Mateus 10
10
Jesu i eloh su lao aden e rendegien su le mburer aden.
1Boen Jesu i eloh su lao aden masongul e rumou, i hengen ndoui le ndro su, le robuldi beld, e regurdueni iab asu ndramed e mandrsu i da momen. 2Aga ngarsu asu masongul e rumou: Simon, ngarn Petrus, ndern Andreas, Jakobus ndur Sebedeus, ma ndern Johanes. 3Philipus e Bartolomus, Tomas e Mateus ndremda moni, Jakobus ndur Alveus, Lebeus ngarn Tadeus lie. 4Simon ber Kana, e Judas Isgariot, i da gin hevani Jesu. 5Boen Jesu i rendegien su masongul e rumou ogo; i vong le ndro su, i bai: Mbue irgai le gor asu Haiden, mbue dogi le gor asu Samaria. 6Hian gal gor asu Israel ge, su dege meh, su gina momen, su gina malold. 7Ar mu hilou ndro su, vong le ndro su nongen dagara: Gor lundielang gin mehere, i da baghege malabo. 8Regurdueni su, su da med, hingen su, su da gin mad, robuldi su beld gregurdueni su, mandrsu i momen, legen ge. Mbue hedi heb moni gleri. Ghengen i, dege io gin hengen i le ndro mu gle gous ge. Mbue hanguruen surien asu. 9Mbue hedi moni le ndob ademu. 10Memrad mabosanged i da le ndob ademu bugane, salo hendre ge, sumianegen bui, ndes bugane. Homo i da bo mburer, i vonei le gan anen. 11Ar mu la gor si, hirong i, homo i da somui le ademu, mu iao le um aden, mu gorge um hom, mabenan mu gbieni gor. 12Ar mu la gor si, mu da bosoui nongen hian ge le ndro su. 13Be su ber um ogo su da vonei le ademu, su somui le ademu, io leng bo hian le ndro su, be su de vonei le ademu, bui, io de hanguruen su bui, nongen ademu i la gmul. 14Ar su de delengasu le nongen ademu bui, su mbure mu e bieni um asu e gor asu giao. Mbue hur heb longu asu. 15Ndangen io boi le ndro mu, su ber gor Sodom ma Gomora su hian ge le asu be gord ad Jehova i gmehere. 16E lele io rendegien mu, mu dege meh hian, su da le molengasu mui momen, su da beg ien su. Hanguruen ademu i ndoa ge, mu dege moad, hanguruen ademu i hian monen gane, mu dege bal si.
Heb nongen le ngendian asu.
17Hian gobgulue meluamu. Su ndramed momen su da bage ndro mu. Su gob gord le ndro mu. Su grii mu le numo lodu asu. 18Su rui mu le ndro su ndurhian asu, le ndro su King asu, aga mu da hanguruen mburer ordo ge. 19Be su rui mu le gord, mbue hanguruen, mu vong sa le ndro su. Meluan Helian i ghenunuen mu le nongen hian monen ge. 20Mu do da vong bui, Meluan ad Jehova i da vong le bohomu. 21Ndern homo i rui ndern, i garii i na gmed ge, damen i da daii ndurn, su ndurn su rii su damsu e nanesu. 22Su masi, su gob iil le ndro umu. Homo ma homo i da ndoa le longu ordo, io beg rumburdi. 23Be su hingismad ademu le gor, mbue dandon, hilou e vob le gor si manan. Ndangen io boi le ndro mu, su gor masi su gob iil le ndro mu sidegesi, mabenan ndurndramed na gmeher lie. 24Hom lao i de hian hanu le Ndorlaben aden bui, ndangen hom lao i de ndoa hanu le Ndorlaben aden bugane. 25Longu masi i da gmeher le ndro Ndorlaben aden, i gmeher ndro lao dandendegei aden dagara lie. Ma lao aden i da somui ri. Be su gin boii i Ndorlaben, su bosoui Belsebub, i vonei Satan, su ghinen i le ndro su lao dandendegei aden dagara lie. 26Mbue mu go noh, longu masi su da gorni, io gobharni i, longu masi su da ndrodhi, bersi muren su dansu leri. 27Longu masigane i da gin nhui le nongen dohongein mu gobharni le ndro su longu masi, io da gin vong le delengamu ge, io da gin bahurhuh ge, loholo leri le balndro um. 28Mbue mu go noh, su masi su dansu daii mandrmu ge, de dansu daii bergolmu e meluamu bui. Hian mu noh le ad homo ge, i da danen bieni meluamu e mandrmu le moan manden. 29Su da semani ndorgan le moni sehendr ge, ndorgan i longu hendre molhege. Ha hirong i, dorgan i de los le boan bui, Damen ber lang ir bogulue i. 30Lomon i da le balmu Ndorlaben gin ha nemeni masigane. 31Mbue mu go noh, mu hian hanu le ndorgan molhe ber lang. 32-33Homo ma homo i da boharni nongen ordo, bombulen de mesi leri bui, muren io gobharni ngarsu le ndro Bo Domo ber belengan. Homo ma homo i da hangaini io, bombulen i mesi le nongen ordo, io da hangaini su lie, io de boharni ngarsu le ndro Bo Domo le belengan bui.
34Mbue hanguruen, io gin me boan le lug benu le gor asu, ndangen io gin me leri bui, io daui mordo borla le nemesu, bahun ge le gor asu. 35Ndurn i gob iil le ndro damen, ndurbihin i bo bahun le ndro nanen, naloson ndrnen i ma le ad naborson. 36Su loun ad homo masigane su gob iil le ndro i. 37Be homo i golnisden damen e nanen hanu, i de vonei io bugane, be homo i da voaniso ndurgamel de ndurbihin hanu i de vonei io bugane. 38Be homo i de hedi beldigei aden ie hauen bui, i da ndrbon le sal ordo bugane, i ogo i de vonei io bui. 39Be homo i da hanguruen mandrn ge i na glos, be homo i da momen le mburer ordo, i da gin hinen i mandrn heb ndoa bui leri, i ogo i horuan ndangen. 40Ar homo i somui le ademu, i somui le ordo lie. Ar homo i somui le ordo, i somui le aden ge, i da gin rendegien io. 41Be homo i hanguruen hom Provet, i vong, i bai: Aga hom Provet io somui le aden, i me le um ordo. Surien i belengeni, aga i vonei le ad Provet. Be homo i bo hian le ndro hom lao ordo i hanguruen le bergoln, aga hom lao ad Jehova, surien hian i da belengen i, surien le ad hom lao ad Jehova. 42Ar homo i hengen le ndro hom lao ordo molhege, dege su ndere ordo, heb ndran le ngoro, i hanguruen le bergoln aga hom lao ad Jesu, ndangen io boi le ndro mu: Surien ber lang ir belengen i.
Voafantina amin'izao fotoana izao:
Mateus 10: LLENT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Published by the British and Foreign Bible Society 1956
