Ipakilya 40
40
1Isam̃u yiṉo vya, sôri n’ôma w’aṉambiṉag’ôga w’Egipt, w’aṽendyi reri yaô, ôga w’Egipt. 2N’aṽendiṉi Faraô iyôfisyè sè mbaṉi ôma w’avegagi gw’ewônjô z’isôri n’ôma w’avegagi gw’ewônjô za mongi wi namba. 3N’aweli yè waô gô ntyôgô, gô nagô y’egogi z’isozè, gô mbôra y’avegagi Yôsèf nunjô pa. 4Egogi z’isozè aveṉi waô gôre Yôsèf gôre yè gô penjavenja waô, n’alwaṉi waô mw’egômbe gô ntyôgô.
5Sôri n’ôma w’aṉambiṉag’ôga w’avegagi fwelô pa gô ntyôgô, waôdu aṽaṉi w’ayinô nyinô ôgwèr’ômô, ôm’edu nyinô yè, ga nt’avegag’ibènguṉa sa yô. 6N’aṽyeṉi Yôsèf ibanga gôre waô, ayeṉi yè waô, na vôna, w’avegagi gèṽagèṽa. 7N’aṽambyi yè iyôfisyè si Faraô s’avegagi na yè gô ntyôgô ya reri yè inè: Ntiṉa nde yi r’azô maṉi fweva pa ṉèṉo wiṉo? 8Awiṉizi waô yè inè: Azw’ajinô nyinô, ndô e zel’ôma gô bènguṉa yô. N’awulinyô waô ne Yôsèf inè: Ibènguṉa si pa pila gôr’Anyambyè? Sambô, rakilyaṉi myè nyinô yaṉi.
9Ôma w’avegagi gw’ewônjô z’isôri arakilyi nyinô yè gôre Yôsèf, n’awulinyè yè inè: Gô nyinô yam̃, vôna, apegag’ôgoli g’ôzô wam̃. 10Na g’ôgoli mè apegag’ampary’ararô. Gw’apunjiṉa wô, iṽya nya wô ny’ajaṉa, ni yembiṉa ya wô y’ajaṉ’ilônd’iwondi. 11N’imogi nyi Faraô ny’apegaga g’ôgo wam̃. Abonga myè ilônda, apyara myè ilônda gw’imogi nyi Faraô, apa myè imogi g’ôgo wi Faraô. 12N’awulinyô yè ne Yôsèf inè: Siṉo ne ibènguṉa sa yô. Ampary’ararô mô ne ntyugu ntyarô. 13Gô ntyugu ntyarô Faraô e be tômbiṉ’ewônjô zo, awiṉizo gw’eṽilô zo, ko wè pa imogi g’ôgo wi Faraô, ga nt’alendagi wè gw’alônga, gw’avegagi wè sôri yè. 14Ndô yônginya myè, gô be dwaṉa yô mbyambye na wè, ko teva myè, kokolo, lendiṉa myè nkèngo, gamba g’ômwanji wam̃ gôre Faraô, ko yè kogunya myè avila gô nagô yiṉo. 15Konde my’awongyô avila gô ntye y’Ebèr, na vèṉo kè mi pa dend’ezom̃a zi re myè ko fwelô gô ntyôgô.
16Ôma w’avegagi gw’ewônjô za mongi wi namba, gw’ayeṉi yè inè, Yôsèf abènguṉi mbyambye, awulyi nè: Vôna, apegaga kè gô nyinô yam̃, itôndô irarô yi mpèmba ya pupu gw’ewônjô zam̃. 17G’ôtôndô w’igôṉô apegaga ôṉongw’edu wi ṽèrè, pikô pa gw’inu, n’inyoṉi s’igôṉô s’anyagaga yô g’ôtôndô w’igôṉô gw’ewônjô zam̃. 18N’awiṉizi Yôsèf awulya inè: Siṉo ne ibènguṉa. Itôndô irarô yô ne ntyugu ntyarô. 19Gô ntyugu ntyarô Faraô e be tômbiṉ’ewônjô zo avila gôre wè, ko yè banyo gw’erere, n’inyoṉi si be ny’ôzôṉe wo.
20Gô ntyugu yi ntyarô, ntyugu y’ijaṉô si Faraô, avangi yè ôgeṽe gôr’inyôngô sè sôdu, n’arômbiṉi yè ewônjô z’ôma w’avegagi gw’ewônjô z’isôri n’ewônjô z’ôma w’avegagi gw’ewônjô za mongi wi namba gô garegare y’inyôngô sè. 21N’awiṉizi yè ôma w’avegagi gw’ewônjô z’isôri gw’eṽilô zè zi sôri, ko yè pa imogi g’ôgo wi Faraô; 22ndô aṽany’ôma w’avegagi gw’ewônjô za mongi wi namba, ga nt’avegag’ibènguṉa s’aṽèngunyô waô ne Yôsèf.
23Ôma w’avegagi gw’ewônjô z’isôri e pa jônginye Yôsèf, ndô aleṽaṉi yè.
Voafantina amin'izao fotoana izao:
Ipakilya 40: MYE
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Published by the British and Foreign Bible Society in 1927.