Jôba 34
34
Miampanga an’i Jôba i Elihò
1Dia nanohy ny teniny i Elihò ka nanao hoe:
2Mandrenesa izay holazaiko, ianareo olon-kendry;
ary ianareo ela nihetezana lava volo, mihainoa,
mba manongilàna sofina hihaino ahy.
3Fa adidin’ny sofina ny mamantatra ny teny
ary adidin’ny lanilany kosa#34.3 Ampit Jôba 12.11.
ny mahatsapa tsiron-kanina.
4Koa aoka hodinihintsika izay rariny,
ary aoka hiarahantsika miaiky izay tsara.
*
5Fa i Jôba efa nanao hoe: «Tsy manan-tsiny aho,
saingy tsy omen’Andriamanitra rariny.
6Tsy mitsara ahy ara-pahamarinana Izy#34.6 Tsy mitsara ahy ara-pahamarinana Izy: na mandainga momba ny fitsarana ahy Izy: araka ny dkt grika tranainy; ny hebreo dia manao hoe mandainga aho... ;
fa na dia tsy meloka akory aza aho,
dia zana-tsipîka hahafaty ahy no alefany.»
7Moa misy lehilahy tahaka an’i Jôba va?
Ny maneso fivavahana no rano fisotrony.
8Miara-dalana amin’ny mpanao heloka izy
ka ny olon-dratsy no iray dia aminy.
9Fa niteny izy hoe: «Tsy mahasoa ny olona
ny mihavana amin’Andriamanitra.»
*
10Koa mihainoa ahy, ianareo olo-mahalala:
Sanatria an’Andriamanitra ny hanao ratsy
ary lavitra an’ilay Tsitoha ny tsy fahamarinana.
11Fa mamaly ny olona araka ny asany Izy
ka manome azy araka ny fitondrantenany#34.11 ampit Sal 62.13..
12Ny marina dia izao: Andriamanitra Tsitoha
dia tsy mba manao ratsy mihitsy
ary tsy manitsakitsaka ny rariny.
13Iza moa no nanendry azy hifehy ny tany?
ary zovy no nanankina izao tontolo izao taminy?
14Raha tsy nihevitra afa-tsy ny tenany ihany Izy
ka nanangona ho azy samirery ny fofonaina,
15dia hiara-maty avokoa ny miaina rehetra,
ary hody vovoka indray ny olombelona.
*
16Satria olon-kendry ianao, dia mandrenesa
ka mampandria sofina amin’izay lazaiko:
17Raha tsy tia rariny Andriamanitra,
moa afaka hifehy izao rehetra izao ve Izy?
Ary hohelohinao ve Ilay Marina sady Mahery
18izay afa-miteny amin’ny mpanjaka hoe#34.18 izay afa-miteny: araka ny dkt grika tranainy, siriaka ary latinina, ny hebreo mety ve ny miteny...?: «Olom-poana»,
sy amin’ireo zanak’andriana hoe: «Olon-dratsy»?
19Tsy mitongilana amin’ny lehibe Izy
na mampandefitra ny mahantra
eo anoloan’ny mpanankarena,
fa asan’ny tanany avokoa izy rehetra.
20Ao anatin’ny indray mipy maso monja
amin’iny mamatonalina iny
no mety hahafatesan’ny olona.
Aringan’Andriamanitra ny mpanankarena
dia manjavona tsy hita intsony;
ary lasa tsy natosiny akory ny mahery.
21Fa arany maso ny toetran’ny olona,
ary hitany avokoa ny lalan-kalehany.
22Tsy ny haizim-pito na ny alo-mainty
no tsy ahitany ny mpanao ratsy.
*
23Andriamanitra tsy mila manao famotorana olona
izay tonga eo anatrehany mba hotsarainy.
24Fa montsamontsaniny ny olo-mahery
na dia tsy misy fakana am-bava aza,
ka soloiny olon-kafa ny toerany;
25satria fantany mihitsy ny asan’ireo.
Ka amin’ny indray alina ihany
no anonganany azy ho montsana.
26Tehamaina eo imasom-bahoaka
no namelezany azy toa olo-meloka.
27Satria niala tamin’Andriamanitra ireo
ka tsy niraharaha ny sori-dalany rehetra.
28Izany no nanesika ny mahantra sy ory
hiantso vonjy amin’Andriamanitra;
ka henony tokoa ny fitarainany.
*
29Raha mangina Andriamanitra,
zovy no hanameloka Azy?
Raha manafin-tava Izy,
zovy no hahita Azy?
Kanefa miahy ireo firenena
sy ny olombelona rehetra Izy
30mba tsy hanjakàn’ny olon-tsy mendrika,
mpanao kobaka am-bava amin’ny vahoaka#34.30 And 29-30: rijan-teny tohanan’ny dkt tranainy maro, ny rijan-teny hebreo indraindray mandika hoe Fa ambonin’ny firenena, ny olombelona izy mba hisoroka ny olona tsy mendrika, mpanao kobaka am-bava tsy handray fahefana..
31Fa raha misy manao amin’Andriamanitra hoe:
«Efa namita ny saziko aho,
ka tsy hanao ratsy intsony.
32Asehoy ahy izay heloko tsy mbola hitako;
fa raha nanao ratsy aho
dia tsy hamerina izany intsony.»
33Araka ny hevitrao be tsikera io, ry Jôba,
moa hanafay azy va Andriamanitra?
Koa satria tsy izaho no manapaka fa ianao,
dia lazao izay fantatrao.
*
34Hiteny ny olo-manan-tsaina
ka hanao toy ny olon-kendry
izay mihaino ahy hoe:
35«Miteny zavatra tsy fantany i Jôba
ka tsy misy dikany akory izay lazainy.
36Enga anie ka hosedraina mafy izy
mandra-pahatonga azy hilefitra,
satria ny valin-teny nataony
dia tahaka ny an’ny olon-dratsy!
37Fa mpanota izy sady mpikomy amin’Andriamanitra
hany ka manao teny maro hanoherana Azy.»
Voafantina amin'izao fotoana izao:
Jôba 34: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.