KISAH 25
25
Paulus Kisemanj Bipecare ya Raja Kerajaan Rom
1Nik arik telas Festus kilei nu lengrik Yudea sebegei penguasa, kek kiet nu kote Yerusalem ju kote Kaisarea. 2Ku pajeh raknak-raknak imam agame Yahudi ru pemimpen-pemimpen mai Yahudi naidakwe Paulus ku ngar Festus. Naisemanj Festus 3kingeng Paulus nu kote Yerusalem kerana enai ya naibepakat naiha-kerep ru naiperdat kek ku kateh iceknip. 4Tapi Festus kiberlag, “Paulus biterhan ku kote Kaisarea ru eng pen doh nglos nij nu majeh. 5Pemimpen-pemimpen ku engkap engkek ajeh buleh naiet besama ru eng nu kote Kaisarea. Amen kek kibesalah, enai buleh naidakwe kek ku pajeh.”
6Festus kigei ku kote Yerusalem kira-kira lapan atao sepuloh arik nij. Telas ajeh kijog nu kote Kaisarea. Ku ihuper, kek kijadi hakem ku mahkamah ru kiog perintah supaye Paulus bien nu ingar. 7Bile Paulus kilei, mai Yahudi de naihol ju kote Yerusalem naijinjeg ku isekelileg ru mula naiperhol dakwean de nyeh tapi pek dapat naiog bukti ha tenudoh enai ajeh. 8Paulus kibele idiri ru kiurok, “Eng pek ngbesalah nu Hukom Taurat, nu Deg Jenang, ataopen nu raja kerajaan Rom.”
9Tapi Festus kaha-kot sengik mai Yahudi. Kerana ajeh, kek kitanya nu Paulus, “Hodka hek haet nu kote Yerusalem supaye buleh ngpecare hek ku peteh?”
10Paulus kiberlag, “Eng ngjinjeg ku ngar mahkamah raja kerajaan Rom. Ku padehloh nghod bipecare. Jen sendiri ya jenpanei eng pek ngbesalah nu mai Yahudi. 11Amen ngbesalah lei patot bihukom dat, eng sanggop ngdat. Tapi amen tenudoh enai ajeh pek betol, bok-bok pen pek buleh kiserah eng nu enai. Eng ngsemanj bipecare ya raja kerajaan Rom!”
12Telas Festus kibelwal ru ipenasihat, kek kiberlag, “Kerana hasemanj bipecare ya raja kerajaan Rom, hek hod hahadap kek.”
Festus Kipasal nu Raja Herodes Agripa Kedue tentang Paulus
13Memerip arik ju kenjeh, Raja Herodes Agripa Kedue ru imenang kerdor imuh Puteri Bernike baihol nu kote Kaisarea baiha-samut Festus sebegei penguasa lengrik Yudea. 14Mase memerip arik baigei ku pajeh, Festus kipejelas tentang hal Paulus nu raja ajeh. Festus kiurok, “Ku padeh mong numom de biwes ya Feliks ku kateh jel. 15Mase eng ku kote Yerusalem, raknak-raknak imam agame Yahudi ru raknak-raknak mai Yahudi naidakwe kek ru naisemanj nghukom kek. 16Tapi ngurok begei adeh nu enai: Mai Rom pek biasa naiserah bok-bok pen sebelom kek kibedepan ru mai de betudoh kek ru biog peluang kaha-bele idiri. 17Bile naihol nu madeh, eng pek ngbuang mase. Ku ihuper nij ngjadi hakem ku mahkamah ru ngog perintah supaye sengoi ajeh bien nu ngar eng. 18Bile mai betudoh ajeh naijinjeg ru mula naidakwe, pek mong nanek pen senalah de naiperhol begei de ngsangka. 19Naibetareh ru Paulus tentang agame liknai ru tentang numom de imuh Yesus taleh. Sengoi ajeh ya dat tapi Paulus kiurok Kek ya Kisui nij. 20Eng pek panei begeiharok ngha-selidek hal ajeh. Kerana ajeh, ngtanya nu Paulus amen kek kaha-et nu kote Yerusalem ru bipeadel ku peteh. 21Tapi Paulus kisemanj supaye biterhan ku kateh jel lei hal ajeh biputos ya raja kerajaan Rom. Kerana ajeh, ngog perintah kek teros biterhan lei buleh ngngeng kek nu raja kerajaan Rom.”
22Raja Herodes Agripa Kedue kiurok nu Festus, “Eng pen ngha-cerngai ju sengoi ajeh.”
Festus kiberlag, “Huper doh jencerngai ju kek.”
Paulus ku Ngar Raja Herodes Agripa Kedue ru Puteri Bernike
23Ku ihuper, Raja Agripa ru Puteri Bernike bailei. Ubai bisamut ya majles de entoi. Ubai baimuj nu ruang pecare besama ru panglime-panglime perag ru sengoi-sengoi de bepangkat ku kote ajeh. Festus kior Paulus bien nu ingar. 24Lalu Festus kiurok, “Tuan Raja Herodes Agripa ru sengoi de mong ku padeh! Sengoi ku ngar eng adeh bidakwe ya dikdij mai Yahudi ku kote Yerusalem ru ku kote Kaisarea. Naiurok ru suara de kuat, ‘Kek pek layak kisui nij!’ 25Tapi eng pek ngbakek ma-ma pen senalah de kibeh lei kek patot bihukom dat. Tapi ya ngkot keputusan ngha-ngeng kek nu raja kerajaan Rom kerana kisemanj bipecare ya raja ajeh. 26Tapi eng pek ngpasti ma de ngha-cot tentang kek ku kateh surat nu raja. Ajehloh isebab ngen sengoi adeh ku ngar engkek de hol nu madeh, teutame sekali nu Tuan Raja Herodes Agripa supaye telas kek bisiasat, doh mong pekare de buleh ngcot ku kateh surat ajeh. 27Ku pendapat eng, pek patot hingeng sengoi tahanan nu kote Rom amen pek mong dakwean de jelas.”
Voafantina amin'izao fotoana izao:
KISAH 25: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.