Wikhikən 11
11
1Naka skitapi ksinokapənak Lasal liwisopənak, Petanik təleyawiwopənak, Mali wicikititicil epilicil Malt ototenesisowak.
2Nət Mali tan sonpekənatpən 'Sakəmaməl sonpekənsot, okasəmowanepənil osihtəl opiyesom ikək, tan wicikitititəh Lasal kesinokatpən.
3Nit tehc wicikimacihi epilicihi, opetapohaniyapən kəlosowakən Sesohsəl, itəmopənik: Nsakəmamən, sakiht, tan mosalət əksinoka.
4Nit Sesohs notək, itəm: Yot ksinokewakən skat ociyew iyo npowakon ikək; kenok weci eyik Kelowəsit okici təmitəhamkosowakən ikək, welaman Kelowəsit 'Kwəssəl okici təmitəhamkosin.
5Nit Sesohs okəselmal Maltəl wici kititicil epilicil, Lasaləl.
6Nit tehc tan toci kisi notəmat okəsinokalin mehc ənkehso nisokəniw tan tet eyit.
7Toci akimte, notəkehkimocik: Lapasinec apc Leswihsowakik.
8Notəkehkimocik 'tiyawal: Nsakəmamən, kechikawiw Leswihsək kətipənapskohokopənik, ktəlihan apc nit?
9Sesohs 'tasitema: Skat iya nisanko təpaskotcikənəl nkekiw? Pəmohset wen spətew skatəc napiskwamao, ipəcəl nəmihton skitkəmik opəshakwhekəm.
10Kenok pəmohset wen nipayiw napiskwamac, ipəcəl skat pəssakwek eyiw ohəkek.
11Yohtəl kekwsal itəkil, toci akimte 'tiya: Lasal əlkwahsin, kenok ntəlihan welaman ntokehla.
12Nit tehc notəkehkimocik 'tiyawal: Nsakəmamən, kowiht, wəlewoc.
13Kenok Sesohs weskowotəlmowat onəpowakən; kenok nekəmaw litəhasoltowək oskowotəmən atlasimwe kewihmək.
14Nit tehc toci Sesohs opapehkiyaha: Lasal mehihiniyak.
15Nolitəhas oci kilowaw skat ntiyewən nit; welaman kolamasətəməniya. Kenok lapasi, nic eyit.
16Nit tehc Toma, tan iyaka liwiso Təkwehs, 'tiya tanihi mawkehkimacihi: Kilon na lapasinec, welaman kowicimehihinətipən.
17Nit tehc Sesohs pekəcihat nit, oməskəmən kisiposkənasowəl kis newokənəkət.
18Nit Petani kwihiw Selosalemk, wecehtakemək tamahal totən nananko stehtey, [nital tamahal nisohsalkot.]
19Ŭktanakwsowək Leswihsək petapasicik Malt Mali eyihtit, oltekotaniya ociwicikimatitəhə.
20Nit tehc Malt ehtohcinotəmat Sesohsəl ockowihalin otəlihan onaciyasikowal. Kenokəlo Mali mehc həpo wenocikwamək.
21Toci Malt 'tiyal Sesohsəl: Nsakəmam, eyənsəpən yot tet, wicikitiyek skatəp mehcinewiyak.
22Kenok nkəcicihton təkec tan eliwihkotəmowət Kelowəsit, kəmilkonc Kelowəsit.
23Sesohs 'tiyal: Wicikitiyekw nəmcesoc.
24Malt 'tiyal: Nkəcicihton nəmcesoc tan toci minowawsoltimk mcəsəlewe kiskət.
25Sesohs 'tiyal: Nil nit apacipewakəni pemawsowakəni. Tan welamsətək nhəkek, cikaw mehcinet pəmawsoc.
26Tan pemowsit welamsətək nhəkek skatəc mehcineso askəmiw. Kolamsətəmən yot?
27'Tiyal: Aha, Nsakəmam, nolamsətəmən kil Niweskowin, Kelowəsit 'Kwəssəl, tan pekəcihat skitkəmikw.
28Kisi itək nit nnomacəhan, wihkwimal wicikititicil Maliwolkikimiw, 'tiyal: Notəkehkikemit pəkəcihe, kowihkwiməkw.
29Mali ehtohcinotək nəkəsaonakeso opəkəcihanəl.
30Nit Sesohs mehc meskw pəkəcihewi otenesisək; kenok mehc iyo tan tet; Malt etli asikowatpən.
31Nit tehc Leswihsək tanik wiciyewatpənik lamikowam tanik etli wəlikowatpənik, nemihatit Maliwəl onəkəsaonakesilin onotəhalin, onosokowawal, iyalotoltowək: Poskənikənaləkək əlihe naci osikeltəm nit.
32Nit tehc Mali pekəcihat Sesohsəl eyilit msakənahtesin ositək, 'tiyal: Nsakəmam, eyənsəpən yot tet, wicikitiyek skatəp mehcinewiyak.
33Sesohs nit tehc nemihat osasətemilin onəmiya Leswihs tanihi wiciyewacik, sasətemoltoh, mehkwe, ocicakwimehkwe, osikitəhaso,
34Itəm; Tama kponawah? 'Tiyaiwal: Nsakəmamən, ckowa, sakiht!
35Sesohs sasətemo.
36Nit tehc Leswihsək itəmotowək: Sakihok! Ehtohcimosalats!
37Ankwoc itəmotowək: Wət skitap tan pantehtowapən nekapilicil osiskol, skatəpal kisilehlawiyəl wəloskitapiyəl skat omehihinaliwən?
38Nit tehc Sesohs apc mehkwe lamiw pekəcihat poskənikənaləkok. Ŭlmalkətəs pənapskok na, pənapskw weskitek.
39Sesohs itəm: Semahtok pənapskw. Malt, npoln wicikititicil, 'tiyal: Nsakəmam, təkec kis məcakwhe, ipəcəl kis omehcinan new wokənəkət.
40Sesohs 'tiyal: Skat iya kətiholokpəs, olamsətəmən, kənəmihtonc Kelowəsit okici təmitəhatəmowakən?
41Toci ocisemahtoniya pənapskw tan tet npowinowəl eləsəsinlit. Sesohs spəmək likcesowəl osiskol, lapeso, itəm: Nmihtakws, wihwinowaməl ipəcəl kciksətowihən!
42Nkəcicihtonepən kil mecimiw kciksətowi; ipəcəl owihi yot mawihamək tanik wiwnikapowihacik, ntitəm: welaman nekəmaw olamsətəməniya kil ktəlkimin.
43Kisi itək yot, kintakwso, itəm: Lasal! Ckowi notaha!
44Tan mehcinetpən weckowi nohtahat, təpakwenasowəl opitinəl osihtəl npowinoweyal həlkotewakənəl Sesohs 'tiya: Apkwehlok, kiseltəmotowək omacənan.
45Nit tehc ktanakwsowək Leswihsək tanik petapasineyapənil Maliwəl, onəmitonca elokelit, olamsətəmotowək ohəkek.
46Kenok ankwəc lapasowək Palosi ikək otakənotəmowawa Sesohsəl elokelit.
47Nit tehc kcipahtəliyasək Palosiyək omawehlawa potowəsowino itəmotowək: Tanəc təlehtakhətinen? Ipəcəl wət skitap okisehtonəl ktanakotol kinowəskoltikənəl.
48Cikitowəkw otəleyin yot Lomkewiyək petapasowəkc kowikwehtakonenəc kəmətkin naka koyekwehləkonwəkc nekwtakəmiksiyəkw.
49Nət peskw nekəmaw liwiso Kayip, tan elikihi pahtəliyasowit nit pemikətək, 'tiya: Kətama kekw kəcicitotipa.
50Skat ktəlitpitəhatəmawsoniya kocikaniyewoltinen peskw oskitap ocimehcinan ocipəmawsowinowək, welaman msiw nekwtəkəmiksicik skat ociskwoskesiwniya.
51Kenok skat oci itəmowənəl yohtəl kəlosowakənəl nekəm ohəkek: Kenok elikci pahtəliyasowit nit pemihkətək, nikaniwhəlacəmo Sesohs ocimecinec nihiht nkotokəmikso.
52Skat tepəkt nihiht nkotokəmikso kenok naka mawehlan opeskowilin Kelowəsit onican tanik sisehtekocik.
53Nit tehc wecehtakemək nit kisok mawakənotəmnak onepahaniya.
54Nit tehc Sesohs skat akwamk əlimesowipəmcew Leswihsow ikək, kenok macehe əlihi kətakəmikw, otenek tan liwisowiw Epləm nit etlimaw eyit tanihi ekehkimacihi.
55Nit Leswihsək nankəmihakewe wikwhəpaltimkeweyamowah kətəyikehi, ktanakwsowək pəliw otapasowək, elitkwakwiyapasowək Selosalemk, opehkihosoltiniya, meskw wikhəpaltimək.
56Nokwilowəhaniya Sesohsəl, yəhotoltowək seklətihtit kci himiyewikwamək: Kekw litəhasoltipa? Skatəcal pəkəcihew wikhəpaltimək?
57Nit kcipahtəliyasək naka Palosiyək elikislotəlmotit wen kcicihat tan eyilit otakəni malp, welaman otakwonawalp.
Voafantina amin'izao fotoana izao:
Wikhikən 11: PQM2014
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Maliseet Gospel of John © Canadian Bible Society, 2014
