Salamo 7
7
SALAMO Tompo ô, omeo rariny aho
1 Fitarainana nataon’i Davida. Nohirainy teo anatrehan’ny TOMPO noho ny amin’i Kosy ilay Benjaminita.
2TOMPO Andriamanitro ô,
Ianao no fialofako.
Mba vonjeo re aho ary afaho
amin’izay rehetra manenjika ahy.
3Raha tsy izany, dia hamiravira ahy
tahaka ny fanaon’ny liona izy,
ka tsy hisy hanafaka
na hanaisotra ahy eny aminy.
4TOMPO Andriamanitro ô, raha nahavita
izany anaratsiany ahy izany aho,
raha nanao heloka ny tanako,
5raha namaly ratsy ny mpanasoa ahy aho
na nandroba an’ireo mpampahory
izay mandrafy ahy tsy amin’antony,
6dia aoka ny fahavaloko
hanenjika ahy ka hahatratra ahy!
Aoka hohoseny an-tany mbola velona aho#7.6 Ampit Sal 18.39 sy nta.,
ka hotarihiny am-bovoka ny hajako!
Fiatoana
7TOMPO ô, mirotsaha an-tsehatra Ianao.
Aoka hirehitra tokoa ny fahatezeranao!
Tohero ireo fahavaloko misafoaka;
mijoroa re Ianao mba hanampy ahy,
amin’ny fitsarana marina avoakanao.
8Aoka ireo firenena hivory hanotrona Anao;
ary makà toerana hanerinerina azy Ianao
eo amin’ilay sezafiandriananao.
9TOMPO ô, Ianao no mpitsara ireo firenena;
koa tsarao aho, ry TOMPO Avo Indrindra,
fa tia rariny aho ary tsy manan-tsiny.
10Ampitsaharo ny haratsian’ireo olon-dratsy,
ampioreno mafy kosa izay tia rariny;
fa Andriamanitra marina Ianao
no mahalala ny ao am-po tsy miloaka#7.10 Jereo Apôk 2.23..
11Ny ampinga miaro ahy dia Andriamanitra,
ilay Mpamonjy an’ireo mahitsy fo.
12Mpitsara mitandro ny rariny Andriamanitra,
ka rahonany mandrakariva ny olon-dratsy.
13Koa raha tsy miala amin’ny ratsy ireo,
dia handrani-tsabatra Andriamanitra
sady hanenjan-tsipîka
ka hikendry hamely.
14Fiadiana mahafaty no omaniny,
dia zana-tsipîka mandoro.
15Indreo kosa ny mpiteti-dratsy:
loza no saintsaininy
lainga sy fitaka no aterany.
16Mihady lavaka lalina tokoa izy,
nefa izy ihany no mianjera ao.
17Ny loza nomaniny
dia mitsingerina eo an-dohany;
ary ny herisetra notetehiny
dia miantonta eo an-tampon-dohany.
18Hidera Anao aho, TOMPO ô,
fa mitandro ny rariny Ianao;
ary hankalaza ny anaranao amin-kira aho,
ry TOMPO Avo Indrindra ô.
Voafantina amin'izao fotoana izao:
Salamo 7: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.