Kèʼlo 26
26
Aysi wùn Abimelek
1Jìŋ nèn lò koò é wòŋ, a yì‑iì dzə̀ ye sən fo yee Abraham ghan. Aysi nèn dù, e beè fon wìr veé Filistia e Gerar, a yír rəə́ dzə̀ ji Abimelek. 2Nyùy Tàr nèn wìy fo Aysi, e sùúy sho jii, «Lá à yòʼ sə̀y é Ejiv, á dzə e wòŋ wo m suuy e wò. 3Kú a dzə e wòŋ fèn, é m wìy a dzə wòsò, a səə̀vì wò. Kiíy ji m wíy fo woŋ və̀n e dzə̀m e wò, é wáa dzə wó vèn à rám yée. A m kfə̀n wíy yùŋrì ŋkàʼmé wo mò‑oò kàʼàn tàr won Abraham sho, e lìʼ. 4M wíy yiì, é rám yée kuʼ moo mejiy meé yuv, e kfə̀n fo woŋ və̀n e dzə̀m e rám yée. A m wíy shaà fo wò ram, e səə̀vì vitúm veé kitu ke nsay vidzə̀m. 5M wíy yiì bèy, bìʼ fo Abraham‑eè lo yù jí yem, e yiì kinyo ke mò‑oò suuyin e wun, e kfə̀n lèm sa nsər sém, wùn à sáʼ yémé, à ntir sém sí.»
6Aysi ku nèn a dzə e Gerar foo fèy. 7Wír vee fóo yén wíiy və, a sòv, wù bìnèr jii, «Dzə̀ jemèr yem.» Wù‑uù fan fó yòŋ ji dzə̀ á wíiy və, kwaʼtì jii, a tàm wír vee fóo yùyrí á wun bìʼ Rebeka wo wù‑uù bòŋèn é ŋàŋ.
8Aysi dzə̀ʼə̀m fo, ntàm dàr, Abimelek woo fon wìr veé Filistia lòo leéy fó ndzə fo shùu wundu, e kishiíy kímóʼ kí, e yèn, a Aysi léŋri Rebeka woo wíiy və. 9Fòn Abimelek nèn tòóy Aysi, e sùúy sho jii, «M yèn ne rú ji Rebeka dzə̀ á wiiy wò. Kì yiì ka, é bo à wáa yòŋ ji jemèr yè?»
Aysi bìnèr jii, «M kì kwaʼtì ji tàm m ràn á dzəʼə̀m yém bìʼ wun.»
10Abimelek nèn yòŋ jii, «Ke à yiìn e vèr ben ki dzə̀ ka? A kì tàm wír fo wír vìne, wù lò lì wiiy wò, áà wiy e lòné e věr kitu.»
11Abimelek nèn kàntì wir dzə̀m, e sùúy jii, «A wìr kùm wír və̀n, kìn wíiy və, bo ŋgaàŋ kpù á ne.»
12Aysi‑iì wày vifá e nsay foo fèy e kiya kee shooy, e kàv kirə́ʼ wií, e shaà mo wù‑uù wayin. Nyùy Tàr kú a səə̀vì wun, 13wù wáa ker kéŋ, yí wáa kuy, wù wáa dzə ŋgaà bùʼ. 14Wù‑uù kér ŋgoo se bvəy wùn à sé nyàm si, kfə̀n kér vé lìme anín. Bìʼ kee shooy, wír veé Filistiàa nèn a bàn wun. 15Vé‑eè lò, e nèn lì nsay, e sə̀tí ndzə́v se vé lìm Abraham woo tàr à Aysi‑iì tuŋen e wùn ghan.
16Abimelek suúy e Aysi jii, «Lò fo věr mvəm, à kùʼ ne e shaà ver.» 17Aysi nèn lò fo fo, e dù tùy kibàn kfə́ é kiwoóy keé Gerar, e nèn a dzə fo. 18Wù kfən fə̀ʼ ndzə́v se tàr wov Abraham‑eè tuŋen, é bo wír veé Filistiàa sə́tí é ghan se wù‑uù kpuun. Wù kú a yòŋ ndzə́v see shooy e yir se tàr wov‑iì yoŋ sho.
19Vé lìm Aysìi wìy tùŋ ndzə́v é kiwoóy, e shùʼ ntoò ndzə̀v ye juŋ, 20anshìy anjiì veé Gerari nèn kèʼ, a nyàm wùn áwune, a suúy ji ndzə́v rə́ne dzə̀ á yév. Aysi nèn shù yír ndzəv yee shooy ji «Kinyam#26.20: Yír rə́ne dzə̀ é Lǎm Hibru ji Esek.».
21Áwune kfən tùŋ yímóʼó, kinyam ki kfə́n a dzə sa e kitu wo. Wù nèn shù yír ji «Vibàn#26.21: Yír rə́ne dzə̀ é Lǎm Hibru ji Sitna.». 22Wù lò fo fo, e dù tùŋ yímóʼ yee ndzə́v, la kinyam ki yòʼ a dzə e yee shooyi. Wù nèn shù yír ji «Kirə́ʼ#26.22: Yír rə́ne dzə̀ é Lǎm Hibru ji Rehobot.». A wù shu bèy, suuy jii, «Nyùy fò ne ver kirə́ʼ é nsay fèn, a vèr sí yiì a kuy kuyín lèn, a dù fo mbìy.»
23Wù lò fo fo, e dù e Beersheba. 24Wáa dzə vitsə́ʼə́, Nyùy Tàr wìy fo wun wùn, e sùúy jii, «M dzə̀ Nyùy Abraham woo tàr won. Lá à yòʼ a fàn, m dzə̀ wòsò. M wíy bùʼ wò, e yiì, é kfə́ə yée kuʼ bìʼ ŋgaà wom lìm Abraham.» 25Aysi nèn bòm *kíy cù fo, a cù Nyùy Tàr, a yòŋ yír rə́. Wù túy kibàn kfə́ fó, wón və́ lìme túŋ ndzə́v fó.
Kilìʼ ké Aysi wùn Abimelek
26Fòn Abimelek nèn lò lì Ahussat woo ŋgaà ntir və wùn Fikol woo mfòómé və rə̀r, wùn áwune lò fo Gerar, e dù, e yèn Aysi. 27Aysi dzə́r aáwune jii, «Vèn wiy, e yen mo ji ka, a vèn bán ne mo, e jùm fo věn mvəm?»
28Áwune bìnèr jii, «Vèr‑iì sìíy, e yèn rúrú ji Nyùy Tàr dzə̀ á vèn wun. Bìʼ bey, vèr nén a wìy ji vèsən yii á kilìʼ e vèsə́n nsàn. Vèsən gwar *mensaŋ 29ji à yòʼ yíi yiì kinyo ke bi kí e vèr, réŋréŋ mo vèr yòʼ‑oò ló a nyàvrì e wò. Vèr‑iì keèrí wò kijuŋ, e tsəə̀né wò ji nyaáŋ. Nyùy Tàr bùʼ ne wò, à kúʼ lèn.» 30Aysi nèn yiì ŋkàʼ fo áwune, á wáa yikír, a nonín. 31Ndzə bvəə́shí, e jàv, áwune nèn yiì kilìʼ. Aysi tsəə́né áwune, á jàvsìn ji nyaáŋ.
32Wáa dzə e kishiíy fóo fèy, wón lìm Aysìi wìy, e bì wun kùm ndzə́v ye áwune‑eè tuŋen. Áwune suúy jii, «Vèr dzə̀ a yén mendzə́v.» 33Wù nèn shù yír ndzəv yee shooy ji «Shiba», a dzə̀ ji kilìʼ. Á nèn a yoŋ yír ŋkàlaʼ yee fó ji Beersheba#26.33: Beersheba: Nsàv yìr rən dzə̀ ji «ndzə́v kilìʼ.», e shem lán.
Esav koóy vikìy a dzə̀ wón veé Kanan
34Esav meé kiyá mkweè, e nèn kòóy vikìy fo Hit ram. Wùmòʼ‑oò dzə̀ Judit woo wan Beeri, wùmòʼ Basemat woo wan Elon. 35Áwune‑eè yiì, Aysi wùn Rebeka kú a dzə, a yu a dzə̀ nyár.
Voafantina amin'izao fotoana izao:
Kèʼlo 26: LNB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022 CABTAL