Jeremià 8
8
1Amin’izany fotoana izany, hoy ny teny hentitry ny Tompo, dia hofongarina avy ao am-pasana ny taolan’ireo mpanjakan’i Joda sy ny an’ireo lehibeny, ny taolan’ireo mpisorona sy ny an’ireo mpaminany ary ny an’ireo mponina tao Jerosalema, 2ka avela hiparitaka eo anatrehan’ny masoandro sy ny volana ary ny andian-kintana eny amin’ny lanitra izay notiavin’ireny olona ireny ka nivavahany sy niraiketany, ary nanontaniany hilan-kevitra sy niankohofany. Tsy hangonina na halevina intsony ireo taolana ireo fa ho tonga zezika eny ambonin’ny tany#8.2 Ny tsy milevina am-pasana dia noheverina ho loza lehibe; jereo Mpitor 6.3.. 3Ary ny sisa tavela rehetra amin’izao taranaka ratsy izao, ka mbola velona any amin’ny toerana izay nanelezako azy any, dia haniry kokoa ny ho faty toy izay ny ho velona. Izany no teny hentitr’ilay TOMPOn’izao rehetra izao.
Mikiribiby aman-keloka
4Hoteneninao amin’ny vahoakan’i Joda, ry Jeremià, fa izao no lazain’ny TOMPO:
Izay mianjera ve dia tsy miarina intsony?
Izay miodina ve dia tsy miverina intsony?
5Koa nahoana àry ity vahoaka ity,
no niodina, ry Jerosalema,
ka mikiribiby amin’izany fiodinany izany?
Mifikitra amin’ny andriamani-tsiizy izy
ka tsy mety miverina amiko.
6Nohenoiko tsara izay nolazainy
fa tsy mitombina velively.
Tsy misy mba manenina amin’ny haratsiany izy
na mba manontany tena hoe: «Inona ity nataoko?»
Fa samy mivily amin’izay maharevo azy avy izy#8.6 Dkt hafa «manohy ny hazakazaka adalany».
tahaka ny soavaly miriotra amin’ny ady.
7Na dia ny vano aza dia mahalala
ny fotoanandro fifindrany lasy;
ary ny domohina sy ny sidintsidina
mbamin’ny tsikorovana koa
samy mitandrina ny fotoana fiverenany,
fa ny vahoakako kosa tsy mahalala ny fitsipiko.
Ireo mpisandoka ho hendry
8Ianareo mihambo hoe: «Hendry izahay,
sady ato aminay ny lalànan’ny TOMPO.»
Ahoana no ahazoanareo mihambo toy izany,
raha ireo mpanora-dalàna aza
manao fanoratana diso
ka mahatonga azy hivoana?
9Mahazo henatra ny hendry
ary ketraka satria voafandrika;
nanamavo ny tenin’ny TOMPO izy
ka inona indray no mahahendry azy?
Tsy fahatsiarovan-tenan’ny mpaminany sy ny mpisorona
(Jereo Jer 6.12-15)
10Ary noho izany, hoy ny Tompo#8.10 And 10-12: ampit 6.12-15.,
dia homeko ny hafa ny vadiny
ary ny sahany ho an’izay maka azy.
Satria izy rehetra na ny kely na ny lehibe
dia samy mitady tombontsoa avokoa.
Na ny mpaminany na ny mpisorona
dia samy mpamitaka avokoa.
11Alasafay fotsiny no nitsaboany
ny fahavoazan’ny vahoakako
tamin’ny nilazany hoe:
«Fiadanana, fiadanana!»;
kanjo tsy misy fiadanana akory#8.11 Jereo Ezek 13.10..
12Tokony hahamenatra azy
ny zava-maharikoriko nataony;
nefa tsy menatra akory izy
sady tsy mahatsapa ny hadisoany.
Noho izany, hoy ny TOMPO,
dia ho isan’ireo ho lavo izy;
ka amin’ny andro hamaliako azy,
dia hitrosina amin’ny tany izy.
Diso fanantenana ny Tompo sy ny vahoaka
(Ny Tompo)
13Nony tena hioty vokatra teo aminy Aho,
hoy ny teny hentitry ny TOMPO,
dia tsy nisy voany teo amin’ny voaloboka
ary tsy nisy voany koa teo amin’ny aviavy,
fa nalazo ny raviny;
koa avelako ho an’ny mpandalo izy#8.13 Tsy misy voany koa ny aviavy: jereo Mk 11.12-14..
(Ny vahoaka)
14Nahoana no mijanona eto isika?
Andeha hifamory isika
ka hiditra ao amin’ny tanànamimanda
ary dia miandry ny ho faty ao,
satria ny TOMPO Andriamanitsika
no manendry antsika ho faty
ka mampisotro antsika rano voapoizina,
noho isika efa nanota taminy:
15Nanantena fiadanana isika,
nefa tsy nisy soa akory.
Nanantena fotoam-panasitranana isika
kanjo indro zava-mampihorohoro.
16Efa ao Dana ny fahavalo
ka re avy any ny fiefonefon’ny soavaly.
Mihorohoro ny tany manontolo
noho ny fanenon’ireo soavaly haingam-pandeha.
Avy izy handripaka ny tany sy izay mameno azy,
dia ny tanàna sy ny mponina ao aminy.
(Ny Tompo)
17Indro bibilava misy poizina
no halefako hamely anareo,
dia menarana tsy azon’ody;
ka hanaikitra anareo tokoa izy,
hoy ny teny hentitry ny TOMPO.
Ny alahelon’i Jeremià
(Jeremià)
18Marary mikainkona ny foko;
tsy misy fanafody hahasitrana ny alaheloko.
19Injany! Re hatrany amin’ny faritra lavitra any
ny antso vonjy ataon’ny vahoakako hoe:
«Tsy ao Tsiôna intsony ve ny TOMPO,
ary tsy ao aminy intsony ve ny mpanjakany?»
(Ny Tompo)
Nahoana moa izy no nahatezitra Ahy
tamin’ireo sarivongan-tsampiny,
dia ireo zava-poana avy any an-kafa?
(Jeremià)
20Efa lasa ny fararano
ary efa tapitra ny fotoam-pijinjana,
nefa tsy mbola misy famonjena ho anay!
21Noho ny fahavoazan’ny vahoakako
dia torotoro tanteraka aho;
misaona aho, azon’alahelo mafy!
22Moa tsy misy balisama mampitony
na dokotera ve any Gilehada?
Nahoana no tsy mety sitrana
ny ratran’ny fireneko?
23Enga anie ka ho feno rano ny lohako
ary ho loharanon-dranomaso ny masoko
mba hitomaniako andro aman’alina
ireo maty tao amin’ny fireneko!
Voafantina amin'izao fotoana izao:
Jeremià 8: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.