Matiyò 10
10
Lìyòmɛ̀ là àpɔ̀rzìtòlò nà hwahwàkɛ hwa ama Yerzù
(Mak 3.13-19; Luk 6.12-16)
1O mburza hvònda Yerzù à mà rzàŋga lìyòmɛ̀ la eni la Hwà-òkòwèlì nà hwàhwàkɛ̀. Rzìi à hwa ŋgbà è wònjà ya lì hvayà hwèlìŋgɛ̀ hwe wòhwe ò inyò ja hwatò, na ò lì wɔ̀wìrzɛ̀ hwà-òkèlì nà inyayi ja nyàmbɛ̀ ja arzɛ. 2Mììnà mà lìŋgi lìyòme la àpɔ̀rzìtòlò na hwàhwàkɛ̀ ma hwèlì ndi: È wà wòrzò Rzìmɔ̀nì, ema à mà hwɛ̀lɛ̀hwɛ̀ Pètrò nà ŋmanyàŋgò wa eni Àndèlè. Jèmìrzì nà ŋmanyàŋgò wa eni Yòwanìrzɛ̀ hwàànà hwa ama Rzɛ̀bɛ̀dì, 3Hvìlìpì na Bàtòlomìyò, Tɔ̀màrzì na Matìyò e mòrzàŋgèlì wa e njàŋge yà lìkànèyà, Jèmìrzì e ŋmanà wa ama Alìhvɔ̀rzì, na Tàdiyòrzì, 4Rzìmɔ̀nì mòtò ema lì emeyà la eni lì rza àyèŋgòwɛ̀, na Jùdàrzì Ìrzìkarìyɔ̀tɛ̀, ema à mà àhwirzɛ̀ Yerzù.
Yerzù a òhwèlì I àpɔ̀rzìtòlò ja eni nɛ i hwɛni lì gbeyà èwòlò ya eni
(Mak 6.7-13; Luk 9.1-6)
5Yerzù à mà òma lìyòme la hwatò na hwahwakɛ. Rzìi à hwa òhweyà nanù ema, “È rzi ɛ̀ndɛ ò mambòwà ema mà rza enje mambòwà mà wònyà Yudà. Ndèŋgànà e rzi ɛndɛ ò tɔ̀ mbòwa ema e hwèlì ò èkòmè ya Rzàmàrìyà. 6Ndi e ɛ̀ndɛ ndi ò hwatò hwa Irzàyɛ̀lì. Hwa hwèlì ndì nàa mɛ̀lɛ̀ŋgù ema me ma wɔ̀ɔ. 7È ɛ̀ndɛ, na òma e ɛndɛ, e òhwe ŋmɛ̀ndì nanù ema, ‘Lìkànèyà la e ŋmanyu yà lohwà lì ma kòmbɛ̀nɛ̀.’ 8È wɔ̀wìrzɛ̀ e wɔ̀ hwa nyàmbɛ, e hvùmùlɛ̀ hwaŋga ema hwa ma ŋwɛɛ. È wɔ̀wìrzɛ̀ hvɛ tɔ̀ hwaŋga hwatò ema hwa òhvi i nyàmbɛ ja mɛ̀lɔ̀ŋgɔ. È hvàye hvɛ hwèlìŋgɛ̀ hwe wòhwe ò tenì ja nyò ja hwatò. Nà ma e ŋgbà e ŋginyà ya lì gbeyà hwene hweyà hwe arzɛ na rza ijòwi tɔ̀ itàŋgi, ò èŋgànɛ̀lɛ̀ inyɔ hvɛ e ɛndɛ e gbèèye nanù mɛnɛ, e rzi ijòwa tɔ̀ itàŋgi. 9È rzìi akpatɛ na tɔ̀ wòlì. 10È rzìi hwanɛ̀ tɔ̀ ekpa, tɔ̀ ehvɛhvɛ mbɔ̀ti. È rzìi wòwà hwètàmbì, tɔ̀ èeyè ya yɔ̀ndɔ̀ na inyɔ. Èhwanja è mògbèèlì a hwɛni lì wòŋgòwàhwà na e mòtò ema a gbeyà. 11È kpèèlì tɛ ò tɔ̀ ima mbòwà tɔ̀ mbòwà rzàlì, e arze e mòtò ema a imànɛlɛ ò lì kàrzɛ̀ nàa ŋmɛ̀nì, e kpèeyà e lìya na mɔ̀ natɛ̀ɛ e anjiya eŋge èki. 12Tɔ̀ ima ndawò ema è kpèèlì ò tenì, e kɔ̀mè hwatò ema hwa hwèlì ò tenì nanù ema, ‘Ɛ̀yɔ̀lɛ̀ nà inyɔ.’ 13È hwèlì tɛ ema, hwa e kàrzɛ tɛ, inyɛ ììkɔ̀mi ja anyu ja ɛ̀yɔ̀lɛ̀ ya ama Lohwɛ̀ e hwɛ na wɔ̀. Hwa rza e kàrzɛ hvɛ tɛ, inyɛ iikɔ̀mi ja anyu i e tìmbeyà. 14Ndi è uki tɛ ò tɔ̀ ima ndawò tɔ̀ mbòwa rzìi hwa rza e kàrzɛ̀ tɔ̀ ò lì e òkànèyà, e hvùhvùhwè irzɔ̀hwɛ̀ ema i hwèlì ò màtàŋgà ma anyu e anjiiya tɛ aŋga ò lì uŋmɛ̀lɛ̀ nanù ema Lohwɛ̀ a rza hwa emelì. 15Nà è òhweyà ndi e jɔ̀kɛ̀ nanù ema, ò Wùnyà wò Hwèkàyìrzèlèlì, Lohwɛ̀ à ò uŋmɛ̀lɛ̀ ììlì ò hwatò hwa màmbòwà ma Rzòdòmì na Gòmòrà lì aka mamɛ ema hwaŋga hwatò hwa eŋge mbòwa hwa ò lùwɛ.”
Mètakà ema hwà-òkòwèlì hwa ò luwɛ ò lìnà là Yerzù
(Mak 13.9-13; Luk 21.12-17)
16Yerzù à mà timba hvɛ lì òhwa nanù ema, “È ɔ̀ŋgɔ tɛ, na e òma ndi nàa mɛ̀lɛ̀ŋgù ò ìtììtènì ja i njùhwɛ̀. O èŋgànɛ̀lɛ̀ rzɔ e aŋgòwe ndi nàa mààhwà, ndèŋgànà e hwɛ ŋmɛ̀ɛ̀ nàa imbeŋga. 17È wòwe hvɛ hvònda na hwatò, ehwànja o ò hwɛ hwatò ema hwa e ò ɛ̀ndɛ̀nɛ̀ ò i ndawò ja hwèkàyìrzèlì, ndèŋgànà e gbiyɛhwɛ hvɛ hvònji ò ndawò ja awu ja màkanɛ̀. 18O nyòla ami, hwatò hwa e ɛ̀ndɛnɛ ò marzò ma i Gɔ̀winà, na ìkiŋgɛ̀. Wɔ̀ hwa gbeyà ene, aŋga nanù inyɔ e hwa òhweyà na hwaŋga ema hwa rza enje wònyà Yudà ŋmɛ̀ndì mò gbamù. 19Hwa è ɛndɛ̀nì tɛ ò hwèkàyìrzèlì tɔ̀ mɔ̀kɔ wa anyu a rzi atàkìrzɛ̀ ò mamɛ ema a hwɛ̀nì lì òhwa, tɔ̀ nɛ mɔ̀ à hwɛ̀nì lì è òhweyà. È hvònda è uki tɛ à ò hwɛ̀nɛ̀ eyà ya lì òhwa. 20È mbɔrzi ema à ò òhwɛ e rza hwɛ e ya eni ndi e uhwɛ̀lɛ̀lɛ ndi ò èlìŋgɛ̀ ya ama e Tatɛ̀ wa eni ema a òhwa ò nyòla ya eni. 21Hwatò hwa ò ŋgba wònyanyàŋgò hwa awu ò màà mà hwahvɛhvɛ hwatò ò lì hwa òŋwa. Irzàŋgo hvɛ ì gbeyànà hwàànà hwa awu nanù mɛnɛ, hwàànà hwa teŋgɛ̀nɛ̀ irzàŋgo nà inyàŋgò ja awù ò lì arza nanù ema hwà òŋwahwe. 22Hwatò hwa àrzɛ hwa ò e kɔ̀ ò nyòla lìinà la ami. Ndi hwatò ema hwa ò nò kakana mèèmà natɛ̀ɛ nà ò lìrzukù hwa ò rzùŋgàhwà. 23È ɛni tɛ ema hwa e tàkirzɛ tɛ ò mbòwa hvɔ̀kɔ, e hwaŋge, e ɛ̀ndɛ èhvɛhvɛ mbòwà. Nà e òhweyà ndi e jɔ̀kɛ̀ ema e rza ò kulɛ lì tàneya i mbòwà ja arzɛ ja èkòmè ya Irzàyɛ̀lì ndèŋgànà è Ŋmanà wà è mòtò wà Hwènàmà à è ja. 24È mòòkòwèlì à rza tànɛyi lì aka è Mòòkòlèlì. È mògbèèlì mɔ̀ hvɛ à rza tànɛyi lì aka è rzàŋgò yà eni wà èwòlò. 25Ò èŋgànɛ̀lɛ̀ è mòòkòwèlì à rza aŋgàmɛ̀nɛ̀yi lì arza èluhwe ema è akàyi è yà ama è mòòkòlelì wà eni. È mògbèèlì mɔ̀ hvɛ à rza aŋgàmɛ̀nɛ̀yi lì arza èluhwe ema è akàyi è yà ama è rzàŋgò yà eni wà èwòlò. Hwa kpɛ tɛ mòòhvò mò lìtumba lìinà ema Bɛ̀lrzɛ̀bùlì, nanù òma hwaŋga hwatò ema hwa hwèlì ò ndawò ya eni hwa ò hwɛ̀lɛ̀hwɛ lìinà ema lì hwiyòhwi lì aka lìni.”
È mòtò ema hwa àŋgàmɛ̀nɛ̀yi lì òka wɔ̀ŋgɔ̀
(Luk 12.2-7)
26“O èŋgànɛ̀lɛ̀ rzɔ e rzi òka hwatò hwa hwènàmà wɔ̀ŋgɔ̀. O rzà ènje tɔ̀ eyà ema e utami ema e rza ò jɛ̀ɛ lì wurzà. O rzà ènje hvɛ tɔ̀ eyà ema è hwandahwi ema è rza ò hwiyàhwà. 27Mamɛ ya arzɛ ema na e òhweyà ò jìtìtì, inyɔ e òhwa wùùnyà wò a ɛnɛ̀ tɛ. Ndèŋgànà hweŋge hweyà hwe arzɛ e ma e hweya nàa wùndɛ̀ e ò hwe òhwa ò mòtè. 28È rzi òka tɔ̀ mòtò wa hwènàmà ema a tànɛyi lì òŋwa e nyàmà nyò wɔ̀ŋgɔ̀, ndi à rza tànɛyi lì òŋwa èlìŋgɛ̀. Ndi e òke Lohwɛ̀ wɔ̀ŋgɔ̀ ema a tànɛyi lì hvàŋga e nyò na èlìŋgɛ̀ ò tenì ya èhvɔ̀ndì ya mùnya. 29È rze jɔ̀kɛ̀ nanù ema hwa àhwirzɛ̀ mèndiyɛ̀ndiyɛ me hwàkɛ ò ŋmanà kahvà hvɔ̀kɔ mɛnɛ e? Ndi tɔ̀ inɔ̀nì tɔ̀ jɔ̀kɔ irza tànɛyi lì unda ò rze ya mɔ̀nyɛ̀, e rzi hwɛ ema Tatɛ̀ Lohwɛ̀ wà anyu à emelì. 30Ndi ò tɔ̀ inyɔ Lohwɛ̀ a hwi mɔ̀rzɔ̀ŋgi mò mahvumbu ma mèyòhvò me anyu. 31O èŋgànɛ̀lɛ̀ rzɔ e rza òka tɔ̀ wɔ̀ŋgɔ̀ èhwanja inyɔ e hwɛni wòlìtò rzayi-rzayi ò ma Lohwɛ̀ lì akayi mèndiyɛ̀ndiyɛ.”
Lì tɛmeya Yerzù mbòŋgi tɔ̀ lì mò rzɔ̀rzɔ̀
(Luk 12.8-9)
32Tɔ̀ njɛnɛ ema a nò tɛ̀mèlì mbòŋgi ò màrzò ma hwatò hwa hwènàmà, imba hvɛ na mò tɛ̀meyà mbòŋgi ò wòrzò wa ama Tatɛ̀ wa ami ema a hwèlì ò ŋmanyu yà lohwà. 33Ndi tɔ̀ njɛnɛ ema a nò rzɔ̀rzi ò marzò ma hwatò hwa hwènàmà, imba hvɛ na mò rzɔ̀rzɔ̀ ò wòrzò wa ama Tatɛ̀ wà ami ema a hwèlì ò ŋmanyu yà lohwà.
Yerzù à mà a jàni ndi kànjɛ-kànjɛ ò ìtììtènì ja hwatò hwa hwènàmà
(Luk 12.51-53; 14.26-27)
34“È rzi wòteya lì lùtèyà ema na jàni ndi ɛ̀yɔ̀lɛ̀ ò rze. Jàyɛ̀, na rzi je ndi ò lì jànà ɛ̀yɔ̀lɛ̀, na jàni ndi kànjɛ-kànjɛ. 35Nà jelì ndi ò lì ìnɛ̀lɛ̀ menitò mòtò ò lì teŋgɛ̀nɛ̀ e rzàŋgò ya eni. È ŋmanà wa mòlanà hvɛ a ò teŋgɛ̀nɛ̀ nyàŋgɛ. È mòlanà hvɛ a ò teŋgɛ̀nɛ̀ è nyàŋgò yà eni yà lìhwa. 36Hwàkɔ̀yèlì hwa e mòtò, hwa ò uhwɛ̀lɛ̀lɛ ndi ò lìtumba la eni.
37“Tɔ̀ ima mòtò ema a lìŋgàni e rzàŋgò tɔ̀ e nyàŋgò ya eni lì nò aka, a rza tànɛyi lì hwɛ e mòòkòwèlì wa ami. Tɔ̀ ima mòtò ema a lìŋgàni e ŋmanà ŋgɔ̀ndɔ̀ tɔ̀ e mberza ya eni lì nò aka, a rza uki hvɛ tɔ̀ lì hwɛ e mòòkòwèlì wà ami. 38Tɔ̀ njɛnɛ hvɛ ema a rza wòwɛ e mbarzà ya eni ò lì nò nɔ̀ŋgɔ, à rza uki ò lì hwɛ è mòòkòwèlì wa ami. 39Tɔ̀ njɛnɛ ema a arza ò lì kòmbɛ̀ lòŋgɛ la eni, à ò lì wɔ̀lɛ̀nɛ̀, ndì tɔ̀ njɛnɛ hvɛ ema à wɔ̀lɛ̀nɛ̀ lòŋgɛ là eni ò lìnà la amì à ò lùwa lòŋgɛ là gbìndèyà.
Etaŋgi jà ama Lohwɛ̀ ò hwaŋga ema hwa kàrzɛyi hwàgbèèlì hwe eni
(Mak 9.41)
40“Tɔ̀ ima mòtò ema à è kàrzɛ̀ nàa hwààyɛ̀nì òma imba ndi à kàrzɛ̀yi. Tɔ̀ ima mòtò hvɛ ema à nò kàrzɛ̀yi nanù òma à kàrzɛ̀yi ndi Tatɛ̀ wà ami ema à mà nò òma. 41Tɔ̀ njɛnɛ ema à kàrzɛ̀yi mòòhwèlì wà èlìŋgɛ̀ èhwanja òŋgò mòtò ema mò à kàrzɛ à hwèlì ndi mòòhwèlì wà èlìŋgɛ̀, à lùwa itàŋgi jà ama mòòhwèlì wà èlìŋgɛ̀. Tɔ̀ ima mòtò ema à kàrzɛ̀yi mòtò gbamù èhwanja òŋgò ema à kàrzɛ̀yi à hwèlì ndi mòtò wà gbamù, à lùwa etaŋgi jà ama è mòtò wà gbamù. 42Ò jɔ̀kɛ̀, nà è òhweyà nanù ema, tɔ̀ ima mòtò ema à ŋgbelì tɔ̀ mòtò tɔ̀ mɔ̀kɔ wà hwaŋga ema hwa nò oŋgama tɔ̀ malìhwa mà lì nyɔ, tɔ̀ òŋgò mòtò à rzi hwɛ wòlìtò, òŋgò ema à ŋgbelì, à hwɛni lì lùwa etaŋgi jà ama Lohwɛ̀.”
Voafantina amin'izao fotoana izao:
Matiyò 10: bri
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
