Marcos 6
6
Jesús lu yëdz Nazaret
(Mt 13:53-58; Lc 4:16-30)
1Jesús buze'e ni' len zuwëëje laadze, len bënni useed kie' zjak'leene Le'. 2Kati bdxin dza tu'ueak'laadxi'ke bënni Judea, gzulau'e rseed'de lu yu'u useed. Len bënni zian gulayëën'de Le' len tubaan'de ati tunaabi lza'a'ke:
—¿Gaxh pseede yugute' le ni? ¿Gaxhkz yajxi'e yëla nayajni'i kie' len yëla wak le ruune? 3¿Naru keg Le' bënni'a rbagu'e yaag, bënni xi'in'nu María len bënni bë'che'e Santiago, José, Judas len Simón? ¿Naru keg nguul zaane'a nakua'leen'nu ro'u ni?
Len ti tayajle'ke Le'. 4Ati Jesús gudxe leke:
—Laadz'ze ga nakua'ke bënni bë'chi' lze'e len bënni nakua'leene Le' liidxe ku tui'ke le' bala'an bënni rue'e diidza ulaaz kie' Dios san ga yubl tui'ke le' bala'an
5Ati ti benn guune ni' yëla wak, lati'iz'ke bënni we' pxua'ne'e len buune leke. 6Len rubaan'de koma bunach'a ti tayajle'ke Le'.
Jesús rsë'le'e bënni useed kie' tzajtixhjë'ke yëla rnabe' kie' Dios
(Mt 10:5-15; Lc 9:1-6)
Jesús rde' rseed'de yugu yëdz nakua' ga'la. 7Ati butzaage chin'nu'ke bënni useed kie', len psë'le'e leke chop ueaj'ke ati bnëëdzje kieke yëla rnabe' naar lubiije yugute' bë' xëwi. 8Gnabe'i'de leke tibi lua'ke tzal layu'u'ke nëëz tuuz xuyaag lazëëne. Keg yët'xhtiil, keg le lia'aj'la'we, keg dumi rala lua'ke. 9Gunn luda'ke lëël'ke san ti gunn lua'ke ye tu kë' xha'ke. 10Gudxe leke:
—Kati tzaaz'li tu yu'u na'z guluga'an tzal gdxin dza uza'li latj'a. 11Ati xhki tu latj ti lazi'ke lbi'ili len ti le'en'de luzenaage lbi'ili, guluroj len gulkuib bexhtë bia' ni'a'li, naar lak'be'i'de ki Dios ti ryaazlaadxe'e le tuune.
12Na' gularooje bënni useed kie' yajëëdx'ke bunach'a ki lubi'i'laadxi'ke len Dios. 13Lekz'ka' gulubiije le zian bë' xëwi len gulu'un'ke bënni we' len tagieeb'de leke za.
Yëla gut kie' Juan bënni rkiile nis bunach
(Mt 14:1-12; Lc 9:7-9)
14Herodes bënni rnabe' yëdz xhën byëën'de kie' Jesús koma gdu yëdz'lyu chi gze diidza kie'. Koma la'ke tanáke: «Juan bënni rkiile nis bunach chi bubaane lu yëla gut, lena'a nape yëla wak.»
15Ye la'ke tanáke: «Le' nake Elías bënni be'e diidza ulaaz kie' Dios.»
Len ye la'ke tanáke: «Le' nake bënni rue'e diidza ulaaz kie' Dios ka glake bënni'a glui'ke diidza ulaaz kie' Dios zia'at.»
16Kati byëën'de le ni Herodes gne':
—Bënni'a nake Juan, Kuin'kza gnabe'i'da luchuuge ikje len na'a chi bubaane lu yëla gut.
17Koma nia'a kieenu Herodías, Herodes gnabe'e lazëëne Juan len beene ga luuge'e le' liidx'gia. Herodías guk'nu nguul kie' Filipo bënni bë'che'e Herodes, san Herodes gzua'leene'nu nguul ni. 18Ati Juan chi gudxe Herodes: «Ti rala sua'leenu'nu nguul kie' bënni bë'chu'u.»
19Lena'a Herodías ti rle'i'nu'ne dxia'a Juan ati re'eni'nu gdëëdi'nu'ne; san ti rzaki'nu, 20koma Herodes raadxi'de le' len run'chi'e le', koma nëëz'de ki nake bënni dxia'a len bënni la'ay. Herodes gdu laadxe'e ryëën'de le rne' Juan zala ti rdzëël'de bixh guune len lea ryëën'de'a, 21San Herodías gxhi'nu latj kati Herodes guli'i'de iz ati beene tu gwi'i'waagu xhën kieke bënni tunabe'ke kie', bënni xan'ke bënni rajake gdil len bënni blou ki Galilea. 22Bi nguul kieenu Herodías gyaaz'bi ga rak gwi'i'waagu xhën len bya'a'bi ati Herodes len bënni nakua'ke taagu'leene le' xhtzë' guladaani'tzki'de ka bya'a'bi, na' bënni rnabe' ni gudxe'bi bi'i ni:
—Le re'enz'du bnaab len neda gunna.
23Len laya'ladxiini gxhi'lu'ne'e ki bi'ti'teez le gnaab'bi unëëdzje, zala nak'tza gatzj yëdz lea rnabe'a. 24Leebi broj'bi len bnaabi'bi'nu xhna'bi:
—¿Bixhkz gnaaba?
Leenu bubi'i'nu diidza:
—Bnaab ikje Juan bënni rkiile nis bunach.
25Bi nguul raban ni bune'te'bi ga rë'e bënni rnabe'a len guudx'bi'ne:
—Ka'teez zuaaru re'en'da gdxiu' ikje Juan bënni rkiile nis bunach lu xhiiga.
26Bënni rnabe' ni gzua'yechi'tzke; san le gxhi'lu'ne'e lau'ke bënni'a nuliidze'a, ti gu'un'de udabaage'e lea bnaab'bi. 27Lena'a ziuub'ze gnabe'i'de bënni riije gdil ki dujue'e ikje Juan. Bënni riije gdil ni gyiije liidx'gia'a len pchuuge ikje Juan 28len yajue'e ley lu xhiiga, len bunëëdzje len bi nguul ni ati leebi bui'bi'nu xhna'bi.
29Kati bënni useed kie' Juan gulanëëz'de le ni, guluzi'e le' len yajka'chi'ke le'.
Jesús rga'we bunach zian
(Mt 14:13-21; Lc 9:10-17; Jn 6:1-14)
30Gdëëd le ni bënni gbaaz kie' Jesús guludzaage len Le' ati gulagixhji'de Le' yugute' le gluune len le guluseed'de. 31Jesús gudxe leke:
—Gultza', ro'uz tziaj'ru ueak'laadxi'ru tu latj ga rë'dxi.
Koma bunach zian tadxiine len tuza'ke ati leke ti talatj'ke la'we. 32Lena'a Jesús len bënni useed kie' gulagie'le'e tu barku len yajake ga yubl. 33San bënni zian gulale'i'de leke len gulumbe'ke leke; na' bunach ki yugute' yëdz gulaxiti'ke yajake ni' len guladxiine zia'al ka leke. 34Kati Jesús bëtje lu barku, ble'i'de bunach zian'a len buechilaadxe'e leke koma nakua'ke ka bëku'xhiila bua'a ti zua' nu gun'chi'i lek'ba; ati le zian gzulau'e rseed'de leke. 35Kati chi za' rdzë', bënni useed kie' gulabiige'e ga'la ga ze' len gle'ke le':
—Chi nadzë', len latj ni nutunu nakua'. 36Busë'la bunach ni, yëdz de ga'la ni naar tzajë'u'ke le la'we.
37Ati Jesús bubi'e kieke diidza:
—Gulunëëdzj lbi'ili le la'we.
Leke gulubi'ke diidza:
—¿Re'en'du tzajë'u'tu yët'xhtiil ki tzka laaxhj'ru ki chop'gayua' dza, naar gnëëdzj'tu le la'we?
38Jesús gudxe leke:
—¿Balxh yët'xhtiil de kieeli? Gultzajyu.
Kati chi nëëzi'kde, gle'ke le':
—Ga'yu' yët'xhtiil len chop'ba bël.
39Na' gnabe'i'de leke labekie bunach'a ki kieke lau'gixi ya'a; 40len gulabë'ke tu'gayua' ueaj'ke len chi'un ueaj'ke. 41Gdëëd'a Jesús gxhi'e lu ne'e ga'yu' yët'xhtiil len chop'ba bël ni, byue' lu xhba len ben'la'aye ley, bxhuuxhje yët'xhtiil'a len bnëëdzje kieke bënni useed kie' naar lagis'ke kiegak bunach'a. Lekz'ka' gdisie'ba bël'a kieke yugute'ke. 42Yugute' bunach'a gla'we tzka glëëlj'de; 43ati ye tzka buga'an ki yët'xhtiil'a len bël'a chin'nu bdë'ë guladza'. 44Len nak'ke ga'yu' mil'ke bënni gla'we yët'xhtiil'a.
Jesús rze'e lu nis
(Mt 14:22-27; Jn 6:16-21)
45Gdëëd le ni, Jesús beene ga bënni useed kie' labeene lu barku naar lanëëre tzjake tzala'a nis, zga ga de Betsaida, tzal Le' ruse'e bunach'a. 46Len kati buudx buse'e bunach'a, gyiije gia'a yaje'leene diidza Dios. 47Kati chi kchul, barku'a chi bdxin gatzj'lau'i nis. Ati Jesús tuuze naga'ane ga nak yu, 48len ble'i'de tayui'i'tzki'de dxin tuse'e barku, koma rak'tzka bë' zga ga leke zjake. Ziil'bal'a Jesús rze'i ni'e lu nis'a ziije ga nakua'ke'a, len chi zua' tëëde kuiti le'e'ke. 49Kati gulale'i'de rde' lu nis'a glaki'de pxin'a, len guluskua'ke; 50koma yugute'ke gulale'i'de Le' len glaadxi'de. San Le' bliidz'tie' leke, ati gne':
—¡Dxiiz! ¡Needa'a: ti gaadxi'li!
51Greene lu barku, len bë'a grë'dxi; ati leke gulubaani'tzki'de, 52koma ti tayajni'i'ni'kde yëla wak le guk len yët'xhtiil'a, koma na'chul yëla nayajni'i kieke.
Jesús ru'uune bënni we' ki Genesaret
(Mt 14:34-36)
53Yajake tzala'a nis len guladxiine yu ki Genesaret, na' gluuge'e barku rui'i nis'a. 54Ka glëtj'ze lu barku, bunach'a gulumbe'ke Jesús. 55Ki gdu gia'a yeego'a gularoj'ke len rajua'ke bënni we' lu da'a, ga tayëën'de zue' Jesús. 56Len ga'ti'teez ga Le' riije, tziaj'tze yëdz we'en u yëdz xhën u tziaj'tze lau'gixi tukua'ke bënni we' la nëëz len tatayui'de Le' gnëëdzje lsenz lagaane zala rui'iz laari xhua kuudze'e; len yugute'ke bënni tagaane ley tu'ueake.
Voafantina amin'izao fotoana izao:
Marcos 6: PZD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Sociedad Biblica de México AC
