กิดจะกาน 3
3
เปโตรปัวกวยนาก็ตัอปันตะยาฮ
1เบินมูจะไง เปโตรกับยอนกำลังตะยาฮมูดจอ์ะวิฮานคองพูซาง ซวงตะยาฮอะกีก็พะดีบายซาม ปันเวลานาก็กวยเกยอะรอ์มอัอดนึงวิฮานอะกีเพือซีอะทิดทาน 2แจะปองโตมูดจอ์ะวิฮานอะกี อะไลก็โฮมกวยนาก็อังกรางกวยลอยอะตัอะ อะจวยฮนาก็ลอยอะกีอันตัอปันตะยาฮกดตีอันกัอด เจอมูคองอันเลิดอังกรางอันอะตัอะอะดอะแจะปองโตวิฮานตีกีกูจะไง เพือออ์นอันคอทานนึงกวยนาก็ตัอะจอ์ะวิฮานอะกี ปองโตมูดจอ์ะวิฮานตูไนอะไลอะโรปายปองโตมายะ
3บัดอะจวยฮลอยอะไนโฮมเปโตรกับยอนกำลังอีตะยาฮมูดจอ์ะวิฮาน อันเลิดแซกปราะนึงอะไล 4เปโตรกับยอนก็อะเฮะจอ์ะอัน เจอเปโตรก็เวาปาย "อะเฮะจอ์ะไน" 5ซังอังกิอะจวยฮอะกีก็อะเฮะ กึดปายอะไลซีเอดอันเตริวแมออ์น
6เจอเปโตรก็เวาปาย "ปันปราะปันทอง กึก็ตัอเบิน ฮักเนวนาก็กึเบิน กึก็ซีออ์นไม กึซีออ์นไมยวลตะยาฮนึงอำนาดคองพะเยซูคริดนาก็ตัอะตีเมืองนาซาเร็ด"
7เวาอังกิเจอเปโตรก็แต็กอังกังยาฮคูอคองอะจวยฮอะกีออ์นอันยวลตะยึง เจอโลลองคองอะจวยฮอะกีก็แค็งแรงตับ 8อะจวยฮอะกีเลิดตะยึงซำบาย ตะยาฮลับปัอะลับจู เจออันก็ตะยาฮมูดจอ์ะวิฮานอัมปรูอมเปโตรกับยอน เจออัอดตีกีอันก็ทังตะยาฮทังซะดายฮคอบคุนซันเซินพูซาง
9เจอกวยนาก็อัอดตีกีก็โฮมกูนาะ นาก็อันตะยาฮซันเซินพูซางอะกี 10บัดอะไลฮะเมือปายอันปันกวยนาก็เกยตะกูคอทานอัอดแจะปองโตมายะอะกี อะไลก็งึดตัอมีนพะดาม จักอันแบ็นดายวิลลาะ?
เปโตรอะเรียนกวยนึงวิฮานคองพูซาง
11อะจวยฮนาก็เกยปันลอยอะกี อันก็นังแต็กอังกังเปโตรกับยอนอัอด อะไลอัมปรูอมอัอดนึงละเบียงวิฮานนาก็อะไลอะโรปายละเบียงคองซาโลมอนอะกี เจอกวยกูนาะนาก็โฮมปายอันแบ็น ก็งึดตัอมีนพะดาม ตัอปายมะเลอก็ตะลุฮตัอะอะเฮะทึด ๆ
12โฮมกวยตัอะอับอังกิ เปโตรเลิดเวานึงอะไลปาย "อัมไปนาก็ปันกวยอิซราเอลเอย อัมไปตะนาะจังงึดอะเลอ โฮมปายอะจวยฮอะไนแบ็น? ตะนาะอัมไปจังอะเฮะจอ์ะมะเฮะก็ากแนอะเลอ? อัมไปกึดปายปันญูอนริดอำนาดญูอนเนวก็ากเนวออคองมะเฮะเบิมนอ นาก็อะจวยฮอะไนแบ็น? ตัอมีนได
13"ปันอำนาดคองพะเยซูเดอ นาก็ตาะออ์นอะจวยฮอะไนแบ็น บัดพะเยซูอัอดนึงโลกอะไนอันก็รับไซพูซาง ฮักจะนูอพูซางพูนาก็ปันพะเจาคองอับราฮัม อิซอัก กับยาโคบอะยาะอะจวยฮคองไฮอะกี นาวออ์นพะเยซูเบินเกียดเจอ ออ์นอันมอ์ยฮตาฮกะเจด อัมไปเอดตอ์คองพะเยซูอะไนมูอบออ์นอะญาคองปะเทดโรมเอดอะปัอะตรายฮ อัมไปตัอญอมรับอันตอมัดปีลาด ทัง ๆ ทีปีลาดอีปะตาฮออ์นอันปันอิดซะลาะ 14อัมไปตาฮพะเยซูพูบอ์ริซุดพูนาก็ตะน็างตะปึง เจอเรือฮเอดกวยนาก็เกยตรายฮกวย ออ์นอันปันอิดซะลาะแทน 15อัมไปตรายฮตะนายฮพูนาก็ออ์นกวยเบินซีวิด ฮักพูซางออ์นอันมอ์ยฮตาฮกะเจดเจอ เจอมะเฮะก็เบินโฮมแป็นมัดปายอันมอ์ยฮลึอะเลอ มะเฮะเลิดอีอะตัองออ์นอัมไปด็างนำเต
16"ปันอำนาดคองพะเยซูพูนาก็มอ์ยฮตาฮกะเจดอะไนออยะ นาก็ออ์นอะจวยฮนาก็อัมไปเกยโฮมเกยด็างอะไนเบินเรงจะนูอ อันแบ็นพอะมะเฮะเจือนึงพะเยซู ญูอนเจือนึงอำนาดคองพะเยซูอะกีออยะ อะจวยฮอะไนจังแบ็นก็ากกือนาก็อัมไปโฮมจะนูอ
17"แซมอายเอย อังกอะด็างปายนาก็อัมไปกับจุมฮัวนาอัมไปตาะกับพะเยซูอะกี อัมไปตาะพอะอัมไปตัอด็างปายพะเยซูปันนีาว 18ฮักเรืองไนพูซางก็เบินอะตัองอะดอะกดตีตีแม็ดเจอ พูซางอะตัองปายพะคริดพูนาก็อันซีอะซวยอะตัอะเพือจูอยกวยอะกี อันซีตองติตองทอ์ระมานตองกะเจด พูซางออ์นจุมพูเวาคูอมเวาคองอันกูนาะเคียนอะดอะเจอปายอันซีปันอังกิ เจอพูซางก็ออ์นปันกือนาก็อะไลเคียนอะดอะลึอะเลอ
19"ค็านอังกิเจอก็ออ์นอัมไปเปียนมิดญอมรับปายอัมไปโลยฮจิเดอ ออ์นอัมไปลับตัอะจอ์ะพูซาง เพือพูซางซีอะดิคูอมโลยฮคูอมบาบคองอัมไป เพือพูซางซีออ์นอัมไปรูอะนึงมิดตุนอุกอ็างนัง 20เจอเพือพูซางซีออ์นพะเยซูพูนาก็พูซางเรือฮออ์นปันพะคริดคองไฮอะไน ออ์นอันลับตัอะแอน
21"จะนูอพะเยซูบัดนังอัอดปัอะซะวันอัอด อันซีอัอดตีกีจนเตามือนาก็พูซางซีออ์นอันลับตัอะแอน ตัอะมือกีเจอพูซางก็ซีอะตึกญิกูอันกูเนวนาก็อันเกยซางออ์นมายะออ์นก็ากแอน เรืองคองพะคริดอะไน พูซางก็ออ์นพูซักซิด กือพูเวาคูอมเวาคองพูซาง เคียนอะดอะกดตีตีแม็ดเจอ 22กือโมเซดก็เกยเคียนอะดอะเรืองคองพะคริดอะไนคือกัน โมเซดเกยเคียนอะดอะอังกิ 'เยโฮวาพะเจาคองไฮแตงต็างออ์นอังกอะปันพูเวาคูอมเวาคองอัน เจอตอปัอะเยโฮวาซีออ์นเบินกวยแอนมะนาะตัอะ เจออันก็ซีปันพูเวาคูอมเวาคองพูซางคือกัน อันซีปันกวยอิซราเอลกือไฮนีออยะ อันเวาวิลลาะก็ออ์นอัมไปเจือตะมึงญิกูเนวเดอ 23ค็านมะเลอตัอญอมตะมึง พูซางก็ซีตัดพูกีอะลอฮ ซีทำลายอันตัอออ์นปันกวยคองพูซางนัง'#ซะเลยทัมบันยัด 18:15-19 โมเซดเกยเคียนอะดอะอังกิแตเกา เจอก็ปันพะเยซูอะไนออยะนาก็ตัอะกือนาก็โมเซดเคียนอะดอะอะกี"
24"โมเซดเกยเคียนอะดอะเจอปายพะคริดซีตัอะ เจอพูเวาคูอมเวาคองพูซางแตละนาะก็เคียนอะดอะเรืองคองพะคริดคือกัน อะไลกูนาะอะตัองออ์นไฮด็างปายบัดอันตัอะเจอซีปันวิลลาะนืยะ ตัอปายซามูเอล ลือพูเวาคูอมเวาคองพูซางนาก็ตัอะอันตูนอันแอน อะไลมังก็เคียนอะดอะเรืองซวงเวลานาก็พะคริดซีตัอะอะไน 25อะไลปันพูเคียนอะดอะ ฮักอะไลตัอเบินโฮมอัมปินเนวนาก็อะไลเคียนอะดอะอะกี กือนาก็พูซางซันญาอะดอะนึงอับราฮัมปาย 'กึซีออ์นกวยญิโลกเบินรับพอนนึงกอนเจาคองไมมะนาะ'#ปะทมมะกาน 22:18; 26:4 พูซางซันญาอังกิกับอับราฮัม ฮักอับราฮัมตัอเบินโฮมอัมปินเนวนาก็พูซางซันญาอะดอะอะกี ไฮนาก็ปันกอนเจาคองอับราฮัมอะกีออยะ นาก็เบินรับคำซันญานาก็พูซางเวาอะดอะกับอะยาะอะจวยฮแตเกาคองไฮ
26"นาก็พูซางซันญาอะดอะกับอับราฮัมอะไน ก็ปันกือนาก็อันซันญาอะดอะเจอ กอนเจาคองอับราฮัมพูนาก็ซีออ์นกวยญิโลกเบินพอนอะกี ก็กือพะเยซูพูนาก็ปันกวยไซคองพูซาง พูนาก็พูซางออ์นมอ์ยฮตาฮกะเจดอะไนออยะ พูซางออ์นพะเยซูตัอะจอ์ะไฮนาก็ปันกวยอิซราเอลญวงมู เพือซีออ์นไฮปันพูนาก็เบินรับพอน เจอพอนนาก็พูซางอีออ์นกับไฮก็กือออ์นไฮเบินมิดตะไม เจอก็แปะจิตาะเนวโลยฮเนวไลอะกี" อังกินาก็เปโตรเวานึงกวยนึงวิฮานอะกี
Voafantina amin'izao fotoana izao:
กิดจะกาน 3: Bru Bible
Asongadina
Hizara
Dika mitovy

Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra