Marcos 5
5
Bënni Gerasa yu'u le' bë' xëwi
(Mt 8:28-34; Lc 8:26-39)
1Guladxiine tzala'a nis lu xhyu'ke bënni Gerasa. 2Ka bëtj'ze Jesús lu barku gbiige'e kuiti le'e tue' bënni yu'u le' bë' xëwi. Bënni ni brooje ladj ba, 3koma na' zue'. Nutunu rak sën le' zala luuge'e le' len du gia. 4Len zala zian lzu bunach gluuge'e ni'a' ne'e len du gia, ka'tekz pchuuge ley ati nutunu rzaki'i'kz sën le'. 5Dza len reel rde' gia'a len lu ba rusku'e len ruun'de zi' kuine len giaj. 6San kati ble'i zitu'ze Jesús, pxiti'e len yajzechu xhiibe lau'e. 7Ruskua'tzke gudxe le':
—¡Bixh rala'a kiu', Jesús, Xi'ine Dios xhën'te! ¡Ratayui'da li' ti ksaka'zi'u neda!
8Gne' ki, koma Jesús chi gudxe bë' xëwi'a:
—¡Bë' xëwi, buroj le' bënni ni!
9Jesús bnaab'de le':
—¿Bixh leu'?
Bë' xëwi'a gna':
—Zian'te lea', koma zian'tu nak'tu.
10Gutayui'tzki'de Jesús ti ksë'le'e bë' xëwi'a ga yubl ki gia'a yeego'a. 11Ga'la'z na' kuiti gia'a ni nakua'ba ziank'ba kuch taag'ba, 12ati bë' xëwi'a glatayui Le':
—Psë'la netu len kuch ni len benn lsenz tzaaz'tu le'ek'ba.
13Jesús bnëëdzje lsenz len bë' xëwi'a guluroj le' bënni'a len gulayaaz le'ek'ba kuch'a bua' nak'kba ka chop mil'ba ati bua' ni gulaxhunj'ba le'gia'a dxi'it ga de nis xhën, len ni' gulaye'pi'ba nis.
14Bënni tun'chi'ke'ba kuch ni guluxhunj'ke len yajdixhjë'ke lu yëdz len nup nakua' tunn dxin gixi ati bunach'a yajyu'ke bixh guk. 15Len kati guladxiine ga zue' Jesús, gulale'i'de bënni'a guluroj le' bë' xëwi rë'e, chi nakue' xhe' len chi zue' dxia'a. Bunach glaadxi'tzki'de, 16ati bënni'a gulale'i'de lea guk kie' bënni'a guluroj le' bë' xëwi len ka guk kiek'ba kuch'a gulagixhji'de ye la' bunach. 17Na' gulazulau'ke glatayui'de Jesús tziije ga yubl.
18Kati budxiine Jesús lu barku, bënni'a guluroj le' bë' xëwi gutayui'de Le' gnëëdzje latj tziaj'leene Le' 19Ati Jesús ti gu'un'de, len gudxe le':
—Buaj liidxu len bënni bë'chi' lzo'u, len gdixhji'kde yugute' le Dios chi beene kiu' len ka beene buechilaadxe'e li'.
20Bënni ni bëëje, len gzulau'e rgixhjë'e lu yëdz ki Decápolis le Jesús beene kie', len yugute'ke gulubaan'de.
Nguul we' len bi nguul'du kie' Jairo
(Mt 9:18-26; Lc 8:40-56)
21Kati Jesús budxiine lu barku zuze'e tzala'a nis, bënni zian guludzaage, ati rui'iz nis'a bga'ane. 22Na' bdxiine Jairo tue' bënni rnabe'e ki yu'u useed, ati kati ble'i'de Jesús gyechue' xhni'e 23len gutayui'de Le', gne':
—Bi'i kia' raki'kz gat'bi; dia' kxua'no'u'bi naar ueak'bi len ti gat'bi.
24Jesús gyaj'leene le' len bënni zian zjake kuudze'e tu'ki tutzutzje Le'. 25Ladj bunach zian ni ziaj'nu tuunu nguul chi guk chin'nu iz re'i'nu, ti ruwi'i'nu rën. 26Chi ptzaag'tzka'nu lu naa'ke bënni tu'un'ke bënni we', len chi ben'ditji'nu gdu le de kieenu, len gat'ga gzua ga ben le ni. Ziaj'tekz ryali'i'nu. 27Kati byëëni'nu rye' diidza kie' Jesús, nguul ni bdxin'nu kuudzu'le, ladj bunach'a, len gdan'nu laari xhua kuudze'e. 28Koma guudx'nu ikj'laadxi'dau'nu: «Zala kan'za laari xhua kuudze'e, ueaka.» 29Na'teez bui'i rën'a, len guk'be'i'nu ki chi bueak'nu. 30Jesús guk'be'i'de broj Le' yëla wak, len bueikje byue' bunach'a, ati bnaabe:
—¿Nuxh gdan xha'?
31Bënni useed kie' gle'ke Le':
—Ryu'kzu bunach ni tu'ki tutzutzje Li' len rnaabu “¿Nuxh gdan neda?”
32Ati Jesús ryu'tekze kuiti le'e naar gle'i'de nuxha' gdan le'. 33Nguul ni, rxhiz'nu yëla raadxi le nëëzi'nu bixha guk kieenu na' gyaj'nu len bzechu xhiib'nu xhni'e Jesús len gdixhji'nu'ne ka'teez guk. 34Jesús gudxe'nu:
—Xi'ina yëla rajle' kiu' ben ga bueaku. Chi nu'ueaku buaj len yëla rë'dxi.
35Ni zue' rue'e diidza Jesús, kati guladxiine bënni za'ke liidxe bënni rnabe'e ki yu'u useed zdujëëdx'ke xuuz'bi bi'i ni:
—Bi'i nguul kiu' chi gut'bi; ¿Bixhkz wen gzu'ne bagi'i Bënni Useed?.
36Ati Jesús, ti bzenaage lea tanáke'a, ati gudxe bënni'a rnabe'e yu'u useed:
—Ti gaadx'du; gyajle'z.
37Len ti bnëëdzje latj nuul tziaj'leen Le', tuuze Pedro, Santiago len Juan bënni bë'che'e Santiago. 38Kati bdxiine liidxe bënni'a rnabe'e yu'u useed len ble'i'de rak'tzka ruzbë' ati bunach tabëëdxe len tuskua'ke, 39gyaazie len gudxe leke:
—¿Bixhkia' run'tzka'li ruzbë' len rbëëdx'tzka'li? Bi'dau' ni ti nat'bi, ras'zbi.
40Bunach'a gulaxhiidx'de Jesús, san Le' beene ga yugute'ke gulurooje ati pche'e xuuz'xhna'bi len bënni'a zjak'leene Le' na' gyaazie ga deebi bi'dau'a. 41Jesús gde'le'e naa'bi len gudxe'bi:
—Talitá, cum (le re'e'ni gna': «Bi'i nguul'du, li' rea', gyas»).
42Na'teez bi'i nguul'du ni gyas'bi len gze'i ni'a'bi koma chi yu'u'bi chin'nu iz ati bunach'a gulubaani'tzki'de. 43Ati Jesús gnabe'i'de leke nutunu lagixhji'de lea guk'a, len chi nak ka gnabe'i'de leke lui'ke'bi bi'i nguul'du ni le gaag'bi.
Voafantina amin'izao fotoana izao:
Marcos 5: PZD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Sociedad Biblica de México AC
