ROM 1
1
1Surat adeh ju eng Paulus hambe Kristus Yesus. Eng bicereg ngjadi rasul#1:1 Rasul: Perkataan adeh kirujok nu sengoi-sengoi de bilantek ha tugas has pelayanan. Icuntohjeh: Paulus, Barnabas, 12 urag pengikot Yesus, ru mai kilek juga. ya Jenang supaye ngperlei Gah Bor ju Ilei.
2Sejak ju entem lagi Gah Bor ajeh ya bijanji ya Jenang melalui Inabi-nabi ku kateh Alkitab.#1:2 Alkitab: Ku jaman Paulus, Alkitab ajeh kirujok nu Perjanjian Lama taleh. 3Gah Bor ajeh penasal tentang Kenon Jenang. Ku bumi adeh, Kek Kiyos sebegei kenon-cenok ju Raja Daud 4ru Ilei ajeh tebukti sebegei Kenon Jenang de ihad bekuasa bile Jenang Kiberkos Kek ju Idanan ya Kelog Santen. Ilei ajehloh Yesus Kristus Tuhan hik. 5Ju Ileiloh eng ngkep bernor sengik Jenang ru kerjak has sebegei rasul untok ngpimpen dikdij mai pek Yahudi naipecaya ru naitaat nu Ilei. 6Engkek de ku kote Rom juga ya temasok ku mai pek Yahudi de pecaya ajeh, de bicereg engkejadi hak Yesus Kristus.
7Eng ngcot surat adeh nu dikdij liengkek de gigei ku kote Rom. Engkek bihok ya Jenang ru Kek ya Kicereg engkejadi Isengoi-sengoi.
Semoge Jenang Menek hik ru Tuhan Yesus Kristus Baiog berkat ru neaman nu engkek.
Paulus Ihad Kihod Kahagu-sueg Kote Rom
8Mula-mula sekali, eng ngbesyukor nu Jenang tentang dikdij liengkek. Eng ngbesyukor melalui Yesus Kristus kerana gah tentang iman engkek nu Kristus ya bipanei ku seluroh dunia. 9-10Sepenoh sengik eng ngbekerjak ha Jenang untok ngperlei Gah Bor tentang IKenon. Eng selalo ngingat ha engkek ku kateh dikdij doa eng. Jenang Kipanei tentang hal ajeh ru Kekloh saksi eng. Ya liu ngbedoa ngsemanj supaye ya Iheknod, Jenang Kibuka nong ngsueg ha engkek. 11Eng ihad nghagu-sueg ha engkek kerana ngha-kungsi kurnie ju Kelog Jenang supaye engkek bipekuat. 12Imaksodjeh, iman eng nu Yesus kipekuat engkek, ru iman engkek nu Yesus kipekuat eng.
13Sesedara seiman, eng nghod engkepanei tentang hal adeh: Mimang ya jeoi kali ngrancang ngha-sueg ha engkek tapi lei hunen pen mong tetaleh hal de bekerlag. Eng ngha-sueg ha engkek kerana nghod kerenjak de ngbeh ku engkap engkek mong ihasel sama begei de ya ngbeh nu mai pek Yahudi ku tempat de kilek. 14Eng wajeb ngkerakjak ha dikdij mai, baik ha mai Yunani ru ha mai pek Yunani, baik ha mai de besekulah ru ha mai de pek besekulah. 15Ajehloh isebab eng ihad nghagu-perlei Gah Bor nu engkek de gigei ku kote Rom.
Kuasa Gah Bor
16Eng betol-betol ngyaken tentang hal adeh: Gah Bor ajeh kuasa Jenang de kipeselamat dikdij mai de pecaya nu Yesus, mula-mula nu mai Yahudi ru nu mai pek Yahudi juga. 17Kerana, ku kateh Gah Bor ajeh mong bipasal begeiharok manusia naijadi benar ku mat Jenang. Icare ajeh, manusia hod naipecaya nu Jenang ju mula lei dij. Begei de bicot ku kateh Alkitab, “Sengoi de benar ku mat Jenang doh kisui kerana kipecaya nu Kek.”#Hab 2:4
Bengal Jenang nu Dosa Manusia
18Jenang Kiperneng Ibengal ju serga nu mai de jehat ru mai de pek naihormat ha Ilei. Jenghat enai ajeh kikerlag mai kilek supaye pek naipanei neajar de benar tentang Jenang. 19Jenang Kihukom manusia kerana ma de dapat naipanei tentang Jenang ya bik ru lau nu enai kerana Jenang ya Kibeh hal ajeh bik ru lau nu enai. 20Sejak Jenang Kicipte dunia adeh, Isipat-sipat de pek dapat bibakek ya dapat bipaham ya manusia. Manusia dapat naibakek Ikuasa de lei ditehjeh ru Isipat-sipat sebegei Jenang melalui dikdij hal de ya Kicipte. Kerana ajehloh, manusia pek mong alasan untok naiurok pek naikenal Kek. 21Hamapen naikenal ha Jenang, tapi enai pek naihormat ha Kek sebegei Jenang ru juga pek naibesyukor nu Ilei. Tapi peniker enai had tentang hal de sie-sie taleh ru sengik enai de budoh tebeg ya gengwer. 22Hamapen naiurok diri liknai ajeh panei, tapi sebenarnye enai ajeh budoh. 23Nainyek pek naiha-sembah ha Jenang de sui lei ditehjeh tapi naisembah ha patong-patong de naibeh begei ha bentok manusia de pek sui lei ditehjeh, cep, binatag, tijik, ru gerig.
24Kerana ajehloh, Jenang Kibiar enai bikuasa ya heknod sengik liknai de kaha-beh napsu seks de niknej lei ratak naipekutor berog liknai. 25Naitukar neajar de benar tentang Jenang ya nelenglod. Naisembah ru naihormat nu bende-bende de bibeh ya Jenang tapi pek naisembah ru pek naihormat nu Jenang de becipte dikdij ajeh. Sepatotnye, Jenangloh de hod bipateh lei ditehjeh! Amin.
26Kerana manusia naibeh begei ajeh, Jenang Kibiar enai naijoi heknod seks de niknej. Kekerdor enai ya naidek kelaku seks de patot naibeh besama ru keral, tapi naibeh seks de pek patot naibeh ratak liknai kekerdor. 27Sama juga, kekeral enai pen ya naidek bahneh seks de patot naibeh besama ru kerdor, tapi mong heknod de kuat naibeh seks de pek patot naibeh ru ratak liknai kekeral. Kerana naibeh hal de ihad beselnel ajeh, enai ya naiterima nehukom de kena ru dosa enai ajeh.
28Lagipen, kerana nairasa pek perlu naiha-aku ha Jenang, Jenang Kibiar sengik enai kijadi rusak lei naibeh hal-hal de pek patot naibeh. 29Sengik enai tebeg ya dikdij hal de pek benar, de jehat, tamak, ru sok sengik. Sengik enai juga tebeg ya iri sengik, heknod naiha-perdat mai, nelawan, nelengnon, ru denendam. Enai nekbecakap ruai, 30nekbepitnah, naigetek ha Jenang, enai sumbong ru belagak, naikek care naiha-beh jenghat, pek naitaat nu amek-apak liknai, 31enai nainyek pek naiha-panei hal belok de betol ru de salah, pek naitepati jenanji, pek mong haknok, ru pek mong neyayak. 32Amen hijoi hukom Jenang de benar, sengoi-sengoi de naibeh dikdij hal ajeh patot bihukom dat. Hamapen ya naipanei hal ajeh, tapi enai lekat naibeh hal-hal ajeh. Apeka ajeh taleh, enai juga naipegalak mai kilek naibeh begei ajeh juga.
Voafantina amin'izao fotoana izao:
ROM 1: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.