KISAH 24
24
Paulus Bidakwe ya Mai Yahudi
1Telas lima arik ju kenjeh, Imam Agong agame Yahudi imuh Ananias ru memerip urag raknak-raknak Yahudi ru numom peguam imuh Tertulus naiet nu kote Kaisarea. Enai naidakwe Paulus ku ngar Feliks penguasa lengrik Yudea. 2Bile Paulus bicereg nu ngar enai, Tertulus kidakwe Paulus ku ngar Feliks, “Jen de bihormat! Kerana jenpimpen jik, liu jik jisui ku kateh neaman. Ru jeoi hal pai de bor ku lengrik adeh ya belaku. 3Jihargai dikdij ajeh ru jik ihad beterima kaseh nu jen. 4Tapi pek jiha-buang mase jen, jadi jisemanj jencerngai penasal jik de ringkas adeh.
5Jipanei sengoi adeh kibeh kenacau ku engkap mai Yahudi ru ku dikdij dunia. Kek adeh pemimpen kumpulan sesat de naijoi ha Sengoi Nazaret. 6Kek juga kipecemar Deg Jenang de suci, jadi jicap kek. [Jiha-hukom kek joi Hukom Taurat lijik. 7Tapi komanden Lisias kirampas kek ju jik. 8Lisias kiog perintah supaye mai de betudoh kek naiterbuk nu jen.]#24:6-8 Ayat-ayat adeh pek mong ku kateh memerip salinan Alkitab manah. Amen jenperiksa sengoi adeh, doh jenpanei ha dikdij dakwean jik adeh betol.” 9Mai Yahudi de mong ku pajeh turot naidakwe ha Paulus juga. Naibesetuju bengwal Tertulus ajeh betol.
Paulus Kibele Idiri ku Ngar Feliks
10Feliks penguasa lengrik Yudea ajeh kiog neuta nu Paulus supaye kibelwal. Paulus kiurok, “Ya betahut jenjadi hakem ku lengrik adeh. Kerana ajeh, ngkerakmik eng buleh ngbele diri ku ngar jen. 11Jen buleh jenselidek ya lienjen sendiri tentang hal adeh: Pek lebeh ju 12 arik de canuk, eng nget nu kote Yerusalem ngha-sembahyang. 12Mai Yahudi pek pernah naibakek eng ngkelahi ru bok-bok atao ngbeh kenacau ku kateh laman Deg Jenang, atao ku deg sembahyang, atao ku belok-belok tempat ku kote ajeh. 13Enai pen pek dapat naipebukti nu jen ha dakwean liknai ajeh. 14Tapi ngaku hal adeh ku ngar jen: Eng ngsembah Jenang de bisembah ya jenang rak jik ru ngjoi neajar Yesus de naisangka ajaran sesat. Tapi eng lekat ngpecaya nu dikdij de bicot ku kateh Hukom Taurat ru kitab nabi-nabi. 15Sama begei ha enai, eng juga ngyaken tentang hal adeh: Jenang doh Kiberkos dikdij mai ju danan, pek kira mai de benarka de jehat! 16Kerana ajeh, ngkerekwat supaye sengik eng sentiase berseh ku ngar Jenang ru ku ngar manusia.
17Memerip tahut telas ngdek Yerusalem, nglos nij nu majeh ngha-en duet derme ha mai misken ku bangse lieng ru ngha-og pesembahan nu Jenang. 18Mase ngbeh upacare pembersehan, naibakek eng ku laman Deg Jenang. Ku mase ajeh, pek mong mai jengoi besama ru eng ru pek mong kenacau de tejadi. 19Tapi ku mase ajeh, memerip urag mai Yahudi ju lengrik Asia mong ku pajeh. Enai ajehloh de patot naiterbuk nu jen ru naidakwe eng amen nairasa ngbeh ma-ma de sek. 20Atao, sengoi-sengoi ku padeh hunen hodloh naipasal ma senalah eng de naibakek ku mase naipecare eng ku Mahkamah Agame Yahudi. 21Ku mase ajeh, enai pek naibakek ma-ma pen senalah ku eng kecuali pek naigemar ha ma de ngurok ru suara de kuat. Eng ngurok, ‘Arik adeh eng bipecare kerana ngpecaya mai dat doh biberkos ju danan.’ ”
22Lalu Feliks de ya kipanei jeoi tentang neajar Yesus kitanggoh ha pecare ajeh. Kiurok, “Bile komanden Lisias kihol, eng doh ngpeselesei hal adeh.” 23Telas ajeh kek kior raknak aska supaye Paulus lekat bitahan tapi ikekawat biog kebenaran untok naiog ma-ma taleh de kiperlu.
Paulus ku Ngar Feliks ru Drusila
24Memerip arik ju kenjeh, Feliks kihol besama ru ikenah Drusila.#24:24 Drusila: Feliks kior Drusila kicerei igengsir petame ru kijadi ikenah ketige. Ikenah ajeh mai Yahudi. Feliks kior supaye Paulus bien nu ngar kek lalu kek kicerngai Paulus kipasal tentang iman nu Kristus Yesus. 25Tapi bile Paulus kipeteros ibengwal tentang begeiharok manusia dapat naijadi benar ku mat Jenang, ru tentang begeiharok manusia hod kiterhan heknod de niknej, ru tentang arik Jenang Kihukom manusia doh, Feliks kijadi sengoh lalu kiurok, “Hek buleh haet hunen. Amen mong mase, doh ngcereg hek nij.” 26Feliks jeoi kali kicereg Paulus ru kibelwal ru kek kerana kibeharap Paulus kiog duet nu kek.
27Telas nar tenahut, Perkius Festus kiganti Feliks sebegei penguasa. Kerana Feliks kaha-kot sengik mai Yahudi, kek lekat kijel ha Paulus.
Voafantina amin'izao fotoana izao:
KISAH 24: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.