Marcos 11
11
Jesús ryaazie Jerusalén
(Mt 21:1-11; Lc 19:28-40; Jn 12:12-19)
1Kati chi nakua'ke ga'la yëdz Jerusalén, chi zjake ga'la yëdz Betfagé len Betania, zga Gia'a ki Olivos, Jesús psë'le'e chope' bënni useed kie', 2len gudxe leke:
—Gultziaj yëdz'du de ni', len kati tzaaz'li ley tzajxaka'li'ba tuuba burru we'en'du naaga'ba, bua' nutunu rbii'ni leeba. Guluseedx'ba len gultzajxi'ba ni. 3Len xhki nu gnaabi lbi'ili bixhkia' rseedx'li'ba, giek'li'ne ki Xan'ru ryaadzj'de'ba, len uduwa'tie'ba.
4Yajake len yajxaka'ke'ba burru naaga'ba la nëëz kuiti tu puert len guluseedxe'ba.
5La'ke bënni nakua'ke na' gulunaab'de leke:
—¿Bi run'li? ¿Bixhkia' rseedx'li'ba burru ni?
6Leke gulanake le gudxe leke Jesús; len glui'ke leke latj tzawake. 7Guluxua'ke xha'ke kuudzu'ba, guluche'ke'ba ga zue' Jesús. Len Le' gdxie'ba. 8Bunach zian tuchiilj'ke xha'ke la nëëz len ye la'ke tuchiilj'ke xhuuzi'i yaag le guluchuuge lau'gixi. 9Ley bunach nanëër'ke ley bunach zjake kuudzi'il, tuskua'ke:
—¡Hosanna! ¡La'ay nake bënni ze'e ulaaz kie' Xan'ru! 10¡La'ay nak yëla rnabe' le za', yëla rnabe' kie' xuuz'ru David! ¡Hosanna lu yewayuba!
11Jesús gyaazie Jerusalén len gyiije lu gdou'. Gdu byue' dxia'a'tit len chi nak ka zuwëëje Betania len chin'nu'ke bënni useed kie', koma chi za' rchul.
Jesús rdxie' dë' yaag higuera ti rbia
(Mt 21:18-19)
12Bueikj dza'a kati gulurooje Betania, Jesús gduune. 13Zitu'z ble'i'de tu yaag higuera dxia xhlaagi'i len yajyue xhki ba dxia xhlu'li'i, san xhlaagi'z dxia koma ti nak beu' kuia xhlu'li'i. 14Na' gudxe yaag ni:
—¡Tzalzu'kz nuturnu gaagu le kuiu'!
Bënni useed kie' gulayëën'de Le'.
Jesús rpe'e yu'u gdou'
(Mt 21:12-17; Lc 19:45-48; Jn 2:13-22)
15Gdëëd guladxiine Jerusalén, Jesús gyaazie lu gdou' len gzulau'e rubiije bënni'a tuti'i'ke len ta'awe. Brixe ga nudxia'ke xhdumi'ke bënni'a tutza'ke dumi len ga nudxia'ke'ba palom bua'a tuti'i'ke'ba; 16len ti rnëëdzje latj nu tzaaz lu gdou'a xhki bi nua'ke. 17Len gzulau'e rseed'de, gne':
—Lu Diidza La'ay rna ki: “Liidxa gak tu yu'u ga bunach ki yugute' yëdz lui'leene diidza Dios”, ati lbi'ili chi nun'li ley tu latj ga tuka'chi' lau'ke bënni gban.
18Kati gulayëën'de le ni bënni tunabe'i'de pxuuz, bënni useed xhba kie' Dios len lekz'ka' bënni nakua'ke lau'i yëdz gulazulau'ke tugiilje nakxh luune ludëëd'de Le', san taadx'de Le' koma bunach tubaani'tzki'de ka nak le rseed'de. 19San kati chi gul, Jesús len bënni useed kie' gulurooje ki yëdz'a.
Rseed'de ki yëla rajle'
(Mt 21:20-22)
20Bueikj dza'a guladëëde kuiti yaag higuera len gulale'i'de ki lu luit gbiidx. 21Na' Pedro gyajnei'de lea guk'a, len gudxe Jesús:
—Bënni Useed, byu'tzka yaag higuera lea bdxiu' dë' chi gbiidx.
22Jesús bubi'e diidza:
Gultzajle'e Dios. 23Le nak'te rea' lbi'ili, ki xhki nu gie' gia'a ni: “¡Pkuit ni len bzal kuinu lu nis xhën!”, le ni wak xhki tzajle'e gdu laadxe'e lea rnaabe'a. 24Lena'a rea' lbi'ili ki yugute' le gnaabi'li'ne Dios gultzajle' ki chi gxhi'li ley len uzi'li ley. 25Len kati gui'leen'li'ne diidza Dios gulsi'xhën bi nap'li len bë'chi' lza'a'li naar Xuuz'li zue' yewayuba lekz'ka' si'xhëëne xhtu'la'li. 26[Koma xhki lbi'ili ti si'xhëën'li, lekz'ka' Xuuz'li zue' yewayuba ti si'xhëëne xhtu'la'li.]
Yëla rnabe' kie' Jesús
(Mt 21:23-27; Lc 20:1-8)
27Gdëëd le ni ye'wake Jerusalén. Tzal Jesús rde' lu gdou', gulabiige'e kuiti le'e bënni'a tunabe'i'de pxuuz len bënni useed xhba kie' Dios, len bënni guul tuzeajni'i'de, 28ati gulunaab'de Le'
—¿Len bixh yëla rnabe' ruunu le ni? ¿Nuxh nunn kiu' yëla rnabe' guunu le ni?
29-30Jesús bubi'e diidza:
—Lekz'ka' neda unaab'da lbi'ili, ¿Nuxh psë'la le' Juan jkiile nis, Dios u bunach? Gulubi'i kia' diidza len neda kixhji'da lbi'ili len bixh yëla rnabe' ruuna le ni.
31Leke gluune diidza dzaag len tanáke: «Xhki gnaaru ki Dios psë'le'e le', gie'e ro'u: “¿Bixhkia' ti gyajle'li'ne?” 32Len ti gunn gnaaru ki bunach gulusë'le'e le'.» Koma tadxiide bunach le nëëzi'kde ki Juan be'e diidza ulaaz kie' Dios. 33Lena'a gulubi'ke diidza kie' Jesús:
—Ti nëëzi'tu nuxh psë'la Le'.
Na'ar Jesús gudxe leke:
—Lekz'ka' neda ti kixhji'da lbi'ili len bixh yëla rnabe' ruuna le ni.
Voafantina amin'izao fotoana izao:
Marcos 11: PZD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Sociedad Biblica de México AC
