KISAH 26
26
Paulus Kibele Idiri ku Ngar Raja Herodes Agripa Kedue
1Raja Herodes Agripa Kedue kiurok nu Paulus, “Hek buleh habele diri lihek.” Paulus kiangket iteg lalu kibele idiri begei adeh:
2“Tuan Raja Herodes Agripa! Ngrasa bor kerana biog peluang ngbele diri ku ngar jen ha dikdij dakwean mai Yahudi. 3Teutame sekali kerana jen taleh de jenpaham ha dikdij adat ru perselisihan antare mai Yahudi. Kerana ajehloh, ngmerayu supaye sabar jencerngai ha engrok eng.
4Dikdij mai Yahudi ya naipanei tentang care sinui eng sejak nglitau. Naipanei begeiharok ngsui ku kampug eng ru juga ku kote Yerusalem. 5Naikenal eng ya liu. Amen naihod, enai buleh naipasal nu jen tentang hal adeh: Ngsui sebegei mai Farisi ru setie ngjoi dikdij neajar agame lijik. 6Hunen eng bipecare kerana ngbeharap nu jenanji de biog ya Jenang nu jenang rak jik. 7Due belas suku Israel naisembah Jenang kelem yah ru naibeharap Jenang Kipenohi Ijenanji ajeh. Tuan Raja Herodes Agripa, eng bidakwe ya mai Yahudi kerana neharap ajeh. 8Engkek sepatotnye engkepecaya Jenang dapat Kiberkos mai dat.
9Entem lieng pen ngserngik eng mesti ngbeh dikdij hal ngha-lawan ha Yesus Mai Nazaret ajeh. 10Ajehloh de ya ngbeh ku kote Yerusalem. Ru kuasa de biog ya raknak-raknak imam agame Yahudi, eng ngjel jeoi sengoi-sengoi Jenang. Eng juga ngsetuju bile enai bihukom dat. 11Jeoi kali nget nu deg-deg sembahyang ngha-hukom enai ru ngpaksa supaye naihina ha Yesus. Ihad ngberiknos ha enai lei nget nu kote-kote ku lengrik kilek ru nganiaye enai.”
Paulus Kicerite Ipengalaman
(Kis 9:1-19; 22:6-16)
12“Ajehloh itujuan ngkep surat kuasa ju raknak-raknak imam agame Yahudi ru nget nu kote Damsyik. 13Tuan Raja Herodes Agripa, mase ku ceknip eng, kira-kira ku itengah arik, ngneng cahaya de lebeh lau daripade mat arik. Cahaya ajeh kihol ju langit ru kisog ku sekelileg eng ru ku dikdij sengoi de naicip besama ru eng. 14Dikdij lijik jijer nu matik. Lalu ngcerngai suara kibelwal nu eng kateh engrok Ibrani, ‘Saulus, Saulus! Yama haaniaye Eng? Amen teros halawan Eng, hek hapernyik diri lihek begei hatendang tungkat de tajap imol.’ 15Lalu ngtanya, ‘Enjen bok?’ Tuhan Kiberlag, ‘Eng Yesus de haaniaye ajeh. 16Kosloh ru jinjegloh! Eng ya Ngperneng diri LiEng nu hek kerana Ngha-lantek hek hajadi hambe Eng. Hek hod hapasal nu mai kilek tentang hal de ya haneng ru tentang hal de doh Ngperneng nu hek. 17Eng doh Ngpeselamat hek ju mai Yahudi ru mai pek Yahudi. Eng Ngngeng hek nu enai 18supaye habuka mat enai lei pek naisui nij ku kateh kenglap tapi naisui ku kateh cahaya. Juga, supaye enai pek lagi bikuasai ya Ibles tapi bikuasai ya Jenang. Begei ajehloh doh dosa enai biampon ru enai doh naikep ma de bijanji ya Jenang nu sengoi-sengoi de bipeberseh ya iman nu Eng.’ ”
Paulus Kipasal tentang Ikerjak
19“Tuan Raja Herodes Agripa! Kerana ajehloh, eng sentiase ngkerekwat ngha-taat nu nengneng de ngterima ju serga. 20Ngajar nu mai tentang hal adeh: Enai patot naibetobat ju dosa lalu naiserah diri enai nu Jenang ru naibeh hal-hal de kipebukti enai ya naibetobat. Mula-mula ngajar hal ajeh ku kote Damsyik. Telas ajeh ngajar hal ajeh ku kote Yerusalem, ku dikdij lengrik Yudea, ru nu mai pek Yahudi juga. 21Kerana ajeh, mai Yahudi naicap eng mase eng ku kateh laman Deg Jenang ru naikerekwat naiha-perdat eng. 22Tapi Jenang selalo Kitulog eng. Kerana ajeh, hunen eng ngjinjeg ku padeh ngha-besaksi nu dikdij sengoi, nu mai entoi ataopen nu sengoi biasa. Ma de ngurok ajeh sama begei de biurok ya Nabi Musa ru nabi-nabi de kilek. 23Enai ya naiurok begei adeh: Peselamat de bijanji ya Jenang hodloh bisiksa ru Kijadi Sengoi petame de Kikos ju danan. Kek doh Kiperlei Gah Bor nu mai Yahudi hodpen mai pek Yahudi. Gah Bor ajeh begei cahaya nu enai.”
24Tengah Paulus kibele idiri, Festus kiurok ru suara de kuat, “Paulus, hek ya gila! Penanei hek tentang jeoi pekare kibeh hek jadi gila!”
25Tapi Paulus kiberlag, “Tuan Festus de bihormat, eng pek nggila. Engrok de ngperlei ajeh benar ru kihol ju peniker de waras. 26Tuan Raja Herodes Agripa, eng teros-terang ru berani ngurok ku ngar jen kerana jenreti tentang dikdij hal ajeh. Eng ngyaken ya jenpanei dikdij hal ajeh kerana hal ajeh pek belaku ku tempat de cenem. 27Tuan Raja Herodes Agripa, jenpecayaka engrok nabi-nabi? Ngpanei jenpecaya!”
28Raja ajeh kiurok nu Paulus, “Hapiker hek dapat hapejadi eng mai Kristian ku mase de singkat adeh?”
29Paulus kiberlag, “Sekejapka liuka, eng ngbedoa nu Jenang supaye jen ru dikdij sengoi de ceringai ha eng ku arik adeh engkejadi begei ha eng kecuali birantei begei eng.”
30Lalu Raja Herodes Agripa Kedue, Festus, Puteri Bernike, ru dikdij sengoi de kilek naijinjeg. 31Telas naihol, naibelwal ratak liknai, “Sengoi adeh pek kibeh ma-ma de patot bihukom dat atao bijel.” 32Raja ajeh kiurok nu Festus, “Sengoi adeh buleh biterlas amen pek kisemanj bipecare ya raja kerajaan Rom.”
Voafantina amin'izao fotoana izao:
KISAH 26: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.