Marcos 9
9
1Jesús lekz'ka' gudxe leke:
—Le nak'te rea' lbi'ili ki la'ke bënni nakua'ke ni, ti lat'gake nakati lale'ir'de gdxin len gdu yëla wak yëla rnabe' kie' Dios.
Yëla rna' kie' Jesús ptza'
(Mt 17:1-13; Lc 9:28-36)
2Gdëëd xop dza, Jesús gyiije tu gia'a xhën len nuche'e Pedro, Santiago len Juan. Lau'ke bënni ni, yëla rna' kie' Jesús ptza'. 3Laari nakue' gyep'yës'lni' len tzka'ti'ga naxhkich nutunu bënni, bënni re'e laari rzaki'de guune ga gna' ka'ti xhkich. 4Ati gulale'i'de Elias len Moisés tui'leene diidza Jesús. 5Pedro gudxe Jesús:
—Bënni useed, ¡dxia'a'kza zuaaru ni! Gun'ru tson yu'u laari: tu kiu', tu kie' Moisés len ye tu kie' Elías.
6Koma Pedro ti bdzëël'de bi gne' tzka'ti'ga glaadxi'de bënni useed kie' Jesús. 7Na', broj tu buaj yajxua leke, len lu buaj ni byën chi'i le gna: «Bënni Xi'ina ni nadxi'i'tzki'da'ne: guluzenaag'de.» 8Na'teez, kati guluyu'ke kuiti le'e'ke, nuturnu gulale'i'de, tuuze Jesús.
9Tzal guludinie gia'a, Jesús gudxe leke ki nutunu lagixhji'de lea gulale'i'de, nakati gdxin'r dza Xi'ine Bënni ubaane lu yëla gut. 10Lena'a nutunu gulagixhji'de lea gulale'i'de, zala tunaabi lza'a'ke bixh'kza uban'ru lu yëla gut. 11Gulunaab'de Jesús:
—¿Bixhkia' bënni useed xhba kie' Dios tanáke ki Elias rala giide zia'a?
12Jesús bubi'e diidza:
—Leel, Elías ze'e zia'a len le' ukua'be'e yugute'. San, ¿bixhkia' rna Diidza La'ay ki Xi'ine Bënni rala ktzaage len ti layaazlaadxi'ke Le'? 13San neda rea' lbi'ili ki Elias chi biide len leke gulusake'e le' ka gna kieke, ka nayoj lu Diidza La'ay rala gak kie'.
Jesús ru'uune'bi tuubi bi kuidi yu'u lebi bë' xëwi
(Mt 17:14-20; Lc 9:37-43)
14Kati guludxiine ga nakua'ke bënni useed kie' Jesús, yajxaka'ke bunach zian nakua'leen'ke leke, len la'ke bënni useed xhba kie' Dios tadil'e diidza len leke. 15Kati gulale'i'de Jesús yugute'ke gulaxiti'ke yajtzaag'ke Le' len yëla rubaani. 16Le' bnaab'de leke:
—¿Bixh diidza rdil'li dzaagk'li'ne?
17Tue' bënni zue' ni' bubi'e diidza:
—Bënni Useed, ni nuche'a'bi bi kia', koma yu'u leebi tu bë' xëwi le ben ga tir gneebi. 18Ga'ti'teez ga rdaabi, bë' xëwi'a rzën lebi, len rzal lebi lyu; len rbia bdxina ziidi rua'a'bi, rtil la'ya'bi len rzeera nia'a naa'bi. Chi guudx'ka'ne bënni useed kiu' lubiije bë' xëwi'a, san leke ti glake.
19Jesús bubi'e diidza:
—¡Lbi'ili bënni ti nayajle'! ¿Gaxhkz zua' ka'tekz sua'leena lbi'ili? ¿Gaxhkz zua' ka'tekz kxikji'da lbi'ili? Gultzajxi'bi ni bi'dau'a.
20Na' yajua'ke'bi bi'dau'a lau'e Jesús. San kati bë' xëwi'a ble'i Le' Jesús pxiiz leebi len brixh'ptul leebi lyu len rbia bdxina ziidi rua'a'bi. 21Jesús bnaab'de xuuz'bi:
—¿Batxh't rak ki kieebi?
Xuuz'bi bubi'e diidza:
—Ni nak'bi bi'dau' kati gzulau. 22Len zian lzu bë' xëwi ni chi bzal leebi lgi' len lu nis naar gdëëdi leebi. San xhki wak bi guunu, buechilaadxi'i netu len guk'leen netu.
23Jesús gudxe le':
—¿Nakxha', “xhki wak bi guuna”? ¡Gat'ga de le ku gak kie' bënni rajle'e!
24Na' xuuz'bi bi'dau'a bisku'e:
—Rajle'a. ¡Guk'leen neda tzajle'a!
25Kati Jesús guk'be'i'de ki chi tadzaag'ra bunach, gdil'leene bë' xëwi'a, gne':
—Li' bë' xëwi ruunu ga ti gui'bi diidza len ti gyëëni'bi bi'i ni rnabe'i'da li' ki yurooju'bi len tir yune'u'bi.
26Bë' xëwi'a biskua', len ben ga yubl gbixh'ktul'bi. Chi nak ka buroj len pka'an lebi ka bi'i nat, lena'a bënni zian tanáke ki leel nat'bi. 27Ati Jesús, gde'le'e naa'bi, pchise'bi; len bi'i ni gzui'bi.
28Chi nak ka Jesús gyaazie tu yu'u, len bënni useed kie' kiizi gulunaab'de le':
—¿Bixhkia' netu ti guk'tu yubiaj'tu bë' xëwi'a?
29Ati Jesús bubi'e kieke diidza:
—Bë' xëwi nak'k ki, turoj'z kati rui'leen'ru'ne diidza Dios.
Jesús rgixhjë'e burop lzu ki yëla gut kie'
(Mt 17:22-23; Lc 9:43-45)
30Kati guluza'ke, guladëëde Galilea. San Le' Jesús ti gu'un'de nu gnëëzi, 31koma zia'a rseed'de bënni useed kie'. Re' leke:
—Le' Xi'ine Bënni uludëëde Le' lu naa'ke bunach len uludëëd'de Le'; san na' gak tson dza ubaane lu yëla gut.
32Leke tibi gulayajni'i'kz'de le re' leke, len taadx'de lunaab'de Le'.
¿Nuxh nak'r blou?
33Guladxiine yëdz Cafarnaúm. Kati chi nakua'ke nu'yu'u, Jesús bnaab'de leke:
—¿Bixh rdili'li diidza na' yu'u'ru nëëz?
34Ati ti gulane', koma tzal dzë'ë'ke nëëz guladil'e diidza ki nuxh'lke rala gak're bënni blou. 35Na' Jesús grë'e, len bliidze bënni chin'nu'ke'a ati gudxe leke:
—Xhki nu re'e'ni gak bënni blou, rala gake bënni we'en kieke yugute'ke len gak'leene yugute' bunach.
36Chi nak ka' gatzj'lau'i bze'bi tuubi bi'dau' ati bniide'bi na' gne': 37—Len bënni'a rzi'e'bi lu la' tuubi bi'dau' ka bi'dau' ni, neda rzi'e; len bënni rzi'e neda, keg neda'z rzi'e lekz'ka' rzi'e nu psë'la neda.
Bënni tibi ruune kieeru, rak'leen're ro'u
(Mt 10:42; Lc 9:49-50)
38Juan gudxe Le':
—Bënni Useed, ble'i'tu'ne tue' bënni rubiije bë' xëwi lu lou' len bzaaga'tu'ne, koma ti za'leene ro'u.
39Jesús bubi'e diidza:
—Ti gzaaga'li'ne, koma nutunu bënni, bënni chi beene yëla wak lu la' gunn gne' kia' le ku nak. 40Bënni'a tibi ruune kieeru, rak'leen're ro'u. 41Nu'ti'teez bënni, bënni gunne kieeli zala tu xhiiga'z nis, uzi'e xhbei lea guune'a, koma lbi'ili naki'li kie' Cristo.
Banaadx le nuche' gbixh'ru lu dula
(Mt 18:6-9; Lc 17:1-2)
42»Nu'ti'teez bënni, bënni guune ga labixe lu dula bënni'du tayajle'ke neda wak'l kie' dxia'a luuge'e yeene tu giaj gich len luzal'e le' lu nis xhën. 43Xhki no'u run ga guunu dula, pchuug ley; nakr'ru dxia'a kchuugu ley len waaziu lu yëla naban tzalzu ka len grop'te no'u tzajtzu'u lu gi'gabil, ga rë' gi' le ti uulkz. 44[Ga bzuuga ti tat'ba len gi'a ti ru'uulkz.] 45Len xhki ni'u run ga guunu dula, pchuug ley; nakr'ru dxia'a kchuugu ley len waaziu lu yëla naban tzalzu ka len grop'te ni'u tzajtzu'u lu gi'gabil. 46[Ga bzuuga ti tat'ba len gi'a ti ru'uulkz.] 47Len xhki lau'u run ga guunu dula, gliaj ley; nakr'ru dxia'a kuiiju ley len waaziu lu yëla naban tzalzu ka tzajtzu'u lu gi'gabil len grop'te lau'u, 48ga bzuuga ti tat'ba len gi'a ti ru'uulkz.
49»Koma yugute'ke laxhi'de zëdi' len gi'. 50Le dxia'a zëdi'a; san xhki tir nak sna'a, ¿Nakxh wak uxhi'? Gulgak ka zëdi'a len gulsua lu yëla rë'dxi len yugute' bunach.
Voafantina amin'izao fotoana izao:
Marcos 9: PZD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Sociedad Biblica de México AC
