KISAH 28
28
Paulus ku Pulau Malta
1Telas ya selamat jilei, baru jipanei pulau ajeh imuh Pulau Malta. 2Sengoi de naigei ku pulau ajeh ihad bor nu jik. Enai rup os ru naisamut jik kerana iarik manik ru sengij. 3Paulus kikumpol cag jehuk ru kijop cag jehuk ajeh. Aleh-aleh nuikor tijik kihol kerana ya hap os ajeh lalu kikap ru kiseksog ku iteg. 4Bile sengoi de naigei ku pulau ajeh naineng ha tijik jeljol ku teg Paulus, enai belwal ratak liknai, “Sengoi adeh tentu nekperendat. Hamapen kek ya selamat ju bahaye ku laot, tapi Dewi Keadilan pek kiog kek kisui.” 5Tapi Paulus kitapes tijik ajeh ru tijik ajeh kiyog nu kateh os ru Paulus pek ma-ma. 6Naisangka teg Paulus doh kias atao kek doh tiba-tiba kidat. Telas naipoj memerip iluniu ru pek mong ma-ma de pelek belaku nu kek, enai pen naiubah peniker lalu naiurok Paulus ajeh dewe.
7Pek nyak ju kenjeh mong tik hak Publius. Kek ajeh penguasa ku pulau ajeh. Kek kisamut jik nu imadeg ru kibeh bor nu jik selame nik arik. 8Ku mase ajeh, apak Publius tengah kinyik bengket ru kiciret. Paulus kiterbuk nu kek lalu kibedoa sambel kidek iteg ku kemil kek ru kek pen kibor. 9Telas hal ajeh, jeoi sengoi de nyik ku pulau ajeh naiterbuk nu Paulus ru dikdij liknai pen biperbor. 10Naihormat ha jik ru naiog jeoi hadiah. Bile jiha-dek pulau ajeh, enai juga naien dikdij ma de jiperlu.
Ju Pulau Malta nu Kote Rom
11Telas nik gencek ku pulau ajeh, jihuj kapal de mong lambang Dewe Kerbar ru jidek ju kenjeh. Kapal ajeh ju kote Aleksandria ru ya kibehenti ku pulau ajeh selame musim sengij. 12Jilei ku kote Sirakusa ru jigei ku pajeh iluniu nik arik. 13Lalu jibelayar nij ru jilei ku kote Regium. Ku ihuper nij pinoi mula kipoi ju selatan. Ku itemuteh jilei ku kote Putioli. 14Ku pajeh jiburuk memerip sesedara seiman ru naipelawe jigei besama ru enai selame seminggu. Telas ajeh jiet nu kote Rom. 15Sesedara seiman ku kote Rom naicerngai gah tentang jik tengah jihol nu majeh. Jadi, naihol ju kote Rom naiha-terbuk nu jik. Engleg ju enai ajeh naiterbuk jik ku pekan de bicereg ‘Pasar ku nong Apius,’ ru mong juga de naiterbuk jik ku pekan de bicereg ‘Nik Deg Tenumpang.’ Bile Paulus kiburuk enai, kek kibesyukor nu Jenang ru isengik kijadi tegalak.
Paulus Kibelwal ru Mai Yahudi ku Kote Rom
16Bile jilei nu kote Rom, Paulus biog gei kihalei ru bijaga ya numom aska.
17Telas nik arik, Paulus kicereg pemimpen-pemimpen mai Yahudi ku pajeh. Bile ya naibekumpol, kek kiurok nu enai, “Sesedara, eng pek ngbeh senalah nu bangse hik atao nglanggar adat de hiterima ju jenang rak hik. Tapi, eng tetap bicap ku kote Yerusalem ru biserah nu mai Rom. 18Telas naiperiksa hal ajeh, mai Rom naiha-terlas eng kerana pek naikep ma-ma bukti naiha-hukom eng dat. 19Tapi mai Yahudi naitentang ha keputusan ajeh, jadi eng tepaksa ngsemanj bipecare ya raja kerajaan Rom. Tapi, eng pek bemaksod ngha-dakwe ha bangse lieng. 20Ajehloh isebab ngha-buruk ru ngha-belwal ru engkek. Eng birantei begei adeh kerana ngpecaya nu Peselamat de biharap ya bangse Israel.”
21Lalu naiurok nu kek, “Jik pekseg jiterima surat ju lengrik Yudea tentang hal hek ajeh ru pek mong numom pen ju kendeh de naien gah atao naiurok nej tentang hek. 22Tapi jiha-cerngai neajar hek kerana sengoi ku jap-jap tempat naitentang ha neajar de hajoi ajeh.”
23Kerana ajeh, naipetetap nanek arik naiha-beburuk ru Paulus. Ku arik de ya naipetetap ajeh, jeoi sengoi naihol nu deg ginei Paulus. Mula ju pegelap lei dui Paulus kiajar begeiharok Jenang Kimemerintah sebegei Raja. Kek kiguna ayat-ayat ju Hukom Taurat Musa ru kitab nabi-nabi kaha-pujok enai naipecaya nu Yesus. 24Mong sengoi de naipecaya nu ma de biurok ya Paulus tapi mong juga de pek naipecaya. 25Enai pek naibesetuju ku ratak liknai ru mula naidek ju tempat ajeh telas Paulus kiurok ibengwal de ipenyudah adeh: “Mimang benar ma de biurok ya Kelog Santen melalui Nabi Yesaya nu jenang rak engkek:
26‘Etloh ru urokloh hal adeh nu bangse adeh:
Engkecerngai tapi pek engkereti ma de engkecerngai.
Engkenengneng tapi pek engkereti ma de engkeneng
27kerana sengik bangse adeh ya ihad keras.
Entag enai tuli ru mat enai perekbet.
Amen enai pek begei ajeh, tentu mat enai doh kinengneng,
entag enai doh kiceringai,
ru sengik enai buleh kireti,
lei naijog nij nu Eng,
ru Eng doh Ngperbor enai.’ ”#Yes 6:9-10
28Paulus kiurok, “Jadi, hodloh engkepanei tentang hal adeh: Jenang ya mula Kipeselamat ha mai pek Yahudi ru enai doh naiterima ha Gah Bor ajeh.” [29Telas Paulus kiurok begei ajeh, mai Yahudi naidek ju kenjeh sambel naibekelahi ratak liknai.]#28:29 Ayat adeh pek mong ku kateh memerip salinan Alkitab manah.
30Paulus kigei ku kote Rom nar tahut iluniu ku deg de kisiwa ajeh. Kek kisamut bok-bok taleh de naisueg kek. 31Bebas pek bikacau ya bok-bok pen, Paulus kiajar tentang begeiharok Jenang Kimemerintah sebegei Raja ru tentang Tuhan Yesus Kristus.
Voafantina amin'izao fotoana izao:
KISAH 28: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.