Nomerỳ 14
14
Nandà tsy nety niditra an’i Kanahàna ny vahoaka
1Nandritra ny alina manontolo dia nikiakiaka sy nitomany avokoa ny vahoaka tafangona teo. 2Nimonomonona tamin’i Mosesy sy I Aharôna ny Israelita rehetra ka nanao hoe:
–Tsara kokoa ho antsika ny maty tany Ejipta na koa maty tatỳ an-taniefitra. 3Fa nahoana isika no nentin’ny TOMPO ho lavon-tsabatra amin’ny tany toy izany? Ho lasan-ko babo avokoa ny vady aman-janatsika; koa tsy aleontsika ve miverina indray any Ejipta?
4Dia nifampilaza izy ireo nanao hoe:
–Aoka isika hanendry mpitarika, dia hiverina any Ejipta!
5Niankohoka tamin’ny tany teo anatrehan’ny fiangonan’ny Israelita rehetra vory teo i Mosesy sy Aharôna. 6I Josa zanakalahin’i Nona sy i Kaleba zanakalahin’i Jefonè izay samy anisan’ny nisafo tany kosa dia nandriatra ny fitafiany 7ary niteny tamin’ny fiangonana israelita tsivakivolo hoe:
–Ny tany izay nosafoinay dia tany tena tsara tokoa. 8Raha ambinin’ny TOMPO isika, dia hoentiny any amin’io tany tondra-dronono sy tantely io ka homeny antsika izany. 9Koa aza mikomy amin’ny Tompo ianareo; ary aza matahotra ny mponin’io tany io, fa tsy misy hataontsika indraim-bava akory ireo. Efa niala taminy ireo andriamanitra fiarovany, fa ny Tompo kosa momba antsika; koa aza matahotra azy ireny ianareo.
10Nandrahona hitora-bato azy roa lahy ny vahoaka iray manontolo; kanjo indro ny voninahitry ny TOMPO fa niseho tamin’ny Israelita rehetra teo amin’ny Tranolay fihaonana.
Nangata-pamelana ho an’ny vahoaka i Mosesy
11Dia hoy ny TOMPO tamin’i Mosesy:
–Mandra-pahoviana no hanamavoan’ity vahoaka ity Ahy? Ary mandra-pahoviana no handavany tsy hino Ahy, na dia teo aza ny famantarana rehetra izay nataoko teo aminy? 12Hamely azy amin’ny pesta Aho ka hamongotra azy; ianao kosa hataoko firenen-dehibe sy matanjaka noho izy.
13Fa hoy ny navalin’i Mosesy ny TOMPO:
–Fantatry ny Ejiptianina fa ny herinao no namoahanao ity vahoaka ity hiala teo aminy. 14Notantarainy tamin’ny mponin’ity tany anoloanay ity izany. Koa dia fantatr’izy ireo fa Ianao TOMPO no momba ny vahoakanao ary IANAO mifanatri-tava aminy; ny rahonao dia mijanona eo amboniny hialofany; mialoha azy amin’ny andry rahona Ianao nony andro ary amin’ny andry afo kosa nony alina. 15Ankehitriny, raha indray hofongoranao ny vahoakanao, dia hiteny ireo firenena efa nahafantatra ny lazanao ka hanao hoe: 16«Tsy afaka nitondra ny vahoakany ho any amin’ny tany izay efa nampanantenainy azy ny TOMPO, koa izany no nandringanany azy tany an-taniefitra.» 17Koa ankehitriny, Tompo ô, mitalaho aminao aho, asehoy ny herinao araka ny teninao hoe: 18«Izaho no TOMPO Izay tsy mora tezitra sady be fitiavana fa mahazaka ny heloka sy ny fikomiana. Kanefa tsy afa-maina ny meloka, fa ny heloky ny olona kosa dia valiako amin’ny taranany hatramin’ny zafindohalika#14.18 Jereo Eks 20.5-6; 34.6-7; Deot 5.9-10; 7.9-10..» 19Tompo ô, araka ny halehiben’ny fitiavanao, dia mamelà ny fahotan’ny vahoakanao tahaka ny efa namelanao ny fahotany hatrany Ejipta ka hatraty#14.19 And 13-19: jereo Eks 32.11-14..
20Ary hoy ny TOMPO hoe:
–Mamela azy araka ny fangatahanao Aho. 21Kanefa velona Aho ary feno ny voninahitra maha TOMPO Ahy ny tany tontolo, koa mianiana Aho fa tsy hisy hiditra amin’io tany io ireo olona ireo. 22Nahita ny voninahitro sy ny asa mahagaga nataoko tany Ejipta sy tany an-taniefitra izy ireo, nefa tsy nitsahatra naka fanahy Ahy tamin’ny tsy fihainoany ny teniko; 23koa satria efa nanamavo Ahy izy, dia tsy hisy hahita ny tany izay nampanantenaiko ny razany#14.23 And 21-23: Heb 3.18.. 24Fa i Kaleba mpanompoko, izay nanam-panahy hafa ka tsy nisalasala nanaraka Ahy, dia hampidiriko any amin’ny tany efa nalehany; ary hahazo izany tany izany ny taranany#14.24 Jereo Jos 14.9-12., 25fa ny Hamalekita sy ny Kanahanita kosa honina amin’ny lemaka. Koa rahampitso, miverena indray ianareo ka mankanesa any an-taniefitra amin’ny lalana mankany amin’ny Ranomasin’ny Volotara.
Nanasazy ny vahoakany ny Tompo
26Niteny tamin’i Mosesy sy i Aharôna indray ny TOMPO ka nanao hoe:
27–Mandra-pahoviana no mbola handeferako fimonomononan’ity fiangonana ratsy ity amiko? Efa mankadilo ny sofiko ny fimonomononany amiko. 28Mandehana lazao aminy hoe: «Velona Izaho TOMPO, ka mianiana fa araka ny teny izay reko taminareo ihany no hataoko aminareo#14.28 Araka ny teny izay reko taminareo: jereo and 2.. 29Ho faty ka hiampatrampatra amin’ity taniefitra ity ianareo#14.29 Jereo Heb 3.17.. Ianareo rehetra izay nanaovana fanisana, dia ny roapolo taona no ho miakatra fahizany, no ho faty satria efa nimonomonona tamiko. 30Mianiana Aho fa tsy hisy hiditra amin’ny tany izay efa nampanantenaiko hamponenana anareo ianareo, afa-tsy i Kaleba zanakalahin’i Jefonè sy i Josoa zanakalahin’i Nona; 31Fa ny zanakareo madinika izay voalazanareo fa ho lasan-ko babo kosa dia hoentiko mankany; ireo no hahafantatra ny tany izay tsy noraharahainareo. 32Ianareo izany ho faty ka hiampatrampatra amin’ity taniefitra ity; 33ny zanakareo kosa dia ho mpiandry ondry atỳ mandritra ny efapolo taona#14.33 efapolo taona: jereo Asa 7.36.. Izy ireo no hizaka ny vokatry ny fivadihanareo mandrapahafatinareo rehetra atỳ an-taniefitra. 34Efapolo andro no nisafoanareo ny tany; koa dia mandritra ny efapolo taona kosa no hitondranareo ny vokatry ny fahotanareo, izany hoe taona iray isaky ny andro iray. Ka dia ho fantatrareo tsara ny dikan’ny faniniako anareo. 35Izaho TOMPO no efa niteny, ka mianiana Aho fa hataoko tokoa amin’ity fiangonana ratsy sy niodina tamiko ity izany: atỳ an-taniefitra no hiafarany sy hahafatesany.»
36Izao kosa ny amin’ny lehilahy izay nirahin’i Mosesy hisafo ny tany ka nony tafaverina, dia nampimonomonona ny fiangonana hanome tsiny an’i Mosesy: 37maty tampoka teo anatrehan’ny TOMPO ireny, satria nanao laza ratsy ny tany. 38Fa i Josoa zanakalahin’i Nona sy i Kaleba zanakalahin’i Jefonè no sisa velona tamin’ireo nandeha nisafo ny tany.
Tsy nanoa indray ny vahoaka
39Nolazain’i Mosesy tamin’ny Israelita rehetra izany teny izany, ka dia nalahelo mafy ny vahoaka. 40Ny ampitso vao maraina, dia niakatra tany an-tendrombohitra izy ireo sady nanao hoe:
–Tena nanota tokoa izahay, fa izao kosa dia vonona hiakatra hankany amin’ny toerana voatondron’ny TOMPO.
41Fa hoy i Mosesy hoe:
–Inona no anton’izao? Mandika ny baikon’ny TOMPO ianareo ka tsy hahomby amin’izany mihitsy! 42Aza miakatra mankany satria tsy momba anareo ny TOMPO fandrao horesen’ny fahavalonareo ianareo. 43Eo anoloanareo ny Hamalekita sy ny Kanahanita, ka ho fatin’ny sabany ianareo. Efa niodina tamin’ny TOMPO ianareo, ka tsy homba anareo IZY.
44Mbola nikiry niakatra hankeny an-tampon-tendrombohitra ihany ireo Israelita; nefa na i Mosesy na ny Vatamasina mirakitra ny fanekempihavanan’ny TOMPO dia samy tsy nihetsika teo an-toby. 45Nidinan’ny Hamalekita sy ny Kanahanita izay nonina tamin’izany tendrombohitra izany izy ireo ka notafihiny ary nenjehiny hatrany Hôrmà#14.45 Hôrmà: toerana tsy fantatra marina, nefa tokony ho 60 km atsimon’i Jerosalema. Somary eo atsinanan’i Beera-Seba no misy azy..
Voafantina amin'izao fotoana izao:
Nomerỳ 14: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.