Nomerỳ 12
12
Voan’ny habokana i Miriama
1Nanome tsiny an’i Mosesy i Miriama sy i Aharôna noho ny nanambadiany vehivavy kosita#12.1 kosita: dia mety ho dikan’ny hoe an’ny fokon’i Kosàna eto (ampit Hab 37)., fa nampakatra vehivavy kosita tokoa izy. 2Hoy izy mianadahy hoe:
–I Mosesy ihany ve no nitenenan’ny TOMPO, fa tsy izahay koa?
Dia ren’ny TOMPO izany. 3I Mosesy kosa dia lehilahy malemy fanahy mihoatra noho ny olona hafa rehetra ambonin’ny tany. 4Tampoka teo dia hoy ny TOMPO tamin’i Mosesy sy i Aharôna ary i Miriama:
–Mankanesa ianareo telo mianadahy ao amin’ny Tranolay fihaonana.
Dia nankany izy ireo. 5Nidina tanatin’ny andry rahona ny TOMPO#12.5 Jereo Eks 13.21 sy nta. ka nijoro teo am-baravaran’ny Tranolay ary niantso an’i Aharôna sy i Miriama. Dia samy nandroso izy mianadahy, 6ka hoy ny TOMPO taminy:
–Henoy tsara ny teniko: Raha misy mpaminany eo aminareo, dia amin’ny fahitana no isehoako aminy, ary amin’ny nofy no itenenako aminy. 7Fa tsy mba toy izany kosa i Mosesy mpanompoko izay olona mahatoky tamin’ny fiandraiketana ny tranoko manontolo#12.7 tranoko manontolo: jereo Heb 3.2. Tsy ny Fonena-masina no ambara amin’izany fa ny vahoaka israelita tsivakivolo.. 8Mifanatrika no itenenako aminy, dia amin’ny teny mazava fa tsy miafina; ary mahita Ahy TOMPO miseho aminy izy; koa nahoana ianareo no tsy natahotra hanome tsiny an’i Mosesy mpanompoko?
9Tezitra mafy tamin’izy mianadahy ny TOMPO ka lasa nandeha. 10Rehefa nisandratra ho eo ambonin’ny Tranolay ny rahona, dia indro feno pentina fotsy toa oram-panala i Miriama fa boka. Nijery azy i Aharôna ka nahita fa boka ny anabaviny. 11Ka hoy i Aharôna tamin’i Mosesy:
–Meloka izahay, tompoko, koa aoka re tsy havalinao aminay izany toetran’adala amam-pahotanay izany! 12Aoka re i Miriama tsy ho toy ny zazarano tsy azo izay lany sasaka ny nofony raha vao teraka!
13Nitaraina tamin’ny TOMPO i Mosesy ka nanao hoe:
–Andriamanitra ô, mba sitrano re izy!
14Dia hoy ny TOMPO tamin’i Mosesy:
–Raha nororan-drainy ny tavany, moa tsy ho menatra herinandro va izy? Avaho mandritra ny fito andro any ivelan’ny toby izy. Fa aorian’izany izy vao afaka miditra ao indray#12.14 Ampit 5.2-3..
15Dia navahana tany ivelan’ny toby nandritra ny herinandro i Miriama, ary tsy niainga ny Israelita, raha tsy efa nandray ny toerany indray izy. 16Rehefa izany, dia niala tao Hatserôta ny vahoaka ka nitoby tao an-taniefitr’i Paràna.
Voafantina amin'izao fotoana izao:
Nomerỳ 12: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.