Hamôsa 3
3
Hampamoahan’Andriamanitra ny vahoakany
1Ry taranak’i Israely, dia ianareo ankohonana rehetra izay nampiakarin’ny TOMPO avy tany Ejipta, henoy izao teny nambarany momba anareo izao:
2«Amin’ny fianakaviana rehetra eto ambonin’ny tany,
dia ianareo ihany no nofidiko sy nokarakaraiko;
noho izany, dia hampamoahako anareo
ny fahadisoana rehetra nataonareo.»
Tsy manam-pidiny ny mpaminany
3Hiara-dalana ve ny olon-droa,
raha tsy efa nifanaiky?
4Hanerona ao anaty ala ve ny liona,
raha tsy mahita remby?
Hanerongerona ao an-davany ve ny liona tanora,
raha tsy misy zavatra azony?
5Voan’ny fandrika amin’ny tany ve ny vorona,
raha tsy nisy sakafo nisarika azy?
Mikatona ve ny fandrika-harato
raha tsy mahazo zavatra?
6Tsofina ao an-tanàna ve ny trompetra,
ka tsy hisahotaka ny vahoaka?
Misy loza ve ao an-tanàna,
raha tsy ny TOMPO no nanao azy?
7Satria tsy manao zavatra ny Tompo ANDRIANANAHARY,
raha tsy efa mampahafantatra ny fikasany
amin’ireo mpaminany mpanompony.
8Ny liona no nierona,
ka iza no tsy hatahotra?
Ny Tompo ANDRIANANAHARY no niteny,
ka iza no tsy hampita ny hafatra ampitondrainy?
Ny fitsarana an’i Samaria
9Ataovy re eny an-tafon-tranon’ireo lapa ao Asdôda
sy eny an-tafon-tranon’ireo lapa any Ejipta,
ka lazao hoe:
«Mivoria eny an-tendrombohitr’i Samaria#3.9 Asdôda: jereo 1.8 sy nta; ny dkt tranainy grika dia manao hoe Asiria. Samaria: renivohitry ny fanjakan’i Israely avaratra. ianareo,
ka jereo ny korontana marobe eo anivony
sy ny famoretana mihatra ao anatiny.»
10Fa izao no teny hentitry ny TOMPO:
«Tsy nahalala hanao asa marina ry zareo;
zavatra vokatry ny herisetra sy ny fandrobana
no angoniny ho ao an-dapany.»
11Noho izany, ry Samaria,
izao no lazain’ny Tompo ANDRIANANAHARY:
«Hohodidinin’ny fahavalo ny taninao,
harodany hiala aminao ny mànda-fiarovanao,
ary horobainy ireo lapanao.»
Famonjena mampalahelo
12Izao no lazain’ny TOMPO:
«Rehefa misy ondry azon’ny liona,
dia tongotra roa na sombin-tsofina#3.12 tongotra roa na sombin-tsofina: jereo Eks 22.12; ampit Gen 31.39.
no tsoahan’ny mpiandry ondry
avy eo am-bavan’ny liona;
toy izany ny amin’ireo Israelita
izay mipetraka ao Samaria,
eo an-joron’ny saofà
na eo ambony fandriana malemilemy:
Vitsivitsy ihany no hovonjena.»
Fampitandremana
13Henoinareo ka ambarao amin’ny taranak’i Jakôba:
ny teny hentitry ny Tompo ANDRIANANAHARY,
dia ilay Andriamanitr’izao rehetra izao:
14«Amin’ny andro hamaliako ny Israely noho ny helony,
dia horavako ireo alitara ao Betela;
hopotehiko ny tandroky ny alitara#3.14 I Betela dia toerana 15 km eo avaratr’i Jerosalema. Tao no nanorenan’i Jerobôhama I mpanjakan’i Israely ny toeram-panasinana hifaninana amin’ny tempolin’i Jerosalema (jereo 1 Mp 12.26-29). –tandroky ny alitara: jereo Jer 17.1 sy nta. –Ny amin’ny fandravana ireo alitara tao Betela dia jereo 2 Mp 23.15. isanisany,
ka hianjerazera amin’ny tany.
15Hazerako ny trano ririnina sy trano fahavaratra#3.15 trano ririnina sy trano fahavaratra: maro ireo mpanankarena no nianatra ny mpanjaka, ka nanao trano fonenana roa samihafa ho an’ny ririnina sy fahavaratra.,
ary ho simba ny trano miravaka ivoara
sady ho fongana ny trano miezinezina.
Teny hentitry avy amiko TOMPO izany.»
Voafantina amin'izao fotoana izao:
Hamôsa 3: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.