Wikhikən 12
12
1Toci, Sesohs kamacin kisokənək meskw nankənihakewe wikhəpaltimək, Petanik pəkəcihe tan Lasal eyit, tan wət kisi mehcinetpən, tanil Sesohs kisi pəmawsowehlatpənil.
2Nit tet etliwikwhəpalatit, Malt onotəmawa. Enokəlo Lasal nit peskw nekəmaw tanik mawihpomacik.
3Toci Mali wihkwehton nkocitkikon sonhəkensot liwihtaso spciknalt, pokəkihe, seskewse, osonpekənəmowanəl Sesohsəl osihtəl, ocikasəmowanəl osihtəl ocikasəmowanəl osihtəl opiyesom ikək, winohcikwam psənakwheso sonhəkensot.
4Toci nət peskw tanik weci kehkimocik ohəkek, Sota Iskaliyot liwiso, Simo 'kwəssəl, tan ketikinowehlat Sesohsəl itəm.
5Kekw weci skat ankowehtasinokəs yot sohəkensot ocinsatkehtol tineliyəl? Tamahal newowinsk kisakihsowək, ənəpmilan təmaksəsowinowək?
6Skat yot ociyitəmowən otəmitəhaman təmaksəsowino, kenok oci nekəm kəmotənesks, otiyin maninot, pəmipton tan kekw picetasik.
7Toci Sesohs item: Ehkwihan ehpit: ociyines okisacihtəmən kiskət poskənimk.
8Ecpilihil təmaksəsowinowək kmeci miwawak maweyiniyak; kenok nit skat kmecimi iyowepah.
9Nit tehc ktanakwsowək Leswihsək kecicatit Sesohsəl otiyelin nit, pitapasowək skat tepəkt oci nekəm, kenok naka ocinəminhaya Lasaləl tanil Sesohs kisi pemawsowehlatpənil.
10Kenok kcipahtəliyasək mawakənotəmatowək naka onepəhaniya Lasaləl.
11Ipəcəl oca nekəm ktanakwsopənik Leswihsək maciyapasitpənik, welamsətəmotopənik Sesohsəl ohəkek.
12Nit apc ehtaw kisok ktanakwsowək pəmawsowinowək tanik petapasicik wikhəpaltimək, notəmatit Sesohsəl ockoyehalin Selosalemk,
13Wihkwehtoniyal psketkonol əpəs liwiso Piniks, otəlapasiniya otasikoniya, otokemoltowək, itəmotowək; Hosana! Nihtəna, kikikw təkec! Olehləkwsowəl Islel okinceməsməl, tanil weckocalicil Ksakəmamowa wisowən ikək.
14Sesohs meskowat ewasisoyelicil cakhasəl, otesakopesinəl, tahalo elowikhasik,
15Mosahk seksikəc Siyən otosəl!
Sakihok kinceməsəm wicowihat otesakopitowal cakhas ocakhasisəməl.
16Nihtəl kekwseyal wetikehkimocik skat onəstəmo tiliwnewihpən təmk. Kenok kisikcitəmitəhamkosit Sesohs omikwitəhatəməniyal nihtəl kekwsal ewikhasikil; naka Sesohsəl okisi lehtakanepənil nihtəl kekwseyal.
17Nit tehc nekəmaw tanik wicewowatitpənik Sesohsəl tan toci weci notekimat Lasaləl poskənikənaləkok, pemawsowehlat nspiwolamhətowək.
18Nit tehc mawihamək otasikowawal, cipəcəl okisi notəmaniya nekəm okisi lehtakan yot kinowaskoltikən.
19Nit tehc Palosiyək iyalotoltowək: Skat knəmihtoniya skahəlkekw ktəlikisehtopa? Sakihok, skitkəmikw onəkanosokakon.
20Nit ankwoc Kəlikewiyək mawiyoltowək nekəmaw tanik kisic kowikwakwiyapasicik otimihaniya Selosalemk wikhəpaltimək.
21Nekəmaw petapasowək Pilipk, tan 'cey Petsehtik, Koliletk, opapehcikesiniyal, itəmotowək: Sakəm, npawatəmənen nəmiyanin Sesohs.
22Pilip pekəcihat otakənotəmowal Atəlewol akimte Atəle Palip petkawotowək otakənotəmowawal Sesohsəl.
23Sesohs 'tasitema: Tepənaskowihak ikehi pəmawsowin 'Kwəssəl okici təmitəhamkosin.
24Leyo, yəholekw, tanəc iyaka nkohciminkət hikliskalən skat əlipənekwihanok kətakəmikok skat mehcinewinək, nkotokahtek; kenok mehcinewik kceyawimin kasoc.
25Tan wət mosacit opəmawsowakən, okəskatonc. Kenok tan akwitehpatək opəmawsowakən yot skitkəmikw, otankewotəmən askəmawsowakən ikək.
26Wen lokewit nosokowic; tan nti, noskinosəm nit tetəc eyitəc. Wen lokewit Nmihtakws okici təmitəhamalc.
27Təkec ncəcakw omacitəhaso: kehkoc ntitəm? Nmihtakws, ocikikihin yot tpaskotikən! Kenok ociyot npəkəci yot tpaskotikənək.
28Nmihtakws, kci təmitəhatəmon kowisowən. Toci Kelowəsit notowah etlewestakw spəmkik itəm: Nkisikihi təmitəhatəmən, naka apc nkicihtəmitəhatəmənc.
29Nit tehc mawihamək tanik sekləticik kwihiw itəmotowək: Petakiw. Kətəkik itəmotowək: Aseliyəl okəlolkol.
30Sesohs itəm: Yot kəlowakən skat ocihikahew ociniy: kenok ociyekehi oci kilowaw.
31Təkec yot skitkəmikw ətplotaso; təkec yot skitkəmikw okinceməsəməl ntiyakanc.
32Nil owihi onakehlikw ktakəmikok nockowiphakc msiw pəmawsowinowək tan eyi.
33Yot weci itək otahkinowehton tanəc elimecinet.
34Pəmawsowinowək 'tasitemawal: Nocinotəmənenopən tpaskowakən ikək Niweskw askəmihiw. Kekwe wecihitəmən pəmawsowin 'Kwəssəl cowiyonakehlac? Wen iya notpəmawsowin 'Kwəssəl?
35Toci Sesohs 'tiya: Mahkiyew pəshakwhek wecihemkoniya. Pəmapasikw kwenihiyekw pəssakwek, welaman piskahtek skat ktələmihkakoniya; ipəcəl tan pemihat piskahtek skat okəcicitowən tan elihat.
36Kwenihiyekw pəssakwek olamsətəmokw pəsakwhek ikək, welaman okwasin pəshakwhek khəkewa. Yohtəl kekwsal Sesohs itəkil, macehe naka okwasohtowah.
37Kenok kak etociktanakətol kinowaskoltikənəl kisehtakpənil wewocəskowiw, skat olamsətəmoneyawipən ohəkek.
38Welaman Isayi nikanik cicitahkawino okəlosowakənəl, leyo tan itəkəs:
Nsakəmamən, wen kisi olamsətəkəs ntakənotəmakənən?
Wen Nsakəmamən opitin elemesowehtowəts?
39Nit tehc skat kisi wəlamsətəmotihtikopən, ipəcəl Isayi apc itəkəs:
40Okisinkapowehtowanəl osiskowal, naka,
okisisaklihtowanəl oməshonowal;
welaman skat ocinəmihtahtiwniyal osiskowal ocinsətəmotiwniyal oməshonowal,
okwolpeh ləsoltiwniya nil nkisipilawənp.
41Yohtəl kekwsal Isayi itəkəpənil, ilpəcəl onəmihtowanepən okici təmitəhamkosowakən, naka onəstohapənil.
42Kenok ktanakwsowək potowəsowinowək welamsətəmoticik ohəkek, kenok oci Palosi skat opapehkinsətomoniya, skat oci notihnawənp himiyewikwamək.
43Ipəcəl opiyemi mosaciniya pəmawsowinowək oki ihitəmi təham kosowakənowa skatək. Kəlowəsit oki citəmitəhamkosowakən.
44Sesohs kintakwso, itəm: Tan welamsətək nhəkek skat [tepəkt] lcolamsətəmo nil nhəkek kenokəlo Nekəm ohəkek tan petəkimitpən.
45Tan nemihat onəmiyal Tanil petəkimitpənil.
46Npəkəci skitkəmikw npəshakwhan, welaman msiw wen tan welamsətək nhəkek, skatəp pəmohse piskahtetək.
47Tan wen notək ntəloswakənəl skat kəlnəmok, nil skat ntəplomao; kenok skat nocipəkəcihaw ntəplotəmən skitkəmikw, kenok wici pəkəcihay nkikehton skit kəmikw.
48Tan wen semahlit, skat wikwehtokw nkəlosowakənəl, otiywal tanil teplomcil. Kəlosowakən tan itəmanpən, nihtəc teplomal mcəsəlewe kiskət.
49Ipəcəl skat nocikəlosikopən nil nhəkek, kenok Nmihtakws tan petəkimitpən, Nekəm nmilkonepən həlkitəmowakən tan elewesto tan itəm.
50Nkəcicihton otəlkitəmowakən askəmawsowakəniw. Nit tehc tanil kekwsal nestomanil Nmihtakws tan ihitpən nit nestəm.
Voafantina amin'izao fotoana izao:
Wikhikən 12: PQM2014
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Maliseet Gospel of John © Canadian Bible Society, 2014
