Kisary famantarana ny YouVersion
Kisary fikarohana

กิดจะกาน 2

2
วินญาน​บอ์ริซุด​ตัอะ​อัอด​นึง​กวย
1บัด​ตัอะ​มือ​นาก็​กวย​อิซราเอล​ซี​ซะลอง​มือ​เพ็นเทคด​อะกี#2:1 กวย​อิซราเอล​ซะไม​กี ‍ แต​ละ​ปี​อะไล​ซี​ซะลอง​ซะเอย​มือ​ซะเอย​เนว ‍ นึง​ซวง​นาก็​พะเยซู​กะเจด​อะกี ‍ กวย​อิซราเอล​ก็​ตัอะ​อะรอ์ม​อัอด​มะนืย​นึง​กรุง​เยรูซาเล็ม​อับ​อะเลอ ‍ เพือ​ซี​ซะลอง​มือ​นาก็​พูซาง​ปัอะ​กลาย​ดง​คอง​อะไล​ปัอะ​ปะเทด​อียิบ​แตเกา​อะกี ‍ เจอ​นับ​ปัอะ​แอน​ฮาซิบ​มือ ‍ กวย​อิซราเอล​ก็​ตัอะ​อะรอ์ม​อัอด​มะนืย​นึง​กรุง​เยรูซาเล็ม​แอน​มู​ตูอ​แอน ‍ เพือ​ซี​ซะลอง​มือ​เพ็นเทคด​อะไน ‍ จุม​นาก็​เจือ​นึง​พะเยซู​ก็​อะรอ์ม​อัอด​มะนืย​ญิ​กู​นาะ ‍  2เจอ​พะดี​อะไล​ซัง​ซะเนียง​อะเบิล​อะเลอ​ปัอะ​มะลัง ‍ อัน​อี​กือ​ซะเนียง​กะยาล​เรง ‍ ตี​ตีแม็ด​อะไล​ก็​ซัง​อัอด​ปัอะ​มะลัง ‍ บัด​กี​อะไล​ก็​ซัง​อัอด​ตัว​นึง​ดง​บอน​นาก็​อะไล​ตะกู​อัอด​อะกี ‍  3เจอ​อะไล​ก็​โฮม​นาก็​บลือ​กือ​อวยฮ ‍ แซง​ตัอะ​จอ์ะ​อะไล ‍ แซง​ตัอะ​เจอ​อัน​ก็​ปลาฮ​ปัน​ซะเอย​ลำ​อังเกยะ ‍ แต​ละ​ลำ​อะกี​ก็​ปัอะ​อัอด​ปัอง​ปลัอ​คอง​กวย​นาก็​อัอด​นึง​ดง​อะกี ‍ เจอ​อัน​ก็​บลือ​อัอด​ปัอง​ปลัอ​กวย​กู​นาะ 4อัน​ปัน​อังกิ ‍ วินญาน​บอ์ริซุด​แซง​ตัอะ​อัอด​นึง​อะไล ‍ อัน​ก็​คอบครอง​มิด​คอง​อะไล​กู​นาะ ‍ เจอ​อะไล​ก็​เวา​พะซา​อะไน​พะซา​อะกี ‍ ตาม​นาก็​วินญาน​บอ์ริซุด​ออ์น​อะไล​เวา ‍ 
5ซวง​ไน​เบิน​กวย​อิซราเอล​ตัอะ​ตี​ซะเอย​บอน​อะเลอ ‍ ตัอะ​อัอด​นึง​กรุง​เยรูซาเล็ม ‍ อะไล​มัง​ก็​ปัน​กวย​นาก็​ทือ​พูซาง ‍ 
6-12กวย​นาก็​ตัอะ​อะไน​ก็​ตัอะ​ตี​ปะเทด​ปารเทีย​นืยะ ‍ ปะเทด​มีเดีย​นืยะ ‍ ทัง​ปะเทด​เอลาม ‍ กับ​ปะเทด​เมโซโปเตเมีย​ก็​ปะนัน ‍ กวย​เคด​ยูเดีย​ก็​เบิน ‍ กับ​เคด​คัปปาโดเซีย ‍ เคด​ปอนทัด ‍ กับ​เคด​เอเซีย ‍ เบิน​ทัง​กวย​เคด​พรีเจีย ‍ เคด​ปัมพีเลีย ‍ กับ​กวย​ปะเทด​อียิบ​นืยะ ‍ เจอ​ก็​เบิน​กวย​ปะเทด​ลิเบีย​นาก็​อัอด​แจะ​เมือง​ไซรีน ‍ กับ​กวย​นาก็​ตัอะ​ตี​กรุง​โรม​ก็​ปะนัน ‍ เบิน​ญิ​ทัง​กวย​นาก็​กัอด​ปัน​กวย​อิซราเอล ‍ กับ​กวย​กะนอฮ​นาก็​แซก​เอด​รีด​คอง​กวย​อิซราเอล ‍ เบิน​ทัง​กวย​นาก็​ตัอะ​ตี​กอะ​ครีด ‍ กับ​กวย​ปะเทด​อาระเบีย ‍ 
บัด​กวย​จุม​ไน​ซัง​ซะเนียง​อะเบิล​นาก็​ตัอะ​ตี​มะลัง ‍ เจอ​ก็​ตัอะ​จอ์ะ​จุม​นาก็​เจือ​นึง​พะเยซู​อะกี ‍ อะไล​ก็​ตะลุฮ​ปัอะ​อะเฮะ​อับ​อะเลอ ‍ เจอ​อะไล​ก็​จินตาล​ตัอ​มีน​พะดาม ‍ พอะ​ปาย​จุม​นาก็​เจือ​นึง​พะเยซู​อะกี ‍ อะไล​ตุน​เวา​นัง​ปัน​พะซา​คอง​อะไล​เบิม ‍ อะไล​เวา​ปัน​พะซา​คอง​กวย​จุม​นาก็​ตะลุฮ​ตัอะ​อะเฮะ​อะกี​ออยะ ‍ เวา​ปัน​ซะเอย​พะซา​อะเลอ ‍ 
ซัง​อังกิ​จุม​กวย​นาก็​ตะลุฮ​ตัอะ​อะเฮะ​อะกี​ก็​อัมปรูอม​กัน​งึด​อะเลอ ‍ เจอ​ก็​เวา​นึง​นังนึ​ปาย ‍ "กวย​นาก็​เวา​อะไน ‍ ตัอ​มีน​อะไล​ปัน​กวย​นาก็​ตัอะ​ตี​เคด​กาลิลี​ญิ​กู​นาะ​นอ? ‍ ฮัก​อะไล​กือ​ปัน​เวา​พะซา​คอง​จุม​ไฮ? ‍ อัน​ปัน​วิลลาะ​อะไล​จัง​เวา​คาวดี​เรือง​คูอม​ยิงไย​คอง​พูซาง ‍ ปัน​พะซา​คอง​จุม​ไฮ? ‍ อะไล​เวา​ดาย​วิลลาะ?"
อะไล​อัมปรูอม​กัน​งึด​ตัอ​มีน​พะดาม ‍ กึด​ตัอ​ลอฮ​ไง​ปาย​ซี​ปัน​ปัอะ​ดาย​วิลลาะ ‍ อะไล​เลิด​เวา​นึง​นังนึ​ปาย ‍ "มาย​คูอม​ปาย​วิลลาะ​อะไน?"
13ฮัก​เบิน​กวย​มู​จุม​นาก็​เวา​พะมาด​ปาย ‍ "เวย ‍ อัมไป​ตัอ​ด็าง​นอ ‍ อะไล​งูอยะ​บลัง​จน​โบล ‍ เจอ​ก็​เวา​ปัอะ​ซูปะเปะ" ‍ 
คูอม​เวา​คอง​เปโตร
14ซัง​อะไล​เวา​อังกิ​เจอ ‍ เปโตร​กับ​จุม​มู​นาก็​อัมปรูอม​ปัน​ตัวแทน​คอง​พะเยซู​ทัง 12 คน​อะกี​เลิด ‍ ตะยึง​ตอ​มัด​กวย​ซะเอย​นาะ​นาก็​ตะลุฮ​ตัอะ​อะกี เจอ​เปโตร​ก็​เวา​ซะเนียง​อะเบิล​ซัด​อะเลอ​ปาย ‍ "แซมอัอย​แซมอาย​เอย ‍ อังกอะ​แซก​ออ์น​อัมไป​ตะมึง​ก็าก ๆ เดอ ‍ นาก็​อังกอะ​ซี​เวา​อะไน ‍ อังกอะ​อี​เวา​นึง​อัมไป​นาก็​ปัน​กวย​อิซราเอล​นาก็​ตัอะ​ตี​บอน​กะนอฮ​นืยะ ‍ อัมปรูอม​ทัง​อัมไป​กู​นาะ​นาก็​อัอด​นึง​กรุง​เยรูซาเล็ม​อะไน ‍ อังกอะ​ซี​เวา​ออ์น​อัมไป​ด็าง​ปาย ‍ นาก็​อัมไป​โฮม​จะนูอ​อัน​ปัน​ปัอะ​ดาย​วิลลาะ ‍  15นาก็​อัมไป​ซัง​มะเฮะ​เวา​ปัน​ซะเอย​พะซา​อะไน ‍ อัน​ตัอ​มีน​ปาย​มะเฮะ​โบล​บลัง ‍ จะนูอ​นัง​ตะรืบ​อัอด ‍ ฮาก็​เกา​โมง​ซัง ‍ ตะรืบ​ซำ​ไน​กวย​ตัอ​ซู​โบล​บลัง​อัมปิน​ดัก ‍  16ฮัก​นาก็​อัมไป​โฮม​จะนูอ​ปัน​ตะนายฮ​วินญาน​บอ์ริซุด​ได​นาก็​ตัอะ​อัอด​นึง​กวย ‍ 
"อัน​ก็​ปัน​กือ​นาก็​โยเอล​พู​เวา​คูอม​เวา​คอง​พูซาง​เกย​เคียน​อะดอะ​แตเกา​อะกี​ออยะ ‍ พูซาง​ออ์น​โยเอล​เคียน​อะดอะ​เพือ​ออ์น​ไฮ​ด็าง​ปาย ‍ นึง​ซวง​เวลา​นาก็​พูซาง​ซี​ออ์น​พะคริด​ตัอะ​อะกี ‍ อัน​ซี​ปัน​วิลลาะ​นืยะ ‍ 
"โยเอล​เคียน​อะดอะ​อังกิ ‍  17-18'พูซาง​เวา​ปาย ‍ 'นึง​ซวง​เวลา​ซุดทาย​นาก็​กึ​ซี​อะซวย​พะคริด​ออ์น​ตัอะ​จูอย​อัมไป​อะกี ‍ กึ​ซี​ออ์น​อัน​ปัน​อังกิ ‍ กึ​ซี​ออ์น​วินญาน​บอ์ริซุด​คอง​กึ​ตัอะ​อัอด​นึง​กวย​กู​นาะ ‍ ซี​ตัอ​มีน​นัง​กวย​บาล​ไป​นาะ​นาก็​ซี​เวา​คูอม​เวา​คอง​กึ ‍ ฮัก​วินญาน​บอ์ริซุด​อะกี​ซี​ออ์น​กวย​ซะเอย​นาะ​อะเลอ​เวา​คูอม​เวา​คอง​กึ ‍ ตัอ​ปาย​กัน​ตัอ​ปาย​กอ์น ‍ ตัอ​ปาย​นุม​ตัอ​ปาย​เทา ‍ ตัอ​ปาย​กวย​อัมปูด​กวย​ปะแก​ลือ​กวย​อังเกยะ​อังแกด ‍ กวย​คอง​กึ​อะไล​มัง​ก็​ซี​เวา​คูอม​เวา​คอง​กึ​จน​ญิ ‍ ลึ​ได ‍ กอน​ปะลูอะ​กอน​กะมอ์ล​คอง​อัมไป​ก็​ซี​เวา​คูอม​เวา​คอง​กึ ‍ กึ​ซี​ออ์น​กวย​นุม​เบิน​โฮม​นิมิด#2:17,18 คำ​ปาย​นิมิด​อะไน ‍ ซี​ปัน​เนว​แปลก​เนว​ปัน​ตา​งึด​นาก็​พูซาง​ซี​ตาะ​ออ์น​อะไล​โฮม ‍ เพือ​อะไล​ซี​เคาไจ​เนว​นาก็​พูซาง​อี​ออ์น​อะไล​ด็าง ‍ นาก็​ซี​ออ์น​อะไล​ด็าง​ออ์น​อะไล​เคาไจ​คูอม​เวา​คอง​กึ ‍ เจอ​ซี​ออ์น​กวย​เทา​อัมปาว​โฮม​เนว​นาก็​กึ​อี​เวา​นึง​กวย ‍ 
19"'ตัอะ​เวลา​กี​กึ​ซี​ออ์น​โฮม​เนว​ซำคัน​เนว​ปัน​ตา​งึด​ซะเอย​เนว ‍ เพือ​ออ์น​อัมไป​ด็าง​ปาย​เวลา​นาก็​กึ​ซันญา​อะดอะ​อะกี​ก็​ตัอะ​เจอ ‍ อะเฮะ​ปะลาะ​ก็​ซี​โฮม​มัง​เนว​ปัน​ตา​งึด ‍ ตัอ​ปาย​นึง​มะลัง​ตัอ​ปาย​นึง​กะแตะ ‍ ซี​ปัน​อะฮาม ‍ ปัน​อวยฮ ‍ ปัน​เพียก​ละอูด​ละเอา​อัอด​ซัง ‍  20มะนาง​ก็​ซี​ตัอ​ละลีาง​นัง ‍ ซี​กะนำ​ญิ ‍ เจอ​กะไซ​ก็​ซี​กะเซา​กือ​อะฮาม ‍ ค็าน​โฮม​อังกิ​เจอ ‍ อัมไป​ก็​ซี​ด็าง​ปาย​มือ​ซำคัน​มือ​ยิงไย​คอง​กึ ‍ นาก็​กึ​ซันญา​อะดอะ​อะกี​ก็​แจะ​อะเลอ​เจอ ‍  21เจอ​กวย​กู​นาะ​นาก็​เปิง​อะไซ​พู​นาก็​กึ​ออ์น​ตัอะ​จูอย​อะกี​ก็​ซี​แว็ด​โตด​ญิ'"#โยเอล 2:28-32 ‍ โยเอล​เคียน​อะดอะ​อังกิ​แตเกา ‍ เจอ​ไฮ​ก็​โฮม​ปาย​จะนูอ​วินญาน​บอ์ริซุด​ก็​ตัอะ​อัอด​นึง​กวย ‍ กือ​นาก็​โยเอล​เคียน​อะดอะ​ลึ ‍ นาก็​อัมไป​ซัง​มะเฮะ​เวา​ปัน​ซะเอย​พะซา​อะกี ‍ ตัอ​มีน​ญูอน​มะเฮะ​ปัน​เวา​เบิม ‍ ฮัก​ปัน​วินญาน​บอ์ริซุด​อะกี​ออยะ​นาก็​ออ์น​มะเฮะ​เวา​ปัน" ‍ 
22-23เจอ​เปโตร​ก็​เวา​ตอ​แอน​ปาย ‍ "กวย​อิซราเอล​เอย ‍ แซก​ออ์น​อัมไป​ตะมึง​ก็าก ๆ เดอ ‍ อังกอะ​อี​เวา​ออ์น​อัมไป​ตะมึง​เรือง​คอง​พะเยซู​คริด​พู​นาก็​ออ์น​วินญาน​บอ์ริซุด​ตัอะ​อัอด​นึง​มะเฮะ​จังอะไน ‍ 
"อัมไป​กู​นาะ​ก็​ด็าง​เจอ​กับ​พะเยซู​อะไน ‍ อัน​ปัน​พู​นาก็​ตัอะ​ตี​เมือง​นาซาเร็ด​อะกี​ออยะ ‍ ซวง​นาก็​พะเยซู​นัง​อัอด​นึง​ไฮ​อะกี ‍ พูซาง​ออ์น​อัน​ตาะ​เนว​ซำคัน ‍ เนว​ก็าก ‍ เนว​ปัน​ตา​งึด​ซะเอย​เนว ‍ เพือ​ออ์น​ไฮ​โฮม​ซัดเจน​ปาย​ปัน​พูซาง​ลึ​นาก็​ออ์น​พะเยซู​ตัอะ ‍ กู​เนว​นาก็​พะเยซู​ตาะ​ออ์น​ไฮ​โฮม​อะกี ‍ มัง​ก็​ปัน​เนว​นาก็​มะนาะ​พูซาง​ซี​เบิน​อำนาด​ตาะ​ปัน ‍ อังกิ​ไฮ​จัง​ด็าง​ปาย​พะเยซู​ปัน​พู​นาก็​พูซาง​อะซวย​อะตัอะ​ลึ​อะเลอ ‍ 
"ฮัก​อัมไป​บัด​เอด​พะเยซู​อะปัอะ​ตรายฮ ‍ ตอก​อัน​อะดอะ​นึง​ไมกางเคน ‍ อัมไป​ตาะ​กับ​อัน​ตาม​กำกึด​ตาม​มิด​คอง​อัมไป​เบิม ‍ มูอบ​ตอ์​คอง​อัน​ออ์น​กับ​กวย​ตะรู​กวย​นาก็​ตัอ​เจือ​ตัอ​ทือ​พูซาง​ไง ‍ เจอ​ก็​ตรายฮ​อัน​จน​กะเจด ‍ 
"ฮัก​พูซาง​ก็​วาง​แพน​อะดอะ​เจอ ‍ ปาย​พะเยซู​ซี​ตอง​กะเจด​นึง​ไมกางเคน ‍ พูซาง​เลิด​มูอบ​ตอ์​คอง​พะเยซู​ออ์น​อัมไป ‍ เพือ​ออ์น​ปัน​กือ​แพนกาน​คอง​พูซาง ‍  24อัมไป​ตรายฮ​พะเยซู ‍ ฮัก​พูซาง​ก็​ออ์น​พะเยซู​มอ์ยฮ​แอน ‍ ออ์น​อัน​เป​อำนาด​คอง​คูอม​กะเจด ‍ พอะ​ปาย​คูอม​กะเจด​ซี​ตัอ​ปัน​เป​อำนาด​คอง​พะเยซู ‍ ปัน​พูซาง​อะกี​ออยะ​นาก็​ออ์น​พะเยซู​มอ์ยฮ​แอน ‍ 
25"นาก็​พะเยซู​กะเจด​เจอ​ก็​มอ์ยฮ​แอน​อะกี ‍ กะซัด​ดาวิด​อัน​ก็​เกย​เคียน​อะดอะ​เจอ ‍ กะซัด​ดาวิด​ปัน​พู​เคียน ‍ ฮัก​อัน​เวา​กือ​ปัน​คูอม​เวา​คอง​พะเยซู​ปาย ‍ 'อังกอะ​โฮม​พะเจา​พู​ปัน​นีาย​คอง​อังกอะ ‍ อัอด​ตอ​มัด​อังกอะ​ตะลอด ‍ อังกอะ​ซี​ตัอ​อังกอฮ​อันเตริว​นัง ‍ พอะ​อัน​ก็​อัอด​ยาฮ​คูอ​คอง​อังกอะ ‍ อะกัน​ซี​จูอย​อังกอะ​อัอด​อังกิ ‍  26-27อังกอะ​ด็าง​ก็าก​ปาย​พูซาง​ซี​ตุน​ตาฮ​วินญาน​คอง​อังกอะ​ออ์น​อัอด​นึง​บอน​คอง​กวย​กะเจด​ตะลอด​ดัก ‍ พูซาง​เอย ‍ อังกอะ​ปัน​กวยไซ​บอ์ริซุด#2:26,27 กวยไซ​บอ์ริซุด​อะไน​ปัน​ละมึฮ​มู​ละมึฮ​คอง​พะเยซู คอง​ไม ‍ เจอ​อังกอะ​ด็าง​ปาย​ไม​ซี​ตุน​ตาฮ​ตอ์​คอง​อังกอะ​ออ์น​เปือย​ออ์น​อันซอ์ะ​อัอด​ตี​กี ‍ ด็าง​อังกิ​เจอ​อังกอะ​เลิด​เบิน​คูอม​ซุก​อัอด​นึง​มิด ‍ เจอ​ปัน​เวา​เนว​ก็าก​เนว​ออ ‍ อังกอะ​ซะอำ​นึง​มิด​ด็าง​ปาย​อังกอะ​นัง​ซี​มอ์ยฮ​แอน ‍ ทึง​แม​ปาย​อังกอะ​ซี​ตอง​กะเจด ‍  28ปัน​พูซาง​อะกี​ออยะ​นาก็​ออ์น​อังกอะ​เบิน​ซีวิด ‍ อังกอะ​เลิด​ด็าง​ปาย​อัน​ก็​ซี​ออ์น​อังกอะ​มอ์ยฮ​แอน ‍ มอ์ยฮ​เจอ​อังกอะ​เลิด​ซี​เบิน​ปัอะ​อัอด​นึง​พูซาง​แอน ‍ อังกอะ​เลิด​ซี​เบิน​คูอม​ซุก​อะเลอ'#ซะดุดี 16:8-11 ‍ แตเกา​กะซัด​ดาวิด​เคียน​อะดอะ​อังกิ ‍ เจอ​ไฮ​กู​นาะ​ก็​เกย​ด็าง​เกย​ตะมึง​เจอ​คูอม​เวา​อะไน ‍ 
29"แซมอัอย​เอย ‍ ล็าง​นาะ​กือ​ซี​กึด​ปาย​นาก็​กะซัด​ดาวิด​เคียน​อะดอะ​อะไน ‍ อัน​เวา​เรือง​ตอ์​คอง​อัน​เบิม ‍ ฮัก​ที​จิง​อัน​เวา​อะดอะ​เรือง​คอง​พะเยซู ‍ ตัอ​มีน​เรือง​ตอ์​อัน​เบิม ‍ อังกอะ​ฮาน​เวา​แป็น​บอ์ะ​ปาย​กะซัด​ดาวิด​นาก็​ปัน​อะจวยฮ​คอง​ไฮ​แตเกา​อะกี ‍ อัน​ก็​กะเจด​ตี​ดูน​เจอ ‍ กะเจด​เจอ​อะไล​ก็​เอด​ซบ​คอง​ดาวิด​อะดอะ​นึง​ทำ ‍ เจอ​ทำ​บอน​นาก็​อะไล​อะดอะ​ซบ​คอง​อัน​อะกี ‍ ไฮ​ก็​นัง​โฮม​จน​เตา​จะนูอ ‍ ไฮ​กู​นาะ​ก็​ด็าง​เจอ​ปาย​กะซัด​ดาวิด​กะเจด​ตุน​มอ์ยฮ ‍ นาก็​อัน​เวา​ปาย​ตอ์​อัน​ซี​ตุน​เปือย​ตุน​อันซอ์ะ​อะกี ‍ อัน​เลิด​ตัอ​มีน​เวา​เรือง​ตอ์​คอง​อัน​เบิม ‍ ฮัก​อัน​เวา​อะดอะ​เรือง​พะเยซู ‍ 
30-31"แตเกา​กะซัด​ดาวิด​อะกี ‍ อัน​ปัน​พู​เวา​คูอม​เวา​คอง​พูซาง ‍ พูซาง​เลิด​ออ์น​อัน​ด็าง​ปาย​อันเตริว​ซี​กัอด​อะซอฮ ‍ พูซาง​ซันญา​กับ​อัน​ก็าก​อะเลอ​ปาย ‍ กอนเจา​คอง​อัน​อันตูน ‍ ซี​ปัน​ตะนายฮ​พะคริด​พู​นาก็​ซี​ตัอะ​จูอย​กวย ‍ เจอ​พะคริด​อะกี​ก็​ซี​ปกครอง​ปัน​กะซัด​แทน​ดาวิด ‍ เจอ​นาก็​ดาวิด​เคียน​อะดอะ​ปาย​พูซาง​ซี​ตุน​ตาฮ​ออ์น​อัน​อัอด​นึง​บอน​คอง​กวย​กะเจด ‍ กับ​ซี​ตัอ​ออ์น​ตอ์​อัน​เปือย​อันซอ์ะ​อะกี ‍ ดาวิด​ตุน​เวา​เรือง​ตอ์​คอง​อัน​เบิม ‍ ฮัก​อัน​เคียน​อะดอะ​ปาย​พะเยซู​คริด​อะไน​ซี​มอ์ยฮ​ตาฮ​กะเจด ‍ 
32"เจอ​พูซาง​ก็​ออ์น​พะเยซู​อะไน​มอ์ยฮ​ตาฮ​กะเจด​ลึ ‍ มะเฮะ​ญิ​กู​นาะ​ก็​โฮม​แป็น​มัด ‍ เบิน​ซิด​ปัน​พะยาน​ปาย​พะเยซู​มอ์ยฮ​ลึ​อะเลอ ‍ เจอ​นาก็​พะเยซู​มอ์ยฮ​ตาฮ​กะเจด​อะไน​ก็​ออ์น​ไฮ​ด็าง​ก็าก​ปาย ‍ พะเยซู​ปัน​พะคริด​พู​นาก็​พูซาง​ปาย​ซี​ออ์น​ตัอะ​จูอย​กวย​ไฮ​ลึ​อะเลอ ‍ 
33"เจอ​จะนูอ​พูซาง​ก็​ออ์น​พะเยซู​เบิน​ตำแน็ง​ปัอง​กูอ​มู​อะเลอ ‍ ออ์น​อัน​เบิน​ครอง​ปัอะ​ซะวัน​มะนืย​กับ​พูซาง ‍ เบิน​ตะกู​อัอด​ยาฮ​คูอ​คอง​พูซาง ‍ เจอ​พูซาง​พู​ปัน​อัมปูอ​มูอบ​วินญาน​บอ์ริซุด​ออ์น​พะเยซู ‍ กือ​นาก็​อัน​เกย​ซันญา​อะดอะ​อะกี​ออยะ ‍ เพือ​พะเยซู​ซี​ออ์น​วินญาน​บอ์ริซุด​ตัอะ​อัอด​นึง​กวย ‍ เจอ​ฮาไน​พะเยซู​ก็​ออ์น​วินญาน​บอ์ริซุด​ตัอะ​อัอด​นึง​กวย​ลึ​อะเลอ ‍ กือ​นาก็​อัมไป​โฮม​นาก็​อัมไป​ซัง​จะนูอ​ออยะ ‍ อังกิ​อัมไป​จัง​ซัง​ซะเนียง​อะเบิล ‍ เจอ​กวย​จุม​ไน​ก็​เวา​ปัน​พะซา​นาก็​อะไล​ตัอ​เกย​เวา​ปัน​อะกี" ‍ 
34-35เจอ​เปโตร​ก็​เวา​แอน​ปาย ‍ "ไฮ​ด็าง​ปาย​พะเยซู​คริด​ซี​เบิน​รับ​ตำแน็ง​ปัอง​กูอ​มู​ปัอะ​ซะวัน ‍ พอะ​ปาย​แตเกา​กะซัด​ดาวิด​เกย​เคียน​อะดอะ​แอน​มู​บอน​ปาย ‍ 'พูซาง​เวา​นึง​พู​นาก็​ปัน​นีาย​คอง​อังกอะ​ปาย​อังกิ ‍ "ออ์น​ไม​ปกครอง​มะนืย​กับ​กึ​นึง​ซะวัน​อะไน ‍ ตะกู​อัอด​นึง​ยาฮ​คูอ​คอง​กึ​ปัอะ​ไน​ออยะ ‍ จน​เตา​กึ​ซี​ออ์น​ไม​เป​ซัดตรู​คอง​ไม ‍ ออ์น​อะไล​ซำ​อัอด​ปืน​อะเยิง​ไม​จน​ญิ"'#ซะดุดี 110:1; มาระโก 12:36 ‍ กะซัด​ดาวิด​เคียน​อะดอะ​อังกิ​แตเกา ‍ เจอ​อัน​ก็​ปัน​กือ​นาก็​อัน​เคียน​อะดอะ​ลึ​อะเลอ ‍ ฮัก​ไฮ​ด็าง​ปาย​นาก็​กะซัด​ดาวิด​เคียน​อะดอะ​อังกิ ‍ อัน​ตุน​เวา​เรือง​ตอ์​อัน​เบิม ‍ พอะ​ปาย​ตอ์​คอง​กะซัด​ดาวิด​ตุน​มอ์ยฮ​ปัอะ​อัอด​ปัอะ​ซะวัน ‍ ฮัก​พูซาง​ออ์น​ตอ์​คอง​พะเยซู​มอ์ยฮ ‍ เจอ​ก็​ออ์น​อัน​ปัอะ​รับ​ตำแน็ง​ปัอง​กูอ​มู​อัอด​นึง​ซะวัน​ลึ ‍ นาก็​กะซัด​ดาวิด​เคียน​อะดอะ​อะไน ‍ อัน​เคียน​อะดอะ​เรือง​คอง​พะเยซู ‍ 
36"นาก็​อังกอะ​เวา​กู​เนว​ออ์น​อัมไป​ตะมึง​อะไน ‍ ก็​พอะ​อังกอะ​อี​ออ์น​กวย​อิซราเอล​กู​นาะ​ด็าง​ก็าก​ปาย ‍ ปัน​พะเยซู​พู​นาก็​อัมไป​ตอก​อะดอะ​นึง​ไมกางเคน​อะกี​ออยะ ‍ นาก็​พูซาง​ออ์น​เบิน​ตำแน็ง​ปัอง​กูอ​มู ‍ ออ์น​ปัน​พะเจา​คอง​กวย​ญิ​กู​นาะ ‍ เจอ​ออ์น​ปัน​พะคริด​นาก็​อัน​เกย​ซันญา​ปาย​ซี​ตัอะ​อะกี" ‍ เปโตร​เวา​อังกิ​นึง​จุม​กวย​นาก็​ตะลุฮ​ตัอะ​อะเฮะ​อะกี ‍ 
37กวย​นาก็​ตัอะ​อะกี ‍ บัด​อะไล​ซัง​เปโตร​เวา​อังกิ​เจอ ‍ อะไล​ก็​ฮะเมือ​ปาย​อะไล​โลยฮ​อะเลอ ‍ อะไล​ติ​มิด​อะเลอ ‍ อะไล​เลิด​อะบลัฮ​เปโตร​กับ​จุม​นาก็​ปัน​ตัวแทน​คอง​พะเยซู​อะกี​ปาย ‍ "แซมอาย​เอย ‍ มะเฮะ​ก็​โลยฮ​เจอ​ออยะ ‍ ออ์น​มะเฮะ​ตาะ​วิลลาะ?"
38เปโตร​เลิด​เวา​ปาย ‍ "ออ์น​อัมไป​กู​นาะ​เปียน​มิด​ญอม​รับ​ปาย​อัมไป​โลยฮ​จิ ‍ ออ์น​อัมไป​เจือ​ปาย​มะนาะ​พะเยซู​คริด​อะกี​ออยะ ‍ นาก็​ซี​ออ์น​อัมไป​แว็ด​คูอม​โลยฮ​อะกี ‍ เจอ​ออ์น​อัมไป​ตาะ​พิที​ดุบ​ดัอะ​นึง​ละมึฮ​คอง​พะเยซู​คริด ‍ ค็าน​อัมไป​ตาะ​อังกิ ‍ พูซาง​ก็​ซี​อะไพ​คูอม​โลยฮ​คูอม​บาบ​คอง​อัมไป​ญิ​กู​นาะ ‍ เจอ​ซี​ออ์น​วินญาน​บอ์ริซุด​ตัอะ​อัอด​นึง​อัมไป​เต ‍ 
39"นาก็​พูซาง​ซันญา​อะดอะ​ปาย​อัน​ซี​ออ์น​ไฮ​แว็ด​โตด ‍ เจอ​ออ์น​วินญาน​บอ์ริซุด​ตัอะ​อัอด​นึง​ไฮ​อะไน ‍ ปัน​คำ​ซันญา​นาก็​อัน​อี​ออ์น​กับ​กวย​กู​นาะ ‍ ตัอ​ปาย​ลุน​ไฮ​จะนูอ ‍ ลือ​ลุน​กอนเจา​คอง​ไฮ​ตอ​ปัอะ​แอน ‍ นาว​อี​ออ์น​กับ​กวย​กู​นาะ​ทัง​นาก็​อัอด​แจะ ‍ ทัง​นาก็​อัอด​ละเยิง ‍ พูซาง​ซี​ออ์น​วินญาน​บอ์ริซุด​ตัอะ​อัอด​นึง​กวย​กู​นาะ​นาก็​อัน​จวน​ออ์น​ตัอะ​ปัน​กวย​คอง​พูซาง" ‍ 
40เปโตร​ก็​เวา​นึง​อะไล​ตอ​ปัอะ​แอน​ซะเอย​เนว ‍ เพือ​ออ์น​อะไล​เคาไจ​เรือง​คอง​พะเยซู​อะไน ‍ อัน​เวา​นึง​อะไล​ตะน็าง ‍ เพือ​อะไล​ซี​ตัอ​เบิน​โตด​นาก็​พูซาง​ซี​เอด​นึง​กวย​อะกี ‍ อัน​เวา​ปาย ‍ "จะนูอ​เบิน​กวย​ซะเอย​นาะ​อะเลอ ‍ นาก็​ตัอ​ญอม​เจือ​นึง​พะเยซู​คริด​อะไน ‍ อะไล​เลิด​อัอด​ละตาฮ​กับ​พูซาง ‍ เจอ​พูซาง​ก็​ซี​ตอง​เอด​โตด​นึง​อะไล ‍ ฮัก​ค็าน​อัมไป​ญอม​เจือ​ปาย​พะเยซู​ปัน​พะคริด​นาก็​พูซาง​ออ์น​ตัอะ​จูอย​กวย​ไฮ​ลึ​อะเลอ ‍ อัมไป​ก็​ซี​แว็ด​โตด​นาก็​พูซาง​ซี​เอด​นึง​กวย​อะกี ‍ ออ์น​อัมไป​แซก​นึง​พูซาง​เดอ ‍ เพือ​อัมไป​ซี​แว็ด​โตด!"
41เจอ​กวย​กู​นาะ​นาก็​เจือ​คูอม​เวา​คอง​เปโตร​ก็​เบิน​ตาะ​พิที​ดุบ​ดัอะ ‍ จะไง​กี​เลิด​เบิน​กวย​นาก็​เจือ​นึง​พะเยซู​เพิม​อะซอฮ​แอน 3,000 คน​เตฮ​ออยะ ‍ 
42เจอ​อะไล​กู​นาะ​เลิด​ปัน​มู​มิด ‍ ตัอะ​อะรอ์ม​อัอด​มะนืย​โดะ​อะเลอ ‍ ตังไจ​ตะมึง​คูอม​เวา​คูอม​อะเรียน​คอง​จุม​นาก็​ปัน​ตัวแทน​คอง​พะเยซู​อะกี ‍ เจอ​ก็​โดะ​อะทิดทาน​โดะ​ตาะ​พิที​เปฮ​คะนมป็าง ‍ เพือ​อะไล​ซี​ซีญือ​นาก็​พะเยซู​กะเจด​เพือ​ซี​เจะ​กีา​คูอม​โลยฮ​คูอม​บาบ​คอง​อะไล​อะกี ‍ 
จุม​นาก็​เจือ​อะกี​ตาะ​วิลลาะ​นืยะ
43เจอ​จุม​นาก็​ปัน​ตัวแทน​คอง​พะเยซู​อะกี​ก็​ตาะ​เนว​ซำคัน​เนว​ปัน​ตา​งึด​ซะเอย​เนว​อะเลอ ‍ จน​กวย​กู​นาะ​ก็​งึด ‍ เจอ​ก็​ออ์น​เกียด​อะไล​ตัอ​มีน​พะดาม ‍ 
44เจอ​กวย​นาก็​เจือ​นึง​พะเยซู​ก็​ปัน​มู​มิด​ญิ​กู​นาะ ‍ มะเลอ​เบิน​อันเตริว​อะไล​ก็​อัมแปะ​นังนึ​ตัก​อัมแปะ​นังนึ​จีา​ญิ​กู​เนว ‍  45เจอ​กะแตะ​กับ​โกรกรูอะ​นาก็​อะไล​เบิน​อะกี ‍ อะไล​ก็​ซี​เอด​อะปัอะ​ตายะ ‍ เพือ​ซี​อัมแปะ​ปราะ​ออ์น​กวย​ตุฮ​นาก็​คาด​อะไน​อะกี ‍ 
46เจอ​อะไล​ก็​ปัอะ​ปะซุม​อัอด​นึง​วิฮาน​คอง​พูซาง​กู​จะไง ‍ เจอ​ก็​อัมปรูอม​เปฮ​คะนมป็าง​อัอด​นึง​ดง​พู​ไน​พู​กี ‍ จีา​ดอ์ย​มะนืย​รูอะ​นึง​มิด​อะเลอ ‍ อะไล​อะยอ์ะ​เปง​นังนึ​ตุน​คีที​ตุน​ซะน็าง​อันเตริว​ไง ‍ อัมแปะ​นังนึ​จีา​อัมแปะ​นังนึ​อัอด ‍  47เจอ​อะไล​ก็​ซันเซิน​พูซาง​อัอด​ตัอ​แปะ ‍ เนว​นาก็​อะไล​ตาะ​อะไน​ตัอ​เบิน​มะเลอ​ติ​พาตี​นาะ ‍ เจอ​พูซาง​ก็​ออ์น​เบิน​กวย​นาก็​ตัอะ​เจือ​นึง​พะเยซู​อับ​อะซอฮ​กู​จะไง ‍ เจอ​จุม​นาก็​เจือ​อะกี​อะไล​ก็​แว็ด​โตด​คูอม​โลยฮ​คูอม​บาบ​คอง​อะไล ‍ 

Voafantina amin'izao fotoana izao:

กิดจะกาน 2: Bru Bible

Asongadina

Hizara

Dika mitovy

None

Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra