अति, दुरेह धह्कते खड़े शुहचे दोऊ हखा उजाब रेंहई। 32भीड़ दोऊ देच़ि न्वेच़ि तोहई, दंङ दोच़ी दोहरंङ साते कुतोह, “खंणु काह याह ए काह कवचि न्वा धह्कते का पेट्री लेहकी तोह।” 33यीशुज़ि दोतिंङ जुबाब रेंहई, “गिऊ याह ए गिऊ न्वा अरी शुहरे?” 34अंऊ दोहर दोऊ देच़ि न्वेच़ि तोहई, दोऊ हखा खांई कुतोह, “खंणु गिऊ याह ए न्वा दिहरे शुहरे, 35छना कुचे ता अरी परमेश्वरो हिटीरंङ जोज़तो, दुह ए गिऊ कवचि न्वा ए रिङह ए याह शुह।”

Voafantina amin'izao fotoana izao:

मरकुसो 3: LBFNT

Asongadina

Hizara

Dika mitovy