Jeremià 9
9
Vahoaka heniky ny lainga
1Raha izao aho no manan-toerana any an-taniefitra
tahaka ny fialofan’ireo mpivezivezy,
dia hilaozako ny fireneko
ka handeha lavitra azy aho.
Satria samy mpijangajanga avokoa
sy mpamadika mpiray tetika izy rehetra.
2«Toy ny tsipîka mihenjana ny lelany#9.2 Tsipîka mihenjana na fiadiana manambana. ,
hoy ny teny hentitry ny TOMPO.
Lainga fa tsy toetra mahatoky
no anjakany eo amin’ny tany.
Mandroso miharatsy hatrany izy,
ary Izaho kosa tsy fantany.
3Samia miaro tena amin’ny namany avy ianareo
ary aza matoky olona na dia ny rahalahy aza;
fa Jakôba vaovao mamitaka tokoa izy#9.3 Ny matoanteny hebreo midika hoe mamitaka na misongona ampiasaina eto dia mampahatsiaro ny anarana hoe Jakôba, izay razamben’ny vahoaka Israely; jereo Gen 25.26; 27.36; Hôs 12.3-4.,
ary na ny sakaiza aza manaratsy anareo.
4Samy mamitaka ny namany izy
fa tsy misy milaza ny marina,
satria efa zatra mandainga.
Nironany loatra ny fanaovan-dratsy
ka tsy afaka hiverina amiko intsony izy.
5Herisetra arahina herisetra#9.5 Ny faran’ny and 4 sy fiandohan’ny and 5 dia nadika araka ny dkt tranainy grika sy latinina. Tsy mazava ny hebreo, ka misy manao hoe vizaky ny manao ratsy izy. 5 Monina eo anivon’ny fitaka ianao; fitaka no tsy anekeny... ,
ary fitaka arahina fitaka!
Tsy manaiky hahalala Ahy izy,
hoy ny teny hentitra ambarako!»
6Koa hoy ny TOMPOn’izao rehetra izao:
«Hodioviko amin’ny afo izy
ary hozahako toetra.
Satria ahoana ny fomba hafa hataoko
amin’ny faharatsian#9.6 ny faharatsian’ny: teny latsaka amin’ny rijan-teny hebreo, fa narenina araka ny dkt tranainy grika sy aramianina.’ny vahoakako?
7Toy ny zana-tsipîka mahafaty#9.7 mahafaty: dkt hafa maranitra. ny lelany,
ka lainga avokoa izay lazainy:
Tsara vava amin’ny namany izy,
fa ao anatiny manao otri-po.
8Koa tsy hirotsaka ve Aho
hamely ireny olona ireny,
ka hamaly faty ny firenena toy izany#9.8 Jereo 5.9,29.,
hoy ny teny hentitra ambarako?»
Andron-dranomaso sy toloko
9Noho ny amin’ny tendrombohitra
no hitomaniako sy hitarainako,
ary noho ny amin’ny kijana any an-taniefitra
no hanaovako hira fisaonana,
satria voadoro avokoa izy rehetra
ka tsy andalovan’olona intsony.
Tsy re any intsony ny fitrenan’ny andian’omby;
ary samy lasa nandositra avokoa
ny voro-manidina sy ny bibidia.
10Dia hoy ny Tompo hoe:
«Hataoko korontam-bato i Jerosalema,
ka ho fonenan’ny amboadia;
ary ireo tanànan’i Joda
hataoko lao tsy misy mponina.»
11Mba misy olon-kendry anankiray ve
mba afaka hahatakatra izao?
Raha nitenenan’ny TOMPO izy,
dia aoka mba hanambara
izay antony nahasimba ny tany
sy nahavoadoro azy ho tahaka ny taniefitra
ka tsy andalovan’olona intsony.
12Ary hoy indray ny TOMPO hoe: «Nandao ny fampianarana nomeko azy izy ary tsy nihaino na nanaraka izay nolazaiko taminy; 13nikiry tamin’ny ditram-pony hanao ratsy izy, ka nifikitra tamin’i Bahala izay efa nanazaran’ny razany azy. 14Noho izany, hoy ny TOMPOn’izao rehetra izao sady Andriamanitr’i Israely, indro hofahanako zava-mahafaty ity vahoaka ity, ary hampisotroiko rano misy poizina. 15Haeliko any amin’ny firenen-kafa izay tsy fantany na fantatry ny razany izy, ka hoenjehiko amin’ny ady any ambara-pahalany ritra azy. 16Izany no TOMPOn’izao rehetra izao.
(Ny vahoaka)
Tandremo, antsoy ho tonga
ireo vehivavy mpitomany.
Maniraha haka ireo efa za-draharaha;
17aoka ho tonga faingana ireny
ka hiredona hira fisaonana ho antsika!
Aoka hijoy ny ranomasontsika
ary ho kotsan-dranomaso ny hodi-masontsika!
(Jeremià)
18Misy feo mitaraina re any Tsiôna:
«Indrisy, rava isika sady afa-baràka tokoa
satria voatery hamoy ity tany ity
noho ny nandrodanana ny tranontsika!»
19Ianareo vehivavy, mihainoa ny tenin’ny TOMPO,
sokafy tsara ny sofinareo amin’izay lazainy:
ampianaro hira fisaonana ny zanakavavinareo,
samia ianareo mampianatra ny namany avy
izao tononkira fitomaniana izao:
20«Mianika ny varavarankelintsika ny fahafatesana,
ary miditra ao an-dapantsika;
eny an-dalambe no andringanany ny ankizy
ary eny an-kianja no andripahany ny zatovo.»
(Ny Tompo)
21Ambarao kosa, ry Jeremià,
izao teny hentitry ny TOMPO izao:
«Eny amin’ny tany eny
no miampatrampatra ny fatin’olona,
toy ny zezika aparitaka eny an-tanimboly;
tahaka ny amboara voajinja
sady efa nilaozan’ny mpijinja
saingy tsy misy olona mpanangona.»
Ny fahalalana ny Tompo no tena fahendrena
22Izao no lazain’ny TOMPO:
«Aoka ny hendry tsy hirehareha
amin’ny fahendreny,
aoka ny mahery tsy hirehareha
amin’ny heriny,
ary aoka ny mpanankarena tsy hirehareha
amin’ny hareny!
23Fa raha misy te hirehareha,
dia aoka izy hirehareha
ho afaka mahafantatra Ahy
sy mahalala fa Izaho TOMPO,
dia mampihatra ny hatsaram-po
ary ny rariny sy ny hitsiny eto an-tany.
Eny, ny olona toy ireny no sitrako#9.23 ny olona... sitrako: dkt hafa izany no mahafinaritra Ahy. –Ny fiandohan’ity and ity dia tsiahivina ao amin’ny 1 Kôr 1.31; 2 Kôr 10.17.;
teny hentitra avy amiko TOMPO izany.»
Fampitandremana ireo voafora ivelany fotsiny
24Indro avy ny andro, hoy ny teny hentitry ny TOMPO, izay hirotsahako an-tsehatra hamely ireo voafora ivelany fotsiny: 25na ny Ejiptianina, na ny Jodeanina, na ny Edômita, na ny Hamônita, na ny Môabita na ireo mponina any an-taniefitra izay miharatra fihirifana. Satria izy rehetra ireo#9.25 izy rehetra ireo: dkt hafa araka ny hebreo mahazatra tsy misy firenena voafora ary na dia ny vahoaka Israely ankapobeny aza dia tsy voafora ho an’ny Tompo. , eny na dia ny Israelita koa aza, dia tsy voafora fo ho an’ny Tompo.
Voafantina amin'izao fotoana izao:
Jeremià 9: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.