Ezekiela 9
9
Ny famaizana an’i Jerosalema
1Avy eo dia reko niteny mafy tamiko ny Tompo nanao hoe: «Manatòna ianareo natao hanafay ny tanàna ka samia mitondra ny fitaovam-pandravana eny an-tanany avy.» 2Dia indreo lehilahy enina nipoitra teo amin’ny vavahady ambony, izay tamin’ny lafiny avaratry ny tempoly, sady samy nitondra ny fitaovam-pandravàny avy. Nisy lehilahy iray niakanjo rongony#9.2 Ny fitafiana rongony dia natao ho fitafian’ny mpisorona (jereo Lev 6.3; 16.4) sy ny anjely mpandrava ao amin’ny Apôk 15.6. teo afovoany sady mitondra fitaovam-panoratana teny amin’ny fehikibony. Niditra izy rehetra ka nijanona teo akaikin’ny alitara halimo. 3Ny voninahitr’ilay Andriamanitr’i Israely izay niseho teo ambony kerobima dia niakatra ho eo amin’ny tokonam-baravaran’ny tempoly. Ary niantso ilay lehilahy niakanjo rongony izay nitondra fitaovam-panoratana ny TOMPO, 4ka nanao taminy hoe: «Mandehana mamakivaky eran’ny tanànan’i Jerosalema, ka asio marika eny an-kandrin’izay rehetra mitaraina sy malahelo noho ny fomba rehetra maharikoriko atao eo aminy.» 5Avy eo dia reko Izy nanome baiko ireo sisa hoe: «Manaraha io lehilahy io eran’ny tanàna, ka vonoy ny mponina. Aza antra fijery azy ianareo, ary aza mamindrafo aminy. 6Aringano na antitra na tanora, mbamin’ny tovovavy sy ny ankizy ary ny vehivavy. Kanefa aza kasihina izay mitondra ilay marika#9.6 Jereo Apôk 7.3-4; 9.4.. Atombohy eto amin’ny Toeramasiko izany.» Dia nanomboka namono ireo loholona izay teo anoloan’ny tempoly izy. 7Ary ny Tompo nibaiko azy hoe: «Lotoy ny tempoly, fenoy fatin’olona ny kianjany#9.7 Ny fikasihana faty dia mahatonga ho maloto*, izany hoe tsy afaka mandray anjara amin’ny fanompoam-pivavahana., dia mandehana.» Dia lasa ireo ka nanohy ny fandringanana tao an-tanàna.
8Izaho irery sisa nijanona teo nandritra ny famelezana, ka niankohoka tamin’ny tany ary niantsoantso hoe:
–Tompo ANDRIANANAHARY ô, raha manampatra ny fahatezeranao amin’i Jerosalema ve ianao dia handringana hatramin’ny Israelita sisa?
9Ary namaly ahy Izy hoe:
–Tsy hita lany mihitsy ny heloka nataon’ny fanjakàn’i Israely sy i Joda: feno vonoan’olona ny tany sady feno fitsarana miangatra ny tanàna. Ary ny olona dia nifampiteny hoe: «Efa nandao ny tanintsika ny TOMPO ka tsy mahita antsika.» 10Noho izany dia tsy ho antra fijery azy Aho ary tsy hamindrafo aminy; fa hataoko mivesatra ny vokatry ny fitondrantenany izy.
11Tamin’izay dia tonga nanao tatitra ilay lehilahy niakanjo rongony ka nanao tamin’Andriamanitra hoe:
–Efa notanterahiko izay nandidianao ahy.
Voafantina amin'izao fotoana izao:
Ezekiela 9: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.