Mateus 9
9
Jesu regurudueni homo, ma sibui longu aden momen.
1I la lundiendol, i iao le gor aden Kapernaum. 2Su gin huri hom ndramed le ndro i, de danen irgai bui, i da le berle aden. Be Jesu gin ilndri i, su dansu boro ndoui aden, i vong le ndro i, i da le berle aden: Mbue uo go noh, io gin sibui longu adem momen gineao. 3Su holel asu ndremda hernou, su gin hanguruen le bergolsu: I ogo i rodi Jehova le nongen aden. 4Jesu i danen hanguruen asu, i vong le ndro su, i boi: Desa mu hanguruen momen dagara le bergolmu ie? 5Sehe longu i beruan hanu, i ndoun ge, be io bai le ndro i: Io ha sibui longu adem momen, de io boi: Edne, hedi berle adem naiu. 6Io beg henunuen mu, ndurndramed i ndoun le longu masigane, i ndoa le esbui longu momen giao lie. Muren i vong le ndro ndramed ogo: Edne hedi berle adem irgai le gor adem. 7I dne, i iao le gor aden. 8Be su ndramed masi su gin ilndri longu ogo, meluasu i ieb, noh asu dsoln, su bamugueni Jehova, i da gin hengen ndoui dagara le ndro su ndramed.
Jesu i loh Mateus.
9Jesu i bieni gor ogo i ilndri hom gamel, ngarn Mateus, i da le logna moni, beg hurdi moni ad Kiab le asu ndramed. Jesu i vong le ndro i, i boi: Irndrbo, i dne, i do ndrobon Jesu. 10Jesu i la um aden, i ien gan le geao aden, su ndramed momen mabosanged su la born ndro i, su lie su ien gan le mandrogosgeao aden, ma su lao aden dagara lie. 11Su Pharisi, su da gin ilndri Jesu, su vong le ndro su lao aden: Desa Ndorlaben ademu i ien gan le mandrogosgeao asu ndramed momen? 12Jesu i hirong nongen asu, i bodeie: Su ndramed, su da horuan ge su mburesu Doktor, su ge, su da mad, su ha lengi i. 13Al sal ademu, hanguruen nongen ogo: Io ha lengi osbani su ndramed, memrad asu bui, io mbueren dirhor asu. Io gin meher, io eloh su ndramed momen ge. Su ndramed hian su gsou.
Heb nongen le bandri.
14Su lao ad Johanes, su me ndro Jesu, su ndemani i: Iou bandri, ma su lao asu Pharisi su bandri lie. Su lao adem ge, su de bandri bui, su hi derbe? 15Jesu i bode: Be gamel homo i ibdi bihin le nambulen, su lounsu mugmug manden leri, su de bandri bui. Su lao ordo dagara lie. Malabo su mugueni io, su ga bandri derbe io da ndro su? Bersi muren, be io gineao gane, su ga bandri ordo. 16Be salo sagen ad homo gin mbusrei, i surien salo houen gle surian derbe? Buio, ar salo i mbuser, salo sagen i momen gane 17Homo i de dau ndrunvain aden de la boged sagen bui, ar i gbud, vain i muh, boged gina momen ge. Su lug ndrunvain le boged houen. Aga hian monen ge.
Jesu hingeni ndurbihin, i regurdueni hom bihin lie.
18Be Jesu i gin vong nongen ogo, hom labenen la born ndro i, i godurhu, i boi: Nduro i gin mad malabo, hian am ndro i, dori i gle nemem, muren dne lie, i mamaren. 19Jesu i dne i la born ndro i, ma su lao aden. 20Malabo hom bihin i da med uru masongul ruo, i me baghege, i gohoni, i la bor ndro i baghege, beg boro salo aden, i hanguruen le bergoln: 21Ar io boro salo aden heb ge mandehe, muren io horuan. 22Jesu i belueni bormarn, ndrbon, i vong le ndro i, i bode: Ndurbihin mbue uo go noh, uo da gin boro ndoui ordo, aga gin sobani uo. Malabo bihin ogo i horuan ge. 23Jesu i la lundieum ad labenen, i hirong su do da ri, su do da dang, su ndramed mabosanged. 24I vong le ndro su, i bai: Alndi, ndurbihin i de gin mad bui i do medir ge. Su masi su hal aden. 25I robuldi su masi, muren i la lundieum, i la bage ndro mbunana, i boro nemen, malabo ndurbihin i dne. 26Ngarnongen i hilou le gor masi.
Jesu regurdueni begmarsor bui, ma homo bohon bui.
27Jesu i bieni gor ogo, sor ndramed marmou, begmarsor bui, sor loholo, sor vale, sor boi: Uo ndur David, hian osbani iouoro. 28I la um aden, sor la born ndro i. Jesu i ndemani sor: Danmor boro i, io ndoa le regurdueni mor? Sor bode: Ehe Ndorlaben. 29Muren Jesu i boro begmarsor, longu na gmehere, dege mor gin boro i. 30Begmarsor i reu. Jesu i vong le ndro sor, mbue sor vong le ndro homo. 31Be sor gin bieni Jesu, sor bosoui longu ogo le ndro su gor masi. 32Sor giniao, su hur homo lie le ndro i, beld i rii i, bohon bui. 33Jesu robuldi beld, bohon hian lie, i danen vong monen. Su masigane, meluasu i ieb, su boi: Du gin ilndri longu dagara le gor asu Israel masou. 34Su Pharisi su boi: I robuldi ngongong le ndoui ad labenen asu ngongong ge. 35Jesu i dogi le gor hoger mandehe, le gor manden lie, i henunuen su le numo lodu asu, i boharni le ndro su longu hian ber lang, i regurdueni su masi, su da med, mandrsu i horuan lie.
Jesu rendegien su lao aden masongul e rumou.
36Be i gin ilndri su masigane, bergoln Jesu i gosusngo le asu, su masi su dege meh, homo i da bogulue su hian bui. 37Malabo i vong le ndro su lao aden: Sengen mabosanged i da le beleng ber boan, su holel ge su bo mburer leri. 38Endemani Ndorlaben ber beleng, i rendegien su holel su gob mburer le beleng aden, su daui sengen mabosangd le goure.
Voafantina amin'izao fotoana izao:
Mateus 9: LLENT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Published by the British and Foreign Bible Society 1956
