Ipakilya 41
41
1N’arweṉi gô ntyay y’impum̃’imbaṉi Faraô ayinô nyinô. Vôna, agum̃aṉi pyèrè n’ôrèmbo. 2Na vôna, inyar’imbya ôrwageṉô n’ipom̃a s’avandi avila g’ôrèmbo, n’anyeṉi sô ôkô. 3N’inyar’inyèṉè ôrwageṉô imbe s’egonga s’avandi avila g’ôrèmbo gô nyum̃a ya sô, n’agum̃aṉi sô pyèrè n’inyar’imori g’ôzamba w’ôrèmbo. 4Inyar’imbe s’egonga s’anyeṉi inyar’imori ôrwageṉô imbya n’ipom̃a. N’aṉongwi Faraô.
5N’arô dèwi yè, n’ayinô yè nyinô nyèṉè. Vôna, imba imbya ôrwageṉô ralye n’antyo s’aweli gw’erer’emô. 6N’imba imbe s’arevô ôrwageṉô jôm̃izô pa ne ômpunga wi nkôṽa yi tongwa ni nkômbe, s’aweli gô nyum̃a ya sô. 7N’imba s’arevô s’am̃èn’imba imbya ôrwageṉô s’avegagi ralye n’antyo. N’aṉongwi Faraô. Na vôna nyinô.
8Ibanga, iṉiṉa nyi Faraô ny’azugyazugyi, aweyi yè aganga waôdu n’aṉaga w’imya waôdu w’Egipt. N’arakilyi yè inyinô sè. Ndô e pa dèngô ôma w’avegagi gô bènguṉa sô gôre Faraô.
9N’ôma w’avegagi gw’ewônjô z’isôri awulinyi Faraô inè: Mi jônginya ṉèṉo wiṉo ifwem̃i sam̃. 10Aṽendiṉagi Faraô inyôngô sè, ko yè fwela waô gô ntyôgô gô nagô y’egogi z’isozè, myè n’ôma w’avegagi gw’ewônjô za mongi wi namba. 11Na vôna, azw’aṽaṉi azw’ayinô nyinô ôgwèr’ômô, n’ôm’edu gôre zwè alèng’ibènguṉa gô takilye nyinô y’ajeṉô yè. 12Ndô avegagi vovo na zwè iwanjo ny’Ebèr, ôsaka w’egogi z’isozè. N’arakilyi zwè yè inyinô sazô, n’aṽènguṉi yè zwè sô. 13Isam̃u y’arweṉi ga nt’avegag’ibènguṉa s’aṽènguṉi yè zwè. Faraô awiṉizi myè gw’eṽilô zam̃, n’aṽanyi yè ôma w’avegagi gw’ewônjô za mongi wi namba.
14N’aweyi Faraô Yôsèf; n’azunge kogunyi waô yè avila gô ntyôgô. N’azèngiṉi yè ôkuṽi wè, agaluṉ’ingoy sè, n’agèndi yè gôre Faraô. 15N’awulinyi Faraô Yôsèf inè: My’are jinô pe nyinô. Ndô e zel ôma wi re ko bènguṉa yô. Ndô my’are jogo pa inè, awè jogo pe nyinô, awè ko bènguṉa yô. 16Yôsèf awiṉizi Faraô inè. Aranga myè! Ndô Anyambyè e be jivire Faraô n’am̃ènjè.
17N’awulinyi Faraô Yôsèf inè: Gô nyinô yam̃, vôna, my’agum̃aṉi g’ôzamba w’ôrèmbo. 18Na vôna, inyar’impom̃i n’imbya s’avandi avila g’ôrèmbo, n’anyeṉi sô ôkô. 19N’inyar’ôrwageṉô imori imbe n’egonga s’avandi gô nyum̃a ya sô, n’ifweva, mi pa jeṉa kè nfweviṉi mè gô ntye yôdu y’Egipt. 20N’inyar’ôrwageṉô imbe n’egonga s’anyeṉ’inyar’inônga ôrwageṉô s’avegag’ipom̃a. 21Ndô gw’anyeṉi sô imori, yi pa jolye myô inè, s’anyeṉi sô, ni nfweviṉi ya sô y’avegag’egolaṉi ga gw’alônga. N’aṉongwi myè. 22N’arô jeṉi myè gô nyinô imba imbya ôrwageṉô ralye n’antyo, aweli sô gw’erer’emô. 23N’imba s’arevô ôrwageṉô, inkongi, jôm̃izô pa ne ômpunga wi nkôṽa yi tongwa ni nkômbe s’aweli gô nyum̃a ya sô. 24Imba inkongi s’am̃èṉ’imba imbya ôrwageṉô. N’amyezi myè yô gôr’aganga, ndô e re pegeg’ôma gô bènguṉa myè yô.
25N’awulinyi Yôsèf Faraô inè: Nyinô yi Faraô yi re mô; Anyambyè are myeza pa gôre Faraô nte be dendè. 26Inyar’imbya ôrwageṉô sô ne impum̃’ôrwageṉô, n’imba imbya sô ne impum̃’ôrwageṉô; nyinô yi re mô. 27Ndô inyar’ôrwageṉô imbe n’egonga, s’azôngag’inônga ni nyum̃a, sô ne impum̃’ôrwageṉô, n’imba s’arevô jôm̃izô pa ne ômpunga wi nkôṽa yi tongwa ni nkômbe, sô ne impum̃’ôrwageṉô yi njaṉa. 28Nyiṉo ne igamba nyi kambô myè gôre Faraô, Anyambyè amyeze Faraô nte be dendè. 29Vôna, e be dwaṉ’impum̃’ôrwageṉô y’iny’ijenge mè gô ntye yôdu y’Egipt. 30Yiṉo maṉa pa, gambèṉè impum̃’ôrwageṉô yi njaṉa yi be bya, n’ibuṉa siṉo sôdu s’inya si be deṽaṉô gô ntye y’Egipt, njaṉa yi be jilize ntye. 31Ni njaṉa yiṉo yi be bya yi be dwaṉe mpôlômè, ko ibuṉa s’inya s’amyô nyèṉè gô ntye. 32Ndô ja Faraô ayeṉi nyinô nkundiṉè, yi re konde ôsam̃u wi re dwaṉizô pa ne Anyambyè, na inè, Anyambyè e be sunge denda wô. 33Ndô Faraô e ga vinj’ôma w’ikôtiza n’imya, ko yè dôṽyè gw’ewônjô zi ntye y’Egipt. 34Faraô e ga lwaṉiz’ikômisèri gô ntye, gô bonge mbèy y’ôtaṉè avila g’ôwongo wi ntye y’Egipt, vo impum̃’ôrwageṉô y’ibuṉa s’inya; 35ko waô kum̃iny’ôwongo wôdu w’impum̃’imbya mèyoṉo yi bya, ko waô kenj’imba n’inya gw’inkala vo ôzômbyô wi Faraô, ko waô penjavenja sô. 36Inya siṉo si be dwaṉa penjavenjô pa gô ntye, g’ômwanja w’impum̃’ôrwageṉô yi njaṉa yi be dwaṉa gô ntye y’Egipt, ko ntye y’ayilizô ne njaṉa.
37N’agamba miṉo m’arondyi Faraô n’inyôngô sè. 38N’awulinyi Faraô inyôngô sè inè: Azwè ko dèng’ôma wi re n’iṉiṉa ny’Anyambyè ôṉongo wiṉo? 39N’awulinyi Faraô Yôsèf inè: Gô re nè. Anyambyè are wè myeza p’isam̃u yiṉo yôdu, e zel ôma wi re kè n’ikôtiza n’imya kè ga wè. 40Mi dôṽyo gw’ewônjô zi nagô yam̃, n’aṉagi wam̃ waôdu wi be jogiṉô izômbyô yo. Mi be pyagaṉo kaô n’ivenda. 41N’awulinyi Faraô Yôsèf inè: Vôna, mi dôṽyo ôvangiṉi wi ntye yôdu y’Egipt. 42N’arômbi Faraô ôm̃ôrô wè avila g’ôgo, awela wô g’ôgo wi Yôsèf, n’aworizè yè ingoy sa pupu, awelyè yè ôlônda wi sika ya teṉateṉa g’ômpele wè. 43N’avandizè yè gô ntyôṉe y’aluk’iyè, n’awôgiṉ’aṉaga gô bôsô yè inè: Lôṽaṉi akotolo! Yeṉo alôṽyô yè ne Faraô ôvangiṉi wi ntye yôdu y’Egipt. 44N’arô bulinyi yè Yôsèf inè: Myè ne Faraô! aranga wè, e zel’ôma w’atô tômbiṉ’ôgo ge ôgôlô gô ntye yôdu y’Egipt.
45N’aṽèti Faraô ina nyi Yôsèf inè: Safenat‐Paanea; n’ayômbizè yè Asenat, y’ômwaṉ’ômwantô wi Pôtifera, miṉisè yi On. N’agèndi Yôsèf gô bale ntye y’Egipt. 46Yôsèf avegag’agôm̃i m’impum̃’ararô g’ôṉèro wè gw’awôm̃unyi yè g’ôzô wi Faraô, y’ôga w’Egipt. N’alubwi yè avila gôre Faraô, agènda gô ntye yôdu y’Egipt.
47Ndô impum̃’ôrwageṉô y’ibuṉa s’inya, ntye y’ayaṉi ôwongw’ômwenge. 48N’alatizi Yôsèf ôwongo wôdu w’impum̃a mè ôrwageṉô gô ntye y’Egipt, n’agènji yè inya gw’inkala, nfwelaga gô gare yi nkaly’edu ôwongo w’intyaga s’avegagi vingôvingô. 49N’agum̃inyi Yôsèf bile, ibuṉa ga nt’are ntyèngè yi ntyuṽa, n’arigi yè gô tanga yô konde y’avegagi nyenge vyagaṉô.
50Impum̃a yi njaṉa ṽyagaga ro, ayanyô gôre Yôsèf awaṉ’aṉôm̃e aṽaṉi, w’ayaṉô yè ne Asenat, y’ômwaṉ’ômwantô wi Pôtifera, miṉisè yi On. 51N’aṽèti Yôsèf ina nyi njalyè inè, Manase, konde awulyi nè, Anyambyè are panga pa myè gô deṽaṉe njuke yam̃ yôdu ni nagô yôdu ya reri yam̃. 52N’aṽèti yè ina ny’ômwaṉa w’aluki, inè: Efrayim, konde awulyi nè, Anyambyè are jaṉiza pa myè gô ntye y’azingô mam̃.
53N’am̃aṉ’impum̃’ôrwageṉô y’ibuṉa s’inya y’avegagi gô ntye y’Egipt. 54N’avakily’impum̃’ôrwageṉô yi njaṉa gô bya, ga nt’awulyi Yôsèf. N’arweṉi njaṉa gw’intye sôdu, ndô inya s’avegagi gô ntye yôdu y’Egipt. 55Na gw’arweṉi njaṉa gô ntye yôdu y’Egipt, aṉaga w’arôngi gôre Faraô gô dèng’inya. N’awulinyi Faraô Egipt waôdu inè: Gèndagaṉi gôre Yôsèf, ko dendaṉi ôsam̃u edu wi be bulinyè ṉwè. 56N’alwaṉi njaṉa gô ntye yôdu. N’aṉunguṉi Yôsèf inagô sôdu s’inya, agôla bile gôr’Egipt. N’aliri njaṉa pôlô gô ntye y’Egipt. 57N’intye sôdu s’aṽyeṉagi gw’Egipt gô kôle bile gôre Yôsèf, konde njaṉa y’avegagi mpôlô gw’intye sôdu.
Voafantina amin'izao fotoana izao:
Ipakilya 41: MYE
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Published by the British and Foreign Bible Society in 1927.