Mateo 28
28
Jesús rubaane lu yëla gut
(Mr 16:1-8; Lc 24:1-12; Jn 20:1-10)
1Gdëëd dza tu'ueak'laadxi'ke bënni Judea, bayën ziil'a rugie'la' seman, María Magdalena len María ye tuunu'a yajyu'knu baa. 2Kati ka zua ka' gyu'u tu utit xhën, koma tue' gbaaz la'ay kie' Dios bëtje yewayuba len gyiije ra baa, gdue' giaj'a nusiaj ley len grë'e lau'i. 3Gbaaz la'ay ni ryepe'yës'lni', len xhe' nak'tzka xhkich ka nak bë'gi'. 4Kati gulale'i'de le', bënni'a rajake gdil glaadxi'tzki'de len glake ka bënni nat. 5Le' gbaaz la'ay kie' Dios guudx'ke'nu nguul ni:
—Ti gaadxi'li. Neda nëëz'da ki rugiilj'li'ne Jesús, bënni'a gulude'e le' lu yaag kruuz. 6Ti yu'e ni, chi bubaane lu yëla gut, ka Le' gne'. Guldá gyuuli ga pxua'li'ne. 7Gultziaj ka'teez zuaali len gultzajëëdx'ke bënni useed kie': “Chi bubaane lu yëla gut, len ziije Galilea naar utzaage lbi'ili yubl; ni' gle'i'li'ne.” Le ni nak le neda rala gie'a lbi'ili.
Jesús rlui'lau'e len nguul
8Nguul ni guluza'te'nu ra baa, ley zua' yëla raadxi len yëla rudziiji len lek'nu, len gulaxiti'nu yajdixhjik'nu'ne bënni useed kie' Xan'ru. 9Tzal'za, Jesús yajdzaag'ke'nu len bliidz'tzawi'ke'nu. Lek'nu gulabiiga'nu lau'e len gulayiijilaadxi'nu'ne len guluniida'nu ni'e, 10ati le' guudx'ke'nu.
—Ti gaadxi'li. Gultzajëëdx'ke bënni bë'cha'a tzjake Galilea, len ni' lale'i'de neda.
Gulagu'u'yëla'ke bënni'a rajake gdil
11Tzal zjak'nu nguul ni, la'ke bënni'a rajake gdil guludxiine lu yëdz'a len gulagixhji'de bënni'a tunabe'i'de pxuuz yugute' lea' guk'a. 12Bënni ni yaje'leen'ke diidza bënni guul tuzeajni'i'de naar luune diidza dzaag. Len zxhëni dumi gulunëëdzje kieke bënni'a rajake gdil, 13len gle'ke leke:
Lbi'ili gnaali ki reel, tzal ras'li, bënni useed kie' Jesús gliide len gulubiije le' lu baa. 14Len xhki chi bdxin'tza gnëëz'de bënni rnabe'e, netu gun'tu ga tzajle'e, ati lbi'ili tibi bagi'i gap'li.
15Bënni'a rajake gdil gulazi'ke dumi'a len gluune lea gle'ke leke. Len ni ziiji na'a ze diidza ni ladj'ke bënni Judea.
Jesús rka'ane le luune bënni useed kie'
(Mr 16:14-18; Lc 24:36-49; Jn 20:19-23)
16Ati chi'niaj'ke bënni useed kie' Jesús yajake Galilea, gia'a lea Jesús gdixhji'de leke. 17Len kati gulale'i'de Jesús, gulayiijilaadxi'ke Le', zala ye la'ke ni ruuniz leke. 18Jesús gbiige'e ga nakua'ke'a len gudxe leke:
Gdu'te yëla rnabe' ki yewayuba len ki yëdz'lyu chi nadëëd lu na'a. 19Gultziaj na'a, gdu gabi'i yëdz'lyu, len gulgun ga lake bënni useed kia'; gulukiil'ke nis lu Le' Xuuz'ru, lu Le' Xi'ine len lu Le' Bë' La'ay kie' Dios, 20Len guluseed'de luzenaage yugute' le chi gnabe'i'da lbi'ili. Le rak ulaaz kia', neda uzua' yugute' dza len lbi'ili na'a gdxin'te dza tzu'u lu'uudx ki yëdz'lyu ni.
Voafantina amin'izao fotoana izao:
Mateo 28: PZD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Sociedad Biblica de México AC
